Bizkaidendak elkarteak Merkataritza Jaialdia antolatu du duela egun batzuk eta Arrigorriagako Amalur liburudendak aipamen berezia jaso du euskararen alde egindako lan eta konpromisoagatik. Amalurrek 1995ean zabaldu zituen ateak lehen aldiz eta gaur egun arte euskarazko liburu eta jolas ugari dituzte adin guztietako haurrentzat.  Iker Albizua Uriondo da liburutegiaren jabea eta bertako produktu guztiak ezagutzen ditu, bezero bakoitzari gomendioak emanez.

Bestalde, Kreta Loreak saltokia finalista izan da Bizkaiko Erakusleiho Lehiaketan.

Maite Ibarra Arrigorriagako alkatea eta Gaizka Ibarretxe Ekonomia zinegotzia Bizkaidendak elkarteak antolatutako ekitaldian izan ziren: “Harro gaudezuen lanaz eta herriari ematen diozuen biziagatik”, azaldu zuten.

24. Korrikaren ibilbidea publikatu du gaur AEKk. ‘Euskara gara’ lelopean, martxoaren 19an abiatuko da Atharratzetik eta martxoaren 29an bukatuko da Bilbon.

Hego Uribe eskualdean martxoaren 27an, ostiralez, igaoroko da euskararen aldeko ekimen erraldoia.

Aurtengoa, gainera, goiztiarra izango da Korrika: 04:48ean helduko da lekukoa Ugaora Arrankudiagatik, eta Arrigorriaga, Basauri, Etxebarri, Galdakao eta Usansolo zeharkatuko ditu.

Guztira, hiru ordu emango ditu Korrikak Hego Uriben; izan ere, Bediarako bidea 08:07an egingo du lekukoak.

Zaratamotik eta Zeberiotik aurten ez da pasako Korrika, baina bertako herritarrek eta erakundeek bat egingo dute ekimenarekin beti bezala.

2.175 kilometro

Guztira 2.175 kilometro egingo ditu lekukoak Euskal Herrian zehar euskararen aldeko mezu sekretua barruan daramala, 11 egunez eta 10 gauez. Eta AEKko arduradunek zehaztu dutenez, 3.436 lekuko hartze izango ditu.

Kilometroak erreserbatzeko aukera otsailaren 1ean zabalduko du AEKk.

Hego Uribe eskualdean 70 kilometro egingo ditu lekukoak, 2.408tik 2.477ra.

Ugaon zortzi kilometro egingo ditu, 2.408tik 2.415era (04:48tik 05:02ra); Arrigorriagan 11 kilometro, 2.416tik 2.426ra (05:06tik 05:32ra); Basaurin 26 kilometro dira Korrikak egingo dituenak, 2.427tik 2.452ra (05:35tik 06:36ra); Etxebarrin bost kilometrokoa izango da ibilbidea, 2.453tik 2.457ra (06:39tik 06:56ra); Galdakaon 15 kilometro egingo ditu, 2.458tik 2.472ra (06:59tik 07:47ra); eta Usansolon beste bost kilometro egingo ditu, 2.473tik 2.477ra (07:51etik 08:07ra).

Korrika 2026 | Ibilbidea Hego Uriben

Martxoak 27, ostirala

Euskarak eta euskal hiztun komunitateak bizi dugun larrialdi linguistikoaren aurrean, indarraldi berri baterako bidea zabaldu nahi du Euskalgintzaren Kontseiluak.

Eta, horretarako ekitaldia antolatu du abenduaren 27an, larunbatez, Bilbao Arenan, Miribillan. ‘Euskaraz bizitzeko Pizkundea’ lelopean, ekitaldia 17:00etatik 19:00etara izango da.

“Etsipenean jausi beharrean, euskaraz bizi nahi dugula adierazi, elkarrekin arnasa hartu, eta euskarari etorkizuna emateko prest gaudela erakusteko ekitaldia izango da”, esan dute antolatzaileek.

Besteak beste, ‘Euskararen soinu-banda’ taularatuko dute, hamarkadatan euskararen taupadaren parte izan diren kantuak ekarriz. Amets Aranguren (Ibil bedi taldea), Anari, Beñat Goitia (Benizze), Gontzal Mendibil, Gorka Urbizu, Joseba Tapia, Julen Goldarazena (Flako Fonki-Chill Mafia), Maia Iribarne (Habia taldea) eta Miren Narbaiza (MICE) musikariek hartuko dute parte.

Era berean, azken urteetan euskarazko zineman nabarmendu diren hainbat aktorek ere parte hartuko dute, tartean, Itziar Ituño basauriarra, Edurne Azkarate, Miren Gaztañaga eta Ramon Agirre.

Oholtzara igoko dira ere Ane Labaka eta Sustrai Colina bertsolariak, baita kulturgile gehiago ere. Ekitaldiaren gidaritza artistikoa Oier Guillan antzerkigilearen esku izan da.

Ekitaldia zuzenean ikusteko oraindik ere sarrerak sagai daude 10 euroan webgune honen bitartez.

Sarreraren kostua artisten lana eta ekitaldiaren gastuen zati bat ordaintzera bideratuko dela adierazi dute Kontseilutik.

Gabonen atarian Bertso poteoa antolatu dute Etxebarrin.

Abenduaren 19an, ostiralez, izango da eta bertsotan ariko dira Nerea Ibarzabal eta Sustrai Colina.

Bertso poteoa 20:00etan hasiko da udaletxeko plazatik.

‘Nolakoak ziren gure Gabonak?’. Galdera horri eutsiz hitzaldia eskainiko du Felix Mugurutza historialariak Ugaoko Jane jauregian, datorren abenduaren 17an.

Euskal Herrian eta bereziki gure eskualdean bizi izandako ohitura tradizionalen garapenaren inguruan inguruan oinarrituko da Mugurutza Udalak, AEK-k eta Foru Aldundiak ‘Praktikatu eta Bizi’ programan antolatutako saioan.

Hitzaldian, galdu diren errito eta praktika zaharrak zein gaur egun ere bizirik dirauten tradizioak azalduko ditu Felixek, “gure kultur ondarearen ikuspegi zabal eta dokumentatuan oinarrituta”.

Hitzaldia doakoa izango da eta 10:30etik 11:30era bitarteko iraupena izango du. Interesdunek 663 040 035 telefono zenbakiaren bidez eman dezakete izena.

Esatariari buruz…

Felix Mugurutza historialaria, etnografoa eta Euskal Herriko mitoetan eta kondairetan aditua da. Ezaguna da EITBko programetan agertu delako eta Aunia bezalako kultur elkarteekin lankidetzan aritu delako. Tradizioak, folklorea eta landa-munduaren, historiaren eta haraindikoaren arteko lotura aztertzen ditu, eta, sarritan, antzinako baserrietan eta euskal antzinako ohituretan zentratzen da.