LOMCEri aurre egiteko eta “gure hezkuntza” eraikitzeko proposamenak batzen eta hedatzen hasi dira Arizko Ikastolan. Martxoaren 26an elkarretaratzea antolatu dute.
Gaur egun ahoz aho dabilen gaia da hezkuntza sistemarena. Espainiako Hezkuntzaren Kalitatea Hobetzeko Lege Organikoa –LOMCE gaztelaniazko siglez edo Wert legea goitizenaz ezagunagoa- 2013. urtean sartu zen indarrean Espainian. Ordutik, Euskal Herrian horren aurkako mugimenduak sortu dira.
Horren adibide da Hezkuntza Plataformen Topagunea. 2014ko abenduaren 6an lan saioa antolatu zuten Durangon. Ehun bat lagun elkartu ziren bertan eta Basauriko Arizko Ikastolatik lau lagun joan ziren: hiru irakasle eta ikasle baten ama. “Bertan argi ikusi genuen ikastolan ere hasi behar genuela gaiaren inguruan gogoeta egiten eta jarrera adostua lantzen”, diote Ikastolako lantaldeko kideek. Pentsatu zuten mugimendu horrek ez zuela soilik LOMCEri aurre egiteko izan behar: “LOMCEri aurre egin bai, baina zergatik, zertarako eta zer lortu nahi dugun kontuan izan behar dugu, hau da, ez da legearen kontra egitea bakarrik, baizik eta eraikitze prozesu bat zehaztea”.
Lan saio horren ondoren, lau lagunek lantaldea osatu zuten Arizko Ikastolan zuzendariarekin batera, eta honakoa adostu zuten: “LOMCEren kontra gaude, LOMCE ez aplikatzeko konpromisoa landu nahi dugu, Euskal Herriak bere hezkuntza behar duela sinestuta gaude eta horretan egin nahi dugu lan”. 2015. urtearen hasieran baieztapen horiek Eskola Kontseiluak onartu eta bere egin ditu. Lantaldeko kideen iritziz, “pauso hori oso garrantzitsua izan da. Izan ere, guk aurreikusten dugun bide hau eskola komunitate osoak onartu beharko luke eta eskola komunitate osoa ordezkatzen duen organoa Eskola Kontseilua da”.
Eskola Kontseiluan aurkeztu baino lehen, Irakasleen Klaustroan eta Guraso Elkartean aurkeztu zuten: “Ekimenaren lanbidea txikitik handira joan da: lehenengo lantaldeak osatu zuen plangintza, ondoren irakasleei eta Guraso Elkarteari azaldu zitzaion, onartu egin zuten eta orduan Eskola Kontseilura eraman genuen”.
KALEAN HEDATUZ
Behin Eskola Kontseiluak onartuta, ekimena lau haizeetara zabaltzen hasi dira. Alde batetik, agerraldia egin zuten Agate Deuna egunean: Basauriko zahar-etxeetara egin zuten bisita eta bidean, elurra lagun, LOMCEren kontrako bertso batzuk abestu zituzten. Bestetik, LOMCE aplikatzeak ekarriko lituzkeen ondorioen berri eman diete ikasleei eta gurasoei , esaterako, ikasgaiak garrantziaren arabera mailakatuko liratezkeela eta euskara hirugarren mailan egongo litzatekeela, azken mailan, alegia.
Sinadurak bilduko dituzte ikasleen familietan eta Irakasle Klaustroan. “Helburua LOMCErik gabeko Arizko Ikastola lortzea da”, diote. “Guk egiten ditugun ekimenak kopia litezke, hau da, ez da ezer esklusiboa. Mugimendu hau beste leku askotan piztu da iaztik hasita: Gasteizen, Barakaldon edo Sestaon, besteak beste”. Hego Uribe eskualdeko eskolak ekimenera batzea da Arizko Ikastolaren helburua. “Gu Arizko Ikastolako lantaldea besterik ez gara eta herri mailako plataforma bat lortzea da gure helburua. Horretarako, beharrezkoa da zonalde edo herri bateko antolaketa egitea”, zehaztu dute.
________
EGUNERO PAUSOAK EMATEN
2015. urtean, besteak beste, bi ekimen berri sortu dituzte Arizko Ikastolan “Guk geure hezkuntza” programaren barruan: familien jolas tailerra eta gurasoen antzerkigintza taldea.
Jolas tailerra Sortzen elkarteari esker jarri dute martxan. Bi talde osatu dituzte eta guztira sei saio egingo ditu talde bakoitzak, ordu eta erdikoak. Hamaika helduk eta hamalau umek eman dute izena: Haur Hezkuntzako ikasleak dira denak eta euskara da tailerreko ardatz nagusia. Kantak, esamoldeak, esku-jolasak, harrapaketa-jolasak, zotz egiteko formulak eta jolas zerrenda zabala lantzen dituzte. Tailerra Guraso Elkarteak ordaintzen du.
Bestalde, gurasoen antzerkigintza taldean zortzi lagunek parte hartzen dute. Euskarabila Basauriko elkartearen bidez egiten dute, eta astero ordu eta erdiz elkartzen dira ikasturte osoan zehar. Kasu honetan guraso bakoitzak bere diru ekarpena egiten du. Ikastolaren helburua, alde batetik, guraso euskaldunen artean euskararen erabilera sustatzea da eta, beste aldetik, prestatu duten antzezlana ikasturtearen amaieran ikasleen aurrean aurkeztea.
