Galdakaok Gerra Zibileko biktimak eta 30. hamarkadan izandako udal korporazioak omendu ditu gaur, maiatzak 19, ostirala. Hain zuzen, 80 urte dira frankistek Galdakao bonbardatu zutela. 1937ko maiatzaren 19an 24 bizilagun hil zituzten bonbardaketa horretan.
Aurten, 1931n eta 1936an Galdakaoko Udalean zinegotzi izan zirenei omenaldia egin diete. Ekitaldian zinegotzi horien senide zuzen batzuk izan dira. Besteak beste, Alberto Santamaria (Simon Linaza alkatea izandakoaren iloba), Maite Abasolo (Julian Abasoloren alaba), Begoña Larrea (Andres de Larrearen iloba), Jose Luis Egideun eta Soledad Garabieta (Bernabe Totorikaren iloba eta amaginarreba), Eguzkiñe Lekue (Lorenzo de Lekueren iloba) eta Karmentxu Barrenetxea (Regino Barrenetxearen alaba).
