-2016an, Basaurikoaz gain, Galdakao, Arrigorriaga, Ugao-Miraballes eta Zaratamoko Udalek ere Geurian parte hartzeko eta diruz laguntzeko konpromisoa hartu dute
-Urtarrilaren 14an kaleratu den paperezko alea 12 orrialdetik 16ra pasa da, herri bakoitzak bere atal berezia du eta hurrengo aleetara begira tokian tokiko banaketa sendotuko da
-2016an ere doako harpidetza eta hileroko herri-bilera irekiak mantenduko dira, elkarte eta norbanakoen partaidetza eta erabakitzeko gaitasuna sustatzeko
Geuria, Hego Uribeko herri komunikabideak, bere ibilbidearen lehen fasea osatu du. 2016an Basaurikoaz gain, Galdakao, Arrigorriaga, Ugao-Miraballes eta Zaratamoko Udalek ere Geuria bultzatuko dute.
Geuriaren bidai orriaren lehen fasea 2014ko irailean hasi zen. Aurreko hilabeteetan Hego Uribe eskualdeko Udaletako euskara teknikariekin bilera orokorrak egin ostean, eskualdeko euskara hutsezko lehen komunikazio proiektua bultzatzea begi onez ikusi zen aipatutako udalerrien aldetik.
2014ko urrian paperezko lehen alea kaleratu eta webgunea martxan jarri zen Basauriko Udalak diruz lagunduta eta Basauriko Euskararen Aholku Batzordearen oniritzi eta babesaz. Ordutik hona Basauriko eta Hego Uribe eskualdeko gai orokorrez gain, Galdakao, Arrigorriaga, Etxebarri, Ugao-Miraballes eta Zaratamoko berriak ere landu ditu Geuriak. Baina lehen fasea osatutzat emateko udalerri hauen babesa eta partaidetza ere beharrezkoa zen eskualdeko nortasunari egonkortasuna eta iraunkortasuna emateko. 2016ra begira helburua lortu da herri bakoitzeko agintari eta euskara zerbitzuekin hainbat elkarrizketa izan ostean.
Etxebarriren kasuan, euskara zinegotzi eta teknikariekin bildu ostean, borondate onenaz, Udal Komunikazio plana zehaztea komeni dela adostu dute Udalak eta Geuriak, Hego Uribeko komunikabideak plan horretan izango duen funtzioaren dimentsioa zehaztu aurretik.
Herriz-herri atal espezifikoak, berritasun
Lehen fase honen garapenaren ondorio gertuenak urtarrilaren 14an kaleratu den Geuriaren ale berrian daude ikusgai. Hilabetekaria 12 orrialde izatetik 16 izatera pasa da, inprentan erabilitako paperaren jasangarritasuna hobetu da –talde ekologistekin lankidetzan–, udalerri bakoitzak bere atal espezifikoa du eta epe ertainera begira herri bakoitzean egingo den banaketa sendotu eta hobetuko da, kalitatea kantitatearen aurrean hobetsita. Kolaboratzaileen zerrenda ere aberastu egin da, herri bakoitzeko elkarte eta norbanakoen parte hartzea sustatzeko bidean.
Orain arte komunikabidearen indar gune izan diren ezaugarriak, ostera, bere horretan mantenduko dira. Alde batetik, hileroko herri-bilera irekiak mantenduko dira, edozein elkarte edo herritar gaiak kritikatu eta proposatu ditzan. Bileren hitzorduak webgunean ikusgai izango dira.
Bestalde, orain arte bezala, Geuriaren harpidedun izatea doakoa da. Hilabetekaria etxean jaso nahi duen orok nahikoa du bere datuak komunikabidera helaraztearekin.
Bigarren fasea, 2017rarteko bidea
2016an Geuriak bere bigarren faseari hasiera emango dio hasierako ezaugarriei eutsita: Hego Uribeko eskualdean sortu den lehen euskara hutsezko komunikabidea, irekia, parte hartzailea, egonkorra eta iraunkorra, eskualdeko euskaltzaleen komunitatearen harremana estutzen duena eta euskaltzale berriak bertara biltzen dituena. Kanporako komunikazio tresna moduan funtzionatzen duena (komunikabide bezala), baina baita barnerako komunikazioan erabilgarria dena ere (eskualdeko udalerrietako elkarte eta norbanakoen bateratzaile moduan).
Filosofia honi jarraituz, azken hilabeteetan, Tokikom (Toki komunikabideen bateragunea) bitarteko eta Galdakaoko Udalaren onespenaz, jaio berria den Galdakao eta Usansoloko Binke! hilabetekariaren zuzendaritzarekin bilerak egin ditu Geuriak, egitasmo bien arteko lotura eta elkarlana sustatzeko, baina momentuz ez dugu akordiorik lortu eta Binkek bere bidea egitea erabaki du. Geuriaren lan taldearen aldetik zorterik onena opa diogu Binkeri, eta etorkizun laburrera begira, alde batera utzitako elkarrizketa prozesuarekin jarraitzeko erabateko prestutasuna azaldu, Hego Uribeko euskaldunek euskarazko komunikabide sendo eta iraunkor bat luzera begira bermatuta izan dezaten.
Ibilbidearen bigarren fasea 2016-2017 urteetan garatzeko asmoa du Geuriak. Fase honen oinarri eta helburuak honakoak liratezke: eskualdeko euskal komunitatearen harremanak estutzea; Hego Uribeko euskaldunon datu basea osatzen jarraitzea; banaketa gero eta gertuagoa eta aberatsagoa izatea; Bizkaiko Foru Aldundia eta Eusko Jaurlaritzaren babesa jasotzeko tramiteei ekitea eta 2016aren lehen erdialdean Tokikom -ekin lankidetzan hastea.
GEURIA, Hego Uribeko herri komunikabidea / DATUAK
www.geuria.eus
Jaiotze data: 2014ko urria
Paperezko hilabetekariaren banaketa: 10.000 ale
Udalerriak: Basauri, Galdakao, Arrigorriaga, Ugao eta Zaratamo
