Sareak

☉ Arrigorriaga

[Programa] Kirola, musika eta gastronomia, Arrigorriagako jaietan

Uztailaren 21ean hasiko dira Arrigorriagako jaiak eta hilaren 25era arte luzatuko dira. Besteak beste, kirola, musika eta gastronomia nagusi izango dira.

|

Arrigorriaga Jaiak 2016 Irina Txupina Gazteak

Uztailaren 21ean, ostiralez, hasiko dira Arrigorriagako jaiak eta hilaren 25era arte luzatuko dira. Besteak beste, kirola, musika –kontzertuak– eta gastronomia nagusi izango dira, baita umeentzako jarduerak eta herri bazkariak ere.

ARRIGORRIAGAKO JAIAK 2017 MADALENAK – PROGRAMA

Uztailak 21, ostirala

19:30 Denok udaletxeko plazara

20:00 Txupinazoa Upo Mendi Lagun Elkartearen eskutik

20:00 LII. Saskibaloi txapelketa triangularra kiroldegiako kantxan

20:15 Buruhandiak udaletxeko plazan

20:30 Harrera udaletxean. Jai Batzordeak erakunde, herriko talde eta koadrilen ordezkariei harrera

20:30 Txosnen irekiera

20:30 Puntu Lila informatiboa Txosnagunean. Eraso sexistarik gabeko jaien alde

22:00 Bizkaiko Foru Aldundiaren Esku Pilota Txapelketa

23:00 Dantzaldia udaletxeko plazan: Nuevo Talisman

23:00 Kontzertuak Txosnagunean: Kompromiso Antisocial + Txapelpunk + Nevadah

Uztailak 22, larunbata

10:00 Diana eta kalejira: Izalde trikitilariak

10:00-12:00 Mistela eta madalena banaketa herrian zehar

11:00 Eskalada kiroldegian

11:00 Esku pilota partidak anbulategi ondoko forntoian: Arrigorriaga eta Zaratamo (hasiberriak eta aurre-umetxoak)

11:00 Meza nagusia

12:30 Kontzertua udaletxeko arkupeetan: Barakaldoko Udal Musika Banda

13:00 Kantuan ekimena Odol emaileen plazatik: Lapurdiko Txanbezpel taldea

13:30 Txakolin eta olibak udaletxe zaharreko arkupeetan

14:00 Oliba-hezur jaurtiketa udaletxeko plazan

14:30 Bazkari herrikoia txosnetan

16:30 Tute txapelketa Jubilatuen etxean

17:00 IX. ‘Gildos’ Futbol 7 txapelketako finalak eta sari banaketa kiroldegiko belar artifizialeko zelaian

18:00-19:30 Emakumeen Padel txapelketaren finala kiroldegian

19:00 Idi probak Osasun Zentroaren ondoan

19:00 Kantuan ekimena udaletxeko plazatik: Lapurdiko Txanbezpel taldea

19:00 Buruhandiak Odol emaileen plazan

19:30-21:00 Gizonezkoen Padel txapelketako finalak kiroldegian

20:00 Euskal dantzak udaletxeko plazan

20:30 Puntu Lila informatiboa txosnagunean. Eraso sexistarik gabeko jaien alde

20:30-22:30 Txikifesta Show Barua parkean

23:00 Rock kontzertuak udaletxeko plazan: Boogie Riders + Porco Bravo + Def Con Dos

23:30-02:00 DJ Festa Sound Barua parkean

Uztailak 23, igandea

10:00 Diana eta kalejira: Izalde trikitilariak

11:00 Urpekaritza batailoa kiroldegiko kanpoko igerilekuan

11:00 X. Irristaketa herri ibilbidea udaletxeko plazatik

11:00-14:00 Xake partida azkarren taldekako txapelketa eta Haur xake txapelketa udaletxeko arkupeetan

12:00-14:00 Umeentzako puzgarriak eta jolasak Barua parkean (2-6 urte)

12:30 Isana Eskolako ikasleen dantza erakustaldia Barua parkean

13:00 Buruhandiak

13:00 “Corrientes Navarras” jota taldea udaletxeko plazan

15:00 Paella jana berdintasunean kiroldegiko kantxa urdinean

17:00 Madalenak 2017 Futbol 7ko XXVIII. Txapelketako finalak eta sari banaketa kiroldegiko belar artifizialeko zelaian

17:00-20:00 Umeentzako puzgarriak eta jolasak (2-6 urte)

17:30-20:30 Fast Food tailerrak umeentzako udaletxeko arkupeetan

18:30-20:30 Madalenak += karpa informatiboa. Jaiak berdintasunean eta eraso sexistarik gabe

19:00 Txistorra jana udaletxeko plazan

19:30 VIII. Playback lehiaketa udaletxeko plazan

22:30 Bakarrizketa: Gorka Aguinagalde, El Txou de Patxi

23:30 Euskal dantzaldia udaletxeko plazan: Drindots

02:00 Karaokea txosnetan

Uztailak 24, astelehena

10:00 Diana eta kalejira: Izalde

11:00 Taekwondo jardunaldi irekiak kiroldegian

11:00-14:00 Umeentzako parkea Barua parkean

12:00 IV. Pizza jaurtiketa Odol emaileen plazan

13:00 Umeentzako apar festa Barua parkean

13:00 Kantatuaz Arrigorriaga Aldapa tabernan hasita

14:00 Bazkari-omenaldia gure nagusiei kiroldegiko kantxa urdinean

15:00 Bertso-bazkaria Argala plazan: Onintza Enbeita eta Xabat Galletebeitia

16:00 Mus txapelketa Adapa tabernan

17:30-20:30 Umeentzako parkea Baruan

18:00 Fritanga Elektro-txaranga

18:30-20:30 Umeentzako tailerrak Barua parkean

19:00-22:00 Sama Siku Fanfarrea

19:00 Buruhandiak Odol emaileen plazan

19:30 Kale antzerkia udaletxeko plazan: Pez Linbo taldea

20:30 Izozki banaketa Kultur Etxeko sarreran

20:30 Dantza-plaza erromeria Joan XXIII plazan: Aiko taldea

21:30 DJ Gomi (Arrigorriaga) Barua parkean

23:00 Dantzaldia udaletxeko plazan: Vulcano

23:00 Kontzertuak txosnetan: Alkarrik + Her Golden Whip + Mr Pongo Band

Uztailak 25, asteartea

10:00 Diana eta kalejira: Aritz Berriko txistulariak

10:00-14:00 XXXIV. Gastronomia lehiaketak: Bakailaoa, Marmitakoa, Paella eta Tortilla

11:00 Esku pilota partidak kiroldegian: Arratia aldeko pilotariak (umetxoak, umeak eta gaztetxoak)

11:00-14:00 Umeentzako parkea Baruan

11:30 XI. Txirrindulari Bira: udaletxeko plaza-Garaigorta-Urgoiti pasealekua (eleiza)-Severo Ochoa-Lonbo-biribilgunea-Urgoiti-Madalen errota-Garaigorta-udaletxeko plaza

12:00-15:00 Ku-klux fanfarrea

12:30 Bizikleta, triziklo, monoziklo eta abarren erakusketa udaletxeko plazan

13:00 Umeentzako kale antzerkia udaletxeko plazan: Trotamundos taldea

16:00 VIII. Tiragoma txapelketa Ugertza parkean (Gaztegunearen ondoan)

16:00-19:00 DJ Gerri Ugertza parkean

17:00-20:00 Umeentzako parkea Baruan

17:30-20:00 Slackline, ponpak eta serigrafia tailerrak txosnagunean (+6 urte)

19:00-22:00 Ku-klux fanfarrea

19:00 Buruhandiak

19:00 Aritz Berri txistulariekin kalejira: kiroldegia-Urgoiti pasealekua-udaletxeko plaza-Severo Ochoa-kiroldegia

19:30 XXIX. Folklore Bizian jaialdia kiroldegiko kantxa urdinean

21:00 Kantatuaz Arrigorriaga

22:00 Jai amaiera udaletxeko plazan: Osterabe + Huntza

☉ Arrigorriaga

Ume arrigorriagarrek puzgarriak, tailerrak eta ikuskizunak izango dituzte Madalenetan

Jai Batzordeak 17 jarduera baino gehiago prestatu ditu uztailaren 19tik 25era, egunez egun: antzerki saioak, tailerrak, buruhandiak, puzgarriak… herria umeentzako ekintzez beteko dute.

|

Haur bat, Arrigorriagako iazko txupinazoan // Geuria

Arrigorriagako Udala aurtengo jaietan izango diren jarduerak iragartzen ari da egun hauetan. Oraingo honetan umeentzat prestatutako ekintzen berri eman dute Udaletik.

Izan ere, Jai Batzordeak 17 jarduera baino gehiago prestatu ditu uztailaren 19tik 25era: antzerki saioak, tailerrak, buruhandiak, puzgarriak… herria umeentzako ekintzez beteko dute. Aurten ere Umeentzako parkea ipiniko dute Lehendakari parkean, hilaren 23an eta 24an, ordutegi ezberdinetan.

Egitaraua | Haurrentzako jarduerak 2024ko Madalenetan

Uztailak 19, ostirala
– 18:00 Jaioberriei aitortza-ekitaldia, Edurne garitazelaia kultur etxea
– 20:15 Buruhandiak, udaletxeko plaza

Uztailak 20, larunbata
– 12:00 Erraldoien kalejira, udaletxeko plazatik
– 19:30 Buruhandiak, Lehendakari Agirre parkea

Uztailak 21, igandea
– 11:00 Patinaje ibilbidea, herrian
– 11:00 Ekortzeko makina puzgarria, Joan XIII plaza
– 19:30 Buruhandiak, Lehendakari Agirre parkea

Uztailak 22, astelehena
– 19:00 Buruhandiak, Lehendakari Agirre parkea

Uztailak 23, asteartea
– 11:30 Umeentzako parkea, Lehendakari parkea (euria bada, eskolako patioa)
– 13:30 Buruhandiak, Lehendakari Agirre parkea
– 17:30 Umeentzako parkea, Lehendakari parkea (euria bada, eskolako patioa)
– 18:00 Izozki banaketa, Pergola

Uztailak 24, asteazkena
– 15:00 Umeentzako antzerkia: Izarren Hartza, Lehendakari Agirre parkea (euria bada, eskolako patioa)
– 18:30 Buruhandiak, Lehendakari Agirre parkea

Uztailak 25, osteguna
– 11:00 Entsalada tailerra, Ugertza parkea
– 17:45 XIII Tiragoma Txapelketa
– 18:30 Bitsa festa, Joan XIII plaza

Osorik irakurri

☉ Arrigorriaga

Arrigorriagako Arritxikerrakekoak ikasturteari euskaraz agur esateko elkartuko dira

17:30ean antolatutako Euskara Plazara izeneko gaurko jardueraren helburua familiak elkartu eta euskaraz berba egitea izango da

|

Familia bat, Arrigorriagako plazan // Geuria

Gaur bertan, ekainaren 20an, hitzordua ipini dute Arrigorriagako Arritxikerrak taldekoek ikasturteari agur esateko. 17:30ean antolatutako Euskara Plazara izeneko gaurko jardueraren helburua familiak elkartu eta euskaraz berba egitea izango da.

“Ez da jarduera gidaturik egongo; udaletxeko plaza euskararen arnasgune bihurtuko dugu”, azaldu dute Arritxikerraketik. Jarduera 0 eta 6 urte bitarteko haurrak dituzten familiei zuzenduta dago.

Osorik irakurri

☉ Arrigorriaga

Izaro Elordui: «Zaldiarekin egotea terapiara joatea bezain esperientzia sendagarria da»

Zoriak Boni izeneko zaldi bat ekarri zion Izaro Elorduiri eta bere istorioa ezagutu nahi izan dugu. Elorduik, kirolaz harago, ongizate mentalera eraman du animaliarekin duen lotura

|

Izaro Elordui, Bonirekin, Arrigorriagako larretan // Geuria

Kirola eta zaldiak Izaro Elordui Nájeraren (Arrigorriaga, 2003) pasioak dira. Arrigorriagarrak munduko kirol gehienak ezagutu ditu eta Jarduera Fisikoaren eta Kirolaren Zientzietako ikasketak burutzen ari da Deustun. Bere adineko umeak bizikletan ibiltzen ikasten ari ziren bitartean, Izaro lehen hastapenak egiten ari zen zaldi baten gainean. Izarorekin Bonifacio (Boni, lagunentzat) eta Lur izan ditugu elkarrizketan.

Boni bederatzi urteko arabiar arrazako zaldia da. Honek esan nahi du ez dela zaldi erraldoi bat, baina arraza honetako zaldiak erresistentzia handikoak dira eta muturrean, ezaugarri bereizgarri modura, kurbadura bat daukate. Buztana ere gorantza daramate. Izaro aulkirik gabe dabil Boniren gainean, Elorduiren arabera “animaliarentzat askoz erosoagoa delako”. Lurrek animalia erraldoiaren pausoak jarraituz laguntzen ditu bere bi lagunak, Arrigorriagako maldetan gora eta behera.

Nolako garrantzia dauka kirolak zure bizitzan, Izaro? Oso txikitatik kirola praktikatu izan dut eta esan daiteke kirol guztietan aritu naizela, gutxi gorabehera. Bost urterekin zaldian ibiltzen hasi nintzen eta aurretik ponian ibiltzen nintzen, gurasoen laguntzaz. Hastapenak Laredoko klub hipiko batean egin nituen, baina beste kirol askorekin bateratu dudan pasioa izan da betidanik. Urte asko saskibaloian eman ditut. Taekwondoa ere praktikatu izan dut. Izan ere, oso txikia nintzela Euskadiko txapelketa irabazi nuen.

Saskibaloian, jokatzeaz gainera bestelako lanak egin dituzu. Bai, aurten entrenatzaile lanetan hasi naiz, jokatzeari utzi niolako. Pena izugarria ematen zidan kirola bertan behera uzteak. Beraz, Arrigorriagako Padura saskibaloi taldean zazpi-zortzi urte bitarteko umeak entrenatzen eman dut urtea.

Gaur egun ikasten ari zara. Zer zehazki? Buruhauste handia izan zen niretzat ikasketen aukera egiteko momentua, albaitaritza eta Jarduera Fisikoaren eta Kirolaren Zientzietako Gradua (CAFYD, erdaraz, lehen IBEF bezala ezaguna) zirelako bi hautagaiak. Bistan da aukera oso ezberdinak direla, baina azkenean Jarduera Fisikoaren eta Kirolaren Zientzietako Graduaren aldeko apustua egin nuen eta Deustun ari naiz ikasten. Hala ere, honek ez du esan nahi aurrerago ez dudanik albaitaritza ikasiko! (barreak). CAFYDak kirola egiteko aukera ematen dit alde batetik, eta baita animaliekin denbora emateko ere, eta mundu bi horiekin harreman oso estua izan dudanez poz-pozik nabil ikasketetan.

Zenbat denbora eskaintzen diozu kirolari astean zehar? Saskibaloiko entrenamendu saioak egiten ditut txikiekin Arrigorriagan bertan. Crossfita ere praktikatzen dut astean hiru egunez. Unibertsitateari dagokionez, egunero praktikatzen dut kirolen bat: aurten judoa, atletismoa, gimnastika, herri kirolak eta mendiko irakasgai bat izan dugu. Asteburuetan zaldiarekin egoten saiatzen naiz, larunbat eta igandean, ahal bada. Aste osoa kirola egiten ematen dut eta egia da gauzaren bat bidean geratu izan zaidala, sakrifizioren bat egin behar izan dudalako. Hala ere, eta ahal dudan heinean lagunekin irteten eta gozatzen saiatzen naiz.

Kirolak joan eta etorri dira, baina zaldienganako pasioa konstantea izan da zure bizitzaren hasieratik. Hala da. Betidanik praktikatu dudan kirola izan da eta ez dut inoiz bertan behera utzi. Laredon zaldian ibiltzen ikasi ostean, duela bospasei urte Arrigorriagako inguruetako larreetan hasi nintzen zaldiarekin paseatzen. Boni ezagutzea bizitzan gertatu zaidan gauzarik onena izan da eta txakurra, Lur, laguntzaile dudala ibilbide ugari egin ditut inguru hauetan.

Laredon ikasi duzu zaldian ibiltzen. Inguru hauetan zaldientzako zentro ugari daude. Zergatik Laredo? Nire familiak etxe bat dauka Laredon eta txikia nintzenean bertan igarotzen genituen udak. Zaldi bat ikusten nuen bakoitzean zoratu egiten nintzen. Egun batean aitak ponian ibiltzera eraman ninduen eta konturatu barik nire bizitza aldatu egin zuen. Eta bonoen bidez hasi nintzen zaldien mundua ezagutzen, bertako hipika zentro batean. Laredora joateko ohitura ez dut galdu eta dagoeneko udan zentroko arduradun bezala egiten dut lan, poniekin zortzi eta hamar lagunek osatutako taldeentzako ibilalditxoak egiten, hondartzan. Bertan ikasi dut Boniri irakasten diodan esperientzia guztia.

Baina Arrigorriagan bizi da Boni, eta Laredoko hondartzaren faltan nora joan daiteke Hego Uriben bizi den zaldizko bat? Azken batean, zaldi bat izatea ez da bizikleta, moto edo auto bat izatea bezalakoa. Mugarik ba al dago? Egia esateko, ibilaldi ohikoenak Pagasarrira edo Arrigorriaga inguruan egiten ditut gehienetan. Pagasarrira noanean aulkia ipintzen diot zaldiari, salbuespen modura. Bestela, aulki barik mugitu ohi naiz hara eta hona, Bonik horrela nahiago duelako.

Zer diote zure gertukoek zaldi bat izateari buruz? Jendeari orokorrean errespetu handia ematen dion gaia da zaldia edukitzearena. Laredon egonda jendea lehen aldiz txangoa egitera ateratzen dudanean lehen inpresioak harridurazkoak izan ohi dira. Gurasoek beraiek eta neba txikiak errespetu handia diote zaldiari. Honek ni ere harritu egiten nau, azken batean, niretzat bizikletan edo zaldian ibiltzea antzekoa baita, kontzientzia dudanetik hazi naiz beraiekin. Zaldien mundua oso barneratuta daukat. Lagunak bisitan datozenean eta zaldira igotzeko esaten diedanean erantzuna antzekoa izan ohi da beti: “Baina nola? Erraldoia da eta!”. Laburtzearren, animaliari begiratzeko modu diferenteak ditugu.

Aizu, zaldizkoaren eta zaldiaren arteko lotura berebizikoa da. Nola ezagutu zenuen Boni eta nolakoa da zuen arteko harremana? Oso txikitatik maitatu izan ditut animaliak. Zortzi urterekin lehen txakurra izan nuen, Zuri. Txakurrarekin batera zaldiekiko maitasun hori izan dut aldi berean. Nire aititeak baserri bat zeukan Ur Partzuergoaren inguruetan eta nire familia bertakoa izan da betidanik. Tamalez ez nuen aititearen baserria ezagutu, baina betidanik gustatu zait zonalde hau eta natura zein baserriaren mundu honek asko erakarri nau. Aitak beti esan du, gainera, nik arbasoen lekura bueltatzeko bidea topatu izan dudala beti.

Izaro Elordui: “Aitak beti esan du arbasoen lekura bueltatzeko bidea topatu izan dudala beti”

Egun batean, duela bospasei urte, nire aita bertako auzotarrekin berba egiten ari zela, bertan zaldi bat zegoela ikusi zuen. Zaldi hark jan eta lo egiten zuen. Ez zuen bestelakorik egiten. Hura ezagutzeko beharra sortu zitzaidan eta harreman oso estua sortu zen bion artean. Egunez egun bertan ibilalditxoak egiten hasi ginen. Bonirekin sortu dudan lotura ikaragarria da eta kirola egin edo ongizate fisikoa lantzetik harago doa: Boni ezagutzeak ongizate mentala ekarri dit. Hona natorren bakoitzean guztiz deskonektatzea lortzen dut. Bizitzan etapa txarrak bizi izan ditudan bakoitzean, zaldiarekin egotea terapiara joatea bezain esperientzia sendagarria izan da.

Gizakion ongizateaz berba egiten denean gorputzaren ongizate fisikoaz aritzen gara, ongizate mentala alde batera utziz. Nire ustez, biak bateragarriak dira: nor zaren eta libre zerk sentiarazten zaituen esaten dizun erreminta eskura izatea oso garrantzitsua da eta ongizate mentala landu behar dela ikusaraztea ere berebizikoa da. Kasualitate handia izan zen Boni ezagutzea, egia esateko, eta horrek energiaz betetzen nau bisitan natorren bakoitzean.

Eta nola lor dezake hori berba egiten ez dakien animalia batek? Zaldiak eta txakurrak, katuak ez bezala, taldean bizi diren animaliak dira eta beste izaki bizidunekin bizitzeko erraztasuna dute. Izaki oso eskuzabalak dira: ez dute ezer eskatzen eta dena ematen dute. Bonirengana natorrenean ura eta janaria ipintzen diot eta trukean zoriontasun itzela ematen dit niri. Konexioa totala da, beraz.

Eta zer dio Lurrek honen inguruan? Esan beharra dago Lur konexio horren parte ere badela. Txakurra ibilaldien parte ere bada eta askotan zaldia eramaten du uhaletik helduta. Ematen du animalia bien artean ere konexio hori egon badagoela.

Bonirekin duzun lotura hori sortuta, eta perspektiba galdu barik, zaldi bat dela gogorarazi behar da; ez txakur bat, ez katu bat. Zeintzuk dira kontuan izan beharrekoak zaldi baten ongizatea bermatzeko? Albaitariaz gainera, zaldia ferratuta egon behar da mendira joan ahal izateko. Momentu honetan Boniren kaskoak atseden hartzen ari dira eta “ortozik” dago, azken hilabeteetan unibertsitateko azterketak direla-eta landan egon delako. Udan, mendira igotzeko sasoia bueltatzen denean, zaldia berriro ferratu beharko dut. Horretarako ferratzaileak etorri beharko du, horrek dakarren gastuarekin.

Horrez gainera, jaten eman behar zaio animaliari. Arrigorriagan landa-eremu dezente daude eta hementxe bertan belar asko dago, baina Bonik pentsua eta lastoa ere jaten ditu. Lan horiez gainera, zaldia gau eta egun ikuskatu behar da, ezer falta bazaio eman ahal izateko.
Zaldiaren bizilekuak ere garrantzi handia dauka. Boni lar handi batean bizi da bere amarekin. Iaz moxal bat izan genuen eta aurten beste bat jaioko da. Dena ondo irtetea espero dut. Oso pozik nago, egia esateko.

Komentatu dituzun beharrak asetzeko inbertsio inportantea egin beharko da, ziur. Zorte ikaragarria daukat, egia esan behar bada. Boniren jabea Arrigorriagako auzotar jator bat da eta zaldiaren gastuak erdibanatzen ditugu: berak pentsua erosten du eta ni ferrak ipintzeaz arduratzen naiz, esaterako. Familiak gainera, lursailak ditu inguru honetan eta horrek asko laguntzen du, Boniri ez baitzaio belarrik faltako, zorionez.

Osagarri gehienak badituzu, beraz: Zaldia, zaintza lanak eta lursailak. Lehen esan duzu ibilbide gehienak Pagasarrira eta Arrigorriaga inguruan egiten dituzula, baina zelakoa da Hego Uribe eskualdea zaldiz ibiltzeko? Pagasarriz gainera, Hego Uribe eskualdetik oso gertu Ganekogorta dago, eta eskualdean bertan Upo eta Markio bezalako lekuak daude hemendik bertatik abiatuta. Upora edo Artandara joateko zailtasun gehiago daude, horretarako errepide nagusia gurutzatu behar delako. Egia esateko, ezin naiz kexatu Arrigorriagako inguruei dagokienez: zabalak dira eta bertatik oinezkoak eta zaldizkoak ere igarotzen dira.

“Zaldi bi daudenean egoera kontrolatzea askoz errazagoa da, baina bakarka joanik batek daki zer gerta litekeen: animalia ikaratuko balitz ez dakit zer gertatuko litzatekeen”

Bestalde, ez naiz Arrigorriagako herrigunera zaldiz jaitsi. Behin Ur Partzuergoko bideraino joan nintzen Bonirekin, baina ez harago; zaldi bi daudenean egoera kontrolatzea askoz errazagoa da, baina bakarka joanik batek daki zer gerta litekeen: animalia ikaratuko balitz ez dakit zer gertatuko litzatekeen. Hala ere, Boni oso mantsoa da eta gainontzeko animaliekin, txakurrekin bereziki, oso harreman ona dauka. Herrigunera jaitsi ez banaiz arazoak ekiditeko izan da, badaezpada ere. Oro har, menditik ibiltzeko permisibitate handiagoa omen dago zaldiekin. Herriguneetan, egia esateko, ez dakit baimen berezirik eskatu behar den. Momentuz ez daukat Bonirekin Arrigorriagako zentrora joateko asmorik.

Denak positiboa dirudi zaldien munduan. Ba al dago hain positiboa ez den zerbait? Aitortu beharra dago: nik uste dut mundu hau zailagoa gerta dakiekeela emakumeei. Baserriaren eta abeltzaintzaren esparruan emakume gutxiago daude, zoritxarrez. Nik neuk ez dut bertako auzotar emakumerik ezagutzen. Egia da askotan bakardade handia suma dezaketela sektore honetan. Ni normalean lagunduta etorri ohi naiz hona. Hala ere, emakume guztiak animatzen ditut zaldiarekin mendira paseoan joatea, esperientzia izugarria delako eta, bereziki, animaliaren eta pertsonaren arteko lotura sortzen den momentua zoragarria delako. Benetan merezi du.

“Mundu hau zailagoa gerta dakieke emakumeei. Baserriaren eta abeltzaintzaren esparruan emakume gutxiago daude, zoritxarrez”

Egia da, baita ere, pertsona batek zaldi bat izateko baldintza jakin batzuk bete behar dituela. Nire kasuan, lehen esan bezala, kasualitate handia izan da: espazio handia behar da, inbertsio handia egin behar da, laguntza izateak ere garrantzi handia dauka… aitortzen dut zaldiarekin lagundu didatenen erraztasun horiek barik ezinezkoa izango litzatekeela Boni mantentzea.

Bestalde, ez dago zertan zaldi bat jabetzan izan beharrik zaletasun hau praktikatzeko. Hipika zentroak existitzen dira horretarako. Hala ere, esan behar da zaletasun benetan garestia dela; baina niretzat inbertsio ona da. Edonola ere, mundu honetan dena ez da arrosa kolorekoa eta hipikak ere zailtasunak baditu: zaletasun hau lehen aldiz praktikatzen denean oso zaila iruditu dakioke zaldizkoari eta frustrazio egoerak bizitzea tokatuko zaio noizbait. Azken batean, zaldiek ere egun txarrak dituzte.

Hipika zentroak aipatu dituzu, eta zaldien mundu honetan, orain arte komentatu duzun zaletasunaz, loturaz edota ongizate mentalaz gainera lehiaketaren mundua ere existitzen da. Zer deritzozu hipikaren beste alde honi? Mundu bi horiek gustuko ditut baina esparru benetan ezberdinak dira. Batak eta besteak ez dute zerikusirik. Aipatzen duzun kirolaren mundu hori lehiaketara eta tituluak eskuratzera zuzenduta dago. Nik neuk tituluren bat eskuratu dut hipikaren mundu honetan, eta badira zaldiarekin lotura duten zaldizko ugari Raid diziplinan lehiatzen direnak (zaldi-diziplina honetan, zaldiaren eta zaldizkoaren abiadura, trebetasuna eta erresistentzia fisikoa eta psikologikoa probatzen dira.

“Momentuz gustura nago nire zaldiarekin lehiaketetan parte hartu barik, eta uste dut hauxe bera egin nahi duela Bonik”

Biek distantzia handiak egin behar dituzte egun batean, eremu desberdinetan zehar eta denboraren aurka). Batek daki, agian baliteke egunen batean lehiaketaren mundura salto egitea, baina momentuz gustura nago nire zaldiarekin lehiaketetan parte hartu barik, eta uste dut hauxe bera egin nahi duela Bonik; ez dut lehiaketetara behartuko eta bere ongizatean zentratuko naiz. Alderdi horixe sarritan ez dute kontuan hartzen hipika zentro askotan, salbuespenak salbuespen.

Amaitzeko, Izaro: non ikusten duzu zeure buru hemendik urte batzuetara? Hasteko, espero dut hemendik urte batzuetara nire ikasketak bukatuta egotea (barreak). Ikasturte hau nire bigarrena da Deustun. Hortik aurrera ez dakit zein norabide hartuko dudan: irakaskuntzarena edo kirolean gehiago sakontzearena. Albaitaritza ikasketak egiteko aukera ere hor dago. Hala ere, gauza bat oso argi dut: zaldian ibitzeari ez diot sekula utziko.

Osorik irakurri

☉ Arrigorriaga

Jokin Iturri, Jon Justo, Beñat Elorrieta eta Xabi García arrigorriagarrek Herri Kirolen Openean hartuko dute parte

Kirol probak 11:30ean hasiko dira umeek parte hartzeko herri kirolekin, Argala plazan

|

Lokotxak // Geuria

Ekainaren 22an, larunbat honetan, Herri Kirolen Bizkaia Open Jardunaldi Puntuagarriak antolatu ditu Jasoka Herri Kirol Klubak Arrigorriagako Udalaren babesarekin, udaletxeko plazan.

Ekitaldia 11:30ean hasiko da, umeek parte hartzeko herrri kirolekin. 12:30ean Bizkaia Open Jardunaldi Puntuagarriei hasiera emango diete eta lasto jasotzea, lokotz biltzea, harrijasotzaileak, txinga erutea eta orga jokoak izango dira Argala plazan.

Guztira 21 kirolari izango dira 2024ko open honetan, eta horien artean Jasoka Herri Kirol klubeko kideak diren Jokin Iturri, Jon Justo, Beñat Elorrieta eta Xabi García arrigorriagarrak egongo dira.

Osorik irakurri

☉ Arrigorriaga

Athletic Clubek jolas askeen bidez Psikomotrizitate Eskola ipiniko du martxan Arrigorriagan

Saioak urritik ekainera antolatu dituzte, astean bitan: 2019an jaiotakoak astelehen eta asteazkenetan eta 2018koak astearte eta ostegunetan, Arrigorriaga HLHIn

|

Haurrak, jolasean // Athetic Clubeko Jolas Eskola

Athletic Clubek Psikomotrizitate Eskola izeneko proiektua martxan ipiniko du Arrigorriagan datorren ikasturtean. Helburua 2018 eta 2019 urteetan jaiotako gaztetxoak kirolera modu naturalean hurbiltzea da, psikomotrizitatean oinarritutako kirol eskaintzaren bidez. Izena emateko Athletic Clubeko esteka honen bidez egin dezakete interesdunek.

“Astean bi egunetan, Atheltic Clubeko Jolas Eskolak bost eta sei urte bitarteko adingabeak bilduko ditu, beren trebetasun psikomotorra gara dezaten kirol-hastapenean eta umeen prestakuntzan espezializatutako profesionalekin batera”, azaldu du David Jorrin Bilbao (Bilbo, 1975) Athletic Clubeko Psikomotrizitate Eskolako arduradunak. “Dibertimenduan eta bizikidetzan oinarritutako jarduera da, eta ikaskuntzarako eta garapen osasungarrirako estrategiak landuko dituzte haurrek bertan”.

Saioak urritik ekainera antolatu dituzte, astean bitan: 2019an jaiotakoak astelehen eta asteazkenetan eta 2018koak astearte eta ostegunetan, 18:00etatik 19:30ak arte, Arrigorriaga HLHIn (Mikel Alonsotegi kalea 2). Gainera, hilabete eta erdiro, igande goiz batean, Lezamako Athletic Cluben instalazioetara joango dira senideekin.

Arigorriaga eta Guretzako eskolek beren zentroetako psikogelak eta bertako baliabideak eskaini zizkioten Athletic Clubeeri

“Joan den ikasturtean Athletic Clubek esperientzia bat proposatu zuen Bizkaia mailan eta lekua zehazteke zegoen”, azaldu dio GEURIAri Jorrinek. “Orduan Arrigorriaga eta Gurutzeta eskoletako zuzendariekin harremanetan jarri ziren Athletic Clubeko Jolas Eskolako ordezkariak”. Zentroetako psikogelak eta bertako baliabideak eskaini zizkioten klubari eta hezkuntza proiektuari itxura ematen hasi ziren, epe laburrean Bizkaia mailan garatzeko.

“Athletic Clubeko helburuen artean hasierako kirol urratsetan espezializazio goiztiarra ez lantzea ageri da. Bai ordea, bestelako kirol-eskaintza bat lantzeko aukera ematea”, nabarmendu du Jorrinek. “Horregatik abiarazi genuen Psikomotrizitate Eskola: alde batetik saio bat egingo dugu psikomotrizitate gelan eta beste bat kirol anitzeko pistan edo gimnasio batean eta helburu nagusia jolasetik abiatu eta kirolera heltzea da”. Psikolgelan, beraz, betiko jolas askeak praktikatuko dituzte haurrek, gaztetxoek beraiek proposatutako jolasak landuz.

Arrigorriagako jolas saioez gainera, hilabete eta erdiro ekimeneko arduradunak haurrak eta senideekin elkartuko dira domeka goiz batean Athletic Clubeko Lezamako instalazioetan. Bertan Barakaldoko Gurutzeta eskolako ikasleekin elkartuko dira Arrigorriagako gaztetxoak eta herrian landutako jolas horiek landuko dituzte bertan.

Familiekin jolasean // Athetic Clubeko Jolas Eskola

Familiarekin jolasean

“Jolas horietan familiek ere hartuko dute parte: ematen du jolasak soilik ondo pasatzeko direla baina gehiago dago: entretenimenduaren atzean helburu potolo batzuk ageri dira eta horien artean jolasak berak prestijioa lortzearena dago”, azaldu du Psikomotrizitate Eskolako arduradunak. “Gaur egun umeak jolastu eta txapelketetan hartzen dute parte eta gurasoak edo senideak kanpoan geratzen dira eta familiarekin batera jolastu behar dela uste dugu ere”. Daviden arabera, gurasoekin batera landutako jarduera honen bidez ama edo aita “barnean daraman umea askatu egiten da”.

David Jorrin: “Haurren loditasuna, pantailak, internet… bezalako mehatxuak ikusita, haurrek, lehen urteetan bereziki, ez dute jolasean behar besteko denbora ematen”

“Kirolera hurbiltzeko modu naturalagoa da”, onartu du Jorrinek. “Orain arte, kirolarekin lotutako metodologiak eta programa pedagogikoak aplikatu dira era honetako ekimenetan, baina gaur egun gero eta handiagoak diren mehatxuak ikusita (haurren loditasuna, pantailak, internet…) haurrek, lehen urteetan bereziki, ez dute jolasean behar besteko denbora ematen. Sedentarismoak gero eta presentzia handiagoa du”.

Haurrak, familiekin jolasean, Lezaman // Athetic Clubeko Jolas Eskola

Davidek gehitu du mehatxu horiek bizi eta gutxira kirol espezialitateetara jarraian salto egiten dutela haurrek, tartean geratzen diren jolasak galduz. “Athletic Club Bizkaiko futbol talde nagusia da eta argi dauka ez duela futbola adin tarte horretan sustatuko”, dio Davidek. “Klubaren helburua ekimen osasungarriak eta entretenigarriak sustatzea da txikienen artean”.

Ekimen arrakastatsua

David Jorrinek antzeko esperientziak antolatu ditu Athletic Clubetik kanpo eta “oso positibo” bezala definitu dituzte, baina ez ekimeneko arduradunek: haurrek eta beren senideek baizik. “Asebetetze galdetegietan kritika oso positiboak jaso ditugu eta familiekin izandako aurrez aurreko elkarrizketetan inpresio oso onak jaso ditugu. Izan ere, gure metodologia aplikatzerakoan jarraipen zehatza eta integrala egin diegu jarduera horiei”.

Kirolaren esparruan soilik jorratu beharrean, psikomotrizitatearen osotasunean egiten dute lan umeekin: “Arlo akademikotik esan digute ekimen honi esker haurren garapena nabarmena izan dela”. Matrikularen hileroko prezioa 40 eurokoa da eta 30 plaza daude bai 2018an jaiotakoentzat, bain 2019an jaiotakoentzat.

Osorik irakurri