Ugaoko Jai Batzordeak martxan jarri zuen apirilean inkesta Udiarraga jaietarako musika kontzertuak aukeratzeko. Irailaren 8rako, ostiralerako, aukera hauetatik gustukoena hautatu behar zuten herritarrek: Itziarren Semeak, Skakeitan ala Hesian.
Guztira 204 inkesta jaso dituzte astebetean: “Oso parte-hartzailea izan da prozesua” diote batzordetik: “Egia da 2017ko Jai Batzordean gazte talde bat dagoela eta mugitu egin dela Ugaoko gazteek bere iritzia eman dezaten”. Talde nafarra bozkatuena izan da inkestan, aldeko 80 botorekin (%39,2), Skakeitan taldeak 70 boto jaso ditu (%34,3) eta Itziarren Semeak 54 (%26,5). Gauzak horrela, Hesian eta Skakeitan arituko dira Ugaoko jaietan.
Ugaon egin bezala, Galdakaon ere herri bozketa bidez erabakitzen dute zeintzuk diren santakurtzeko jaietan joko duten musika talde nagusiak. Esaterako, iaz Su Ta Gar, Ken Zazpi eta Reincidentes aukeratu zituzten galdakoztarrek. 579 herritarrek eman zuten botoa.
