Sareak

☉ Ugao

[Programa] Irailaren 7tik 11ra bitartean izango dira Ugaoko jaiak

Jai Batzordeak 50 jarduera baino gehiago antolatu ditu: kale animazioa, kontzertuak, antzerki musikalak, kalejirak, kirola, hitzaldiak eta txapelketak, besteak beste.

|

ugao jaiak 2016 txupinazoa 0
Iazko kuadrillen kalejira Ugaoko jaietan // Geuria

Udiarraga Ama Birjinaren omenezko jaiak irailaren 7tik 11ra bitartean ospatuko dira Ugaon. Jai Batzordeak 50 jarduera baino gehiago antolatu ditu: kale animazioa, kontzertuak, antzerki musikalak, kalejirak, kirola, hitzaldiak eta txapelketak, besteak beste. Kontzertuei dagokienez hauek izango dira aurten: Kalakan, Hesian, Skakeitan, Kebasque, Osterabe eta Enkore.

UGAOKO JAIAK 2017 – EGITARAUA

Irailak 7, osteguna

18:30 Kuadrilen jaitsiera Ugao-Miraballesko buruhandiek eta Gazteleku fanfarreak alaituta: San Bartolome kaletik Herriaren enparantzara

19:00 Pregoia eta txupinazoa udaletxeko balkoitik

19:30-22:30 Kale animazioa: buruhandiak eta Gazteleku fanfarrea

19:30 Puntu Lila informatiboa Hiru txorroko iturrian: Eraso sexistarik gabeko jaien alde

20:00 Salbea Udiarraga Ama Birjinaren baseliza

20:30 Kontzertua baselizan: Eder Bengoetxea (biolina)

21:00 Kuadrilen jaitsieraren sari banaketa Herriaren enparantzan

21:00 Kontzertua Herriaren enparantzan: Kalakan

Irailak 8, ostirala

11:00 Diana

12:00 Meza nagusia Udiarraga Ama Birjinaren baselizan. Sarea Abesbatza

12:45 Kontzertua Herriaren enparantzan: Los Chimberos (bilbainadak)

13:30 Adineko pertsonei omenaldia

14:30 Jubilatuen senidetze-bazkaria El Jaro kiroldegian

18:00 Antzerki musikala: Go!azen dantzatu eta abestera!

19:00-22:00 Kale animazioa herriko kaleetan zehar: Ku-Klux fanfarrea

19:00 Esku Pilota partiduak herriko pilotari gazteekin Gernika enparantzan. Ohorezko sakea pilotari profesional baten eskutik

19:30 Hitzaldia Jane Jauregian: “Dorreak, leinuak, gatazkak?” Juan Manuel Gonzalez Cembellin

20:00 Kalejira Ugaoko buruhandiekin

20:00 Ugao Futbol Taldearen aurkezpen ofiziala Arandia futbol zelaian

21:00 Berbena Herriaren enparantzan: Arizgoiti taldea

22:30 Kontzertuak Gernika enparantzan: Kebasque (Ugao) + Hesian + Skakeitan

Irailak 9, larunbata

09:00 Marmitako eta tortilla txapelketetan izena ematea baselizako enparantzan. Euria bada, Leitoki ikastetxean

11:00 Diana

12:00-14:00 Ugaoko Konkistatzailea txapelketa Herriaren enparantzan, Lehendakari Agirre enparantzan eta Hiru txorroko iturrian

14:30 Marmitako eta tortilla txapelketen sari banaketa baselizako enparantzan

16:30 Futbola Arandia zelaian: Ugaoko Futbol Taldeko emakumezko taldearen eta gazte taldearen arteko konbinatua

18:00 Mus eta Briska txapelketen finalak Jubilatuen egoitzan

18:30 Dantza jaialdia baselizako enparantzan: Rioloboseko Coros y danzas Zangaena (Extremadura) + Etorki Dantza Taldea (Ugao)

19:30-22:30 Kale animazioa: Guretzat fanfarrea eta Ugaoko buruhandiak

22:00-02:00 Dantzaldia Gernika enparantzan: Montecristo orkestra

22:30 Kontzetuak Herriaren enparantzan: Osterabe (Arrigorriaga) + Enkore

02:00-05:00 DJ Markelin Gernika enparantzan

Irailak 10, igandea

11:00 Diana

11:00-14:30 + 17:00-18:30 Haurrentzako parkea baselizako enparantzan

11:00-14:30 + 17:00-18:30 Gazteentzako parkea Arandia gunean

12:30 Herri Kirolak Herriaren enparantzan. Harriti giza-proba taldeko emakumeak + Aizkolariak: Alazne Etxaburu (Zizurkil), Gaizka Lopez (Laudio), Aimar Irazabal (Ugao) eta Aritz Irazabal (Ugao)

18:30 Kale antzerkia Herriaren enparantzan: “Walkman” Ganso&Cia

19:45 Kalejira Ugaoko buruhandiekin

21:30 Antzerkia Gernika enparantzan: Ugaoko Bidea taldea

Irailak 11, astelehena

11:00 Diana

11:30 Meza

12:30 Kale animazioa: Beti Jai fanfarrea

14:30 Indaba-jana baselizako gunean

18:00 Pailazoak Gernika enparantzan: Pirritx, Porrotx eta Marimotots

18:00 Puntu Lila informatiboa Hiru txorroko iturrian

18:30 Kale animazioa: “Euskorleans” Zo-Zongó

19:00 Dantzaldia: DJ Gauargi

20:30 Kale animazioa: “Rock-kalean” Zo-Zongó

23:15 Bola jiraraztea Hiru txorroko iturrian

23:30 Jai amaierako traka Ibaiondoko gunean: FML piroteknia

☉ Ugao

Bi orduko lanuztea eta manifestazioa egingo dute gaur Ugaon Envaseseko langileen alde

Herri mailako ordu biko lanuztea eta manifestazioa deitu dute gaurko Ugaon, atzo hasitako dinamikari jarraipena emanez

|

Martxoaren 16an egin zuten lehen manifestazioa Ugaon / Utzitakoa

Joan den apirilaren 8an aste biko grebari hasiera eman zioten Ugaoko Envases Universales multinazionaleko langileek, Aldi Baterako Lan Espedientearen kontsulta-aldia enpresa batzordearekin akordiorik lortu gabe amaitu ostean.

Gaur, eta atzo hasitako dinamikari jarraipena emanez, herri mailako ordu biko lanuztea eta manifestazioa deitu dute. LAB sindikatutik azaldu dutenaren arabera, “langileak zaurgarritasun-egoera larrian daude inolako eskrupulurik ez duen multinazional baten aurrean, aberastasun gehiago metatzeko irrika nola ase besterik ez duena buruan, aberastasun hori beren ahaleginaren bidez sortzen ari diren pertsonen bizitzari erreparatu gabe”.

Envases Universaleseko langileek Gaubela egin zuten atzo / Utzitakoa

Egoera hori salatzeko hainbat ekintza egin dituzte herrian atzotik hona, besteak beste pankarteoa, elkartasun kontzertuak, afari kolektiboa edo gaubela.

Denak bere horretan jarraituko balu mobilizazio berriak iragarri dituzte langileek, eta LAB sindikatuak kanpainan dauden alderdiei eskatu die “hauteskunde-kanpainaren amaierako mitinak ematen ariko diren pertsona horiei, arduradun politiko horiei, langileak babesteko politikak ezar ditzaten, deslokalizazio eta eraispen industrialeko prozesuak zailtzen dituzten legeak sor ditzaten eta errotuta dagoen industria baten alde egin dezaten”

Osorik irakurri

☉ Ugao

Ugaoko Gazte Eguna egingo dute bihar, “gazteek euren egun propioa aldarrikatzeko”

|

Gautegun erromeria / Geuria

Musika, jolasak eta aldarrikapena izango dira Ugaon bihar egingo duten Gazte Egunaren oinarria. Helburua, antolatzaileek eurek adierazi dutenaren arabera, “gazteak elkartzeko espazioa sortzea da, gazteek euren egun propioa aldarrikatzeko”. 

Hori horrela, 12:00etan hasi eta gaueko ordu txikietan bukatuko den ekitaldiz betetako egitaraua prestatu dute. Hasteko, 12:00 taldeen arteko jolas musikatuak egingo dituzte tabernetan zehar. Hori ondoren etorriko den herri bazkariaren atarikoa izango da.

Arratsalde parterako elektrotxaranga 17:30ean, eta gauarekin batera hainbat kontzertu, hala nola Txapelpunk, Arene G, Gautegun Erromeria edo Jonkass DJa.

Osorik irakurri

☉ Ugao

Veronica Martin zeberioztarrak elikagai osasuntsuen etiketak identifikatzeko tailerra eskainiko du Ugaon

Hitzaldia Ugaoko Jane jauregian antolatu du AEK-k apirilaren 24an, 18:00etatik 19:30ak arte, ‘Praktikatu eta Bizi’ programan

|

Elikagai osasuntsuen etiketak identifikatzeko hitzaldia eskainiko du Veronica Martin Requena nutrizionista zeberioztarrak Ugaoko Jane jauregian, apirilaren 24an, asteazkena. GEURIAk iazko apirilean elkarrizketatu zuen Zeberioko nutrizionista.

“Elikadura osasuntsua erosketa-saskian hasten da, baina gaur egun ez da batere erraza supermerkatuan elikagai onenak aukeratzea”, azaldu du nutrizionistak HasiHazi Jaten kontsultategitik. “Hainbat eta hainbat produktu mota daude, ezen jakin ere ez dakigun zer jaten dugun”. Hori dela eta, produktuen etiketak bereizten jakitea garrantzitsua dela nabarmendu dute, nahasketa batzuek gure dietak desorekatzeko arriskua sortzen dutelako.

Zeberioko produktuak // Geuria

Saioa 18:00etatik 19:30ak arte antolatu du HasiHazi jaten kontsultategiak AEK-ko Praktikatu eta Bizi programan eta Ugaoko Udalaren eta Bizkaiko Foru Aldundiaren babesa du. Hitzaldian parte hartu nahi duten interesdunek 663 040 035 telefonora deituz eman beharko dute izena.

Osorik irakurri

☉ Ugao

HAPO berria ezagutarazteko saio parte-hartzailea antolatu dute Ugaon

Hiri Antolamenduko Plan Orokor berri onartua ezagutarazteko saio irekia Jane Jauregian egingo dute apirilaren 29an, 18:30ean

|

Goikiri auzoko eraikinak // Geuria

Ugaoko Udalak Hiri Antolamenduko Plan Orokor berri (HAPO) eta onartua ezagutarazteko saio irekia antolatu du Jane Jauregian apirilaren 29an, 18:30ean. Bertan izango da Ekaitz Mentxaka Ugaoko alkatea Udaleko teknikari eta HAPOa idatzi duten taldearekin batera: “Ekimen honen helburua ugaotarrek, onartutako dokumentuaren xehetasunak ezagutzea da, aurrekoetan egin den bezala”, azaldu du herriko alkateak.

Udal ordezkariek gogoratu lez, Ugaoko Hiri Antolamenduko Plan Orokorra behin betiko onartu zuten Azpiegituretako eta Lurralde Garapeneko foru diputatuaren 2024ko otsailaren 20ko 130/2024 Foru Aginduaren bidez eta ebazpena martxoaren 26ko Bizkaiko Aldizkari Ofizialean (61 zk.) argitaratu zen, onartutako hirigintza araudiarekin batera, Ugao-Miraballesko Udalari eta Euskal Autonomia Erkidegoko Lurralde Antolamendurako Batzordeari jakinaraziz.

Osorik irakurri

☉ Ugao

Argazkilaritza digitaleko hastapen ikastaroa antolatu dute Ugaon

klaseak hilaren 22an hasiko dira eta astelehenero izango dira, 17:00etatik 20:00ak arte, Jane jauregian. Izena emateko azken eguna apirilaren 18a izango da

|

Kostaldeko argazki bat // urtzivera.com

Argazkilaritzaren maitale amateurrek apirilaren 18ra arte izena eman dezakete Urtzi Verak (Orozko, 1975) Ugaon eskainiko duen hastapen ikastaroan. Lehen saioa apirilaren 22an izango da eta klaseak astelehenero izango dira 17:00etatik 20:00ak arte, Jane jauregian.

Ikastaroa 27 ordukoa izango da eta argazkilaritza digitalean interesa duten herritarrei zuzenduta dago, “argazkilaritza digitalaren munduan prestakuntza-oinarri garrantzitsu batekin hasi nahi duten argazkilaritza-zaleei eta maitaleei”, udal ordezkariek azaldu lez.

Izena emateko azken eguna apirilaren 18a izango da eta modu bitan egin daiteke: Jane jauregian, aurrez aurre edo esteka honen bidez. Edukiera mugatua izango da eta ikastaroak 29 euroko prezioa du.

Urtzi Vera // urtzivera.com

Irakasleari buruz

Urtzi Vera artea eta natura maite dituen argazkilaria da eta sari ugari jaso ditu bere ibilbidean zehar eta guztien artean Fritz Polking izenekoa (2014) nabarmentzen da, urtero ematen dena eta Alemaniako argazkilariaren izena daramana. Hala ere, Amurriokoak bestelako sari ugari irabazi ditu, den-denak bere webgunean iragarrita ditu.

Urtzi Vera irudien garai digitalean murgildu zen duela hamabost urte baino gutxiago. Ogibidez Industri ingeniari teknikoa da, arkatz, errotulagailu eta plastilina artean eman zuen haurtzaroa. Betidanik maite izan zituen marrazketa eta jolas sortzaileak.

Unibertsitateko ikasketak amaitu ondoren, marrazketa, pintura eta eskultura tailerretara itzuli zen Vera. Oso urte entretenigarriak eta ikaskuntza handikoak izan ziren berarentzat, eta, ziurrenik, haien lanaren oinarriak finkatu ziren.

Natura eta animaliak inspirazio-iturri izan ditu beti. 2005ean, mendira kamera konpaktu bat eramatea bururatu zitzaion… eta momentu hartan piztu zitzaion argazkigintzarekiko grina.

Gaur egun Ingeniari tekniko lez egiten du lan Amurrion, baina horrek ez du bere pasioa, argazkilaritza, oztopatzen.

Osorik irakurri