Sareak

Geuriak 10 urte: bidearen lezioak, biharko gidari

Amagoia eta Eider (Berria): «Digitalari begira lan egiten dugu orain, eta horretara moldatu dugu gure eguneroko lana»

Bilakaera digitala erdigunean jarrita, Berria eguneratu egin da, paperetik hasita,baina batez ere atari eta sareetako euskarriei dagokienez. Horretaz guztiaz hitz egin digute Amagoia Mujikak eta Eider Goenagak

|

Amagoia Mujika eta Eider Goenaga pozik daude Berriak egindako eraldaketa digitalarekin // Geuria

Martin Ugalde parkea euskal herritar askorentzat ez da soilik Berriaren egoitza, eta bere sarrera zeharkatzeak halako zimikoa eragiten du bihotzean, Euskaldunon Egunkaria itxi zuteneko irudiak baitatozkizu akordura ezinbestean. Baina bai orduko hartan, egoera lazgarri batean, eta bai egun, oraina den etorkizunak komunikabide guztiak unibertso digitalean barrena gure tokia eta geroa bilatzera bultzatu gaituen honetan, erronkari tamainako erantzuna ematen jakin du hedabideak. “Zerotik hasiko bagina, zer nolako egunkaria egingo genuke?” Hori da orain dela bi urte langileei luzatu zitzaien galdera, egun errealitate bilakatu den eraldaketa (paperari eragin diona baina batez ere digitala izan dena), martxan jartzeko abiapuntutzat har daitekeena. Galdera horren bueltan, eta hari mataza ezberdinak lotuz eta txirikordatuz, Berriak ez du soilik bere azala eta itxura aldatu, lan egiteko eta kazetaria ulertzeko modua bera da irauli duena, eta aldi berean bere balioetan sakondu du, feminismoa edo zaintza erdigunean kokatuz. Amagoia Mujika Tolaretxipik (Andoain, 1971), eta Eider Goenaga Lizasok (Donostia, 1974), Berriako zuzendaria eta zuzendariordea hurrenez hurren, bertatik bertara bizi izan dute ibilbide guztia, eta horren inguruan aritu dira GEURIArekin, luze eta zabal, aho bizarrik gabe.

Aldaketa handia gauzatu du Berriak, gehienbat arlo digitalean. Zelakoa izan da bide eta prozesu hori?
Amagoia Mujika: Orain dela bi urte hasi ginen lanean. Irakurleari irudituko zaio denbora asko dela, baina hasiera-hasieratik argi geneukan langileekin batera egin beharreko bidea zela, eta hori horrela, lan taldeak antolatu genituen, honako galdera hau luzatuz: “Zerotik hasiko bagina, zer nolako egunkaria egingo genuke?”. Hasieratik argi geneukan digitalera salto handia egin behar genuela. Gogoeta prozesu hori oso luzea izan da, egia esan. Aldi berean, eta modu paralelo batean, kanpoko bi enpresekin hasi ginen elkarlanean barruko lanketa honi guztiari forma emateko, betiere argi izanda aholkularitza zerbitzu hori gure helburu eta egiteko moduetara moldatu behar zela.

Eider Goenaga: Digitalizazioari dagokionez, Berriak jaiotzatik izan du presentzia sareetan. Hasiera batean egunkariko eduki guztiak igotzen genituen sareetara, baina denboraren poderioz ikusi genuen etorkizuna, eta betiere papera eta gure harpidedunak ahaztu gabe, gure gasolina baitira, esparru digitalean zegoela. Behar horri erantzutera dator egin dugun lanketa guztia. Eta esango nuke bidea ez dela bukatu, eraldaketa prozesu etengabea dela hau.

Eta zein da aldaketa nabariena?
E.G: Bat aipatzekotan zera esango nuke: digitalari begira lan egiten dugula orain, sareei lehentasuna emanez. Konturatu ginen lan bikoitza egiten genuela, bai kazetariek eta bai euskara zuzentzaileek, dena aldi berean paperean eta digitalean landuz. Horri buelta eman, eta jauzi bat eman genuen: sareei begira lan egingo dugu, eta daukagun hori paperera moldatu.

A.M: Konturatu ginen webgunean beranduegi erreakzionatzen genuela, egun dinamikak aldatu direla, eta lan erritmoak ere bai. Saltsa web gunean, batez ere, goizetan dago. hori horrela, lan txandak aldatu ditugu, kazetariak goizago sartzen dira lanera, eta goizago alde egiten dute. Zentzu horretan, lan baldintzak hobeak dira. Diru aldetik ez daukagu hobekuntzarik egiteko aukerarik, baina lan baldintzak ez dira dirua soilik, eta saiatu gara txandak zazpi ordutara jaisten.

Esparru digitalari begira lan egite horrek badakar informazioa kudeatzeko modu ezberdin bat, ezta? Sareetako behin-behinekotasuna, informazioa kontrastatzeko arazoak…
E.G: Guk gure buruari beti egiten diogun galdera zera da: albiste hau presazkoa da? Alegia, askotan hobe dela albistea kontatzen bigarren izatea, baina lana ondo egitea. Arestian aipatu dugun lan antolaketa zahar horren ondorioz lehen albiste asko eta esku gutxi zeuden goizetan. Orain, aldiz, lau kazetariko bi talde ditugu, bat goizez eta beste bat arratsaldez. Kazetari horiek, nolabait esatearren, libre daude, gertatzen denari erantzuteko. Bakoitzak badauka bere lana, noski, baina ez dabil paperera begira ito beharrean, lehen bezala.Bat mundua sailekoa izaten da, bestea ekonomia, politika…

A.M: Aholkularitza egin diguten enpresek hasieratik esan ziguten papera oso ondo egiten genuela, baina web gunean hankamotz geratzen ginela. Paperezkoan diseinua eguneratu eta txukundu dugu, baina jauzi handiena, ezbairik gabe, digitalean eman dugu.

E.G: Kontutan hartu behar dugu lehen geneukan web orrian sei eduki edo gai nagusi soilik jarri genitzakeela, eta orain, aldiz, gure neurrira egindako jantzia daukagu, egiten dugun lan hori guztia erakusteko aukera ematen diguna. Aldaketa handia izan da, sistema operatibo guztia aldatu dugu, ordenagailu guztiak, orain hodeian lan egiten dugu…

   “Hasiera hasieratik argi geneukan hau langileekin egin beharreko bidea zela. Hori horrela, orain dela bi urte lan taldeak egin genituen eta hurrengo galdera luzatu genien; zerotik hasiko bagina, ze komunikabide egingo genukeen?”

Eta zelan bizi izan dute langileek halako “iraultza”?
A.M: Horrela lan egiten hasi ginen lehen astea oso gogorra izan zen, zoramen erabatekoa. Ez genuen gure burua gai ikusten. “Hemendik ez gara onik aterako”, hori da buruan bueltaka zebilkidan ideia. Baina tira, astebeteko kontua izan zen. Martxa hartzen joan gara, eta jendea pozik ikusten dugu.

Aipatu dituzuen aldaketa horien artean ez diogu bati erreparatu: zuzendaritzarenari.
A.M: Naturaltasunez bizi izan dugun prozesua da. Kontutan hartu biok izan garela bekadunak Berrian, hainbat sailetan ibilitakoak gara, eta pixkanaka-pixkanaka egin dugu bidea. Argi daukagu Martxelo (Otamendi) erreferente bat izan dela egunkarian, baina aldaketa ez dugu egun batetik bestera egin, eta ez dio zuzendari postuari eragiten soilik. Orain emakume gehiago gaude zuzendaritzan, eta egiteko moduak aldatu dira, lanaren ardura kolektibizatu dugu, nolabait esatearren. Arestian esan bezala, postu eta sail askotan ibili gara, langileen beharrak ezagutzen ditugu, eta zaintza, adibidez, erdigunean jarri dugu.

E.G: Etxe mailan feminismoa ere gure balioetan ardatz moduan kokatu dugu. Horrek badauka eragina edukietan, baina baita gure lan egiteko moduetan ere. Protokoloak landu eta garatu ditugu, berdintasun taldea sortu da… Urteetako lana izan da, baina bere fruitua ematen ari da. Orain dela ez hainbeste sailetako koordinatzaile guztiak gizonak ziren. Hori gaur egun pentsaezina liteke, eta hor atzean badago kontzientziazio lan sakon bat.

Berria izan dugu ardatz orain arte, baina Euskal Herri mailako medioei dagokienez, zelan ikusten duzue egungo panorama?
A.M: Lehenik eta behin esango nuke kazetaritzaren etorkizuna bera kolokan dagoela, eta egoera ez dela batere ona. Hasteko, informazioa kudeatzeko ditugun arazoak aipatuko nituzke: albiste faltsuak, clickbaita. Denok kazetariak garela uste duen gizarte batean bizi gara, kazetaria izatea mugikorra hartu eta grabatzea balitz bezala. Ez da horrela, eta hor erronka handi bat daukagu aurretik: inoiz baino beharrezkoagoa da kazetaritza ona egitea, sinesgarria eta benetakoa, bai guk, eta noski, bai zuek ere tokikotik. Gizartearentzat helduleku bat izan behar gara, gezurraren eta manipulazioaren kontrako txerto bat, nolabait esatearren.

E.G: Gure burua kokatzeko unea da: papera gainbeheran dago, telebista ikusteko modua aldatu da, irratiak hala-moduz eutsi dio, baina orain beste eredu batzuk ere badaude, podcastak eta abar… kontsumo moduak aldatu dira, eta hor kokatu beharra daukagu. Hori alde batetik, eta bestetik, Amagoiak esan duenari helduta, sinesgarriak eta erreferentziazkoak izan behar dugu mediook. Ez nuke ahaztu nahi, bide batez, hau guztia egiteaz aparte ekonomikoki bideragarriak izan behar dugula, eta hori dena uztartzea ez da batere erraza.

 “Konturatu ginen lan bikoitza egiten genuela, nai kazetariek eta bai euskara zuzentzaileek ere, dena aldi berean paperean eta digitalean landuz. Horri bueltan eta digitalera jauzi egin dugu, eta pozik gaude”.

Tokiko komunikabideak aipatu dituzu zure aurreko erantzunean, Amagoia, eta zuk bertan hasi zenuen zure kazetari ibilbidea. GEURIAk hamar urte bete dituen honetan, zelan ikusten dituzue tokiko hedabideak?
A.M: Tokiko hedabideak niretzat oso garrantzitsuak dira, eta funtsezkoa da egiten duten lana, are gehiago eremu ez bereziki euskaldunetan lanean ari zaretenok. Horrelako egoeretan jo eta su aritzea benetan zaila da, guri ere gertatzen zaigu askotan. Gogorra den arren, merezi duela konturatzen zara, baduela gozotik gazitik beste, eta denborarekin, inurri lana eginez, hainbat harresi botatzen dituzula. Are gehiago, esango nuke garrantzitsua dela tokikoen arteko lotura eta harremana sendotzea, indartzea. Azken batean komunitate txikia gara, denok elkar ezagutzen dugu, eta oso garrantzitsua iruditzen zait euskara oinarri daukagunok elkarlanean aritzea eta hartu eman hori elikatzea.

E.G: Nik ere gertukotzat ditut tokiko medioak, lehen lana Tolosako Galtzaundin egin nuen, eta bai Amagoia eta bai biok Gipuzkoako Hitzan aritu gara lanean, koordinazioa egiten. Informazioaren lehen koska hori zuena da, tokiko hedabideena, eta horrek sinesgarritasuna ematen dizue herritarrei begira. Bertatik bertara jasotzen duzue gertatukoa. Informazio horren balioa oso handia da. Tolosaldean askotan entzuten duzu jendea hizketan esanez Atarian (tokiko hedabidea) hau edo bestea ikusi duela. Erreferentzialtasun hori badute gertuen lanean ari diren hedabideek, zalantzarik gabe.

Iragan hurbilaz aritu gara, kazetaritzaren oraina hartu dugu hizpide, eta GEURIAren 10. urteurrena ere aipatu  dugu. Etorkizunera begira jartzea falta zaigu. Hamar urte barru elkartuko bagina, zer nolako kazetaritzaz ariko ginateke? Zeintzuk lirateke balizko elkarrizketa horren gakoak?
A.M: Ez da galdera batere erraza, egia esan. Nik egingo nukeen lehen ariketa, aurrerantz jo beharrean kontrakoa egitea litzateke, hau da, atzerantz jotzea, ikusteko zelan geunden orain dela hamar urte, eta zelan gauden orain. Gauzak ziztu bizian joan dira, eta orduan pentsaezinak ziren gauzak gaur egun errealitate bilakatu dira. Kontrakoa ere gertatu da, alegia, orain dela hamar urte uste genuen papera bukatuko zela, eta ez da hala gertatu. Egia da egoera ez dela ona, eta ez dut uste etorkizuna paperetik etorriko denik, baina ez dakit desagertzeraino iritsiko den. Berriari dagokionez uste dut ondo kokatu dugula gure burura, datorrenari eutsiko diogula, osasuntsu ahal den neurrian. Badaude, noski, kanpoko faktoreak ere, begira pandemiarekin zer gertatu zen, edo egun bizi dugun mundu mailako testuingurua ere: Ukraina, Gaza… Hau nire etxea da, eta hemen jarraitzea espero dut, mundua esplikatzen, edo saiatzen behintzat.

E.G: Agian hamar urte barru holograma bidez lan egingo dugu (barrez). Orain dela gutxi Kazetaritzako gradu bukaerako lan bat zuzentzea egokitu zait, eta 3D betaurrekoekin zuzendu behar izan dut, egin kontu. Zer gerta ere, euskaraz lan egiten ikusten dut nire burua, ikuspegi nazionala jorratuz.

Geuriak 10 urte: bidearen lezioak, biharko gidari

Geuriak 10 urte / Gure kazetarion berbak: Eñaut Barandiaran, Maider Ibañez eta Jon Goikouria

|

Eñaut Barandiaran GEURIAko zuzendaria, eta Maider Ibañez eta Jon Goikouria kazetariak // Geuria

Geuriak 10 urte: labur.eus/Geuriak10urte

Geuriako lantaldea osatzen dute Eñaut Barandiaran Urkiza zuzendariak, Maider Ibañez Espinosa eta Jon Goikouria Larrabeiti kazetariak, eta Jon Villapun Arbide editoreak (Geuriako zuzendari izandakoa 2014-2022 urte bitarteetan).

Villapuni elkarrizketa sakona egin diogu Geuriaren 10. urteurreneko ale berezian, eta egungo lantaldekoon hitzak ere jaso ditugu:


Izena: Eñaut Barandiaran Urkiza
Adina:
42 urte
Herria:
Arrigorriaga
Lanbidea:
Geuriako zuzendaria

Geuria Hego Uribetik mundura irekitako leiho bat da, euskaratik eta euskaraz, hurbilen ditugun gaiak eta baita unibertsalak direnak ere jorratu daitezkeela erakutsiz, proiektu komunikabide sendo, egonkor, orekatu, konprometitu eta irudimentsu baten bidez.


Izena: Maider Ibañez Espinosa
Adina:
32 urte
Herria:
Basauri
Lanbidea:
Geuriako kazetaria

Belaunaldi berriek txikitatik ezagutu dute Geuria: eurekin hazi gara eta hazten jarraituko dugu. Tokiko kazetaritzak eta Geuriak eskualdeko herritarrekin zuzenean konektatzea ahalbidetu dit, eta sare hori zelan trinkotzen eta indartzen doan ikusi.


Izena: Jon Goikouria
Adina:
36 urte
Herria:
Bilbo
Lanbidea:
Geuriako kazetaria

Geuriari esker herri txikien handitasuna eta aberastasuna ezagutu ahal izan dut. Prentsa generalistak ez bezala, Geuriak bertatik bertara eta bitartekorik gabe jasotzen ditu herritarren berbak.

Osorik irakurri

Geuriak 10 urte: bidearen lezioak, biharko gidari

Geuriak 10 urte / Herritarren berbak (VII): Txufer Garay, Irantzu Sagarminaga eta Iratxe Alaña

|

Txufer Garay zeberioztarra, Irantzu Sagarminaga usansolotarra eta Iratxe Alaña basauriarra // Geuria

Geuriak 10 urte: labur.eus/Geuriak10urte
Hego Uribeko herritarren berbak:

Galderak:
1. Geuriak 10 urte bete ditu. Geuria aipatzen dizutenean, zer da burura datorkizun lehen gauza?
2. Zer da gehien gustatzen zaizuna Geuria komunikazio proiektuan?
3. Garrantzitsua al da zuretzat toiko kazetaritza?
4. Zertan laguntzen du Geuriak gizartean?
5. Zer hobetu, aldatu edo gehituko zenuke Geurian?
6. Zergatik gomendatuko zenioke lagun bati Geurian informatzea?


Izena: Txufer Garay Milla
Adina: 60 urte
Herria: Zeberio
Lanbidea: Okina

1. Gure inguruko albisteak publikatzen dituen hedabidea.

2. Gure herrialdeko berriak urbiltzen deuskula.

3. Bai, oso. Guretzat aipagarriak diren albisteak ez dira hedabide “orokorretan” agertzen, Geuriari Esker, inguruko barriak jasotzen ditugu.

4. Inguruko aniztasun aberatsez jabetzen

5. Ez zaio biztanleri guztiari heltzen, eta uste dot garrantzitsua litzatekeela etxe guztietan egotea.

6. Eguneratuta eta adi egotea gertuen gertatzen direnekin.


Izena: Irantzu Sagarminaga
Herria: Usansolo

“Gu eta gutarrak protagonista egiten dituen komunikabidea da Geuria!”

1. Eskualdeko euskarazko komunikabidea; hurreko informazioa, gu eta gutarrak geure hizkuntzan protagonista garen hedabidea; beharrezko zerbitzu, eskaintza eta ondarea. Lan itzela egin duzuela, eta hamaika mila oztopori eta gabeziari aurre egin diezuela! 10 urteongatik bejondeizuela, eta topa datorren hamarkada hobe baten alde!

2. Hurbiltasuna, protagonisten elkarrizketak eta inguruko herrietako ekimen eta ekitaldien agenda.

3. Beharrezkoa! Nazio-hedabideek gai eta hartzaile orokorragoak dituzte jomuga, eta, sarriegi, “txikitasunentzako” edo tokikoentzako lekurik ez. Herritarrek beraien herriko gertaera eta bizilagunen berri izatea ere behar-beharrezkoa dute; eta merezi dute leku eta protagonismo hori, egunerokotasunaren eta norberaren bizitzan eragina eta garrantzia dutelako.

4. Besteak beste hiru kontu aipatuko nituzke: batetik, informazio-iturri da; informazioa duen jendea errazago molda liteke bizitzara zein mundura, eta pentsamendu landuagoa izan lezake, erabaki egokiagoak hartzeko, eguneroko eta gertuko kontuetan ere bai. Bestetik, bertokoari, Hego Uribe eskualdeari lekua eta garrantzia ematen dizkio; eta eskualdeko herri zein herritarren arteko topagune izan liteke. Azkenik, euskararen normalizazioan, jakina.

5. Baliabide gehiago edo (batez ere ekonomiko) handiagoak balitu? Maiztasuna, zalantza barik; eta kazetari gehiagorekin ekimen-albiste-elkarrizketa gehiago egin zitezkeen; baliabide teknologikoen erabilera areagotu ahalko luke, bitarteko ezberdinetan sarriago informazioa zabaldu ahal izatea; eskaintza zabalagoa.. Ostera, hasierako galderan jasotako baldintza bete barik, lanbrotuta ikusten dut dena.

6. Hego Uribe eskualdeko eta bertoko herritarren gaineko informazioa hain zabal eta landu beste inon ez duelako lortuko, eta euskaraz, ia informazio-iturri bakarrenetakoa baita. hori arrazoi nahikoa iruditzen zait edonori gomendatzeko.


Izena: Iratxe Alaña Jauregi
Adina: 49 urte
Herria: Basauri
Lanbidea: Gizarte hezitzailea

1. Euskara hizkuntza.

2. Tokiko eta euskaldun komunikabide bat dela.

3. Bai, informatzeaz gain herriaren nortasuna sortzen eta indartzen duelako . Gainera, guztioi interesatzen zaigu gure ingurune hurbilean gertatzen ari dena, ezta? Horregatik, hauek dira gure egunerokoan jorratzen ditugun gai gehienak: udal politikak, zerbitzu publikoak, merkataritza, kirola, kultura edo agenda soziala… Eta tokiko kazetaritza garrantzitsua da haietaz arduratzen den kazetaritza delako.

4. Gure herriaren eta eskualdeko herrien jarduera ezagutzen laguntzen digu. Euskara ezagutzen eta erabiltzen duten pertsonak ere ikusarazten ditu eta hori oso aberasgarria da, euskal komunitatea batzeko, zaintzeko eta indartzeko modu egokia delako.

5. Ez dakit zer esan. Nire ustez, urteekin egokitu eta eguneratu egiten da, eta, beraz, hobetzen da, bere profila instagramen sortzen dudanean edo bideoak editatzen hasten denean. Horrela jarraitzea gomendatuko nioke, zaharkituta ez geratzeko.

6. Arrazoi asko daude emateko, baina gaur, arrazoien ordez, erronka bat jartzen nioke; esango nioke ospatzen ditugun 10 urte hauei askoz gehiago gehitu lortu behar diegula eta, bide batez, askoz irakurle gehiago.

Osorik irakurri

Geuriak 10 urte: bidearen lezioak, biharko gidari

Geuriak 10 urte / Herritarren berbak (VI): Irati Azkueta, Bego Moreno eta Mikel Larunbe

|

Irati Azkueta zaratamarra, Bego Moreno basauriarra eta Mikel Larunbe galdakoztarra // Geuria

Geuriak 10 urte: labur.eus/Geuriak10urte
Hego Uribeko herritarren berbak:

Galderak:
1. Geuriak 10 urte bete ditu. Geuria aipatzen dizutenean, zer da burura datorkizun lehen gauza?
2. Zer da gehien gustatzen zaizuna Geuria komunikazio proiektuan?
3. Garrantzitsua al da zuretzat toiko kazetaritza?
4. Zertan laguntzen du Geuriak gizartean?
5. Zer hobetu, aldatu edo gehituko zenuke Geurian?
6. Zergatik gomendatuko zenioke lagun bati Geurian informatzea?


Izena: Irati Azkueta Pujana
Adina: 34 urte
Herria: Zaratamo
Lanbidea: Irakaslea

1. Geuria. Geurea. Bertokoa. Herrikoa. Herritarrona.

2. Bertokoa dala, bertokoentzat egina. Gure inguruen jazoten danaren barri aukiteko aukera eskaintzen deuskula, euskaraz eta debalde! Ganera, bai semeagaz zein ikasleakaz erabilten dot eta ezin aproposagoa da, munduen kokatute egon daitezen eta euren inguruan gertatzen denaren jakitun egon daitezan, leiduteko erakargarria dan euskarri baten, gai ezberdin eta ikuspegi anitzetatik.

3. Ezinbestekotzat joten dot. Gure inguru hurbilean hamaika proiektu eta ekimen txiker dauz, bestelako komunikabide handiagoetan lekurik ez deukienak. Eskualdeko herrietako agenda kulturalaren barri eukiteko eta egunerokotasuneko gertaeren barri izateko, alkarren berri izateko.

4. Euskarazko komunikazio proiektu batek, hasteko euskararen alde egiten dau, gure altxorra dan hizkuntzari dekon balioa emonez. Bestetik, gaur egungo komunikazio proiekturik gehienen ikuspegia oso globala iziten da, eta hurbil dekogun horreri balioa emotea inportantea da. Jende txiki askok, leku txiki askotan, gauza txikiak eginez, mundua alda dezakegu.

5. Geuriaren formatua sano erakargarrie eiten jata, irakurterraza eta erosoa da.
Mundu digital zoro honetan, paperezko edizioari eustea eskatuko nizueke. Gure semeari sano gustetan jako begiradatxo bat emotea, alkarregaz irakurtea eta herrien gertatu danaren berri eukitea.

6. Gure inguru hurbilean gertatzen danaren berri eukiteko. Hainbatetan inork baino arinau emoten dozuelako informazinoa. Eskualdeko agenda kulturala eskure eukiteko. Eta argazki erreportaiak ederrak iziten direzelako!


Izena: Bego Moreno Gonzalez
Adina: 26 urte
Herria: Basauri
Lanbidea: Berdintasun teknikaria

“Gizarte mugimenduak eta haien ekintzak edota aldarrikapenak partekatzeko lekua da Geuria”

1. Eskualdean dugun egunkari euskalduna, ia gertakizun guztietan presente dagoena, zehazki gizarte mugimenduetara lotuta dauden ekintza edo berrietan.

2. Proiektu bezala nik uste gustoko ditudan ezaugarri batzuk direla gertutasuna eta euskalduna izatea. Azken finean presentzia handia du, eskualdean ematen diren berrietan oinarrituta, gizarteari eta baita gizarte mugimenduekiko lotura eta harreman estua.

3. Noski. Askotan komunikabideetan urrun gertatzen diren berriak aipatzen dira auzoan bertan gertatu denari erreparatu gabe. Gure inguruan gertatzen diren hainbat gauza ezagutzeko edota konsziente izateko baliogarria da.

4. Eskualde mailan berriak euskaraz jasotzeko aukera ematen du eta baita elkarren artean ezagutzeko, hau da, alboan dauden herrien artean besteak zertan ari diren ezagutzeko. Bestalde, gizarte mugimenduak eta haien ekintzak edota aldarrikapenak partekatzeko lekua bada ere. Mugimendu feministatik adibidez, hainbatetan zabaldu ditugu gure deialdiak edo geure ekintzen berri.

5. Zaila iruditzen zait proposamenik egitea, jakinda lan txukuna egiten duzuela eta izugarria gainera. Gertakizun askotan zaudete nahiz eta asteburua izan, edozein ordutan. Horrela jarraitzearekin beste 10 urte nahiko! Eskerrak emanez egiten duzuen lan guztiagatik.

6. Lehen esan dudan bezala, GEURIAk dituen ezaugarri bereziengatik: tokiko kazetaritza delako, euskalduna eta gizarte mugimenduen berriak ematen dituelako formatu desberdinen bidez, haien hitzak zuzenean zabaltzen saiatuz beti.


Izena: Mikel Larunbe
Adina: 31 urte
Herria: Galdakao
Lanbidea: Pilotari ohia

1. Gure eskualdean gertatzen ari denaren berri emateko dugun komunikabiderik esanguratsuenetarikoa dela. Eta, gainera, oso anitza eta erabat euskalduna

2. Gai asko jorratzen dituela, komunikabide ezagunek edo handiagoek ematen ez dituzten berriak argitaratzen dituztela eta guztiz euskalduna dela.

3. Noski. Izan ere, tokiko kazetaritzari esker normalean egunkari edo komunikabide handietan agertzen ez diren ekintzaile,ekimen,artista,kulturzale,idazle,kirolari eta beste hainbat arlotako jendearen berri izan ohi dugu. Eta askotan itzaletan lanean ari den jende hori ezagutarazten dute,merezitako aitorpena eginez.

4. Esan bezala, tokiko kazetaritza izaki,gure eskualdean gertatzen dena eta egosten dena kontatzen digu egunkari edo komunikabide handiek baino sakonago eta zehatzago. Gainera, dena euskaraz idatzita dago eta hori euskararentzat bultzada handia da.

5. Galdera zaila. Burura datorkidan lehenengo ideia edukietatik haratago doa. Seguruenik horretan ere bazabiltzate baina Geuriaren ekoizpena(papera,erabilitako material zein produktuak etab) ahalik eta jasangarrienak izatea ondo legoke. Ingurunearekiko inpaktua ahal beste txikitzea alegia.

6. Bere herriari edo bere auzoko herrietakoren bati buruzko informazio interesgarria jaso dezakeelako. Gure inguruko gertaerak era gertuago batean kontatzen direlako eta gainera,guzti hori euskaraz egiten duelako.

Osorik irakurri

Geuriak 10 urte: bidearen lezioak, biharko gidari

Geuriak 10 urte / Herritarren berbak (V): Elisabeth Luengo, Urtzi Diaz eta Ainhoa Sainz

|

Elisabeth Luengo etxebarritarra, Urtzi Diaz arrigorriagarra eta Ainhoa Sainz basauriarra // Geuria

Geuriak 10 urte: labur.eus/Geuriak10urte
Hego Uribeko herritarren berbak:

Galderak:
1. Geuriak 10 urte bete ditu. Geuria aipatzen dizutenean, zer da burura datorkizun lehen gauza?
2. Zer da gehien gustatzen zaizuna Geuria komunikazio proiektuan?
3. Garrantzitsua al da zuretzat toiko kazetaritza?
4. Zertan laguntzen du Geuriak gizartean?
5. Zer hobetu, aldatu edo gehituko zenuke Geurian?
6. Zergatik gomendatuko zenioke lagun bati Geurian informatzea?


Izena: Elisabeth Luengo
Adina: 32 urte
Herria: Etxebarri
Lanbidea: Arkularia

“Eskualde mailako kohesioa lortzen du Geuriak”

1. Hego Uribe eskualdean informatzeko leku egokia. Gure alboan gertatzen diren ekintzen, lehiaketen, albisteen eta abarren inguruan informatzeko aukera oso ona delako. Tokiko hedabide txikiek beren egunerokotasunean zuzenean eragiten duten gaiei buruzko informazioa eman diezaiokete komunitateari eta erabiltzaileari doan.

2. Hurbileko informazioa oso ondo azaltzen du. Gainera euskaraz kalitatezko albisteak garatzen ditu. Komunikabideek eragin zuzena dute gizarte baten iritzi publikoan.

3. Tokiko kazetaritza oso garrantzitsua da. Tokiko hedabideek gertutik berri ematen dute, pertsonekin, erakundeekin harremana mantentzen dute eta merkataritza-sareei bizitza eta mugimendua ematen diete. Gure kirol txikiari mikrofono bat eskura jartzen dio GEURIAk. Gainera, tokiko albisteak (gugandik hurbil gertatzen direnak) dira gugan inpaktu handiena dutenak.

4. Gure bizimodua, gure ohiturak, produktu batzuen edo besteen kontsumoa, iritzi publikoa… Gertaera sozial, politiko edo ekonomiko ezberdinei buruz iristen zaigun informazioak inguratzen gaituen errealitateaz gure pentsamoldea alda dezake. Komunikabideek informatzeko, munduko leku ezberdinetan gertatzen dena ezagutzeko, zailtasunak dituztenei elkartasuna adierazteko, gure jatorria berraurkitzeko, gure historia ezagutzeko, eta abar balio dute. Eskualde mailako kohesioa sortzen du, galdakaoztar batek askotan ez daki zer gertatzen ari den Arrigorriagan, nahiz eta 3 kilometrora egon.

5. Hilean behin kaleratu beharrean astero edo hamabostean behin argitaratzea, informazioa oso ona delako. Batzuetan, hilero izanez, berritasuna galtzen da. Agian laburragoa izan daiteke, baina albisteak asteko albisteak izan daitezen gustatuko litzaidake.

6. Geurian informatzea oso gomengarria da, herriari buruzko albisteak ondo idatzita daudelako. Tokiko hedabideak dira udalerri bakoitzeko albiste guztien benetako adituak. Askotan beste komunikabide handiago batzuek jasotzen ez dituzten albisteak irakurtzeko aukera ematen dute. Herrian dauden ekintzak ezagutzeko aukera ematen duelako, herritarren artean elkar ezagutzeko aukera ematen duelako gomendatuko nuke.


Izena: Urtzi Diaz Sanz
Adina: 23 urte
Herria: Arrigorriaga
Lanbidea: Ikaslea

1. Komunikatzeko bide bat non bai gazteok, helduok eta zaharrak irakurri, ikusi eta entzun dezakegu zer nolako gauzak gertatzen diren gure inguruan urrutira joan barik.

2. Inguruko egunkaria dela eta batez ere ondoko herrietan zer nolako gauzak gertatzen diren konturatzea. Azken finean ondoko herrietan asko ibiltzen gara eta ezinbestekoa da jakitea zer nolako albisteak dauden, baita elkarrizketak ere inguruko jendea pizkat hobeto ezagutzeko.

3. Bai. Azken finean beti jartzen dugu ikuspuntua estatu mailako albisteetan baina egunerokotasunean ibiltzen garen tokietan ezinbestekoa da jakitea zer nolako mugimenduak dauden eta horretarako tokiko kazetaritza onuragarria da inguruko herritarrontzat.

4. Lehen esan dudan moduan batez ere inguruko jendea ezagutzea elkarrizketen bitartez eta bestetik hurbiletik ikustea zer nolako albisteak dauzen gure inguruko herrietan. Honekin uste dot pausu handi bat ematen duela gizarteari laguntzeko, azkenean lehenik eta behin hurbilekoa zaindu behar dugulako.

5. Egia esan ez nuke ezer aldatuko, uste dot argi eta garbi dagoela zer nolako edukiak dauden eta herritarrei asko erakartzen duela komunikabide hau.

6. Azkenean lehenik eta behin inguruan gertatzen diren gauzak hobeto ezagutzeko gomendatuko nioke lagun bati. Bestetik komunikabide honetatik gizartea aldatu dezakegula, eta azkenik ez garela joan behar oso urrutira albisteak, elkarrizketak edota irudiak ikusteko, oso garrantzitsua dela gure ingurua ondo ezagutzea eta zaintzea.


Izena: Ainhoa Sainz Ipiña
Adina: 49 urte
Herria: Basauri
Lanbidea: Tabernaria

1. Gure egunkari bat.

2. Orokorrean komunikabideetan agertzen ez diren kirol txikiei ahotsa ematen diezue, eta horren berri izatea garrantzitsua da niretzat.

3. Funtsezkoa da, herritarrengandik hurbilen dagoenak baitzarete.

4. Bertatik bertara bizi duzun errealitatea ezagutzen laguntzen dizu, eta eguneroko bidelagun bilakatzen da.

5. Posible den heinean auzoetako albiste gehiago jorratzea nahiko nuke. Herriekin egiten den bezala, baina auzoari erreparatuz.

6. Euskaraz aritzeko edo euskara hobetzeko baliagarria delako, eta inguruko herrietako albisteen berri ematen dizulako.

Osorik irakurri

Geuriak 10 urte: bidearen lezioak, biharko gidari

Geuriak 10 urte / Herritarren berbak (IV): Estibaliz Carracedo, Itziar La Concha eta Mikel Karrillo

|

Estibaliz Carracedo galdakoztarra, Itziar La Concha ugaotarra eta Mikel Karrillo basauriarra // Geuria

Geuriak 10 urte: labur.eus/Geuriak10urte
Hego Uribeko herritarren berbak:

Galderak:
1. Geuriak 10 urte bete ditu. Geuria aipatzen dizutenean, zer da burura datorkizun lehen gauza?
2. Zer da gehien gustatzen zaizuna Geuria komunikazio proiektuan?
3. Garrantzitsua al da zuretzat toiko kazetaritza?
4. Zertan laguntzen du Geuriak gizartean?
5. Zer hobetu, aldatu edo gehituko zenuke Geurian?
6. Zergatik gomendatuko zenioke lagun bati Geurian informatzea?


Izena: Estibaliz Carracedo Osinaga
Adina: 46 urte
Herria: Galdakao
Lanbidea: Kultura teknikaria

“Eskualdeko informazio kulturala sakon lantzen du Geuriak”

1. Bi ideia azpimarratuko nituzke, komunikabidea bata, eta informazioa bestea. Horrela definituko nuke.

2. Bai paperezkoaren bitartez, baina batez web orriaren bidez inguruko herrietako programazio eta ekintza kulturalen berri aurrerapenaz ezagutzeko aukera daukat, eta gainera testuinguru jakin batean kokatuta, izan albistea edo elkarrizketa (erreportajea idatziz).

3. Noski. Egunero bizi duzun errealitatea jorratzen duen kazetaritza da, eta zentzu horretan zuzeneko informazioa jasotzen duzu, bertatik bertara jaso, kudeatu eta plazaratu dena. Gizarte osasuntsu eta heldu bat izateko behar-beharrezko aldagaia da tokikoa.

4. Goiko erantzunean esan bezala, komunikabideeak orokorrean, eta tokikoek bereziki, gizartearekiko ardura handi bat daukate, hurbilekoak izatean badaukatelako sinesgarritasun bat irabazita, eta sinesgarritasun hori da egunero jokoan jartzen dutena. Hori galduta, ez lukete egun herritarrekin duten lotura ezta babesa izango. Gainera, Geuria bezalako medio batek normalean ahotsa ez dutenei ahotsa ematen die, eta horrek ere badauka balio bat.

5. Ondo dagoena ez da ukitu behar, baina zeozer aipatzekotan zera esango nuke: bigarren erantzunean esan dut ekitaldi kulturalen berri izaten dudala GEURIAn, eta zentzu hortan oso aberasgarria litzateke sarean horien inguruko lanketa bereziak egitea, bideoekin, lehiaketekin etabar…

6. Bere inguruan gertatzen denaz informazio fidagarri eta benetazkoa izateko, eta bizi den eskualdearen aberasgarritasuna ezagutu eta horretaz gozatzeko, euskaratik eta euskaraz!


Izena: Itziar La Concha Aiartzaguena
Adina: 32 urte
Herria: Ugao
Lanbidea: Administraria

1. Zonaldeko egunkari digitala.

2. Aipatutakoa, gure zonaldeko berriak agertzen direla, danetarik dagoela…

3. Bai. Garrantzi handia dauka egunero bizi duzun errealitate horretan zure burua kokatzeko.

4. Ba Euskalduna izanik, euskara bultzatzen laguntzen du adibidez, edota normalean egunkari batean agertzen ez diren gertaerak erakusten ditu.

5. Berdin jarraitzea berri pozgarria litzateke.

6. Hurbileko informazioa jorratzen dela, seriotasunez eta sentsazionalismorik gabe.


Izena: Mikel Karrillo Garikano
Adina: 32 urte
Herria: Basauri
Lanbidea: Kirol arduraduna

1. Gertutasuna. Ez bakarrik gertuko berriak jorratzeagatik, baizik eta, nere hizkuntzan informatua izateko aukera emateagatik.

2. Gai desberdinak jorratzean bertatik egitea, kalean bizirik ikustea, besteen kontakizunak entzun beharrik gabe publikatuz

3. Noski. Munduko beste alderdietan gertatzen denak garrantzia izan dezake, baina ingurukoak eragiten du zuzenki norberaren bizitzan.

4. Gertutasun sozialean eta inguruko herrietan lortzen diren aurrerapenak erreferente bezala plazaratzean.

5. Hego Uribeko euskal hiztunen kolektiboa handitze eta indartze aldera, euskera bultzatzen dugun taldeei, hizkuntzan oinarrituta, ikusgarritasuna ematen dion atal bat zabaltzea, apurka apurka beste hainbat biltzen has daitezen.

6. Gertuko berriak direlako, herrikoa plazaratzen dutenak.

Osorik irakurri