☉ Hego Uribe
Bakardadea hautatu ez dutenek elkarrekin bizi dezakete
Biztanleria zahartzearen ondorioz, gero eta gehiago dira bakarrik bizi diren adinekoak Hego Uriben. Bakarrik bizitzea hautua izan daiteke, baina “azken aukera” denean, egoera berean dauden nagusiak saretu egin behar dira aurrera jarraitzeko
Gaztetan beltz-beltza zen buruan ile zuri bat agertzen denean hasten dira arazoak. Ispiluan begiratzen dugun hurrengo aldian, lehen ez zeuden bi zimur agertzen dira bat-batean kopetan. Ez ote gara zoratzen ari? Telebistan azaltzen diren iragarkiek lagunduko digutela diote, eta hor goaz, supermerkatura ileko tintearen eta azalerako krema miragarriaren bila. Baina “arazoak” ez dauka atzera bueltarik. Zahartzen ari gara. Eta ez gu bakarrik, gizarte osoa baizik.
Euskal Herrian gizon-emakumeen bizi esperantza 84 urte ingurukoa da. Baldintzen hobekuntzei eta osasun sisteman egondako aurrerapenei esker, gero eta gehiago bizi gara, eta, beraz, gizartea pixkanaka-pixkanaka zahartzen ari da. Hego Uribeko zazpi herrietan, adibidez, 20 urtetik beherakoek populazioaren % 17 baino ez dute osatzen, 2021ean Eustatek emandako datuen arabera. Emaitzak bestelakoak dira adinean aurrera egin ahala: 20 eta 59 urte bitarteko nagusiek biztanleriaren % 61 osatzen dute, eta 60 urtetik gorakoek, % 32. Duela bi hamarkada, 2001ean, % 22,3koa baino ez zen adinekoen ehuneko osoa: 10 puntu igo da.
Kolektibo horren ehuneko handi bat, gainera, gizartetik nahiko aldenduta bizi da. 2021 urtearen amaieran EDE Fundazioak eta Basauriko Udalak egindako ikerketa baten arabera, Basaurin, eskualdeko herririk populatuenean, 65 urtetik gorako 2.558 lagun bizi dira etxean bakarrik. Horietatik ia % 75 emakumeak dira, gehienak, senarra hil zelako bakarrik gelditu diren alargunak, eta kasuen % 50ean, hamarkada bat baino gehiagoz bizi izan direnak egoera horretan.
Erradiografia bat
Gustura edo ez? Bada, pertsona bezainbeste erantzun eman dituzte adinekoek beren egoera azaltzeko. Nahita bilatutako bakardade egoeran dauden lagunak izan ez arren, ikerketarako elkarrizketatutako pertsonen % 57k erantzun du egoerarekin konforme dagoela; gainontzekoak, ez horrenbeste. Tristura, antsietatea eta beldurra medio, osasun emozionalarekin arazoak dituzten lagunak eta irisgarritasun arrazoiengatik egoerarekin “oso deskonforme” dauden 80 urtetik gorako adinekoak identifikatu dituzte Basauriko ikerketan.
Konpainia beharra
Basauriz gain, eskualdeko gainontzeko herrietan ere antzeko problematikak aurkitu dituzte: “Nahita bilatutako bakardade egoeran dauden pertsonen kolektiboa oso ugaria da, eta ahalik eta lasterren landu behar den zerbait iruditzen zaigu”, kontatu digu Soiartze Unzueta Arrigorriagako Gizarte Zerbitzuetako langileak. Herriko Osasun Foroa izeneko taldean (hilean behin biltzen dira bertan herriko anbulatorioko ordezkariak, farmazietakoak, eskolakoak, Gaztegunekoak, AMPAkoak, kiroldegikoak, Berdintasun Saila, elkarte feministak eta beste hainbat), hori da pandemiaz geroztik identifikatu duten kezka nagusietako bat.
Herriko kontsultategia gainezka dagoenean, ondo ikus daiteke adinekoen errealitatea. 80 urteko gizon bat sorbaldako mina sentitzen duelako hurbildu da osasun zentrora. Medikuarekin ordu erdi egon ostean, irten egin da. Baina datorren astean, bueltan da: bizkarreko mina dauka; bi aste barru, beste behin, sorbaldakoa. Farmazietan ere, berdin: adineko asko medikazioaren bila doazenean, bost minutu behar izaten dituzte pilulak hartzeko eta ordubete farmazialariarekin hitz egiteko. Osasun fisikoarekin izan ditzaketen arazoez gain, izan ere, bakarrik bizi direnen kasuan, osasun mentala ere zaindu behar da: askotan, arta medikoa jasotzera baino, nagusiak hitz egiteko norbaiten bila doaz zentroetara.
Saretzeko lana
Kasu batzuetan, gainera, adinekoek herritarrekin izan dezaketen hartu-eman labur hori ere ezinezkoa suertatzen da: Arrigorriagako Kubon, adibidez, mugikortasun arazoak dituzten lagun asko ezin dira etxetik irten ere egin. Auzoa industriaren hazkunde garaian sortutako gunea denez, zaharra da eta irisgarritasun arazoak ditu, bai kaleetan, baita etxebizitza barruetan ere (igogailu falta, kasu). Gainera, auzoan egiten den bizitza eskasa dela diote Osasun Forotik: Kubon ez dago dendarik, tabernarik, ezta farmaziarik ere, eta jende gazteak herrigunean denbora gehiago igarotzen du auzoan baino, bertan daukatelako lantokia, umeentzako eskola, parkea eta taberna.
Udalak aurten jarri du martxan Kubo berrurbanizatzeko plana, auzuneko muga arkitektonikoak kendu eta irisgarritasuna bultzatzeko. Bakardade egoerak identifikatzeko eta ekiditeko ekintza komunitarioak bultzatzeko, berriz, programa pilotu bat jarri dute abian bertan: Bizkaia Saretu II. Herri gobernuak, BBKk eta Grupo SSI enpresak lankidetzan garatutako planak auzoan bakardadearen sentsibilizazioan lagunduko duten eragile ezberdinak identifikatzea eta hauen sarea osatzea du helburu, auzolanean adinekoei laguntzeko ekintza kolektiboak garatzeko. Irailean jarriko dute martxan.
Zaintzaileak herrian
Bitartean, laguntzarako beste programekin aurrera jarraitzen dute; horietako bat Etxebarrin eta Ugaon ere abiatu duten Zaintzaileak programa da. Europako Next Generation funtsekin finantzatutako dinamikarekin, epe luzeko langabezian dauden edota zaurgarritasun egoeran dauden bizilagunei hilabete bateko prestakuntza eskaintzen diete adinekoak zaintzen irakasteko ikastaroarekin. Gero, % 75eko lanaldian jardun dute sei hilabeteko epean (abuztu ingurura arte), hirugarren eta laugarren adineko jendea zaintzen.
“Hasieran, herri txikia denez, bazirudien jendeari beldurra ematen ziola laguntza jasotzeko izena emateak”, azaldu du Oihane Artetxe Ugaoko programaren koordinatzaileak. “Baina gero, ahoz aho zabaldu da, eta askoz gehiago animatu dira”. 8 laguntzaileak kalera irteteko, ospitalera joateko, paseatzeko, hitz egiteko eta beste hainbat gauzatarako egon dira adineko ugaotarrekin. “Arratsaldeetan kartetan jolasteko ere gelditu izan dira, eta kuadrilla osatzea lortu dute!”, dio Artetxek.
Aisialdiko tarteak
Izan ere, eskualdeko herrietan laguntzaileak saretzea lortzeaz aparte, berebiziko garrantzia ematen ari dira adinekoen artean loturak sortzeari ere. Udalek garatu dituzten dinamika gehienek nagusiak harremanetan jartzea eta elkar ezagutzea dute helburu. Ohikoenak bidaiak eta irteerak, tailerrak eta kirola egiteko ikastaroak dira.
Zaratamon, adibidez, osasun fisikoari lotutako hainbat dinamika jarri dituzte martxan. Adinekoen osasuna sustatzeko programaren barruan, 2022-2023 tarteko epean, gimnasia ikastaroak eta ibilbide osasungarriak egin dituzte Arkotxan eta Elexalden, hurrenez hurren. Herri erdialdeko tailerrean izena eman duten 16 lagunek 9,25eko nota jarri diote dinamikari, herriko Gizarte Zerbitzuek jakinarazi bezala. Paseoek bere helburuak betetzen lagundu diete adinekoei: %38,46k eman zuen izena gainontzekoekin harremanetan egoteko; %33,33k, aldartea hobetzeko; eta %28,21ek, osasuna sustatzeko.
Galdakaon, berriz, ikastaroak egiteaz gain, adinekoentzako irteerak eta bidaiak antolatzen dituzte (Bilboko Itsasadar Museora, Jakara…). Mari Carmen Zarandona galdakoztarrak 83 ditu, eta Udalak antolatzen dituen ekintza ia guztietan hartzen du parte. “Bakarrik bizi garenontzat laguntza handia da horrelako ekintzak eskura izatea”, azaldu digu Zarandonak: “Udaleko webgunean sartzen naiz; hor dator informazio guztia, eta interesatzen zaidan zerbait ikusten badut, izena ematen dut”. Dinamiketan ezagutzen duen jendearekin, gainera, oso harreman ona daukala onartu du galdakoztarrak. “Asko hitz egiten dugu gure artean, aurrez aurre ezin bada, WhatsApp bidez, azkenean, pertsonentzako garrantzitsuena komunikatzea baita”.
Nork zaintzen ditu adinekoak?
Bakarrik bizi diren adinekoen kasuan edo lagunduta bizi direnei dagokionez, kasu gehienetan, nagusiek norbaiten beharra izaten dute eguneroko lanak egiteko. EDE Fundazioak egindako inkestaren arabera, Basaurin bakarrik bizi diren 65 urtetik gorakoen % 85ek seme-alabak ditu, eta hauen laguntza izan ohi dute zerbait behar dutenean. Azterketan esaten denez, 10 kasutik 9tan, familiako kideak zaindu behar duten pertsonarengandik hurbil bizitzeak egiten du posible arta hori eman ahal izatea.
Dena den, badaude zaintza zailtzen duten beste faktore batzuk ere, adibidez, adina. Arrigorriagan pertsonaren baten zaintzaz arduratzen diren bizilagunentzako egiten duten laguntza programan (Zainduz), 87 pertsonak hartu dute aurten parte: horietatik 77 izan dira 60 urtetik gorako lagunak eta 10 baino ez adin horretatik beherakoak. Guztira 69 emakumek eta 18 gizonek eman dute izena Zainduz dinamikan.
Nork zaintzen ditu zaintzaileak?
Foru Aldundiak martxan jarri duen programa horrek, hain zuzen, zaintzaileak zaintzeko helburua dauka. Dependentzia duen norbaiten gaineko ardura izateak eragin ditzakeen zailtasun sozioemozionalak kudeatzeko Foru Aldundiak bultzatutako programa da Zainduz. Eta eskualdeko Gizarte Zerbitzuetako arduradunek garatzen dituzte bere dinamikak herri bakoitzean. Hainbat ildo lantzen dituzte, bost oinarritan banatuta:
- Aholkularitza: mendekoak eta ezgaituak dituzten familientzako informazioa, kontsulta eta aholkularitza
- Prestakuntza: hitzaldiak, mintegiak eta ikastaroak
- Laguntza taldea: zaintzaileen ongizate emozionala zaintzeko eta hobetzeko
- Banakako saioak
- Adinekoentzako tailerrak: psikoestimulazioa
☉ Hego Uribe
Renfek eskualdeko trenen maiztasuna handitzeko asmoa iragarri du
Zerbitzuaren maiztasuna handitzeko asmoa iragarri dute Renfetik eta egungo trenak irisgarritasun irizpideak betetzen dituztenekin ordeztuko dituztela aurreratu dute
Arrigorriagako udal ordezkariek bilera berri bat izan dute Renfeko arduradunekin, udan zehar herritar batzuek helarazi zituzten kezka batzuen haritik. Herritarren arabera, “Renfeko aldiriakeko trenen zerbitzuak hutsuneak dituzte” eta kezkatuta agertu dira Arrigorriagako udal ordezkarien aurrean.
Maite Ibarra Arrigorriagako alkatea eta Gaizka Ibarretxe zinegotzia Renfeko arduradunekin bildu ziren uztailean herritarren kezkak helarazteko, antzemandako hutsuneak konpontzen eta egoera hobetzen laguntzeko”, azaldu dute Udaletik. “Renfeko arduradunek kezka guztiak jaso zituzten eta zerbitzua hobetzeko hainbat neurri hartuko zituztela adierazi zuten”.
Bilera berri honetan egoeraren eta hartutako neurrien jarraipena eta balorazioa egitea izan da helburua. Erantzun modura, Renfeko ordezkariek zerbitzuaren puntualtasuna hobetu dela azaldu dute eta gaur egun % 95ekoa dela azpimarratu dute.
Gainera, trenen maiztasuna handitzeko asmoa duela iragarri du garraio enpresak, ordutegietan aldaketak eginez. Bestalde, irisgarritasunaren alorrean aldaketak egongo direla iragarri dute eta egungo trenak “irizpideak betetzen dituzten trenekin” ordeztuko dituztela aurreratu dute.
Aldiriakeko tren bat // Geuria
Maite Ibarra: “Asko dira eguneroko bizitzan Renfe erabiltzen dute arrigorriagarrak, eta lanean jarraituko dugu herritarren kalitatezko garraio publikorako eskubidea berma dadin”
“Asko dira eguneroko bizitzan Renfe erabiltzen dute arrigorriagarrak, eta lanean jarraituko dugu herritarren kalitatezko garraio publikorako eskubidea berma dadin”, azaldu du Maite Ibarrak. Hori dela eta, Udaletik herritarrek kalitatezko garraio-zerbitzua jasotzea garrantzitsua dela azaldu diote Renfeko ordezkariei eta “elkarlanean jarraitzeko zein ahal den guztian laguntzeko prestasuna eta borondatea” adierazi dizkie Renferi.
☉ Hego Uribe
Txulalai Hego Uribeko haur musika talde berriak lehen bideoklipa grabatu du San Migeleko Sofia Taramona ikastetxean
Kantu Kolore taldea osatzen zuten kide batzuek, Galdakaokoak eta Usansolokoak, eratu dute Txulalai. Urriaren 25ean kaleratuko dute lehen diskoa
Galdakaoko eta Usansoloko hiru lagunek Txulalai haur musika talde berria eratu dute. Lehendik Kantu Kolore taldean ibilitakoak dira eta oraingoan “gogotsu eta ilusioz” aurkeztu dute euren proiektu berria.
“Musikaren bitartez, ondo pasatuz eta gozatuz, hezkuntza munduari haize freskoa eta proposamen didaktiko ederrak eskeintzeko asmoz eratu dugu Txulalai”, diote Miel, Alai eta Xaba taldekideek.
Taldearen lehen bideoklipa gaur bertan, irailak 27, publikatu dute: ‘Makinista’. San Migeleko Sofia Taramona ikastetxean grabatu dute, bertako ehunka ikaslerekin.
Urriaren 25ean kaleratuko du Txulalaik bere lehen diskoa.
☉ Hego Uribe
Loraldia Plazak 50 sortzaile baino gehiagoren lanak ekarriko ditu Zaratamo eta Arrigorriagara
Guztira, zazpi egunetako programazioa ondu dute Loraldia Plazan aurten eta Zaratamo eta Arrigorriagarako bereziki prestatutako proposamenak ekarriko dituztela azaldu dute antolatzaileek
Gaur goizean aurkeztu dute datorren urriaren 18 eta 19an eta 23tik 27ra Zaratamon eta Arrigorriagan antolatu duten Loraldia Plazaren hirugarren edizioaren programa. “Aurreko bi edizioak arrakastatsuak izan ziren eta hirugarren honetan berriro ere kultur adierazpen ezberdinak izango dira hizpide: tankera eta estilo ezberdineko musika eta dantza proposamenak, kabareta, poesia, literatura eta dastaketa bat”, azaldu du Amaia Ocerin Loraldiako komunikazio arduradunak.
Guztira, zazpi egunetako programazioa ondu da eta “herri bi hauentzako bereziki prestatutako proposamenak” direla ziurtatu du Loraldiako komunikazio arduradunak gaurko aurkezpenean.
Urriaren 18an eta 19an Zaratamo izango da Loraldia Plazaren erdigunea: aurreko bi edizioetan egun bakarra eskaini zioten Zaratamori eta aurten erakuslehio bi izango ditu herriak: urriaren 18koa Elexaldeko Kultur Etxean eta 19koa, Arkotxako elizan.
Urriaren 18an Maite Larburu eta bere musikariek “Krak” lana aurkeztuko dute Zaratamoko Kultur Aretoan. “Emanaldi honetan gobidatu nabarmen bat izango dugu: Arrigorriagako Artizarra Abesbatza“, azaldu du Ocerinek. “Adin guztietako kantariz osaturiko abesbatz honek Maite Larbururen “Loti (herrena)” kanta moldatuko du”.
Jon Maia, Basaurin // Geuria
Hilaren 19an Jon Maia bertsolaria egongo da Arkotxako elizan: “Orain arte egindako ibilbidea ikusita argi ikusi genuen Arkotxa auzora ere zabaldu behar genuela Loraldia”, azaldu du Alberto Ugarriza Zaratamoko alkateak. “Arkotxa enpresa handi biren gerizpean sortutako langileen auzoa da, Estatu mailako hainbat lekutatik etorritako langileena, hain zuzen ere”.
Horiek horrela, Jon Maiak proposamen propio bat ekarriko du Arkotxara eta Federico García Lorcaren lana Lauaxetarenakin lotuko du ‘Arkotxa: Lorcatik Lauaxetara’ izeneko hitzaldi performatibo eta musikatuaren bidez: “Auzoarekin lotura bat izango du Maiaren ekarpenak”, aurreratu du Zaratamoko alkateak.
Arrigorriaga eta Zaratamoko udal ordezkariak, Maite Ocerinekin // Geuria
Urriaren 23tik 27ra Arrigorriagaren txanda izango da, eta Karlos Aretxabaleta ‘Txapel’en Izarrak eta Haitzak liburuaren haritik Izar eta haitz artean diziplina anitzeko ekitaldia eskainiko dute, duela egun batzuk GEURIAn aurreratu lez. Txapelekin batera eskualdeko gonbidatu bereziak egongo dira: Irati Anda Villanueva, Estropozu bertso-eskola, Iraia Urraca, Ioritz Benito, Lehian Erromeriako Maitane Etxegarai eta Padura Mendi Taldeko kideak.
Urtez urte, lorak jasoz
Maite Ibarra Arrigorriagako alkatea eta Alberto Ugarriza bat datoz urteek aurrera egin ahala harrera hobeagoa duela Loraldia Plazak Hego Uribe eskualdean: “Ausardiaz jokatu dugu Loraldia Plaza bezalako ekimen hau Arrigorriagara ekartzen”, azaldu du Ibarrak. “Jakitun gara era honetako proposamen berriak zailak direla martxan jartzeko baina hasiera-hasieratik sinistu dugu proiektu honetan eta oso modu positiboan baloratzen dugu diziplina ugari lantzen direlako, besteak beste. Espero dugu urteek aurrera egin ahala gero eta jende gehiago hurbiltzea herriko areto eta plazetara”.
Maite Ibarra: “Jakitun gara era honetako proposamen berriak zailak direla martxan jartzeko baina hasiera-hasieratik sinistu dugu proiektu honetan”
“Gure aldetik egiten dugun balorazioa oso positiboa da ere”, gehitu du Zaratamoko alkateak. “Bai herrian izandako harreragatik, bai Euskal Herrian egonkortuta dagoen Loraldia kultura proiektuan parte-hartzegatik. Euskal kultura garaikidea zabaltzeko proposamen handienetakoa da, ezbairik gabe”. Lehen edizioan Joseba Sarrionandia eta Ines Osinaga izan ziren Zaratamon eta “proposamen zoragarria” izan zela nabarmendu du Ugarrizak. “2023an lortutakoa ere zoragarria izan zen eta Olatz Salvador, La Basu, Osterabe eta Lide Hernando izan ziren Kultur etxeko oholtzan. Loraldia gabe ezinezkoa izango litzateke”, aitortu du.
Egitaraua | Loraldia Plaza 2024
Urriak 18, ostirala
19:30 Maite Larburu + Artizarra abesbatza, Zaratamoko Kultur Etxea
Urriak 19, larunbata
19:30 Jon Maia ‘Arkotxa: Lorcatik Lauaxetara’, Arkotxako eliza
Urriak 23, asteazkena
19:00 Karlos Aretxabaleta ‘Txapel’: ‘Izar eta haitzen artean’, Edurne Garitazelaia
Urriak 24, osteguna
19:00 Haatik Dantza Konpainia: ‘Lau Eme’, Abusuko Zentro Soziokulturala
Urriak 25, ostirala
20:00 ‘Xiberoa Kantuz Loraturik’, Lonbo aretoa
Urriak 26, larunbata
19:30 Andoni Mutiloa: ‘Nire Fantasia Kabareta’, Arrigorriagako udaletxeko Erakusketa gela
Urriak 27, igandea
12:00 Unai Elorriaga eta Josu Aurrekoetxea: ‘Euskal kantugintzaren tregepedia’, Edurne Garitazelaia
13:30 Ardo dastaketa: Biba Ardoak, Edurne Garitazelaia
☉ Hego Uribe
Hitzaldiak, bisita gidatuak eta ihes gela bat antolatu dituzte Hego Uriben, Ondarearen Europako Jardunaldietan
Arrigorriagan, Etxebarrin, Galdakaon, Ugaon eta Zeberion antolatu dituzte jarduerak urrian zehar, Ondarearen Europako Jardunaldien baitan
Ondarearen Europako Jardunaldiak antolatu ditu berriro Bizkaiko Foru Aldundiak urrian zehar lurraldeko 71 udalerritan.
Aurten, “Bide, sare eta loturen ondarea” izango da jardunaldien gaia, eta Hego Uribe eskualdean hamaika jarduera antolatu dituzte.
Hitzaldiak, bisita gidatuak eta ihes gelak izango dira hilabetean zehar Arrigorriagan, Etxebarrin, Galdakaon, Ugaon eta Zeberion.
Leixuri Arrizabalaga Euskara, Kultura eta Kirol diputatuak azpimarratu duenez, “aurten ere urria da Bizkaiko ondarearen hilabetea. Urri kultural honek, aurten ere, gure historiaren eta ondarearen ezagutzan sakontzeko aukera eskaintzen die herritarrei, ikuspuntu eta ikusmolde desberdinetatik eta jarduera askotariko eta didaktikoen bidez, ehun bat eragile kulturalen jardueren antolaketari esker. Ondarearen Europako Jardunaldiak Bizkaiko kultura-ondareak herritarrei ateak irekitzeko egunak dira”.
“Bide, sare eta loturen ondarea” izango da aurtengo jardunaldien gaia // Bizkaiko Foru Aldundia
Arrigorriaga
Hitzaldi zikloa: ‘Komunitate sareak ehuntzen: Abrisketatik Malmasinera’
Malmasinen eta Abrisketako Done Perin egiten ari diren lanei buruzko azken datuak ezagutaraziko dituzte hitzaldi-ziklo baten bitartez.
Urriak 23, 19:00-20:30: Malmasinetik Burdin Aroari begirada bat. Jagoba Hidalgo
Urriak 24, 19:00-20:30: Erdi Aroko paisaiak eraikitzen Euskal Herrian. Josu Narbarte
Urriak 29, 19:00-20:30: Zer esaten digu osteoarkeologiak? Arbasoak, nola bizi eta nola hil ziren. Maite Iris Garcia
Urriak 30, 19:00-20:30: Abrisketa, zer berri? Nora goaz? AR.GU.I.A. Proiektua: ibilbide berriak. Teresa Campos-Lopez
Non: Edurne Garitazelaia Kultur Etxea
Hizkuntza: euskaraz eta gazteleraz
Izena ematea: malmasingolagunak@gmail.com (ez da erreserbarik egin behar)
Etxebarri
Hitzaldia eta bisita gidatua: ‘Harribidea. Bideen bidea’
María López de Haro andreak 1348an berretsi zuen Bilboko Hiribilduaren fundaziorako (1300) herri-gutuna. Bertan, “Echevarritik Ganguren mendilerroraino doan bidea” aipatzen da, baina ba al dakigu zer bide zen? Ba al dago Bilbo eta Etxebarriren arteko muga zehazteko balio izan zuen elementu horren beste konstanterik, orduan Galdakaoko elizateak? Eta zergatik agindu zuen María López de Haro andreak ez erabiltzeko? Urduña eta Bermeo arteko lotura-bidearen zati bat ezagutaraziko dute.
Noiz: urriak 18, urriak 20
Non: Lezama Legizamoneko Irin Fabrika
Hizkuntza: euskaraz eta gazteleraz
Izena ematea: kultura@etxebarri.eus / 944 267 005
Galdakao
Hitzaldiak: ‘Gure erromeriak’
Jai-giroko elkargune gisa, erromeriak parada egokia ziren gizarte-harremanetarako. Oinez, bizikletaz, tranbiaz, trenez, autobusez edo autoz joaten ziren gazteak erromerietara lagun berrien bila, eta harreman hertsiak sortzen ziren komunitateen artean, eta tratuak ere egiten ziren, esaterako, Urkiolan, San Antonio egunean. Arratiako tranbia, Durangorako trena, autobusa eta autoa garraiobideek ohiturak aldatu zituzten eta denborak eraldatu, haiei esker, errazagoa eta azkarragoa baitzen Bizkaitik mugitzea; hala bada, jai handiek, pixkanaka, adiera tradizionalagoa eta folklorikoagoa hartu zuten: “geure erromeriak” .
Urriak 3, 19:00: Tranbiatik metroraino ibilbide historikoa. Juanjo Olaizola
Urriak 17, 19:00: Erromeria topaleku Gorbeialdean. Juan Manuel Etxebarria
Non: Torrezabal Kultur Etxea
Hizkuntza: euskaraz
Ugao
Kanpoaldeko ihes gela: ‘Errege Bidearen misterioa’
Jarduera horretan, hainbat garai historikotako pertsonaiei lagundu beharko diegu Ugaotik igarotzearekin lotutako arazoa konpontzen. Arazo hori misterio handiago baten parte da, eta konpondu egin beharko dute. Lau proben irtenbideen bidez, Ugaoko lurreko komunikazioekin lotutako azken enigmaren lau zatietako bat lortuko da.
Urriak 18, 18:00-20:00
Non: Jane Jauregia
Hizkuntza: euskaraz eta gazteleraz
Izena ematea: 946 480 704 / kultura.ugao@ortzadar.es
Zeberio
Hitzaldia eta bisita gidatua Juanjo Hidalgoren eskutik: ‘Errege Bidea’
Zeberioko errege-bidearen goiko tartearen gaineko esku-hartze bati esker –Etxebarri eta Undurraga auzoen artetik igarotzen den tokian–, XVIII. mendeko bidarriaren jatorrizko harzolaren zati bat aurkitu da. Bidarri hartatik, Miraballes hiribildutik Arratia haranera joaten zen. Bide haren oroimena gogora ekarriko dute.
Urriak 12, 10:30
Non: Ermitabarri
Hizkuntza: euskaraz eta gazteleraz
Izena ematea: 946 122 695 / turismo@gorbeialdea.com
☉ Hego Uribe
Basconiak eta Padurak asteburu honetan ekingo diote Liga txapelketari
Larunbatean jokatuko dute euren lehen norgehiagoka Basconiak eta Padurak: 17:15etan Padura-Alaves C eta 18:00etan Eibar C – Basconia
Lehen mailako futbol txapelketak atsedena hartuko du asteburu honetan, baina Hego Uribeko futbol zaleentzat ez da atsedenik izango. 3RFEFko txapelketak 2024-2025 denboraldiari hasiera emango dio iraileko lehen asteburu honetan, eta bertan eskualdeko bi talde lehiatuko dira: Basauriko CD Basconia, eta Arrigorriagako CD Padura.
Biek ala biek larunbatean jokatuko dute estreineko partida, eta bitxia bada ere, Alaves eta Eibarren filialen aurka: 17:15etan Padura-Alaves C eta 18:00etan Eibar C – Basconia. Basauriarren kasuan, eta urtero legez, aldaketa handiak izan dira taldean, eta jarraitu beharreko harribitxien artean Athleticek Liverpooletik fitxatu zuen Elijah Gift dago, edo Selton Sued san migeldarra.
Padurak, aldiz, gaztetasuna eta esperientzia uztartzen dituen taldea osatu du, eta bostgarren denboraldiz jarraian Aitor Garmendiak gidatuko du taldea.
Txakurkros hastapen Ikastaroak martxan jarriko ditu KorriCanek Arrigorriagan, gazteentzako
Undurraga eta Etxebarri arteko Errege Bide zatia konpontzen hasi da Zeberioko Udala
Argazkiak / Etxegarai eta Sofia Taramona garaile, Basauriko ikastetxeen arteko Esku Pilota Txapelketan
Argazkiak / Etxegarai eta Sofia Taramona garaile, Basauriko ikastetxeen arteko Esku Pilota Txapelketan
Argazkiak / San Migeleko jaietako Playback lehiaketan ere txapeldun Los Gambas kuadrilla
