Ibai Magdaleno Palacios (Bilbo, 1996) Basauriko Bertako-Javi Conde Klub Paralinpikoko atleta da eta apirilean Munduko Virtus txapeldun bihurtu da, 10 kilometroko lasterketan. Txapelketa Kazakhstaneko Almaty hirian (Asia) jokatu zen apirilaren 19tik 21era. “Lehiaketa zirkuitu bihurgunetsu batean egin zen, 700 metrotik gorako altueran, eta zaila izan da proba egitea”, adierazi dute Javi Conde klubeko ordezkariek.
Magdalenok 33 minutu eta 15 segunduan egin zuen 10 kilometroko proba, eta mendean hartu zituen Daniel Bosy poloniarra eta Victor Karadzhov bulgariarra. “Lehiakide gogorrak”, adierazi dio GEURIAri Magdalenok. “Denboraldi bikaina egin du Ibaik. Laredon 10 kilometroko ibilbideko lasterketan errekorra egin zuen (33’05”), Reimseko (Frantzia) munduko txapelketetan pista estaliko 3.000 metroetako proban laugarren postuan bukatu zuen, eta orain Munduko txapelduna da!”, diote Javi Conde klubeko ordezkariek.

Lehenik eta behin, zorionak, Ibai! Munduko Virtus txapelduna zara 10 kilometroko lasterketan! Ez da marka makala, gero!
Eskerrik asko, Maider! Oso pozik nago, liluratuta! Ez nuen espero txapelketa irabazterik. Pozagatik eta urte hauetan guztietan egin dudan ahalegin guztiagatik negar egin nuen! Orain urrezko domina leku guztietara eramaten dut, ezin dut gainetik kendu!

Zelan joan zen txapelketa? Javi Conde klubetik adierazi dutenez, proba zaila izan zen txapelketa zirkuitu bihurgunetsu batean egin zelako eta 700 metrotik gorako altueran.
Lasterketa bikaina izan zen. Ni ez nago ohituta altitudean korrika egitera, baina dena ondo joan zen. Egia esan, ez nuen lehiaketa irabazterik espero, beraz, zoriontasuna bikoitza da!

Zelan bizi izan zenuen txapelketa eguna?
Goiz jaiki eta logelan genuenarekin gosaldu behar izan genuen. Gero gosaria eman ziguten bidean, baina ez nuen goserik. Txapelketa ospatzen zen lekura 05:00etan iritsi ginen eta 06:00etan beroketa lanak hasi nituen. 06:45erako lehen irteeran geunden. Lehentasuna genuen, beraz, lehenengo ilararaino eraman gintuzten eta denak, korrika egitera. Edaria eta janaria genituen hirugarren, seigarren eta bederatzigarren kilometroetan: indarrak hartzeko, ezinbestekoa. Egia da altitudean arnasa hartzea kosta egiten zitzaidala, logale nintzen, baina txipa aldatu eta motibatu egin nintzen. Ura hartu nuen lasterketan, eta berriro indarrak berreskuratu nituen, eta lasterketaren amaieran, maldan behera, estadiora iritsi nintzen. Ikaragarria izan zen!

Txapelketa Kazakhstaneko Almaty hirian jokatu zen. Kazakhstan zoragarria da. Almaty oso hiri anitza da, herrialde desberdinetako eta leku guztietako jendea dago. Eta bizi dudan esperientzia, zirraragarria! Oso ondo tratatu gaituzte eta bertako jendearekin bazkaldu genuen. Hiria oso polita da. Asko gustatu zait, Maider.

Almatyn edo inguruan turismoa egiteko aukera izan zenuen?
Ostiralean mendietara bisita antolatu zuten, bertako hegaztiak ikusteko, baina guk hirian egotea erabaki genuen, bidaiarekin nekatuta geundelako. Almatyko alkateak bisitatu gintuen eta irabazleoi opari bat eman zigun. Zorionak eman zizkigun kazakhstanderaz eta errusieraz, eta oso ondo tratatu gintuen. Oro har, Almatyn eta Kazakhstanen topo egin dugun guztiek bikain tratatu gaituzte.

Zer da Kazakhstanetik gehien gustatu zaizuna?
Berotzeko eta entrenatzeko egon ginen parkea asko gustatu zitzaidan, eta jende guztiarekin bazkaltzen egon ginen jauregia ere zoragarria zen. Dortsala hartzeko tokia, merkatua eta hotela ere gustatu zitzaizkidan. Janaria ere gustatu zitzaidan; osa ona zegoen.

Eta gutxien?
Gutxien gustatu zitzaidana lasterketako ordutegia da. Goiz zen.

Noiz hasi zinen atletismoan, Ibai?
2017an hasi nintzen atletismoan, aire zabalean egin zitekeen banakako kirol bat bilatzen nuelako. Banakako beste kirol batzuetan ere pentsatu nuen, baina atletismoa aukeratu nuen. Bakarkako kirolean hobeto moldatzen naiz, taldean baino. Txikitan futbola egin nuen, baina utzi nuen. Frontenisean ere hasi nintzen, baina hori ere utzi nuen. Eta azkenean atletismoan zentratu naiz. Azkarra izatea eta amets bat betetzea gustatzen zait: jolas paralinpikoetara nola edo hala joatea. Espainiako selekzioarekin egotea ere gustatzen zait, futbol taldeek egiten duten bezala, hautatua izatea, eta telebistan nire burua ikustea. Ea noizbait telebistan futbola ikusten dugun bezala, kirol egokituko txapelketa handiak ere ikus ditzakegun! Eta ahal dela, ni ikustea txapelketa handietan!

Zer ematen dizu atletismoak zure bizitzan?
Denetarik, egia esan. Gustuagatik, distrakzioagatik, hobby bezala, dibertsioagatik, osasuntsu egoteagatik, lagunak egiteagatik, lekuak bisitatzeagatik, egin behar dudan ahaleginagatik eta iraunkortasunagatik praktikatzen dut atletismoa. Nire bizitzan dena dago atletismoari lotuta.

Gaur egun Basauriko Bertako-Javi Conde Klubean zaude. Bai.
Hasiera batean Artunduaga Atletismo Taldean hasi nintzen. Gaur egun oraindik ere Artunduaga klubari lotuta nago, baina aldi berean Javi Conderen taldean ere banago, kirol egokituan zentratzen dena.

Zure entrenamenduez galdetuko banizu.
Nire entrenamenduak zorrotzak eta gogorrak dira. Goi mailan egoteko sufritu behar da edo zure errendimendua hobetu behar duzu gorputzak nahikoa dela esan arte.

Ibai Magdaleno (erdian), entrenamendu saioan

Noiz entrenatzen duzu?
Astean sei egunetan entrenatzen dut, egunero bi orduz. Normalean ostiraletan hartzen dut atseden, baina ostegunengatik aldatu izan dut. Entrenatzeaz gain, jarraitzen duzu dieta espezifikoren bat errendimendu hobea eta emaitza hobeak izateko? Ez. Denetarik jaten dut. Ez daukat egutegi bat egunero zer jan behar dudan zehazten duena. Denetarik jaten dut, osasuntsu.

Aurten Joko Olinpikoak eta Joko Paralinpikoak dira Parisen. Inoiz amestu al duzu joko batzuetan parte hartzea?
Ez naiz oraindik joko paralinpikoetara joan, baina bai Munduko, Europako eta Espainiako txapelketetara. Eta esan diezazuket asko gustatzen zaidala horietan lehiatzea. Beraz, Joko Paralinpikoetan parte hartzeak izugarria izan behar du!

Ametsa egi bihur daitekeela uste duzu? Joko Paralinpiko horietara joatea gustatuko litzaidake, noski, baina nire kategoriarako, T-20rako, proba gehiago jartzea bikaina izango litzateke. Kategoria honetan, adimen-urritasuna dugun atletok lehiatzen gara, eta proba gehiago jarriko balituzte, agian, Joko Paralinpikoetan parte hartzeko aukera izango nuke. Ea ametsa egi bihurtzen den eta Joko batzuetara joan eta irabazten dudan!

Aurten Basauri Kirolaren Europako hiriburua da. Zer espero duzu aurten Basaurirengandik? Urte ona izango da Basauriko kirolarentzat, asko baitago, gainera. Nik espero dudana da Espainiako txapelketa Basaurin irabaztea. Lapatzako zirkuituan jokatuko da. Ilusio handia daukat erronka horri begira.

Etorkizunean atletismoan jarraitzen ikusten duzu zeure burua?
Oraingoz, bai. Urtetik urtera noa. Gustatzen zait atletismoa, ondo sentiarazten nau eta urtetik urtera neure burua gainditzen saiatzen naiz atleta hobea izateko.

Entrenatzaile izan nahi duzu?
Agian entrenatzaile izan naiteke hemendik urte batzuetara. Auskalo. Baina, oraingoz, atletismoa egiten jarraituko dut atleta gisa. Etorkizunak esango du.