Sareak

☉ Basauri

Kepa Aperribai: “Daukadan kafe-makinarik zaharrena Isabelinoa da, XVII. mendekoa”

Kepa Aperribai (Basauri, 1962) basauriarrak 250 kafe-makina baino gehiago ditu bere gain. Etxetik kanpoko lokal batean gordetzen ditu, San Migeletik kanpo

|

basauri kepa aperribai 2016 erakusketa

Kepa Aperribai (Basauri, 1962) basauriarrak 250 kafe-makina baino gehiago ditu bere gain. Etxetik kanpoko lokal batean gordetzen ditu, San Migeletik kanpo, eta munduko herrialde ezberdinetako jatorria dute. Hala nola, Errusia, Txina, Kanada, Italia eta Espainia.

Noiz erabaki zenuen kafe-makinen bilduma egitea?

Aintzinako gauzak eta artea oso gustuko izan ditut betidanik. 25 bat urte nituenean etxean zeramikazko kafe-joko bat aurkitu nuen eta oso interesantea iruditu zitzaidan. Momentu hartan zeramikarik ez zen ikusten eta harrezkero pixkanaka-pixkanaka bilduma osatzen jarraitzen dut.

Mundu osoan egin diren kafe-makinak bildu dituzu.

Bai. Batzuk opariak izan dira eta beste batzuk nik lortuak edo erosiak izan dira. Nire lagunek eta familiak lagundu egin didate bilduma hau geroz eta handiagoa egiten.

Bidaia asko egin behar izan dituzu horietako batzuk lortzeko…

Baten batzuk bai (kar, kar), baina lehen esan bezala, lagunen bat nik aurretiaz bisitatu ez dudan beste herrialde batera badoa, bertako kafe-makinaren bat ekartzen dit. Laguntza handia izan dut.

Zein jatorriko kafe-makinak dituzu?

Egia esan, askotariko jatorria dute. Batzuk aipatzearren: tailandiarrak, errusiarrak, poloniarrak, belgiarrak, frantziarrak, alemanak, txinatarrak, kanadarrak, italiarrak, espainiarrak, baita kubatarrak ere.

Jakingo duzu zein den bildumarako gorde zenuen lehendabiziko kafe-makina?

1920. urteko kafe-makina bat da, Espainiakoa.

Eta, daukazun kafe-makinarik zaharrena?

XVII. mendeko bat. Datu zehatzagoa emateko, 1690. urtekoa da. Isabelinoa.

Etxera, San Migelera itzuli zara erakusketa honekin…

Bai, hala da. Bigarren erakusketa izan da San Migelen egin dudana. Orain dela 18 urte inguru hasi nintzen bilduma hau azaleratzen eta oso gustura nago egin dudan ibilbidearekin.

Gogoratzen al duzu non izan zen lehendabiziko erakusketa hori?

Bai, noski. Hornillos de Cerrato (Palentzia) udalerrian egin nuen nire aurreneko erakusketa. Orain dela 18 bat urteko abuztuan izan zen hori eta handik hilabetera, irailean, San Migelen aurkeztu nuen kafe-makinen inguruko erakusketa.

Garai hartan, zenbat kafe-makina izango zenituen?

Gutxi gorabehera, 150 kafe-makina inguru izango nituela uste dut. Gaur egun azaltzen ditudanen erdia.

Beraz, 250 kafe-makina baino gehiago izango dituzu zure gain…

Kopuru zehatza ez dakit. Hainbeste kafe-makina ditut ezen ez dakidala zenbat ditudan zehatz-mehatz. Baina 250 baino gehiago baditudala konfirma dezaket. Izan ere, Taberna Nagusiko erakusketa honetan 250 kafe-makina ekarri ditut eta lokalean gehiago ditut.

Gainera, beste erakusketa batzuetan ere izan zara, ezta?

Bai. Garrantzitsuenen artean Barakaldoko BECekoa izan dela esango nuke. Hain zuzen ere, Expovacaciones eta Expoconsumo erakusketetan.

Erakusketan ere bisitaldi gidatuak egin dituzu…

Bai. Erakusketa ikustera etorri ziren pertsonei bisitaldi gidatua egiten nien eta kafe-makina bakoitzaren historia kontatzen saiatu nintzen. Hala nola, herrialde bakoitzean nola egiten zuten kafea, zein urtetakoak diren eta zein material erabiltzen zuten kafe-makinak egiteko.

Kafearen eta kafe-makinen historia luzea jakingo duzu orduan…

Bai. Noski, interesa jartzen dut eta eta kafe-makina bakoitzaren jatorria eta historia zein den ezagutzea oso interesgarria da niretzat.

Kafe-makinaren bat lortzeko, anekdotarik gogoratzen duzu?

Asko! Baina beti gogoratuko dudan bat kontatuko dizut: behin kafe-makina bat saldu zidaten, baina dendariak zukugailua zela uste zuen. Dendari hark ez zekien ezta zer saltzen ari zen. Eta horrelako dendari asko ere badago, aintzinatasun dendetako saltzaileak salbu, noski.

☉ Basauri

Basauri Bonua kanpaina berria martxan izango da apirilaren 22tik maiatzaren 19ra arte

|

Bi bonu mota igorriko dituzte: bata 4 eurokoa, bezeroek 6 euro gastatu ahal izateko; eta bestea 10 eurokoa, 15 euro gastatzeko // Geuria

Basauri Bonua kanpaina berria abiaraziko du Udalak apirilaren 22tik maiatzaren 19ra bitartean. Guztira herriko 140 saltoki atxiki dira kanpainara, iaz baino zazpi gehiago.

Aurreko urteetan bezala, bi bonu mota igorriko dituzte: bata 4 eurokoa, bezeroek 6 euro gastatu ahal izateko; eta bestea 10 eurokoa, 15 euro gastatzeko.

Aurrekoetan bezala, bonuak ez dituzte formatu fisikoan aterako. Bonuak kanpainari atxikitako establezimenduetan eskuratu behar dira, eta gehienez ere 60 eurora arteko bonuak erosi ahal izango dira NAN/IFZ/AIZ bakoitzeko. Ezin izango dira diru-truke aldatu eta, erabiltzen ez badira, ez da dirua itzuliko.

Kanpainara atxiki diren establezimenduen zerrenda apirilaren 22an bertan publikatuko dute bono.basauri.eus webgunean. Hala ere, saltoki bakoitzak Basauri Bonua identifikazio-eranskailua izango du.

100.000 euro gehiago

Basauriko Udalak 300.000 euro bideratu ditu aurtengo kanpainara, iaz baino 100.000 euro gehiago.

“Guztira 300.000 euro bideratuko ditugu ekimen honetara, baina udalerrian izango duen inpaktu ekonomikoa askoz ere handiagoa izango da, bezero bakoitzak bonua eskuratzean eta erosketa egitean ordaintzen duen kopurua gehitu behar baitzaio kopuru horri”, diote udal ordezkariek.

Osorik irakurri

☉ Basauri

Basauriko Meeting Probak maiatzaren 5ean izango dira Artunduagako kiroldegian

|

Proba Nazioarteko Batzorde Paralinpikoaren Nazioarteko Atletismo Egutegian sartuta dago // Geuria

Basauriko Meeting Probak maiatzaren 5ean, igandez, izango dira Artunduagako kiroldegian 09:00etatik aurrera. Aurten 26. edizioa da eta guztira 40 proba izango dira, tartean kategoria paralinpikokoak.

Izan ere, proba Nazioarteko Batzorde Paralinpikoaren Nazioarteko Atletismo Egutegian sartuta dago, eta, beraz, meetingaren emaitzek errekorretarako eta KPIren rankingerako balioko dute.

Basauriko Meeting Probetan parte hartzeko izena emateko epea zabalik dago apirilaren 21era arte. “Beharrezkoa da atletek, gidariek eta entrenatzaileek izena emateko inprimakia betetzea”, diote batzorde antolatzailetik.

Meetinga Basauriko Merkatari Elkarteak antolatzen du, Udalaren laguntzarekin.

Osorik irakurri

☉ Basauri

Basauri metro geltokia itxi dute “sute txiki” batengatik

|

basauri metro bilbao 2016 bost urte
Basauriko metro geltokia // Artxiboko irudia, Geuria

Arazo teknikoak direla eta, Etxebarri eta Basauri geltokien artean zerbitzua eten egin du Metro Bilbaok. Gainera, Basauri geltokia itxita egongo dela adierazi dute, “beste abisurik eman arte”.

Suhiltzaileek jakinarazi dutenez, “sute txiki bat” piztu da metro trenaren gainean, eta adierazi dutenez Metroko langileek eurek amatatu dute.

Osorik irakurri

☉ Basauri

Thailandian gaixo dagoen basauriarra ekartzeko hegazkin medizalizatua prestatzen ari dira

|

Alex Garcia, Usoa Martinez bere emaztearekin batera //

Alex Garcia Galas basauriarra (Basauri, 36 urte) pankreatitisak jota gaixorik dago Bangkokeko (Thailandia) ospitale batean.

Otsailaren 25ean ospitaleratu zuten Zainketa Intentsiboetako Unitatean (ZIU) eta ordutik bere senideak Euskal Herriratzeko ahaleginetan dira.

Alexen ingurukoek zabaldu dutenez, familiak, “etsi-etsian”, hegazkin medikalizatu bat kontratatu zuen bertara ekartzeko, baina ez zioten hegan egiten utzi, “barne-odoljario larria izateko arriskua” baitzegoen.

Familiak 221.000 euro jarri zituen hegazkin medikalizatu hori kontratatzeko, baina ezin izan dutenez erabili, diru hori galdu dute.

Gauzak horrela, crowfunding kanpaina bat abiarazi dute Alexen lagunek eta senideek. Momentuz 91.371 euro bildu dituzte.

Defentsa Ministerioarekin harremana

Alexen senideak Margarita Robles Defentsa ministroarekin harremanetan jarri ziren aste hasieran eta horrek egoera aztertuko zuela adierazi zien.

Orain, Eitb-k jakinarazi duenez, Defentsa Ministerioak baieztatu du pankreatitisa duen gaztea Espainiaratzeko (Madrilera eramango lukete) hegazkin medikalizatua prestatzen hasi direla, baina oraingoz ez dutela datarik zehaztu.

Diru bilketa Basaurin

Estatuko zein Euskal Herriko hainbat herritarrek dohaintzak egin dituzte. Momentuz 91.371 euro bildu dituzte eta asmoa da 221.000 eurora iristea.

Basaurin El Maño Basozelaiko Auzo Elkarteak kanpaina bat jarri du martxan dirua biltzeko: “Basozelaiko Auzo Elkartetik gure babesa adierazi nahi diogu gure bizilagun Alexen familiari eta datozen egunetan zehaztuko ditugu egingo ditugun ekitaldi solidarioak”, diote.

“Basozelaiko saltokietan itsaulapikoak jarriko ditugu Alexen familiari dohaintzak egiteko, eta diru-sarrerak egiteko kontu-zenbaki bat zehaztuko dugu”, adierazi dute.

Osorik irakurri

☉ Basauri

Ikastetxeetako jolastokiak ikuspegi feministarekin eraldatzeko prosezua hasi dute Basaurin

|

Apirilaren 23an egingo dute mahai-inguru irekia / Geuria

Ikastetxeetako jolastokiak ikuspegi feministarekin eraldatzeko prozesua hasi dute Basaurin. Horretarako Udaleko Berdintasun Arloak jardunaldi bat antolatu du eskoletako jolastokiak ikuspegi feministarekin eraldatzearen garrantziari buruzko gogoeta bultzatzeko.

‘Patioetan hamaika aukera. Jolastokiak konpon eta berdintasuna lor’ lemapean, apirilaren 23an mahai-inguru ireki bat antolatu dute Basauriko Udalak eta Marieneak 1era2kain egitasmoaren barruan.

Jardunaldia Ibaigane Kultur Etxean izango da 17:30etik 20:00etara bitartean, eta Basauriko jolastokiak eraldatzeko prozesuan parte hartu duten Lehen Hezkuntzako ikastetxeen esperientziak aurkeztuko dituzte, “haien zailtasun, erronka eta aukerekin”.

Ildo horretan, etorkizuneko erronkak jasoko dituzte “eskola-ingurune inklusibo, genero-estereotiporik gabekoa eta ingurunearen eta pertsona guztien zaintzaz arduratutako baterantz urratsak egiten jarraitzeko”.

Jardunaldian parte hartu nahi duten herritarrek izena eman behar dute esteka honen bitartez edo 605 173 119 telefono zenbakira deituz apirilaren 22a baino lehen.

Osorik irakurri