☉ Basauri
Sara Mediavilla: “Jasotzen dudan soldata bidaiatzeko aprobetxatzen dut”
Familia ingeles batekin eta alokairuan dauden beste bi neskekin bizi da Sara Mediavilla basauriarra Newbury herrian, Erresuma Batuan.
Familia ingeles batekin eta alokairuan dauden beste bi neskekin bizi da Sara Mediavilla basauriarra Newbury herrian, Erresuma Batuan
Ingelesa ikasi nahi dudalako, bizipen berriak nahi ditudalako, etxetik irten nahi dudalako… hauek izan ohi dira atzerrira joan nahi izateko arrazoietariko batzuk. Baina guztiok eduki, ez daukagu kanpora joateko paradarik, dirua dela, harreman-loturak direla… Geure gaurko elkarrizketatuak, ordea, bai. Basauriar gazte honek zortzi hilabete daramatza aupair atzerrian eta hara joatearen arrazoiak eta bizipenaren nondik-norakoak jakin nahi ditugu.
Nora joan zara eta zenbaterako?
Erresuma Batuko hego-mendebaldean dagoen Newbury izeneko herrira etorri naiz. Herri oso lasaia eta polita da, baina garestia ere bai. Diotenaren arabera, arrazoia Londresetik ordu batera eta Oxfordetik ordu erdira egotea da. Ezaguna da duen Racecourse, zaldi lasterketak egiten diren tokia, delakoagatik. Uztailean etorri nintzen, 19an hain zuzen ere, beraz, hamar hilabete daramatzat eta oraindik beste bi falta zaizkit. Baina ikusteke dago zertxobait gehiago geratuko ote naizen.
Zein izan zen atzerrira joan nahi izateko arrazoia?
Gainezka nengoen, aldi berean gauza piloa egiten ari nintzen: gidabaimena ateratzen, ingelesa ikasten, kitarra jotzen ikasten, eskola partikularrak ematen… eta hori gutxi balitz, amarekin arrandegian lanean ere banengoen. Gogoratzen dut magisteritza ikasten nenbilenean norbaitek atzerrira aupair joateari buruz zeozer kontatu zidala. Beraz, hau guztia amaitzean, argi neukan horrelako bizipen bat bizi nahi nuela eta horri ekin nion! Inondik inora espero ez nuena zen ni neu bakarrik joatea, erronka izugarria baitzen! Baina azkenean horrela suertatu zen eta bakarrik egin izanaz harro nago. Uste dut atzerrira joatea edozein hizkuntza ikasteko eta, era berean, pertsona moduan hazteko aukerarik hoberena dela. Bitartean magisteritza oposaketak prestatzen ere banabil.
Zer da atzerrira aupair joatea?
Aupair familia gonbidatzaile batekin bizitzera joatea eta familia horretako seme-alabak zaintzea da, etxeko lan arinak egiten lagunduz. Gehienezko lan-orduak aldatu egiten dira aupair aukeraren arabera eta astean egun bat, gutxienez, libre izaten da. Trukean, aupairra familia hartzailearekin bizi da, familiako kide bat izango balitz bezala, eta astean diru-kopuru txiki bat jasotzen du. Batzuetan, aupairrak hizkuntza-ikastaroak egiten ditu ordu libreetan.
Ni, adibidez, familia ingeles batekin, ama eta bere bi semeekin, eta alokairuan dauden beste bi neskekin bizi naiz. Eta esan beharra daukat zortea izan dudala, denak oso jatorrak direlako eta oso gustura nagoelako! Lanari dagokionez, 30 ordu egiten ditut astean. Aste barruan 13.00etatik aurrera libre daukat eta asteburuak osorik. Jasotzen dudan soldatarekin bidaiatzeko aprobetxatzen dut. Dagoeneko Basingstoke, Reading, Milton King, Thacham, Bath, Shanboroug, Londres, Cambridge eta Lambourn bisitatu ditut. Azken honetan ohikoa da biztanleak kaletik zaldi gainean ikustea. Frantziara ere joana naiz. Hurrengo helburua Oxfordera joatea da. 25 urte baino gutxiago edukitzeagatik trenean bidaiatzeko eskaintzen dituzten bonoak direla medio, hemen bidaiatzea merkeago ateratzen zait.
Zer da handik gehien gustatu zaizuna?
Ingurua, natura. Irakurtzea izugarri gustuko dut eta honekin gozatzeko inguru polit ugari dago. Honen harira, hemendik izarrak primeran ikusi ahal izatea ere bai. Gutxien gustatzen zaidana, arrain falta, eguraldia eskasa eta otorduak dira, hemen oso goiz afaltzen baitute.
Bertakoak, hemengoekin alderatuta, nolakoak dira?
Oso desberdina. Hemengoak oso independenteak dira eta normalean ez dituzte sentimenduak askatasunez adierazten. Maitasun adierazpenak ez dituzte edonon egiten eta haien iritziz musuak gehiegikeria dira. Normalean lagunartean bi musu beharrean, besarkadak ematen dizkiote elkarri.
Nola moldatzen zara ingelesarekin?
Orain hobeto. Dena den, etorri baino lehen desastre hutsa ez nintzenez, orain nahiko ondo moldatzen naizela uste dut. Astean hirutan Toodle Group izeneko mintzasaio batzuetara joaten saiatzen naiz. Bertan pixka bat ordaindu eta tea eta gailetak eskaintzen dizkigute eta umeek bertako txokotxo batean jolasean aritzeko aukera daukate. Ingelesa gehiago praktikatzeko, saiatzen naiz espainiarrekin ez elkartzen; zaila bada ere, asko baitaude. Horrez gain, astean behin irakasle partikular batekin lotzen naiz.
Zer-nolako bizipena izaten ari da?
Berezia eta oso ona, ez nukeen inoiz imajinatuko horrelakoa izango zenik. Alde batetik, zoragarria izaten ari da, askatasun handia dut eta aurreko ikasturtearekin alderatuta, askoz lasaiago nabil. Bestalde, lehenago esan bezala, ingelesa ikasten eta oposaketak prestatzen ari naiz, beraz oporretan ez nago, bete-beharrak ditut. Horrez gain, maite dudan jendea izugarri faltan botatzen dut. Hasieran geure ohiko eremu erosotik hanka bat aterako dugula pentsatzean, joera dugu bertigoa sentitzera eta segurtasun falta itzela izatera. Baina hori guztia poliki-poliki gainditzen da eta posible da atzerrira bakarrik joatea! Hemendik horrelako bizipen bat bizitzera animatzen zaituztet! Ni orain bizi izandakoa kontatzen ari natzaizue, baina zirrarak azalezinak dira. Anima zaitezte! Seguru nago ahaztezina izango zaizuela!
Etxebizitza-eredu alternatiboak azaltzeko topaketa antolatu dute Setem Hego Haizeak eta Sagarrak Ekologista Taldeak gaur, urtarrilak 21, Basaurin.
Irati Mogollon soziologoak ‘Posible al da komunitatean bizitzea?’ hitzaldia emango du 18:00etatik 20:00etara Pozokoetxeko Kultur Etxean. Hitzaldia gazteleraz izango da.
Solasaldian, komunitatean bizitzearen kasu praktikoak, esperientziak, baldintzak eta etxebizitrza kolaboratibo motak azalduko ditu.
“Gure egungo etxebizitza-errealitateei buruz hausnartuko dugu, errealitate horiei aurre egiteko estrategia kolektibo posibleak detektatuko ditugu eta Europan zeharreko etxebizitza kolaboratiboen kasuak aztertuko ditugu”, diote antolatzaileek.
Zaintza kolektiboak
Bestetik, urtarrilaren 22an, Irati Mogollon soziologoak tailer bat eskainiko du: ‘Zaintzaren arkitekturak eta zahartze aktibista’. Jarduera hau ere Setem Hego Haizeak eta Sagarrak Ekologista Taldeak antolatu dute.
“Tailer honetan, zaintza kolektiboari dagokionez toki bakoitzean dauden egiturak aztertuko ditugu, baita egitura horiek nolakoak izatea gustatuko litzaigukeen eta horiek gauzatzeko zer ekintza-ahalmen dugun ere.
Tailerra online izango da eta hau ere gazteleraz. Interesdunek izena eman behar dute esteka honen bitartez (doakoa).
Irati Mogollon euskal soziologoa da, adinekoen ahalduntze feministan, ekonomia feministako ikerketa-ekintzan eta etxebizitza kolektiboen prozesuen talde-bideratzean espezializatua, diziplinarteko ikuspegi batetik.
☉ Basauri
‘Basauriko auzokide berriak’ dokumentalak herrian bizi diren migratzaileen bizipenak ikusaraziko ditu
‘Basauriko auzokide berriak’ dokumentala aurkeztuko dute urtarrilaren 25ean, larunbatez, San Migeleko Taberna Nagusian
Basaurin bizi diren migratzaileen bizipenak ikusarazten dituen dokumentala diseinatu eta sortu du Zurrumurruen Aurkako Sareak, Basauriko Udalaren laguntzarekin.
‘Basauriko auzokide berriak’ da dokumentalaren izenburua eta zazpi bizilagunen testigantzak jasotzen ditu: Carol, Alí, Bouba, Fatu Matu, Jon, Toktam eta Nati.
Testigantza horien bidez, jasotako harrerari buruzko eta herrian kulturen arteko elkarbizitza eraikitzeari buruzko beren esperientziak, sentsazioak eta proposamenak partekatzen dituzte dokumentalean agertzen diren herritarrek.
Dokumentala urtarrilaren 25ean, larunbatez, aurkeztuko dute San Migeleko Taberna Nagusian, 11:00etan. Aurkezpenera joateko izen-ematea telefonoz (606 050 662) edo posta elektronikoz (amekadi@gmail.com) egin dezakete herritarrek.
“Basauriar guztiak animatu nahi ditugu film laburraren aurkezpen ofizialean parte hartzera, lan kolektibo baten emaitza baita. Dokumental horren bidez, hausnarketarako hainbat gune bultzatu nahi ditugu, hausnartu ahal izateko gure harremanak zelakoak diren eta zer egin dezakegun, gure egunerokotasunean, Basaurin, gure aniztasuna aitortzeko eta, gure aurreiritziak atzean utzita, errespetuz eta inklusioz jarduteko”, dio Isabel Cadaval Basauriko Udaleko Bizikidetza Aniztasunean Ataleko eta Immigrazioko zinegotziak.
Urtarrilaren 25ean, larunbatez, GKSk manifestazioak deitu ditu Bilbon eta Iruñean (18:00, Jesusen Bihotza plazatik), ‘Gerraren eta faxismoaren aurka, gazte langileok lehen lerrora’ lemapean.
Mobilizatzeko deialdia zabaltzeko helburuarekin, Basaurin eta Galdakaon mural-margoketak antolatu dituzte gaur, urtarrilak 18: goizean Basaurin eta arratsaldean Galdakaon.
Muralaren diseinua Elene Uribarri galdakoztarrak egin du eta Basaurin dozena bat gazte batu dira.
Eguerdian batu dira Bentako plazan Basauriko GKSko dozena bat gazte // Geuria
Olatz Galindez Verano Hego Uribeko GKSko kidearekin berba egin dugu goizean Basaurin: “Azken aldian eskualdean hedatzen ari dira faxismoari bidea ireki ahal dioten ideia erreakzionarioak, konkretutik, arrazistak eta matxistak. Adibidez, Basaurin pintada arrazistak agertu dira eta Arrigorriagan eraso arrazista bat eman zen abenduan”.
“Faxismoa langile klasearen aurkako ideologia eta praktika bezala identifikatzen dugu, eta sektore zaurgarrienak kolpatzen ditu; batez ere, migranteak, emakume langileak eta LGTBI kolektiboak. Horregatik, horren aurrean ikusten dugu beharrezkoa dela kaleak hartzea eta gurekin mobilizatzera animatzen zaituztegu”, dio Galindezek.
☉ Basauri
Basaurik 82.000 euro gastatu behar izan zituen 2024an ekintza bandalikoek eragindako kalteak konpontzeko
Zenbateko osoaren erdia baino gehiago, 45.800 euro, Solobarriako karpako pintadak eta olana konpontzeko erabili zituen iaz Basauriko Udalak
2024an zehar herrian izandako ekintza bandalikoek eragindako kalteak konpontzeko 82.000 euro gastatu zituen Basauriko Udalak.
Datuak datu, kalte hauek ordaindu zituen iaz Udalak:
- Eraikinetako hormetako edo Solobarriako karpako pintadak kentzeko: 45.800 euro
- Erre zituzten 10 edukiontzi ordezkatzeko: 12.000 euro
- Igogailuak konpontzea: 11.844 euro
- Bizkotxaldeko parkeko sareak eta segurtasun-zoru berriak konpontzeko: 7.477 euro
- Arrapala mekanikoetako beiren haustura konpontzeko: 4.260 euro
- Komun publikoetan egindako ekintzak garbitzeko: 1.016 euro
“Ekintza horiek kalte handiak sortzen dizkiete zuzenean basauriar guztiei, espazio publiko partekatuak hondatzen dituzte eta herritar guztiengan eragin duen aparteko gastua dakarte”, diote udal ordezkariek: “Adibidez, norbaitek nahita eragitea igogailuek eta arrapala mekanikoek ibiltzeari utz diezaioten izugarrizko kaltea da mugikortasun murriztua duten bizilagun askorentzat”.
Gauzak horrela, Basauriko Udalak dei egiten die gizalegerik gabe jarduten duten edo beren ardurapeko pertsonei hori egiten uzten dieten herritar gutxi horiei, eta eskatzen die haien ekintzen ondorioez jabe daitezen.
Pirritx, Porrotx eta Marimotos pailazoek ‘Euskararen zuhaitza’ oparitu zieten iazko maiatzean Basozelaiko Beat taldekoei. Pago bat da eta Sagarrak talde ekologistaren laguntzarekin, abenduan landatu zuten auzoan.
Ekitaldira bertaratu ziren. “Landatu dugun pago txiki honek, Euskararen zuhaitza, hazi egingo da eta horrekin batera euskararen erabilerak ere egingo du gora gure auzoan”, diote Beateko kideek.
Sagarrak taldeko ordezkariak kultura guztietan zuhaitzek balore sinboliko handia dutela nabarmendu zuen: “Euskal Herrian bi zuhaitz nagusi ditugu: haritza eta pagoa. Zuhaitzek eta basoek, hizkuntzak eta kulturak bezala, lurra behar dute sustraiak landatzeko. Zuhaitza hazi egingo da gu apenas konturatu gabe, eta espero dezagun ere euskal hiztunak ere haztea zuhaitzarekin batera”.
Ametzeta auzoko basoak naturalizatuko dituen herri landaketa egingo dute Zaratamon
Arrigorriagako gazteek Logo lehiaketa abiarazi dute kamisetak egiteko
Enaitz Arandia eta Arhane Mendibil zeberioztarrak txapeldun eta txapeldunorde izan dira Bizkaiko Eskuz Banakakoan
Argazkiak / Ibilaldiaren urteari hasiera emateko Herri kirolen desafioa giro bikainean ospatu dute Galdakaon
Argazkiak / 650 lagunek hartu dute parte Arrigorriagako Ausartak Mendi Lasterketaren azken egunean
Argazkiak / Errege Magoen magiak etxeko txikienen ilusioa piztu du beste urte batez
Bideoa / Ibilaldia 2025 batzordea: “Herri kirolen desafioa arrakastatsua izan da! Oso pozik gaude”
Bideoa / Gerraren eta faxismoaren aurkako murala margotu du Hego Uribeko GKSk Basaurin
