Sareak

☉ Galdakao

Alex ‘Welder’ Diaz: “Txikitasunetik gorenera hel daitekeela uste dut”

Gogorik ez zaio falta Alex ‘Welder’ Diaz (Galdakao, 1994) galdakoztarrari. Websail bat zuzendu eta idatzi du: El Himno Mundial.

|

'El Himno Mundial' websaila idatzi eta lehenengo denboraldia grabatu du Alex 'Welder' Diaz galdakoztarrak // Argazkia: Alex 'Welder' Diaz

Gogorik ez zaio falta Alex ‘Welder’ Diaz (Galdakao, 1994) galdakoztarrari. Websail bat zuzendu eta idatzi du: El Himno Mundial. Interneterako ekoizten den fikziozko saila da eta dagoeneko lehenengo denboraldia grabatu du. Oraindik ez dago sarean ikusgai, baina nazioarteko jaialdi ezberdinetan aurkeztu du. Asmoa lau denboraldi grabatzea da eta ondoren osorik sarean zabaltzea, “aurreikuspenen arabera, 2020rako”.

El Himno Mundial websailaren filmatze taldeak Estudio Stonewood du izena eta gaur egun 12 lagunek osatzen dute: Alex ‘Welder’ Diaz bera (Galdakao), Mabel Luna (Venezuela/Bilbo), Jie He (Bilbo), Oscar Alonso (Basauri), Ander Garcia (Bilbo), Marcos Crespo (Durango), Aroa Tueros (Ortuella), Koldo de las Heras (Muskiz), Itxaso Domingo (Bilbo), Miriam Rodriguez (Santurtzi), Aitor Fresneda (Arrigorriaga) eta Daniel Cobo (Kanariak/Arrigorriaga).

Nolatan, bada, websail bat?
El Himno Mundial eleberria izango zelakoan idazteari ekin nion orain dela bi urte. Gaur egun filmatze taldea osatzen duten zenbait lagunek animatu ninduten nobela benetako irudien bidez grabatzera, istorioa berez oso ikusizkoa baita. Hala ere, eleberriaren korapiloa oso luzea zen film bezala grabatzeko, eta beraz telesail bezala filmatzeko aukera bakarrik genuen.

Eta horri heldu zenioten.
Bai. Taldekide batek websailak sustatzen dituen Bilboko Seriesland jaialdiaren berri eman zigun eta orduan erabaki genuen kapitulu pilotu batzuk grabatzea. Hasieran hiru kapitulu grabatu genituen (jaialdirako aurkez daitekeen gutxienekoa), baina azkenean zortzi filmatu genituen! Hortaz, lehenengo denboraldi osoa grabatuta dugu. Guztira lau denboraldi izango ditu websailak eta Bilboko jaialdiko esperientzia eta gero, argi dugu denak filmatu nahi ditugula. Gure asmoa da websail guztia grabatzea eta ondoren osorik sarean zabaltzea.

Zertan datza El Himno Mundial websaila?
El Himno Mundial lanak heroiaren kontzeptua du oinarri. Heroiaren definizioa, famaren prezioa, erospena eta sakrifizioa biltzen ditu. Road Movie, komedia dramatikoa eta zientzia fikzio soziala generoak lantzen ditu eta etorkizunean dago kokatuta, non egungo teknologia berrabiatu eta bere horretan geratu den. Bakea eta lasaitasuna zapuztuta, gerra eta armatutako gatazkak dira nagusi; post-apokalipsia da nagusi. Mundua leku eder eta izugarria dela erakutsi nahi dugu, gizakiok egiten duguna eginda ere. Hori da islatu nahi dugun ideia.

‘El Himno Mundial’ websaileko protagonistetako batzuk // Argazkia: Alex ‘Welder’ Diaz

Non egin dituzue lehen filmaketa?
Euskal Herriko eta inguruko lekurik politenen bila aritu ginen, berariazko post-apokalipsi horretako “edertasun osoa” erakusteko. Esate baterako, Getxoko portu zaharra eta bertako auzotarrak atondu genituen, Nordur izeneko herri zaharra irudikatzeko (Norduren bizi dira El Himno Mundial websaioko protagonistak). Esatea dago ez dugula herri edo hiri handietan filmatu, bertako tokiak ez datozelako bat istorioarekin.

Momentuz websaila ez dago sarean.
Ez. Gure asmoa zen lehenengo denboraldia osorik publikatzea Seriesland jaialdian aurre-estreinatu eta gero, baina websailak izan zuen arrakasta ikusita, erabaki genuen buru-belarri sartzea istorio osoa filmatzeko eta behin bukatuta dagoenean, sarean oso-osorik zabaltzeko. Aurreikuspenen arabera, 2020an estreinatuko dugu osorik. Ez dugu arin joan nahi eta websaila goizegi zabaldu. Ez dago inor websailaren zain, eta zain daudenek badakite websailerako onena nahi dugula eta dagokion momentuan publikatuko dugula.

Hala ere, nazioarteko jaialdietan aurkeztu duzue El Himno Mundial.
Bai. Argi dago Seriesland jaialdiak ateak ireki dizkigula nazioartera eta horregatik oso pozik eta eskertuta gaude. Nazioarteko jaialdi hauetan aukeratu dute gure websaila: Buenos Aires Web Fest (Argentina), Sicily Web Fest (Italia), Asia Web Awards (Korea), Realist Web Fest (Errusia), TSFM (Italia), London Short Series Festival (Ingalaterra), Apulia Web Fest (Italia) eta Miami Web Fest (Estatu Batuak). Aipatzekoa da Koreako jaialdia dagoeneko ospatu dela eta sari bat jaso genuela!

Zein ikusleri dago zuzenduta websaila?
Gazteek eta helduek ikus dezakete El Himno Mundial. Norberarengandik ikasten jarraitzeko eta bide ezezagunetarantz joateko berandu ez dela uste duen edozeinek ikus dezake websaila. Gainera 10 urteko ume batek ere ikus dezake eta bere ustetan interpretatu. Nire iritziz disfrutatzeko websaioa da.

‘El Himno Mundial’ websaileko eszena bat // Argazkia: Alex ‘Welder’ Diaz

El Himno Mundial zuzentzeaz gain, gidoia ere idatzi duzu.
Hala da. Izugarrizko maitasuna eskaini diogu gidoiari. Mezu bat bidali nahi dugu gidoiarekin, baita ikuslea harrapatu ere. Gidoia idazteko prozesua oso luzea izan da. Gidoia idaztea ez da teklatuaren aurrean esertzea eta ideiak botatzea. Filosofia edo zerbaiten inguruko iritzia adierazteko metrajearen errealizazioan sinisten dut. Gai baten inguruan hitz egitea, alegia.

Adierazi nahi duzun ideia argi izan behar duzu, baita istorioaren inguruan darabilen elementurik txikiena ere. Eta horrek bere denbora behar du. El Himno Mundial lanaren istorioa idazten lau urte eman ditut. Niretzako gidoilariaren barnekoa erakusten du, publikoari guztiz zabalduko diozuna. Zure burua gehiago ezagutzen laguntzen dizu.

Finantziazioari dagokionez, zaila da websail bat aurrera eramatea?
Lehenengo denboraldia gure poltsikoetatik ordaindu dugu eta laguntza ez monetarioak ere jaso ditugu. Egia da, baita ere, gero eta jende gehiago dagoela prest proiektuan laguntzeko. Gero eta gehiago gara lantaldean eta horrek motibazio gehiago izaten lagundu digu. Zenbait merkatari txikik edota erakundek laguntza eman digute proiektu hau aurrera eramateko.

Websailen eta telesailen arteko diferentziaz galdetuko banizu…
Galdera horrek ñabardura askotako erantzunak ditu, baina ez nahasteko bi desberdintasun aipatuko dizkizut. Alde batetik, kapituluen iraupena. Websail batek gehienez 15 minutu irauten ditu, eta telesail batek, ordea, iraupen askoz luzeagoa du. Bestetik, websailek, telesailek ez bezala, indie faktorea (ez amateurra) delakoa dute: “Nola egin dute hori hain aurrekontu txikiarekin?” edo “Filtrorik gabeko autore batek eginikoa da obra hau?”, bi adibide jartzearren.

Qué Vida Más Triste fenomenoa. Fikziozko lehen websail espainiarra da, non eta Hego Uriben sortua, Basaurin.
Qué Vida Más Triste maite dut! Zorionez lantalde horretako batzuekin harremana dut. Ideia on batekin arrakasta lor dezakezula erakusten duen adibidea da QVMT. Inguruko norbait bere obrarekin jende askorengana irits daitekeela erakutsi zidan QVMTk. Txikitasunetik handitasunera hel daitekeela sinetsita nago eta hori inspirazio iturri izan da niretzako.

El Himno Mundial ahalik eta jende gehienarengana iristea nahi dut eta ikusleek ikus dezatela kamara atzean egiten dugun lana eta jartzen dugun pasioa. Zaila dela? Ba ez dakit, baina saiakerarik egiten ez badugu, ez dugu inoiz jakingo! Ikus dezakezunez, irrika eta grinarik ez zaigu falta, baina oinak lurrean mantendu behar ditugu.

☉ Galdakao

Argazkiak / Galdakaoko Udalaren aurkako “eraso euskarofoboa” salatu dute ehunka herritarrek

Hizkuntza politiketan jauzi bat emateko garaia dela aldarrikatu dute gaur Kontseiluak eta Bagabiz Euskara Elkarteak

|

Euskararen kontrako “beste oldarraldi judizial bat” salatu dute gaur Galdakaon ehunka herritarrek. Zehazki, Galdakaoko Udalak 2022an egindako gizarteratzeko eta laneratzeko teknikari lanpostua egonkortzeko deialdian ezarritako euskara eskakizuna baliogabetzearen Bilboko epaitegiaren epaia salatu dute.

Epai horren arabera, “diskriminatzailea” da euskara hizkuntza eskakizuna eskatzea: “Oldarraldi judizialak ez du etenik. Sententziaz sententzia, gero eta argiago geratzen ari da olatu erreakzionario, atzerakoi eta euskarafobo honen atzean ezkutatzen den mezua: urrunegi joan zarete eta mugak jarri behar dizkizuegu”, adierazi dute gaur Galdakaon egin duten elkarretaratzean. Guztira 200 lagun bertaratu dira Kontseiluak eta Bagabiz Elkarteak deitu duten euskararen oldarraldiaren kontrako kontzentraziora.

“Edozerk balio du epaitegietatik euskararen normalizazioa sustatu nahi duten neurriak baliogabetzeko: ezin da euskara eskatu “zailegia” delako, ezin da euskara eskatu “inposizioa” delako, ezin da euskara eskatu “gehiegizkoa” delako, ezin da euskara eskatu “diskriminatzailea” delako… Eta horrela, Galdakaoko Udalean gizarteratzeko eta laneratzeko teknikari lanposturako euskara eskakizuna gehiegizkotzat jo du epaileak, Udalaren eskumenaren aurka eta herritarren hizkuntza eskubideen kaltetan”, diote Kontseiluko eta Bagabiz Euskara Elkarteko ordezkariek.

Bai Kontseiluak bai Bagabiz Euskara Elkarteak “gogor” salatu dute “botere judizialaren injerentzia hau”, eta, era berean, “euskararen ekosistema berri bat” aldarrikatu dute, “gure eskubideak egiazki bermatuko dituena eta euskaraz bizitzea posible egingo duena”, diote.

“Erasoei erantzun behar zaie, baina bada garaia harago joateko, hizkuntza politiketan jauzi bat emateko: aurre egitetik, aurrera egiteko”, diote, eta gaineratu dute: “Gure herriko edozein herritarrari ere dei egiten diogu, eremu publiko zein pribatuan, bere hizkuntza-eskubideak urratu direla sentitzen badu, Hauspotu zerbitzuaren bidez horren berri eman dezan”.

350 atxikimendu

Atzo, Galdakaoko Udaleko langileek kontzentrazioa egin zuten udaletxe aurrean, ELA eta LAB sindikatuek deituta. Eta gaur, Kontseiluak eta Bagabiz Elkarteak deitutako herri elkarretaratzera ehunka lagun batu dira.

Era berean, Galdakaoko Udalaren aurkako eraso euskarofoboa salatzeko atxikimendua eman dute 300dik gora norbanakok eta herriko 35 elkartek eta taldek.

“Argi utzi nahi dugu euskaraz bizi nahi dugula eta ez dugula eskubide murrizketarik onartuko!”, bukatu dute elkarretaratzea.

Osorik irakurri

☉ Galdakao

Lanpostu guztietan “euskararen gutxieneko ezagutza bermatzea” aldarrikatu dute Galdakaoko udal langileek

Euskararen aurkako “beste eraso bat” salatzeko elkarretaratzea egin dute gaur eguerdian Galdakaoko Udaleko langileek

|

Galdakaoko Udaleko langileek elkarretaratzea egin dute gaur eguerdian udaletxe aurrean // Argazkia: LAB Sindikatua

Euskararen aurkako “beste eraso bat” salatzeko elkarretaratzea egin dute gaur eguerdian Galdakaoko Udaleko langileek. Zehazki, Galdakaoko Udalak 2022an egindako gizarteratzeko eta laneratzeko teknikari lanpostua egonkortzeko deialdian ezarritako euskara eskakizuna baliogabetzearen epaia salatu dute.

Epai horren arabera, diskriminatzailea da euskara hizkuntza eskakizuna eskatzea, “eta, beraz, euskararen ezagutza kentzen du Galdakaoko Udalaren lanpostu batetik”, salatu dute ELAko ordezkariek. ELArekin batera LABeko ordezkariek egin dute elkarretaratzea.

Gaineratu dutenez, sektore judizial, politiko eta sindikal batzuek “gaztelaniaren erabateko nagusitasuna inposatu nahi dute, eta, azkenaldian ikusten dugun bezala, euskararen aurka egiten dute etengabe”.

Kontseiluak, ELAk eta LABek 15 urteko epean administrazioa euskalduntzea helburu duen akordioa azpimarratu dute. “Eta horrela, lanpostu guztietan euskararen gutxieneko ezagutza bermatzea, horrela bakarrik bermatuko baita euskaldunek zerbitzua euskaraz jaso eta euskaraz lan egin ahal izatea, gaztelaniazkoek bezala”, diote.

Bihar, ekainak 20, Kontseiluak eta Bagabiz Euskara Elkarteak elkarretaratzea deitu dute Ardanza parkean 19:30ean.

Osorik irakurri

☉ Galdakao

Galdakaoko Santi Brouard plazan eta Mugurun San Juan suak piztuko dituzte

|

Andra Mari Dantza Taldeak eta Zizpak San Juan suak piztuko dituzte Santi Brouard plazan eta Mugurun // Geuria

Udari ongi etorria emateko San Juan bezperan, ekainaren 23ko gauean, suak pizten dira Euskal Herrian. Galdakaon, Urretako jaietan sua pizteaz gain, beste bi su piztuko dituzte: Santi Brouard plazan eta Mugurun.

Galdakaoko Udalak, herriko hainbat eragilerekin batera, hainbat ekintza antolatu ditu:

Egitarauak / San Juan suak Galdakao

Ekainak 23, igandea

Santi Brouard plazan
22:00 San Juan suaren bueltan, erritualak eta konjuruak, ume jokoak, sanjuanetako kantuak, eta erromeria. Andra Mari Dantza Taldeak antolatuta

Muguru
22:30 Dantza ikuskizuna: ‘San Juanetako taupadak’, Taupadak Dantza Eskolak eta Zizpa Gazte Asanbladak antolatuta
22:45 San Juan sua, txokolatada eta San Juan ura. Zizpa Gazte Asanbladak antolatuta
23:00 Erromeria: Gautegun

Osorik irakurri

☉ Galdakao

Euskararen aurkako erasoa salatzeko elkarretaratzea egingo dute Galdakaoko Udaleko langileek

Galdakaoko Udaleko Langile Batzordeak kontzentrazioa deitu du bihar, ekainak 19. Gainera, ekainaren 20an elkarretaratze handia deitu dute Kontseiluak eta Bagabiz elkarteak

|

Iazko uztailean EAEKo alkateek Konstituzionalak euskararen kontra emandako epaia salatu zuten, tartean, Iñigo Hernando Galdakaoko alkatea // Kontseilua

Euskararen aurkako sententzia jaso du Galdakaoko Udalak. Zehazki, Udalak 2022an egindako gizarteratzeko eta laneratzeko teknikari lanpostua egonkortzeko deialdian ezarritako euskara eskakizuna baliogabetu du Bilboko Administrazioarekiko Auzien 4. epaitegiak.

Hori salatu zuten ostiralean Euskalgintzaren Kontseiluak eta Galdakaoko Bagabiz Euskara Elkarteak, eta elkarretaratzea deitu dute ekainaren 20an 19:30ean Ardanza parkean.

Era berean, Galdakaoko Udaleko Langile Batzordeak (LAB eta ELA sindikatuak) ere kontzentrazioa deitu du bihar, ekainak 19, 13:30ean udaletxeko plazan, “administrazioaren euskalduntzearen eta langileen eskubideen aurkako azken sententzia salatzeko”.

Osorik irakurri

☉ Galdakao

Programa / Urretako jaiak 2024

Ekainaren 21etik 23ra bitartean izango dira Urretako jaiak, Galdakaon. Urretaldeak 50 ekintza antolatu ditu:

|

Herri bazkaria izango da ekainaren 23an Urretako jaietan // Geuria

Ekainaren 21etik 23ra bitartean izango dira Urretako jaiak, Galdakaon. Urretaldeak 50 ekintza antolatu ditu:

Egitaraua / Urretako jaiak 2024

Ekainak 20, osteguna
Barrakak irekitzea, Romualda plazan

Ekainak 21, ostirala
16:30 Aurpegiak margotzea eta eskulanen tailerra, Ludotekak antolatuta
17:30 Guarrindongada Jokoak eta ur-borroka, Topaguneak antolatuta
19:00 Pregoia: Erabide Emakume Elkartea eta Femme
19:00 Txosnak irekitzea eta Rally Poteorako txartelak eta Bingorako kartoiak ematea
19:00 Soka Batukada
19:30 Sardina-jan herrikoia
20:00 Mozoilo Irratia
20:00 Musika: Femme
20:00 Musika: Femme-Adur
21:00 Musika: Femme-Lena Makana
22:00 Musika: Viktor Kordoba DJ + Tracy DJ + Divinoa DJ
04:00 Txosnak ixtea

Ekainak 22, larunbata
11:00 Artisau Azoka Urreta parkean
11:00 Patinaje artistikoko erakustaldia eta tailerra Skating 4 Gurpilen eskutik Urreta eskolan
12:00 Txosnak irekitzea
12:00 IA & Robotics Txokoa Izarra Topagunean
12:00 Puzgarriak, ur-puzgarriak… Urreta parkean
12:30 Putxeren III. Lehiaketan izena ematea
13:00 Rally Poteoa
13:00 Kalejira: Da Capo Musika Banda
13:30 Soka Batukada
14:00 Putxeren aurkezpena eta sari banaketa
14:00 Putxera zozketa Urreta zelaian
16:00 Apar festa Urreta parkean
16:00 Mus txapelketa Gure Bastartxue tabernan
17:00 Patata tortillen X. Lehiaketan izena ematea
17:00 I. Futbolin Txapelketa, Iluntze tabernak eta Solabarriak Dardosek antolatuta
18:30 Tortillen aurkezpena eta sari banaketa
19:00 Kalejira eta animazioa tabernetatik
19:30 Txokolatada
20:00 Kontzertuak Musika Eskolako etxartean: Koiu + Tinta + Garaje-drama
00:00 Dantzaldia: Princesa taldea
01:30 Bingoa eta ezusteko emanaldi berezia
02:00 Dantzaldia: Princesa taldea

Ekainak 23, igandea
12:00 Txosnak irekitzea
12:00 Kalejira eta animazioa tabernetatik
12:00 Familiako I. Futbolin Txapelketa, Iluntze tabernak eta Solabarriak Dardosek antolatuta
12:30 Txupiponpa tailerra Urreta parkean
13:00 Rally Poteoa
13:00 Galdakaoko Ad Libitum Txistu Banda
13:00 Meza
13:00 Paella lehiaketaren X. edizioan izena ematea
14:30 Paellen aurkezpena eta sari banaketa
15:00 Herri bazkaria
16:00 Aurpegiak margotzea, tailerrak eta jolasak Argizai Eskaut Taldeak antolatuta
17:00 Stunt Rider motorren erakustaldia
17:00 Txupiponpak Urreta parkean
19:00 Kontzertua Patxi tabernan: Tequilas
21:00 Zozketa Urreta zelaian: Rally Poteoko saria
22:00 Tributu kontzertua: El Barrio
22:30 Sua piztea
00:00 Jaien amaiera

Osorik irakurri