Sareak

☉ Galdakao

Ana Mezo: “Eguzkibegi Ikastolan jarraitzen dut lan boluntarioak egiten”

Ana Mezo Eguzkibegi Ikastolako irakasle izan da 30 urtez. Nahiz eta iaz erretiroa hartu, oraindik ere harremanetan jarraitzen du Ikastolarekin.

|

galdakao ana mezo 2017 eguzkibegi ikastola

Ana Mezo Eguzkibegi Ikastolako irakasle izan da 30 urtez. Nahiz eta iaz erretiroa hartu, oraindik ere harremanetan jarraitzen du Ikastolarekin, besteak beste, 50.urteurreneko ospakizunetan laguntzen

Ana Mezo (Larrabetzu, 1955) Kimikan lizentziatua da eta 33 urte eman ditu Eguzkibegi Ikastolan irakasle. 1983. urtean heldu zen bertara, aurretik Sopelako Ander Deuna ikastolan lanean ibili ondoren. Joan den ikasturtearen bukaeran erretiroa hartu arren, ikastolarekin harremanetan jarraitzen du, “lan boluntarioak egiten”. Esate baterako, 50. urteurreneko ospakizuentan laguntzeko aukera du.

Zein zen 80ko hamarkadako egoera soziala?

Aurretik egoera zailak bizitu ziren, baina oraindik ere dena ez zen samurra. 80ko hamarkadan Euskal Herriak urte gogorrak bizi izan zituen. Baina zailtasun horiek eztabaidarako eta gogoetarako bidea ematen zuten, hala beharrez.

Euskararen egoera ere zaila zen.

Hala da. Euskarari eta hezkuntza euskaraz egiteari zegokionez, oraindik ere zailtasunak zeuden, baina arazoak leuntzera gindoazen. Funtzionamendurako eta antolaketarako, hau da, Hezkuntza erregulatzeko legeak agertu ziren, irakasle taldearen egonkortasun maila txiki bat lortu zen, eta erkidego honetako euskararen normalizaziorako legea ere ordukoa da. Edozelan ere, hurrengo hamarkadetan ere lan handiak egin dira.

Gaur egungo euskararen egoeraz galdetuko banizu?

Datuek esaten dute ezagutzan gora egin dela. Hala bada ere, ez da nahikoa minoritarioa eta minorizatuta dagoen hizkuntza baten biziraupenerako. Gainera, uste dut erabileran behera egin dela, baina baita euskararen kalitatean ere, eta hori ez da berri ona. Hizkuntza batek, euskarak, aurrera egingo du hiztunek erabili egiten badute. Beraz, har ditzagun neurriak euskarak aurrera egin dezan.

Eta, horretan gizartearen inplikazioa behar da…

Orokorrean, jendartean, konpromisoak hartzeko eta inplikatzeko moduak asko aldatu dira. Bitartekoak ere desberdinak dira: teknologia berriak eta bestelako bitartekoak. Edozelan ere, hezkuntzan komunitate osoaren inplikazioa behar dela argi ikusi dut beti, bakoitzak bere esparrutik konpromisoa hartu behar du. Bakoitzak berari dagokion lanari ekin behar dio, inoren esparruan sartu barik, baina irakasle, gainontzeko langile eta gurasoek inplikatu egin behar dute.

Irakasle izan zara, baina zer da Egukibegik zuri irakatsi dizuna?

Ikastola nire bizitzako parte oso garrantzitsua da. Irakasle izateaz gain, zuzendaritza taldeko partaide izan naiz 25 urte baino gehiagoan. Nire formazio akademikoari erreparatzen badiogu, nik beste nonbait lanean aritzeko profila daukat. Baina mundu honetan sartu nintzen eta asko ikasi dut, pedagogiaz, pertsonen arteko harremanez, kudeaketaz eta abarrez. Momentu estuak bizi izan ditut, baina ez daukat inolako damurik.

Aurten 50 urte bete ditu Eguzkibegik.

Bai. Hor daude hasierako urteak eta egoerak, baina baita hurrengoak ere. Nik batzuk bizitzeko aukera izan dut beste pertsona askorekin batera, paperetan egundo agertzen ez direnak baina asko aportatu dutenak. Belaunaldi desberdinetakoak gara, jubilatu garenak, jubilatzeko daudenak, gaur egun lanean jarraitu beharko dutenak, gazteak direnak eta horren gazteak ez direnak.

Iaz hartu zenuen erretiroa. Harremanetan jarraitzen al duzu ikastolarekin?

Bai, lan boluntarioak egiten ditut. Besteak beste, 50. urteurreneko ospakizunetan laguntzen, baita bestelako zalantzarik dagoenean iritzia ematen ere.

Honekin guztiarekin amaitzeko bi gauza esan gurako nituzke. Batetik, lanean jarraitu behar dutenei animo eta aurrera, merezi du-eta; bestetik, aipamen berezia sekulan edo gutxitan agertzen direnei, lanean oso gertu izan ditudanei, zein horren gertu izan ez ditudanei.

Azkenik, legeak lege, oraindik Euskal Herriko Hezkuntza erregulatuko duen legea falta zaigu. Bitartean lanean jarraitu beharko dugu EAEko, Nafarroako eta Iparraldeko gainontzeko euskalgintzako eragileekin batera.

☉ Galdakao

Bizkaiko igeriketa txapelketa jokatuko da asteburuan Galdakaon

Guztira 140 igerilari inguruk hartuko dute parte, denak kategoria absolutukoak eta junior kategoriakoak. Besteak beste, Galdakaoko, Etxebarriko eta Basauriko klubek izango dute ordezkaritza

|

Guztira 140 igerilari inguruk hartuko dute parte Bizkaiko igeriketa txapelketan, denak kategoria absolutukoak eta junior kategoriakoak // Galdakaoko Udala

Bizkaiko igeriketa txapelketa jokatuko da uztailaren 13an eta 14an Galdakaoko Urreta kiroldegian. Guztira 140 igerilari inguruk hartuko dute parte, denak kategoria absolutukoak eta junior kategoriakoak, eta asteburuan zehar guztira 47 proba izango dira Urretako igerilekuan, goizez zein arratsaldez.

Bizkaiko 16 klubetako igerilariak lehiatuko dira: Galdakao, Basauri, Ganguren, Maristas, Getxo Igeriketa Bolue, Bilbao, Santurtzi, Sestao, Portugalete, Bilbao Aingeruak, Gernika-Kosnoaga, Kikunbera, Mungia, Sopela, Swim Camp Getxo eta Zurkide Zalla.

Galdakao Igeriketa Taldeak 16 ordezkari izango ditu (Uxue San Juan, Irati Larrea, Aitor Gomez, Elrik Huth, Eider Villar, Laia Aurrekoetxea, Iker Ariño, Haizea Furundarena, Ander Madina, Ander Gonzalez, Ainara Ortun, Usune Fernandez, Ariane Guillen, Olaia De La Calle, Eneko Neven eta Alain Antolin), Etxebarriko Ganguren klubak hiru (Eneko Ruiz, Beñat Alvarez eta Ibon Vazquez) eta Basauriko taldeak ordezkari bakarra (Danel Castillo) izango du.

Maria Casillas galdakoztarrak ere parte hartuko du Bizkaiko txapelketan, Swim Camp Getxo klubarekin. Pasa den asteburuan Munduko eta Europako errekorrak hautsi zituen errelebotan Lara Vicandirekin, Ane Ibarrondorekin eta Naia Ibarrondorekin batera, São João da Madeiran (Portugal) izandako XXV. Masters Verão txapelketan.

Oraingoan 50 metroko eta 100 metroko bizkar-igeriketako probetan hartuko du parte galdakoztarrak. Momentura arte, 50 metroko bizkar-igeriketan Bizkaiko errekor absolutua egin zuen Casillasek 2022an (29.49).

Osorik irakurri

☉ Galdakao

Galdakaoko Ibilaldia aurkeztu du Eguzkibegik Euskaltzaindiaren egoitzan

|

Galdakaoko Eguzkibegi Ikastolako eta Getxoko San Nikolas Ikastolako ordezkariak Euskaltzaindiaren egoitzaren aurrean // Argazkia: Eguzkibegi Ikastola

2025eko maiatzaren 25ean Ibilaldia antolatuko du Eguzkibegi Ikastolak Galdakaon. Duela hilabete leloa eta logoa aurkeztu zituzten Kurtzeko plazan, eta Oihane Arana Eguzkibegi Ikastolako lehendakariarekin berba egiteko aukera izan genuen GEURIAn.

Gaur, uztailak 11, Galdakaoko Ibilaldiaren aurkezpena egin dute Euskaltzaindiaren egoitzan, Bilbon. Eguzkibegi Ikastolako ordezkariez gain -tartean Oihane Arana lehendakaria-, aurten Ibilaldia antolatu duten Getxoko San Nikolas Ikastolako ordezkariak ere izan dira aurkezpenean.

Osorik irakurri

☉ Galdakao

Olabarrietako Katamar Haurreskolako jolastokiak estalkia izango du ikasturte berritik aurrera

|

Estalkia jartzeko lanak uztailaren 15ean hasiko dituzte eta sei astez luzatuko dira // Galdakaoko Udala

Estalkia jarriko diote Galdakaoko Olabarrietako Katamar Haurreskolako jolastokiari. Lanak uztailaren 15ean hasiko dituzte eta sei astez luzatuko dira, Galdakaoko Udaletik zehaztu dutenez.

Estalkiaren egitura metalezkoa eta egurrezkoa izango da eta sabaia zeharrargia izango da, “argi naturala sar dadin”. Led motatako argi puntuak ere izango ditu.

Estalkia jartzearekin batera, jolastokian gomazko zoru berria ipiniko du Udalak.

Aurreikuspenen arabera, ikasturte hasterako jarrita egongo da estalkia. Udalak 60.000 euroko inbertsioa egin du.

Osorik irakurri

☉ Galdakao

Maria Casillas igerilari galdakoztarrak Munduko eta Europako errekorrak hautsi ditu errelebotan, Master kategorian

Casillasekin batera erreleboen taldea osatu dute Lara Vicandi Telleriak (Donostia), Ane Ibarrondo Garciak (Getxo) eta Naia Ibarrondo Garciak (Getxo), denak Swim Camp Getxo klubekoak

|

Maria Casillas (zutunik, eskuman), Lara Vicandi, Ane Ibarrondo eta Naia Ibarrondorekin batera // Utzitakoa

Maria Casillas Chueca igerilari galdakoztarrak Munduko eta Europako errekorrak hautsi ditu errelebotan, asteburuan São João da Madeiran (Portugal) izandako XXV. Masters Verão txapelketan.

Casillasekin batera erreleboen taldea osatu dute Lara Vicandi Telleriak (Donostia), Ane Ibarrondo Garciak (Getxo) eta Naia Ibarrondo Garciak (Getxo), denak Swim Camp Getxo klubekoak.

Munduko errekorrari dagokionez, 4×50 crol +100 proban 1’49”9ko denbora egin zuten, zegoen errekorra —2016koa— hautsiz (1’50”28).

Munduko errekorra hausteaz gain, Europakoa ere hautsi zuten lau igerilariek 4×100 estilos +100 proban, 4’37”39 denborarekin (aurreko marka 4’42”20koa zen).

“Gogor prestatu genuen txapelketa eta atzetik entrenamendu asko dago. Errekorrak haustea zaila zen: laurok ia gure markarik onenak egin behar genituen, eta motibazioarekin lortu genuen bi markak haustea. Sekulakoa izan zen!”, adierazi dio GEURIAri Mariak.

Igeriketa “oso kirol sakrifikatua” dela dio Mariak: “Oso gutxitan ematen ditu fruituak, baina kasu honetan eman ditu eta oso pozik gaude!”.

“Talde honetan oso argi daukagu ondo igeri egiteko denon artean oso ondo konpondu behar dugula eta giro oso ona egon behar duela. Eta hori da gure errealitatea”, dio Mariak.

Osorik irakurri

☉ Galdakao

Kurtzeko frontoiko estalkia eta teilatu-hodiak konpontzeko lanak udazkenean hasiko dituzte

Uztailean frontoiko tabernaren estalkiko arazoak konponduko dituzte, eta irailetik aurrera ekingo diete lan handiei. Kasu batean zein bestean obrek ez diote frontoiko erabilerari eragingo

|

Aste honetan frontoiko tabernaren estalkiko arazoak konpontzen hasiko dira // Google

Kurtzeko frontoian dauden ur-filtrazioak konponduko ditu Galdakaoko Udalak. Aste honetan frontoiko tabernaren estalkiko arazoak konpontzen hasiko dira: estalkiko lamina iragazgaitza aldatuko dute, zaharra zulatua baitago eta ura sartzen baita.

Lan hauek “egun gutxitan” amaituko dituztela adierazi dute udal ordezkariek, eta frontoiaren eta tabernaren erabileran eraginik ez dutela izango zehaztu dute.

Bestetik, estalkiko hegal nagusia berritzeko lanak egingo ditu Udalak: alde batetik, teilatu-hodi berria jarriko dute aurrealdean, txapa ordezkatuko dute eta erremateak egingo dituzte; eta bestetik, atzealdeko teilatu-hodia ere konponduko dute.

Obra horiek iraila amaieran edo urrian hasiko dituzte, “Santakurtze jaiak bukatu ostean”. Kasu honetan ere kanpotik egingo dutenez lan, Udaletik aurreikusi dute lanek ez dutela eragingo frontoiaren erabileran, eta entrenamenduek “normaltasunez” jarraituko dutela adierazi dute.

Osorik irakurri