Sareak

☉ Galdakao

Jon Garcia: “Pazko Uharteko natiboek surfa belauniko ere egiten zuten”

Jon Garcia galdakoztarrak Munduko Kneeboard Txapelketan parte hartuko du. Irailaren bukaeran hasiko da lehiaketa Kantabrian eta urriaren 8ra arte iraungo du.

|

galdakao jon garcia 2017 kneeboard surf
Jon Garcia Tagle galdakoztarrak Kneeboard surfa praktikatzen du // Maider Ibañez

Zortzi urte zituela hasi zen Jon Garcia (Galdakao, 1974) surfa praktikatzen. Batik bat, bodyboard modalitatearekin eman zituen lehen pausoak, baina 90. hamarkadan Kneebordaren berri izan zuen eta horri ekin zion. Gainera, surfaren beste modalitate gehiago ere praktikatzen ditu. Hala nola, Longboarda edo Retro ex. Irailaren 30etik urriaren 8ra bitartean Munduko Kneeboard Txapelketan parte hartuko du Garciak, Somon (Kantabria).

Azaldu zer den Kneeboard surfa.
Stand Up Surfa (arraun-surfa) edo Body-boarda (etzanda) modalitateak dauden bezala, Kneeboard Surfa ere badago. Belauniko surfeatzean datza modalitate horrek. Oholak ohikoak baino zabalagoak dira eta tamaina aldetik, berdinak. Kneeboardeko oholak ere gogorrak dira.

Nondik dator diziplina hau?
Kneeboarda zutunik egiten den surfa bezain aspaldikoa da. Pentsa, ohikoena den surfa ezagutzen denetik 500 urte baino gehiago dira. Jasota geratu da James Cook-en kolonietako lehen biztanleek Pazko Uharteko natiboak ikusi zituztela surfa zutunik praktikatzen, baita belauniko ere (Cook nabigatzaile eta esploratzaile britainiarra izan zen).

Maila profesionalari begira, 70. eta 80. hamarkadan Kneeboardaren boom-a gertatu zen, eta Euskal Herrian Mundakan edo Bakion praktikatzen hasi ziren batzuk. Garai haietan ere Kneeboardaren komunitatea sendotu egin zen Kantabrian eta Kanariar Uharteetan. 90. hamarkadan Body-boarda indarrez sartu zen eta Espainian Kneeboarda alde batean geratu zen.

Zuen kluba agertu zen arte.
Bai, hala da. 2007. urtean modalitate honen berri jendeak izan zezan Espainiako lehendabiziko Kneeboard kluba sortu genuen zaletu batzuek: Kantabriako Kneeboard Kluba, alegia. Taldea eratu dugunetik egia da indarberritu egin dela Kneeboardaren praktika.

Orduan, gero eta jende gehiagok praktikatzen du Kneeboarda?
Bai. Batik bat gure hasierako helburua izan da umeek eta gazteek modalitate hau ezagutzea eta praktikatzea, surfaz eta body-boardaz gain. Urtean hirutan doako batailak eskaintzen ditugu eta gure ohol propioak uzten dizkiegu umeei. Behin edo beste birrinduta itzuli dizkigute oholak, baina gu pozik, ikusten dugulako Kneeboarda gorantz doala eta gero eta jende gehiagok praktikatzen duela.

Orduan, etorkizuna badu Kneeboardak gurean.
Bai. Surf modalitate hau probatzen duten umeek errepikatzen dutela esan genezake. Eta hori gustatu zaien seinale da. Batailoiak egiteko eta oholak uzteko eskaera asko jasotzen ditugu urtetik urtera. Gero eta gehiago jasotzen ditugula esango nuke. Eta horrela jarrai dezala!

Batik bat, non praktikatzen da Kneeboarda gure inguruan?
Egia esan, Euskal Herrian ez da hainbeste praktikatzen. Zazpi bat euskaldun izango gara Kneeboarda praktikatzen dugunak, baina Kantabrian eta Kanariar Uharteetan komunitate zabalagoa dago: gutxi gorabehera 30 lagunen inguruan ibiliko dira autonomia erkidego bakoitzean.

galdakao jon garcia 2017 kneeboard surf olatua ARG James Lanter 100x600

Jon Garcia, belauniko, olatu ederra hartzen // James Lanter

Zure kasuan, non entrenatzen duzu gehien?
Neguan Bizkaian egiten ditut entrenamenduak. Oro har, Mundakan edo Bakion. Eta, udan Kantabriarantz noa. Horren arrazoia da hondartza kilometro luzeagoak daudela bertan eta itsasoa ez dagoela Euskadin bezain “betea”. Hau da, udan Euskadin olatu bat hartzeko hurrenkera tiketa izan behar duzu. Hain onak dira bertako olatuak, surfaren zale asko hurbiltzen baita euskal itsasaldera.

Laster, Munduko Kneeboard Txapelketan parte hartuko duzu.
Hala da. Irailaren 30etik urriaren 8ra bitartean ospatuko da txapelketa Somon, Kantabrian, eta bertan parte hartuko dut, Munduko beste 91 surflariekin batera. Euskal Herritik Zarauzko bi, Donostiako bat, Sopelako beste bat eta ni neu izango gara.

Txapelketa hau Europan ospatuko da lehendabizikoz, ezta?
Bai, aurreneko aldia da txapelketa Europan burutuko dena. Munduko txapelketa bi urterik behin ospatzen da eta beti antolatu izan dute Zeelanda Berrian, Australian, Estatu Batuetan edota Tahitin. Aukera bakarra izango da tankera horretako txapelketa gure inguruan ikusteko. Ez dakigu noiz antolatuko duten horrelakorik berriro Europan.

Lehiaketan zure burua nola ikusten duzun galdetuko banizu…
Txapelketan egongo den maila oso altua da. Profesionalak diren asko etorriko dira. Open kategorian aukera dut 92 partaideren artean lehenengo 10 postuen artean geratzeko, eta adinaren araberako kategorian top hiruan. Ez da uste makala, baina lor dezakedalakoan nago. Baikorra izan behar da horrelako erronka baten aurrean (kar, kar).

Zure lorpenei dagokienez, zeintzuk dira azpimarratzekoak?
2007an Espainiako Kneeboardeko txapeldun suertatu nintzen Gijonen eta 2011n Europako hirugarren nire kategorian. Gainera, eskualde mailako txapelketetan lehenengo eta bigarren postuak lortu ditut.

Kirol honetatik bizi daiteke?
Nire kasuan ez. Esan genezake profesional asko ere ez direla honetatik bizi. Badaude kirola ogibide duten kasu batzuk. Esate baterako, surfaren modalitatean Acero anaiak daude. Marka baten irudi publikoa izateak edota Surf Eskolak sortzea kirol hau lanbide izatea egin dezake.

Eta, kirol honek suposatzen dituen gastuei aurre egiteko nola egiten du bakoitzak?
Bada, ahal duen moduan. Nire kasuan, laguntza jasotzen dut babesle batzuen aldetik: Jiorings (Galdakao), Dinaksa (Arrigorriaga) eta Walltrapping (Arrigorriaga) enpresek bere ekarpena egiten didate eta Munduko txapelketarako laguntza eman didate. Horiei esker posible dut gustatzen zaidan kirolean aritzea. Era berean, Galdakaoko Udalak ere babesa erakutsi dit.

Surf taulen bilduma

GALDAKAO. Jon Garcia, Kneeboard surfa praktikatzeaz gain, surf oholen bildumagilea da. “Aspaldiko surf oholak biltzen ditut 90eko hamarkadatik hona. Gutxi gorabehera 100 taula inguru ditut: surfaren hastapenak Bizkaian, Euskal Herrian, ohol frantsesak, espainiarrak edota Sopelako 1972ko sorosleenak, besteak beste”, dio Garciak: “Espainiako oholen bigarren bildumarik handiena omen da nirea”.

Zaletasun hau 1991tik datorkio: “Urte hartan hainbat lagunek euren ohol zaharrak berriengatik ordezkatu zituzten eta horiek biltzea erabaki nuen, zigiluak zein txanponak biltzen dituen batek egiten duen bezala”, dio. Horrek antzinako taulak biltzea ekarri zion eta 70eko eta 80ko hamarkadako oholak lortu zituen.

Asmoa da azaroan surf taulen erakusketa egitea Galdakaon, Udalak ematen dion laguntza ekonomikoaren trukean. “Oraindik ez dakigu noiz egin ahal izango dugun erakusketa, baina horren berri jakingo duzue”, dio.

☉ Galdakao

Bizkaiko igeriketa txapelketa jokatuko da asteburuan Galdakaon

Guztira 140 igerilari inguruk hartuko dute parte, denak kategoria absolutukoak eta junior kategoriakoak. Besteak beste, Galdakaoko, Etxebarriko eta Basauriko klubek izango dute ordezkaritza

|

Guztira 140 igerilari inguruk hartuko dute parte Bizkaiko igeriketa txapelketan, denak kategoria absolutukoak eta junior kategoriakoak // Galdakaoko Udala

Bizkaiko igeriketa txapelketa jokatuko da uztailaren 13an eta 14an Galdakaoko Urreta kiroldegian. Guztira 140 igerilari inguruk hartuko dute parte, denak kategoria absolutukoak eta junior kategoriakoak, eta asteburuan zehar guztira 47 proba izango dira Urretako igerilekuan, goizez zein arratsaldez.

Bizkaiko 16 klubetako igerilariak lehiatuko dira: Galdakao, Basauri, Ganguren, Maristas, Getxo Igeriketa Bolue, Bilbao, Santurtzi, Sestao, Portugalete, Bilbao Aingeruak, Gernika-Kosnoaga, Kikunbera, Mungia, Sopela, Swim Camp Getxo eta Zurkide Zalla.

Galdakao Igeriketa Taldeak 16 ordezkari izango ditu (Uxue San Juan, Irati Larrea, Aitor Gomez, Elrik Huth, Eider Villar, Laia Aurrekoetxea, Iker Ariño, Haizea Furundarena, Ander Madina, Ander Gonzalez, Ainara Ortun, Usune Fernandez, Ariane Guillen, Olaia De La Calle, Eneko Neven eta Alain Antolin), Etxebarriko Ganguren klubak hiru (Eneko Ruiz, Beñat Alvarez eta Ibon Vazquez) eta Basauriko taldeak ordezkari bakarra (Danel Castillo) izango du.

Maria Casillas galdakoztarrak ere parte hartuko du Bizkaiko txapelketan, Swim Camp Getxo klubarekin. Pasa den asteburuan Munduko eta Europako errekorrak hautsi zituen errelebotan Lara Vicandirekin, Ane Ibarrondorekin eta Naia Ibarrondorekin batera, São João da Madeiran (Portugal) izandako XXV. Masters Verão txapelketan.

Oraingoan 50 metroko eta 100 metroko bizkar-igeriketako probetan hartuko du parte galdakoztarrak. Momentura arte, 50 metroko bizkar-igeriketan Bizkaiko errekor absolutua egin zuen Casillasek 2022an (29.49).

Osorik irakurri

☉ Galdakao

Galdakaoko Ibilaldia aurkeztu du Eguzkibegik Euskaltzaindiaren egoitzan

|

Galdakaoko Eguzkibegi Ikastolako eta Getxoko San Nikolas Ikastolako ordezkariak Euskaltzaindiaren egoitzaren aurrean // Argazkia: Eguzkibegi Ikastola

2025eko maiatzaren 25ean Ibilaldia antolatuko du Eguzkibegi Ikastolak Galdakaon. Duela hilabete leloa eta logoa aurkeztu zituzten Kurtzeko plazan, eta Oihane Arana Eguzkibegi Ikastolako lehendakariarekin berba egiteko aukera izan genuen GEURIAn.

Gaur, uztailak 11, Galdakaoko Ibilaldiaren aurkezpena egin dute Euskaltzaindiaren egoitzan, Bilbon. Eguzkibegi Ikastolako ordezkariez gain -tartean Oihane Arana lehendakaria-, aurten Ibilaldia antolatu duten Getxoko San Nikolas Ikastolako ordezkariak ere izan dira aurkezpenean.

Osorik irakurri

☉ Galdakao

Olabarrietako Katamar Haurreskolako jolastokiak estalkia izango du ikasturte berritik aurrera

|

Estalkia jartzeko lanak uztailaren 15ean hasiko dituzte eta sei astez luzatuko dira // Galdakaoko Udala

Estalkia jarriko diote Galdakaoko Olabarrietako Katamar Haurreskolako jolastokiari. Lanak uztailaren 15ean hasiko dituzte eta sei astez luzatuko dira, Galdakaoko Udaletik zehaztu dutenez.

Estalkiaren egitura metalezkoa eta egurrezkoa izango da eta sabaia zeharrargia izango da, “argi naturala sar dadin”. Led motatako argi puntuak ere izango ditu.

Estalkia jartzearekin batera, jolastokian gomazko zoru berria ipiniko du Udalak.

Aurreikuspenen arabera, ikasturte hasterako jarrita egongo da estalkia. Udalak 60.000 euroko inbertsioa egin du.

Osorik irakurri

☉ Galdakao

Maria Casillas igerilari galdakoztarrak Munduko eta Europako errekorrak hautsi ditu errelebotan, Master kategorian

Casillasekin batera erreleboen taldea osatu dute Lara Vicandi Telleriak (Donostia), Ane Ibarrondo Garciak (Getxo) eta Naia Ibarrondo Garciak (Getxo), denak Swim Camp Getxo klubekoak

|

Maria Casillas (zutunik, eskuman), Lara Vicandi, Ane Ibarrondo eta Naia Ibarrondorekin batera // Utzitakoa

Maria Casillas Chueca igerilari galdakoztarrak Munduko eta Europako errekorrak hautsi ditu errelebotan, asteburuan São João da Madeiran (Portugal) izandako XXV. Masters Verão txapelketan.

Casillasekin batera erreleboen taldea osatu dute Lara Vicandi Telleriak (Donostia), Ane Ibarrondo Garciak (Getxo) eta Naia Ibarrondo Garciak (Getxo), denak Swim Camp Getxo klubekoak.

Munduko errekorrari dagokionez, 4×50 crol +100 proban 1’49”9ko denbora egin zuten, zegoen errekorra —2016koa— hautsiz (1’50”28).

Munduko errekorra hausteaz gain, Europakoa ere hautsi zuten lau igerilariek 4×100 estilos +100 proban, 4’37”39 denborarekin (aurreko marka 4’42”20koa zen).

“Gogor prestatu genuen txapelketa eta atzetik entrenamendu asko dago. Errekorrak haustea zaila zen: laurok ia gure markarik onenak egin behar genituen, eta motibazioarekin lortu genuen bi markak haustea. Sekulakoa izan zen!”, adierazi dio GEURIAri Mariak.

Igeriketa “oso kirol sakrifikatua” dela dio Mariak: “Oso gutxitan ematen ditu fruituak, baina kasu honetan eman ditu eta oso pozik gaude!”.

“Talde honetan oso argi daukagu ondo igeri egiteko denon artean oso ondo konpondu behar dugula eta giro oso ona egon behar duela. Eta hori da gure errealitatea”, dio Mariak.

Osorik irakurri

☉ Galdakao

Kurtzeko frontoiko estalkia eta teilatu-hodiak konpontzeko lanak udazkenean hasiko dituzte

Uztailean frontoiko tabernaren estalkiko arazoak konponduko dituzte, eta irailetik aurrera ekingo diete lan handiei. Kasu batean zein bestean obrek ez diote frontoiko erabilerari eragingo

|

Aste honetan frontoiko tabernaren estalkiko arazoak konpontzen hasiko dira // Google

Kurtzeko frontoian dauden ur-filtrazioak konponduko ditu Galdakaoko Udalak. Aste honetan frontoiko tabernaren estalkiko arazoak konpontzen hasiko dira: estalkiko lamina iragazgaitza aldatuko dute, zaharra zulatua baitago eta ura sartzen baita.

Lan hauek “egun gutxitan” amaituko dituztela adierazi dute udal ordezkariek, eta frontoiaren eta tabernaren erabileran eraginik ez dutela izango zehaztu dute.

Bestetik, estalkiko hegal nagusia berritzeko lanak egingo ditu Udalak: alde batetik, teilatu-hodi berria jarriko dute aurrealdean, txapa ordezkatuko dute eta erremateak egingo dituzte; eta bestetik, atzealdeko teilatu-hodia ere konponduko dute.

Obra horiek iraila amaieran edo urrian hasiko dituzte, “Santakurtze jaiak bukatu ostean”. Kasu honetan ere kanpotik egingo dutenez lan, Udaletik aurreikusi dute lanek ez dutela eragingo frontoiaren erabileran, eta entrenamenduek “normaltasunez” jarraituko dutela adierazi dute.

Osorik irakurri