☉ Basauri
Soraya Gonzalez: “Futbola eta pintxo potetik aparte, taberna bat egitea posible da”
Orain dela hamar urtetik buruan izan duen proiektua izan da. Joan den otsailean martxan jarri zuen Nai Lua Teteria, besteak beste, literatura, yoga eta musika uztartzen dituen taberna
Orain dela hamar urtetik buruan izan duen proiektua izan da. Joan den otsailean martxan jarri zuen Nai Lua Teteria, besteak beste, literatura, yoga eta musika uztartzen dituen taberna
Gizarte eta kultura arloan lan egindako basauritar honek Mapa Munditik bueltak eman baditu ere, bere jaioterrian berriro lurreratu da, oraingoan hemen geratzeko asmoz. Izan ere, Basaurin dagoen teteria bakarraren jabea dugu bera, Nai Lua Teteria.
Zelan sortu zen teteria bat sortzeko ideia hau?
Gizarte eta Kulturan egindako moduloan, auzo bakoitzak daukan hutsunea identifikatzen ikasi nuen eta Basaurik ez zeukan horrelako tabernarik. Basaurik baditu partiduak ikusteko edota pintxo-potea hartzeko tabernak, baina ez dauka naturala den zeozer edaten duzun bitartean erlaxatzeko, liburu bat irakurtzeko, koadro erakusketa bat ikusteko edota zenbait tailerretan parte hartzeko lekurik. Horrelako antzeko proiektu bat baneukan ikusita Leioan eta hau guztia pentsatzen hasi nintzenetik, aurreko urtean otsailaren 28an Teteria ireki nuen arte, hamar urte pasatu dira.
Beldurtzen ninduen nik bakarrik horrelako enpresa bat sortzeak, baina beldurra gainetik kendu eta gogor ekin nion. Geroxeago ikusi nuen, Teteria nirea izan arren, inguruan nituen eta bidean ezagutu ditudan lagun askoren laguntza ere izan dudala, besteak beste lokala margozteko, mahaiak eta eskulanak egiteko eta ikastaroak emateko eta horregatik guztiagatik eskerrak eman nahi dizkiet nirekin egon diren guztiei.
Nolako ikastaro edo ekintzak antola- tzen dituzu teterian?
Mota askotariko tailerrak antolatzen ditugu. Gorputzari dagokionez, astearte eguerdietan Yoga egoten da eta ostegunetan Hipopresibo tailerra, hau arnasaren bitartez diafragma lantzean datza, horrela emozio negatiboak kanpora ditzagun.
Bestetik, arteari ere lekua utzi diogu eta astearte arratsaldetan Kitarra tailerra eskaintzen da eta dagoeneko bi eskola ematen dira. Asteazken arratsaldetan Arteterapia lantzen da. Teterian materiala dago eta nahi duguna da jendea margoztera etortzea, bakoitza norbere artea azaleratzeko eta bide batez erlaxatzeko; ez da beharrezkoa horretan aditua izatea.
Eta azkenik, orain pixkat geldirik dagoen arren, Tarot ikastaroa ere landu izan dugu eta landuko dugu berriro.
Ba al daukazu etorkizunerako beste tailer berririk buruan?
Bai, noski. Apirilean Pastelgintza beganoa landu genuen eta bertan labea behar ez duten hiru pastel egin genituen eta azaldu genituen zeintzuk diren azukrea ez erabiltzeko beste aukerak. Aurreko hilabetean beste tailer bat ere estreinatu genuen, baina honetan edatekoari erreparatuz. Garagardo-dastatzea egin dugu jendeak hainbat eta hainbat artisau-garagardo ekologiko proba ditzan. Ikus dezakezuenez gauza asko eta oso ezberdinak lantzen dira.
Teterian eskaintzen ditutzun janari eta edari gehienak naturalak edota ekologikoak al dira?
Gehienak, bai. Edatekoan, besteak beste, zukuak, garagardoa, ardoa eta infusioak. Esan beharra dago produktu hauek ordaintzean, askotan planetari laguntzen ari gatzaizkiola; izan ere, infusio saltzaileak irabazitakoaren ehuneko bat planeta salbatzeko destinatzen du.
Jatekoan, bi ostegunean behin Dimako baserri batetik garaiko barazkiez beteriko otarreak datoz eta nahi duenaren eskura daude salgai. Aukera hau aprobetxatuz, bertatik hartzen ditut hemen egiten ditudan entsaladak, crep-ak, guakamolea, humus-a, etab. egiteko erabiltzen ditudan osagaiak. Probatzera etorri behar duzue, ez zarete damutuko!
Zer mezu botako zenuke inoiz etorri ez den norbait etorrarazteko?
Norberak dituen teterien gaineko aurreiritziak albo batera uztea da onena. Askotan uste baita hemen tea baino ez dela eskaintzen, edota emakumeei edo gazteei zuzenduriko esparrua baino ez dela, eta ez da horrela. Gonbidatzen zaituztet eskaintzen ditugun tailerretan parte hartzera, ondo pasatzera, jendea ezagutzera, modu osasuntsuan jan eta edatera. Eta proposamenik izatekotan, jakizue helarazi ahal dizkiguzuela.
Nahi izanez gero Facebook bitartez jarrai gaitzakezue antolatzen ditugun gauzen berri izateko.
Emakumezkoen futbol seniorreko lehen Piru Gainza Txapelketa, 2024ko abenduaren 28an ospatzekoa zena, azkenean ekainean izango da.
2022an lehen aldiz emakumezkoen triangularra antolatu zuten Piru Gainza txapelketaren barruan, baina kadete mailakoa zen. Aurtengoa, Emakumezkoen I. Piru Gainza Txapelketa, seniorrek jokatuko dute lehen aldiz.
Basauriko Udalak, kirolean aukera-berdintasuna sustatzearen ildotik, emakumezkoen senior mailako futbol selekzioaren sorrera bultzatu zuen iaz. Maiatzean aurkeztu zuten eta urrian jokatu zuen lehen partida.
Emakumezkoen I. Piru Gainza Txapelketak Basauriko emakumezkoen selekzioak “merezi duen kalitatea eta parte-hartzea” izatea nahi dute bai Udalak bai Piru Gainza Peñako arduradunek. Ildo horretan, zera esan dute: “Ziur gaude data aldaketak jokalari gehiago izatea eta bertaratzen direnei kirol-ikuskizun handia eskaintzeko aukera emango digula”. Ekainean ere gizonezko kadeteen Piru Gainza Txapelketa jokatzen da, lehen asteburuan.
Basauriko jubilatu etxeetan hobekuntza-lanak egin ditu Udalak 2024an zehar. Zehazki, Arizgoitiko, San Migeleko, Kareagako, Karmelo Torreko, Pozokoetxeko eta Basozelaiko adinekoen egoitzetan.
Arizgoitiko lokalari dagokionez, tabernako sukaldea berritu, eta gasa eta bentilazioa ere jarri dituzte bertan (14.871 euro).
San Migelen, ile-apaindegia eta margogintza-gela berritzeaz gain, estore berriak jarri dituzte (31.642 euro).
Kareagako adinekoen etxean motordun pertsianak jarri dituzte (2.622 euro), eta margogintza-lokalean, sarrera-ate berria jarri eta komunak berritu dituzte (3.052 euro).
Bestalde, Karmelo Torre kaleko lokalean —zahartze aktiboko ikastaroetarako erabiltzen duten lokala— arotzeria berritu dute (9.487 euro).
Era berean, aulki eta mahai berriak erosi dituzte Arizgoiti, Pozokoetxe, Kareaga eta Basozelaiko adinekoen etxeetarako (21.581 euro), eta, Pozokoetxekoan, gainera, sarrera-ate berria jarri dute (3.384 euro).
Erabilera publikoko beste udal eraikin batzuei dagokienez, Musika Eskolan moketa berritu dute jardueren gelan (4.299 euro).
Atzo eman zioten hasiera ‘El Conquistador’ saioaren 21. edizioari ETB2n. Aurten 37 lehiakidek hartuko dute parte, tartean, Maider Marcos bilbotarrak.
Basauri Eskubaloi Taldeko jokalaria da Maider: Zilarrezko Ohorezko Mailako talde seniorrean dabil.
Maiderrek 22 urte ditu eta eskubaloian jokatzeaz gain, gimnasta ere bada.
‘El Conquistador’ astelehenero emango dute ETB2n, 22:30ean.
Hego Uribeko zenbait herritarrek hartu dute parte ‘El Conquistador’ saioetan. Galdakaoko Mertxe Cornago (2007), Egoitz eta Ekaitz Rios (2010 – Egoitz irabazle), Nekane Arroyo (2012 eta 2020), Mari Carmen Alvarez (2013) eta Aritz Irusta (2023); Zaratamoko Riki Rekalde (2016); Ugaoko Aiskander Jauregi (2017, – bigarren sailkatua); eta Basauriko Alazne Gomez eta Alvaro Jimenez (2023).
Kapitain bezala ere izan zen Patri Espinar usansolotarra (2019ko eta 2020ko edizioetan).
☉ Basauri
Hitz-erdiko Kontaketak lehiaketak euskarazko ipuin laburrak jasoko ditu martxoa bitartean
Lehiaketaren zortzigarren edizioan parte hartzeko lanak urtarrilaren 15etik martxoaren 15era bitartean jasoko dituzte. Saritan 750 euroko bonuak banatuko dituzte
Hitz-erdiko Kontaketak lehiaketaren zortzigarren edizioa abiatuko du Zirt Zart Basaurik. Urtarrilaren 15etik martxoaren 15era bitartean jasoko dituzte euskarazko ipuin laburrak, gehienez 100 hitzekoak, zirtzart.basauri.eus webgunearen bitartez.
Aurten “Erabaki zuzena hartu ote nuen?” izango da ipuinek izan behar duten hasiera, antolatzaileek hala erabakita, eta esaldi horretatik abiatu beharko dituzte lanak.
Lehiaketa 12 eta 35 urte bitarteko gazteei dago zuzenduta eta asmoa da idazmenean interesa dutenen talentua aurkitzea.
Guztira bost sari banatuko dituzte: lehen sailkatuak 200 euroko bonua jasoko du, biharrenak 150 euroko bonua, hirugarrenak 100 euroko bonua, eta Elkar sariaren zein Basauri sariaren irabazleek bakoitzak 150 euroko bonuak jasoko dute.
Elkar sarian 12-17 urte bitartekoen proposamenak baino ez dituzte aintzat hartuko eta Basauri sarian herrian erroldatua egon beharko da parte hartzailea. Ipuin sarituak GEURIAn argitaratuko ditugu, bai paperezko alean zein webgunean.
Basauriko Udalaren Gazteria arloak antolatzen du lehiaketa eta Elkarren eta GEURIAren laguntza du. 2018an jarri zuten martxan lehiaketa eta urtetik urtera hazi egin da, ez bakarrik Basaurin, baizik eta Euskal Herri mailan ere.
Datuak datu, eta lehiaketak izan dituen formatu desberdinak tarteko, lehenengo edizioan 89 kontakizun jaso zituzten, bigarrenean 83, hirugarrenean 54, laugarrenean 204, bosgarrenean 288, seigarrenean 149 eta zazpigarrenean 155.
Iaz honako hauek izan ziren sarituak: Rebeca Fernandez Rueda (Barakaldo), Irene Izaguirre Chaparro (Villabona), Olatz Noberan Gartzia (Ondarroa), Andere Ramirez Garcia (Laudio) eta Izaskun Herce Quintana (Basauri).
Europara begira jarraitzen du Basauriko Urbi Institutuak. Ikasturte honetan arteari buruzko eTwinning proiektua ari dira gauzatzen: ArThenea proiektua, alegia.
Europako sei ikastetxetako ikasleak ari dira proiektuan parte hartzen: Kretako Chania hiriko Geniko Lykeio Akrotiriou (Grezia), Alsaziako Mulhouse Lavoisier (Frantzia), Asturiasko Mieresko Sanchez Lastra (Espainia), Pilseneko Gymnázium Lud´ka Pika (Txekiar Errepublika), La Reunion uharteko Lycée Jean Hinglo (Frantzia) eta Basauriko Urbi Institutua.
Proiektuaren barruan, abenduaren 2tik 8ra bitartean Basauriko ikasleak eta irakasleak Alsaziara joan ziren, eta abenduaren 10etik 15era Greziakoak Basaurira etorri ziren bisitan. “Esperientzia zoragarria, ikasleentzat ahaztezina”, adirazi dute Urbiko ordezkariek.
“Urbiko ikasleek, proiektua komunean lan egiteaz gain, euskal ohiturak, geografia, kultura, hizkuntza, monumentu enblematikoak eta altxorrak ezagutzera eman diete kanpotarrei. Bestalde Mulhouserako bisitan basauritarrak Europar Parlamentua bisitatatzez gain, Alsatziako Gabonetako merkatuak, ohiturak eta kultura ezagutzeko aukera izan zuten”, diote.
Arrigorriagako Arandia adinekoen egoitzako egungo lan baldintzak salatu ditu ELAk
Emakumezkoen lehen Piru Gainza senior txapelketa ekainean izango da
Basauriko jubilatu etxeetan hobekuntza-lanak egin ditu Udalak 86.000 euro bideratuz
Argazkiak / Errege Magoen magiak etxeko txikienen ilusioa piztu du beste urte batez
Argazkiak / Jende andanak harrera egin die Errege Magoei Basaurin
Argazkiak / Euriak ez du Arrigorriagako txikienen ilusioa zapuztu Olentzero eta Mari Domingiren etorreran
Gorka Perez: «Mendiko artzaintza galtzen ari da eta han behar dira, hain zuzen ere, txakurrak»
Aztarnak Muralismo: «Denborak, esperientziak eta zailtasunek muralismoaren sormen-artean zaildu gaituzte»
