☉ Ugao
Iker Mendaza eta Mikel Ipiña:«Estudiora sartu beharrean, momentuz, disfrutatu eta plazak hankaz gora jartzea da Gautegunen helburua»
Mikel Ipiña arrigorriagarrak (ahotsa eta panderoa) eta Iker Mendaza ugaotarrak (trikitixa eta ahotsa) Gautegun erromeriaren oinarriak adostu eta gaueko ordu txikiak alaitzeaz arduratzen den erromeria taldea osatu zuten
Zoriak gautxori bi elkartu eta “a kapela” kantatzera eraman zituen. Nork esango luke Gabonetako afari hartatik, parranda itzelaz gainera, erromeria talde bat sortzearen proiektua jaioko zenik? Ajea igarota eta aurreko gaueko ideiak garbira pasata, fresko-fresko, Mikel Ipiña arrigorriagarrak (ahotsa eta panderoa) eta Iker Mendaza ugaotarrak (trikitixa eta ahotsa) Gautegun erromeriaren oinarriak adostu eta gaueko ordu txikiak alaitzeaz arduratzen den erromeria taldea osatu zuten. Horra hor parranda maite duen zazpi lagunez osatutako istorio xelebrea. Ipiñarekin eta Mendazarekin batera Gautegun Erromeria taldea osatzen dute: Iradi Campollo (baxua), Andoni Gaztelumendi (tronboia), Axular Bahillo (bateria), Unax Perez (gitarra eta ahotsa), Maider Tato (gitarra).
Zer dela eta eta noiz sortzen da Gautegun Erromeria?
Mikel Ipiña: Iker Mendazak eta nik crossfiten ezagutu genuen elkar, eta gabonetako afari baten gauzela egun baten erdi txolindute akapela kantetan hasi ginen. Afarian egon ziren lagun denak jarraitu zuten kantutan gurekin batera. Horrelako batean esan zidan Ikerrek: “Eh, hurrengokoan bardin, baie panderoa eta trikia ekarriko dogu”. Heldu zan hurrengoko afaria, Iker, ni, panderoa bat eta triki bat eta erdaraz esaten den lez: Exitazo total! Apurke-apurke modu informalean hasi ginen triki eta panderoagaz eta Ikerrek egun batean Ugaoko jaietan Gozategi ikusten egoala, Whatsapp bat bialdu zidan: “Erromeria talde bat egin behar dogu”. Kontaktuen ipini zan herriko ezagunekaz eta holan osatu ginen.
Nolako perfilak topa daitezke kideen artean?
M.I: Iradi gazteena da, oraindik batxilergoan, musika heziketa aldetik triki, gitarra eta bajoa jotzen daki. Oin bajoa jotzen dau Victoria De Angelesi esker. Harritu egin zion zelan neska batek hain ondo joten zauen bajoa, eta urtebete ibili jakon amari txapie emoten bajora apuntetako. Eritzaintza ikasi gure dau, eta ixile bada be oso umore bitxia deko.Unaxek gitarra eta bateria jotzen dau, 21 urte eingo dauz laster, eta futbolera olgetan dau Ugaon. Entrenatzailea da bebai, aurten bederatzi eta hamar urteko umeak entrenetan ditu herrian bertan. Iradi eta Unax lehengusuek die, “Ipiña” abizenagaz. Kasualitatea da Ipiñatar gitxi egotie eta gure taldean hiru egotea. Ni neu ez naiz euren lehengusue!
Axularrek arte ederrak ikesi dauz. Txikitatik hasi zan bateria jotzen 10 urte ingurugaz. Oinarrizko bateria klasiek emoten die umetxuei Sortu musika eskolan; Maiderrek Gitarra jotzen dau, ingenieritza ikasten dabil eta Goikiri auzokoa da; Gazteluk tronboia jotzen dau, Euskal Filologis ikasi dau; Mikeli buruz… elkarren aurka jokatu dogu futbolean beti derbietan, Padura-Ugao arteko norgehiagokoetan; Ikerrek Batxilergo artistikoa egin dau eta goi-mailako ziklo bi egin ditu be: ikus entzunekoak eta 3D animazioak. Pianoa jotzen hasi zan baina utzi zuen. 11 urtegaz trikia joten hasi zan gaur egunerarte. Arte dramatikoa egin dau 10 urtez, eta taldien ahotsa eta trikia jotzen ditu. Nik ez dut sekula musika klaserik hartu, musikaz dakidana etxetik edo juergatan ikasi dut. Ez dakit ez solfeo ez ezer; dandana belarriz barneratu dut. Nire etxien aitan partetik filarmonikie (holan esaten jako nirien akordeoieri) eta panderoa jotzen zuten. Gaur egun irakaslie naz Lauaxeta ikastolan, crossfita praktikatzen dot eta Gautegunen ahotsa eta panderoa jotzen dot.
Denok zarete Hego Uribe eskualdekoak. Nola ezagutu zenuten elkar?
M.I: Axular, Iradi, Unax, Maider eta Iker harrobikoak die honegaz esan gura dutena da musika eskola bardinetik datozela “Sortuz musika eskola Ugaon”.
Iker Mendaza: oso saltseroa nazenez inolako lotsa barik ipin nintzen harremanetan eurekin.
M.I: Nik Unax ezaguten nuen, Beranduegiko Ainizen nebie da, eta askotan koinzididu izan dogu kantatzen Beranduegiko eszenatokian, Unax txikia zelarik. Gaztelugaz juergatik bueltan topau naiz behin baino gehiagotan goizeko ordu txikietan (barreak).
Estudiora sartu beharrean, momentuz, disfrutatu eta plazak hankaz gora jartzea da Gautegunen helburua
Zergatik erromeria bat eta ez musika talde bat? erromeriek, besteak beste, konpromiso handia eskatzen dute eta gaueko ordu txikietan jotzen dute asteburu askotan.
M.I: Gaueko ordu txikiak gustetan jakuz, oso parrandazaleak gara eta erromerixek poztasune eta bizixe emoten izan doskue beti.
I. M: Ganera erromeria batek publiko asko eta kontzertu asko ematen ditu.
Zenbatero eta non egiten dituzue entsegu saioak?
M.I: Entseguek normalien domeketan egiten doguz, Ugaon edo Basauriko sala batzuten. Domeka goxetan, askotan ordu gitxi lo eginda, gaztiek gara eta zapatu gabak sakratuek dielako!
Nondik ibili zarete kontzertuetan?
Momentuz Bizkaitik ibili gara, baie Euskal Herri osora zabalik gauz, zazpi probintzietan joteko prest.
Apiriletik aurrera non ikusi ahal zaituztete ikusentzuleek?
Aste Santutik bueltan atarako dogu kartel erdi-ofiziala gure kontzertu danakaz, orain batzuk konfirmau barik dauz; baina Araba hegoaldetik ia Iparraldera arte dekoguz kontzertuek konfirmatuta.
Nolako abestiak ageri dira zuen setlistean?
Erromeria klasikoak joten doguz, baina beste hainbat erromerixetan entzuten ez direnak be; lau hizkuntzatan kantetan dogu eta bertsioak guriek egiten saiatzen gara. Adin eta epoka desberdinetakoak, baitte dantzak be. Ez dekogu abesti propiorik, baie moldaketak egiten dizkiogu bertsio orginalari segun eta non gauzen, publikoa zein dan.
Pentsatu al dozue grabazio estudioan sartzea inoiz?
Momentuz ez, disfrutau eta plazak hankaz gora baño ez oin momentuen. Gure helburua epe laburrera eta luzeera argia da: guk disfrutatzea, eta gentie diafrutau daixela guk disfrutetan dogun beste, eztau besterik.
☉ Ugao
Bertan behera utzi dituzte Ugaoko inauterietako arrastiko buruhandiak
Hala ere, haurrentzako puzgarrien jarduerak aurrera egingo duela azaldu dute udal ordezkariek. Frontoian prestatuko dituzte
Ugaoko inauterietako programa aurrera doa, baina eguraldi txarra dela eta, gaur arrastian Herriaren enparantzan eta kale zaharrean antolatuta zeuden buruhandiak bertan behera utziko dituztela iragarri dute Udaletik.
Hala ere, haurrentzako puzgarrien jarduerak aurrera egingo duela azaldu dute udal ordezkariek. Izan ere, puzgarriak 18:00etan prestatu dituzte etxeko txikienentzat.
Otsailak 16, astelehena
Buruhandiak eta puzgarriak17:00 Buruhandiak, Herriaren enparantza eta kale zaharra[BERTAN BEHERA]
18:00 Puzgarriak, frontoia
Otsailak 17, asteartea
Kiskailuaren erretzea, haurrentzako jolasak eta txokolatada
17:30 Umeentzako jolasak
19:00 Kiskailua erre
19:30 Txokolatada, Herriaren enparantza
☉ Ugao
Ongizatea: adin guztietako ugaotarrentzat eskuragarri
Kirola egiteaz gainera, uretako jarduerak onuragarriak dira erabiltzaileen ongizate fisiko eta mentalerako, aldi berean
Joan den urtarrilaren 19an berrireki zituzten El Jaro kiroldegiko igerilekuetako ateak, 11 hilabetez obrak direla eta itxita egon ostean. Tarte horretan, Ugaoko Udalak 1997tik egin duen esku-hartzerik garrantzitsuena egin du bertan. Izan ere, 1.226.826 euroko inbertsioa egin dute, eta horietatik 500.000 euro Bizkaiko Foru Aldundiak jarri ditu.
Aurrekontu handiko proiektu guztiekin gertatzen den bezala, iritziak askotarikoak izan dira: kiroldegiko erabiltzaile askoren aburuz beharrezkoa eta onuragarria izan da inbertsioa. Egon da, baina, beharrezkotzat jo arren, lehentasunak beste obra eta arlo batzuetan daudela uste duenik ere.
Egun arte, eta uretako jardueren esparruari dagokionez, Ugaoko kiroldegiko eskaintza igerileku tradizionalak eta bainu turkiarretara mugatzen zen. Behin obra hau bukatuta, aukera gehiago izango dituzte El Jaro kiroldegira bertaratzen diren erabiltzaileek.
Berrikuntza aipagarrienak eraiki dituzten bi igerileku-baso berriak dira. Lehenengoa, 1,20 metroko sakonerakoa, jarduera espezifikoetarako izango da, hala nola haur, heldu eta nagusientzako ikastaroak eta zuzendutako jarduera berriak, aquagym-a kasu. Bestea, sakonera berekoa, aisialdirako erabiliko dela iragarri du Udalak, spa eta erlaxazio gune batekin: “Espazio hori erabilera anitzeko areto zaharra igerileku nagusiaren esparruarekin (klimatizatua) lotuz egokitu da. Azken honek bere sei kaleak eta ohiko erabilera mantentzen ditu, bai igeriketa librerako bai irakaskuntzarako”, zehaztu dute udal ordezkariek.
Izan ere, mota honetako spa eta ur basoei (haurrentzako edo nagusientzako igerilekuak tartean) hainbat onura onartzen zaizkie: spa bezalako guneek hidroterapia eskaintzen dute giharrak erlaxatzeko, zirkulazioa hobetzeko, ametsen kalitatea modu nabarmenean hobetzeko eta helduen estresa murrizteko, oro har.
Zentzu honetan, ez da ahaztu behar, Ugaoren datu demografikoei erreparatuz gero, 65 urterik gorako populazioa %23koa da, eta zahartze aktiboa errazten duten instalazioen beharra handia dela.
Ur gutxiko eremuei dagokienez, berriz, segurtasuna, urarenganako familiarizazioa eta estimulazioa bermatzen dute haur txikientzat, eta aukera ematen dute urari beldurra dieten haurrei igeri egiten ikasteko hastapenak hobeto barneratzeko. Gainera, ur gutxiagorako edukiera daukatenez, ohiko igerilekuetan erabiltzen diren kimiko kopuru gutxiago erabiltzen dira bertan.
Kirolaz harago
Urtarrilaren 29an Leixuri Arrizabalaga Euskara, Kultura eta Kirol foru diputatuak El Jaro kiroldegiko instalazioak bisitatu zituen Ekaitz Mentxaka Ugaoko alkatearekin batera, eta kirolaz harago, Ugaoko kiroldegia ongizaterako, osasunerako eta komunitate-kohesiorako gune ere bihurtu dela azpimarratu zuen.
Horrekin batera, belaunaldien arteko faktore inklusiboa ere aipatzekoa da: sakonera txikiko igerileku bati esker, haurrek, helduek eta adinekoek jarduera partekatu dezakete ingurune seguru batean. Kirol guztiek ez dute zeharkako izaera hori.
Beste hitz batzuetan, aisialdiaz haratago, udal igerileku berri hauek entretenimendurako espazio bat eskaintzeaz gain, osasun publikoko tresna bat eskaintzen dute: inpakturik gabeko jarduera fisikoa, ongizate mentala, belaunaldien arteko inklusioa eta adin guztientzako ariketa irisgarria.
Udalaren datuen arabera, Ugaoko instalazioak ehunka pertsonek erabiltzen dituzte egunero, eta Mentxakaren arabera “jarduketa hau herritarrek aspalditik eskatutakoa da. Erabiltzaileek adierazitako beharrei erantzun diegu, eta ziur gaude datozen urteetako erronkei aurre egiteko prest dauden instalazio moderno eta moldakorrez gozatuko dutela”, izan dira Ugaoko alkatearen berbak.
☉ Ugao
Memoria Tailerra abiaraziko dute Ugaon, ‘Zainduz’ programaren baitan
Saioak astearte eta ostegunetan egingo dituzte, 16:00etatik 17:30ak bitartean, Gure Etxea Jubilatu eta Pentsiodunen Elkartean
Otsailaren 17an hasiko da memoria lantzera eta ongizate kognitiboa sustatzea helburu duen Memoria Tailer berria, Ugaon, ‘Zainduz’ programaren bidez.
Saioak astearte eta ostegunetan egingo dituzte, 16:00etatik 17:30ak bitartean, Gure Etxea Jubilatu eta Pentsiodunen Elkartean (Udiarraga, 25).
Era honetako tailerretan, “gogoratzeko trebatzeaz” gain, estimulazio kognitiboa, autoestimua eta sozializazioa modu integralean lantzen dira normalean. Helburu nagusia da funtzio mentalak mantentzea eta indartzea, narriadura kognitiboa prebenitzea eta egunerokorako tresna praktikoak ematea.
Edukiera mugatua izango da eta parte hartzeko izena ematea beharrezkoa dela adierazi dute Ugaoko Udaletik. Horretarako, udaletxera jo edo 747 455 290 telefono zenbakira deituz harremanetan ipini beharko dira interesdunak.
☉ Ugao
San Mames estadioa berdez argiztatuko dute Ménière gaixotasunari ikusgarritasuna emateko
Edurne Astondoa ugaotarra Menière Sindrome España ASMES elkarteko ordezkaria da eta duela egun batzuk harremanetan ipini zen GEURIA komunikabidearekin San Mames estadioan egingo duten ekimenaren berri emateko
Datorren otsailaren 7an Bilboko San Mames estadioa berdez argiztatuko du Athletic Clubek 20:00etatik 20:30ak bitartean Menière sindromeari ikusgarritasuna emateko. Edurne Astondoa ugaotarra Menière Sindrome España ASMES elkarteko ordezkaria da eta duela egun batzuk harremanetan ipini zen GEURIA komunikabidearekin San Mames estadioan egingo duten ekimenaren berri emateko.
Izan ere, otsailaren 7an Ménière kontzientziatzeko eguna ospatuko dute. 2016an elkartea eratu berria zela, bilerak egin zituen Europako antzeko elkarteekin, eta Osasunaren Mundu Erakundeari (OME) Ménière Sindromearen Munduko Eguna esleitzeko eskatzea erabaki zen. “Otsailaren 7a aukeratu zen, egun horretan hil baitzen Prosper Ménière, gure gaixotasunaren sintomak lehen aldiz deskribatu zituen mediku frantsesa. Gestioak hasi ziren, baina ezinezkoa izan zitzaigun OMEra iristea, ahanzturan geratuz, baina ez guretzat. Egun horretan ofizialki berriz eskatu ahal izateko zain, Ménière-ren Sindromeari buruzko Kontzientziazio Eguna ospatu genuen”.
Ménière-ren sindromea barne-belarriko nahasmendu kronikoa da, eta bertigo larriko eraso errepikakorrak, entzumenaren galera gorabeheratsua, tinnitus (burrunbak) eta belarriko presio- edo zapalkuntza-sentsazioa eragiten ditu. Orekari eta entzumenari eragiten die, gehienetan belarri bakar batean, eta belarriko labirintoan likido gehiegi egotearen ondorio dela uste da.
☉ Ugao
Ugaoko kultur ondarea ezagutzeko otsailaren 11n ibilbide gidatua egingo dute
Jarduera parte-hartzailea izango da eta helburua herriaren memoria eta nortasuna gertutik ezagutzea izango da
Ugaoko Udalak, AEKrekin elkarlanean eta Bizkaiko Foru Aldundiaren babesarekin, hiribilduaren kultur ondarea ezagutzeko ibilbide gidatua antolatu du beste urte batez ‘Praktikatu eta bizi’ programaren barruan. “Herriko kultur ondarea ezagutzeko aukera izango dugu aditu baten eskutik”, iragarri dute.
“Ibilbide gidatuan, Ugaoko hainbat leku esanguratsu bisitatuko ditugu, haien historia, erabilera eta garrantzia ezagutzeko”. Jarduera parte-hartzailea izango da eta helburua herriaren memoria eta nortasuna gertutik ezagutzea izango dela azaldu dute antolaketa taldetik.
’80. Hamarkada’ izango da Abusuko inauterien gaia aurten
Galdakaon ondutako ‘Bi baso bat ur’ antzezlana estreinatuko dute ostegunean Torrezabal Kultur Etxean
Lau gizon atxilotu dituzte Basauriko metalurgia enpresa batean lapurreta egiteagatik
Argazkiak | Euriak ez ditu Arrigorriagako herri-inauteriak geldiarazi
Argazkiak | Lau urtaroak, Oilategi Deluxe eta Txorimaloak izan dira mozorrorik onenak Basaurin
