☉ Zeberio
Aitziber Mendibil: «Frontoia bizirik dago eta palarekin eman nahi diogu jarraipena»
Herrian umeen pala taldea sortzearen alde, lehenengo topaketa egin zuten irailean Zeberion. Aitziber Mendibil guraso eta Mandoia Zeberio Pilota Kirol Klubeko zuzendaritza taldeko kideak egitasmoa bide onetik doala uste du
Mandoia Zeberio Pelota Kirol Klubak 2021eko maiatzean zabaldu zituen ateak, eta ordutik, hainbat ume eta gazte hasi dira Zeberioko frontoian astero biltzen esku-pilotan entrenatzeko. Ekimenak izan duen arrakasta ikusita, frontoia biziberritzeko beste pauso bat ematea pentsatu dute klubetik: pala taldea sortzeko topaketekin hastea. Aitziber Mendibil (Basauri, 1973) Mandoia Zeberioko zuzendaritza taldean dago, eta harekin hitz egin dugu proiektuaren hasieraz eta herriko haurrei pilota lehiaketetatik kanpo ere bizi daitekeela irakasteko beharraz.
Zerk bultzatu zaituzte pala taldea sortzeko topaketak antolatzera? Hemen betidanik egon izan da ohitura frontoiko jokoetara jokatzeko, batez ere frontenisera. Halere, esku pilota kluba hasi genuenean, ez genuen talderik sortu, nahiz eta uste dugun pilotaren mundua beste modalitate horietara ere zabaldu behar dela. Esku-pilota telebistan agertzen denez, jaun eta jabe da, eta umeek hori nabaritzen dute: nagusiok esku pilota arreta handiz ikusten badugu, baina gero katez aldatzen badugu palako partida bat dagoenean, haurrek pentsatzen dute hori dela jokatu behar dutena. Eta guk ezin ditugu frontoiko modalitate horiek ahaztu. Zeberion, gainera, jende askotxok jolasten du palan, eta joko hori ere izan daiteke jendea klubera hurbiltzeko gakoetako bat; izan ere, esku hutsezko jokoen aurrean, palarekin edo bestelako erremintekin ibiltzea erakargarriagoa izan daiteke batzuentzat.
Nor erakarri dezake palak? Badaude ume batzuk pilotari eskuarekin ematea hain gustuko ez dutenak (agian, bortitza izan daitekeelako atzamarrentzat), eta horietako asko frontoira palarekin edo erraketarekin hurbiltzen dira. Orduan, horri forma pixka bat emateko, entrenatzaileekin hitz egin genuen: hori izan zitekeela hasiera. Horrez gain, kontutan izan behar dugu pilota taldeetan, gurean bezala, genero arrakala dagoela: askoz mutil gehiago daude neskak baino. Eta pala jokoa eskaintzen badugu, haiek ere erakarri genitzake beharbada, batek daki.
Frontenisa ere aipatu duzu. Zergatik egin duzue palaren aldeko hautua erraketaren aurrean? Frontenisean jolastea errazagoa da, nahiz eta ondo jokatzeko asko praktikatu behar den, kirol guztietan bezala. Palarekin alderatuta, erraketa ez da hain konplikatua maneiatzeko, zabalagoa delako, eta gainera, palak teknika gehiago eskatzen duelako: eskumuturrarekin indarra egin behar da, eta materiala egokitu arren, maneiu ona eskatzen du. Halere, Euskal Herrian, tradizioz, beti jokatu izan da palaz. Orduan, gurea bezalako taldeek eta elkarteek modalitate hau zaintzearen alde egin behar dute, galtzeko zorian ere egon baita.
Palarekin hasteko, baliabide aldetik, nahikoa dituzue? Momentuz, ez, forma emateko eta taldea sortzeko lanetan ari baikara oraindik. Hasteko, adibidez, Zaratamoko pilota elkarteari eskatu diogu laguntza materialetarako, alde horretatik talde guztiok gabiltzalako nahiko eskas. Beraz, taldeen artean hitz egiten dugu.
Beste zein pala talde daude Zeberio inguruan? Zeanurin, Artean eta Orozkon badaude, eta Zeberion ez dagoenez, jokatzen duen jendea kanpora joaten da. Orduan, dauzkagun instalazioekin eta jen- dea izanda taldea egiteko, elkarteak hartu behar du hori bultzatzeko erronka.
Topaketekin jarraituko duzue? Bai, topaketak ostegun guztietan egiten ditugu, udaletxeko frontoian, 17:00etik 19:00etara. Baina, hemendik aurrera, jendeak hurbiltzen jarraitzen badu eta interesatuta badago, datorren urteari begira, eguna jarriko dugu eskola kirolean bezala apuntatzeko. Gainera, badaukagu beste frontoi bat ere, Ermitabarrikoa, eta epe luzera ordutegi ezberdinak planteatu daitezke: klaseak asteko bi egunetan egitea, ordu bateko edo ordu eta erdiko entrenamenduak.
Zer egiten duzue topaketetan? Hurbiltzen diren umeekin jolasak egiten ditugu eta beroketak “gantxo” moduan erabiltzen ditugu, apurka-apurka ariketa ezberdinak tartekatzen joateko. Bitartean, bakoitzaren maila zein den ikusten dugu (batzuk hasiberriak dira, beste batzuk trebatuta daude palan), eta horren ara- bera antolatzen ditugu taldetxoak. Bestela, hasiberriak jolasten hasten badira eta ikusten badute ez dutela asmatzen, desanimatu egiten dira. Beraz, bakoitzari bere mailako ariketaren bat jartzea ere komenigarria da.
Orain arte, zein adinetako umeak gerturatu zaizkizue? Lehen Hezkuntzakoak eta baita Bigarren Hezkuntzakoak ere, 9-10 urtekoak zein 12-13 urteko neska-mutilak. Talde mistoa.
Lehiaketetan eta txapelketetan parte hartzeko arazoak izango dituzue agian, kategoria ezberdinetako umeak daudelako. Baina hori Federaziotik kudeatzen da: partidak, daukaten mailaren arabera egiten dira. Haur bat oso maila altuan jartzen baduzu, desmotibatu egiten da behin eta berriro galtzen ari dela ikusten badu. Egia da porrota kudeatzen ere ikasi behar dela, baina beti badabil galtzen.
Orduan, hau afizioa sortzeko baino ez da? Bai. Azkenean, txapelketak motibatzeko baliabide bat dira, eta horrela izan behar dira beti. Lehiaketak eta egiten ditugun txapelketak kirolak behar duen saltsa dira, mugimendu apur bat, baina gehiegi ez da komenigarria, umeek ez dakitelako presio hori kudeatzen. Zeberion ere, harmailak gurasoz beteta daudenean, haurrek presio izugarria daukate. Beraz, haientzat, momentuz, nahikoa da herriko jendearekin jolastea eta ondo pasatzea. Pilota, gainera, ez da txapelketen mundua bakarrik: lehiaketetatik kanpo badago beste arlo bat ere, monitorearena, entrenatzailearena, epailearena… Pilotari profesionalen kasuan, goreneko maila uzten dutenean, dena ez da hor bukatzen, frontoia beti baitago hor edozeinek jolasteko. Gustua hartzen badiozu, bizitza osorako balioko dizu, eta hori irakastea da gure helburua.
Kontzeptua aldatzea, zer izan daitekeen, nola hasi eta nola jarraitu. Noski. Eta ohiturak ere bai: frontoira hurbiltzea kirola ikusteko eta herriko bizitza sustatzeko. Jaietan, adibidez, emakume profesionalen partidekin, beteranoenekin eta umeenekin giro polita egon zen. Azkenean, frontoia bizirik dago eta palarekin eman nahi diogu jarraipena.
☉ Zeberio
Itxaso Atutxak ez du EAJren Bizkaiko buruzagitzan jarraituko
Hamabi urteko ibilbidearen ondoren erreleboa emango du azaroan eta enpresa pribatura bueltatuko da, bere “ziklo politikoa” bukatzat emanda
Itxaso Atutxa Bizkai Buru Batzarreko presidenteak gaur jakinarazi du ez duela bere burua berriro Bizkai Buru Batzarreko presidentzarako aurkeztuko. Hala, Jose Antonio Susok Araban hartutako bide bera hartu du. Ikusteke dago Gipuzkoako Joseba Egibarrek gauza bera egingo duen edo ez.
Zergatiaz galdetuta, Onda Vascari emandako elkarrizketan Atutxak bere “ziklo politiko eta ibilbide publikoa” bukatutzat eman du, enpresa pribatura bueltatuko dela zehaztuz. Bere garaian 3Koma ekoiztetxeko arduraduna izan zen zeberioztarra hainbat urtez.
2013an heldu zen Atutxa BBBren buruzagitzara, Andoni Ortuzarren ordez. Ordutik hona, alderdi mailako erabaki garrantzitsuetan parte hartu du, eta bi errelebo gidatu ditu Bizkaiko Foru Aldundian: Unai Rementeria Ahaldun Nagusi moduan Jose Luis Bilbaoren ordez, eta iaz Elixabete Etxanoberena Rementeria beraren ordez.
☉ Zeberio
Undurraga eta Etxebarri arteko Errege Bide zatia konpontzen hasi da Zeberioko Udala
Astelehenean bertan ekin diete konponketa lanei. Obra hauetarako 27.000 euro bideratuko ditu Zeberioko Udalak, BEZa kanpo
Iraila eta urriko hasierako euriteek kalteak eragin dituzte Zeberioko Undurraga eta Etxebarri auzoen arteko Errege Bidearen zatian eta Zeberioko Udalak astelehenean bertan ekin zion bidea konpontzeko lanei.
Ura garraiatzeko hodi berriak ipiniko ditu Udalak eta lursaila egonkortzeko materiala gehituko dutela iragarri du Ekain Goti herriko alkateak: “Gainera luizi batzuk egon ziren zonalde horretan eta bertako inguruak garbituko ditugu hurrengo egunetan”, azaldu dio GEURIAri eta lanek aste biko iraupena izango dutela aurreikusi du. Konponketa hauetarako 27.000 euro bideratuko ditu Zeberioko Udalak, BEZa kanpo.
Errege bidea // Zeberioko Udala
☉ Zeberio
Gabonetako oporrak baino lehen bukatu nahi ditu Zeberioko Udalak frontoiko lanak
Udalak 65.000 euro bideratuko ditu (BEZa kanpo) hezetasunak konpondu, margoketa lanak egin, bentilazio sistema berri bat ipini eta LED sistema bidezko argiteria ezartzeko
Urriaren erdialdean hasiko dituzte Zeberioko Zubialde auzoko frontoiko lanak, ondo bidean. Urte hasieran Ekain Goti Zeberioko alkateak GEURIAri aurreratu zion herriko frontoi nagusian egin beharreko konponketak. Izan ere, Gotik azaldu lez, “hezetasunena ez da kontu berria” eta Udalaren asmoen baitan zegoen arazo horri aurre egitea.
Udako oporrak amaituta eta Gabonetarako hilabete eta erdi falta direlarik, tarte hori erabili nahi du Udalak egin beharreko obrak burutzeko. Ekainen aurreikuspenen arabera, gauzak behar bezala badoaz lanen iraupena hilabete bi baino txikiagokoa izan beharko litzateke, Gabonetarako prest egoteko.
Aurrekontua 65.000 eurokoa izango da, BEZa kanpo. “Frontoi barruan saneamendu lanak egingo dituzte, margoketa lanak eta bentilazio sistema berria ezarriko dugu bertan”, izan dira herriko alkatearen berbak. Gainera, LED sistemako argiteria ipiniko dutela gehitu du.
Entrenamenduak, Ermitabarrira
Obrek dirauten bitartean frontoia ezin izango dute erabili Mandoia Pelota Klubeko ikasleek eta behin behineko alternatiba moduan entrenamendu klaseak Ermitabarriko frontoian ematea izango da: “Asteburuko partidak egiteko frontoi txikiegia bada ere entrenamenduetarako balioko du”. Asteburuko partidak Arrigorriagan jokatuko dituzte.
☉ Zeberio
Zeberioko Santa Kurtze ermitako lanak hilabete bukaeran amaituko dituzte
Obra guztia egin ahal izateko aurrekontua 35.431,41 eurokoa izan da guztira. Horietatik 23.325,91 euro eliztarren ekarpenetatik lortu dituzte
Santa kurtze auzoko ermitaren lanen azken ukituak ematen ari dira egun hauetan Zeberion. 2023ko abenduaren 6an, 19:00ak aldera, gidari gazte batek autoaren kontrola galdu, errepidetik irten eta Santakurtze elizako arkupearen aurka jo zuen. Errepidea bustita zegoen eta kolpeak, ikusgarria izan arren, ez zuen zauritu larririk utzi.
Kalteak materialak izan ziren beraz, arkupea ezagutezina geratu baitzen. Istripua gertatu eta egun gutxira, kalteak konpontzeko prozedura martxan ipini zuen Zeberioko parrokiak, eta GEURIAri azaldu lez aseguruak 12.105,50 euro ordaindu dizkio elizari konponketak egiteko.
Elizako ordezkarien arabera kopuru hori “txikiegia” da arkupea konpontzeko: “Ez dugu kaltetutako zatia konpondu nahi izan soilik; helburua arkupe osoa konpontzea da eta aseguruak kalte jakin batzuk konponduko ditu emandako diruarekin”, azaldu dute. “Gure gurasoek eraiki zuten ermita hau bere fedea eta ahaleginari esker, orain gure esku dago konpondu eta mantentzea”, azaldu dute parrokiatik.
Horiek horrela eta istripua sortutako autoak “kalte izugarriak” izan zirela ikusita, parrokiak konponketa integrala egin du arkupean: “Falta zitzaigun dirua eliztarren ekarpenei esker lortzen ari gara”, gehitu dute parrokiako arduradunek. Obra guztia egin ahal izateko aurrekontua 35.431,41 eurokoa izan da guztira.
Zeberioko Parrokia: “Ez dugu kaltetutako zatia konpondu nahi izan soilik; helburua arkupe osoa konpontzea da”
Teknikarien lana, kudeaketa eta aholkularitza Bilboko Gotzaindegiko Kultura Gai eta Ondasunen Sailari egokitu zaio. Zeberioko Olabarrietako Santo Tomas parrokiak, Zeberioko Santa Kurtze auzoaren laguntzarekin, eta eliztar eta boluntario anonimo gehiagok egin dute konponketa honen ahalegina.
Lanak bukatuko dituztenean inaugurazio ofiziala egingo dutela aurreratu diote GEURIAri.
Ondasun historikoa
Santa Kurtze ermita Gurutze Santuari eta honen aurkikuntzaren oroitzapenari dago eskainia. Gurutze Santua Constantino enperadorearen amak, Santa Elenak, aurkitu eban Jerusalemen, 326. urtean.
Tenplu honen jatorria ezezaguna da, baina 1678. urtean auzokide batzuek (Martin Petralanda, Rafael eta Tomas de Ibarrola eta Juan de Urabarrok) berreraiki zuten.
Egungo eraikina 1890ekoa da eta jatorriko eraikinaren antz handirik ez du. Casto de Zabalak proiektatu zuen eta azken berreraikitze honek 2.500 pezetako kostua izan zuen.
Ermitaren arkupean hilerri bat dago. Kareharri bloke bat da, trapezio-formaduna, apaindua eta XI.-XII. mendeen artean egindakoa.
Santa Kurtze eguna maiatzaren 3an da. Antxina, egun honek landaguneetan berebiziko garrantzia hartzen zuen, udaberriko bedeinkapenen egutegian egun nagusienetarikoa izaten baitzen.
Mezatan elorri zuri loredunez, zumez edo hurritzez egindako gurutzeak bedeinkatzen zituzten. Ostean, soroetan sartzen ebezan, ereindako ortuak bedeinkatzeko. Baserrietako leihoetan be ipinten zituzten, etxeak tximistetatik babesteko.
☉ Zeberio
Heziketa fisikoa, muskulazioa eta mantentze-gimnasia ikastaroak iragarri ditu Zeberiok
Kirol-ikastaroetan izena emateko epea gaurtik hasita irailaren 30era zabaldu dute
Ikasturte berriaren hasierarekin, Zeberioko Udalak herrian eskainiko dituen kirol-ikastaroen eskaintza iragarri berri du. Hiru jarduera izango dira guztira: Heziketa fisikoa, muskulazioa eta mantentze-gimnasia eta hirurak, urtero lez, eskola zaharrean eskainiko dituzte.
Jarduerak, momentuz, astearte eta ostegunetan programatu dituzte. Urritik aurrerako datak zehazteke daude oraindik:
17:00 – 17:55 Mantentze gimnasia
18:00 – 18:55 Heziketa fisikoa
19:00 – 19:55 Muskulazioa
20:00 – 20:55 Mantentze gimnasia
Izena emateko epea gaurtik hasita irailaren 30era zabaldu dute (amaiera ordua 14:00ak izango dira). Parte-hartzeko telefono zenbakia 946 481 079 da.
Tokiko produktuak goi-mailako sukaldaritzara eramateko jardunaldiak antolatu dituzte Galdakaon
Eusko Legebiltzarrera joango dira Usansoloko herritarrak metro geltokia erdigunean eraiki dezaten eskatzera
