☉ Basauri
Probidentzia ikastetxeak 85 urte Basaurin
Probidentzia Andra Mari ikastetxeak 85 urte bete ditu Basaurin. Apirilaren 21ean ospakizun-jaia antolatu dute.
Probidentzia Andra Mari ikastetxeak 85 urte bete ditu Basaurin. Apirilerako ospakizun-jaia antolatu dute eta bertan ikasle zein irakasle izandakoak eta direnak elkartuko dira
30eko hamarkadaren hasiera zen Probidentzia Andra Mari alaba erlijiosoek Lehen Hezkuntzako ikastetxe bat Basaurin errotu zutenean. “Ikastetxea berez 1931n sortu zen Probidentziako alaba erlijiosoen eta S.A. Basconia lantegiko ordezkaritzaren arteko elkarrizketa baten ondorioz“, dio Amaia Etxebarria Urtiaga Probidentzia ikastetxeko zuzendariak (berriztarra). Eraikina 1930ean eraiki zuen Estanislao Segurolak eta gaur egun berdin mantentzen da. “Jesus Landarena uste dut zela lursaila eta ondoan txaletak baino ez zeuden. Alde batean mojak bizi ziren eta ingurua landa-eremua zen“, dio Etxebarriak.
Garai hartako Basaurik 8.000 biztanle inguru baino ez zituen eta Basconia fabrikak hazkundea ekarri zuen udalerrira. “Basconiako zuzendariek eskola bat nahi zuten Basaurin beren langileak eta haien seme-alabek hezteko. Orduan, kongregazio bat bilatzen hasi ziren eta Eibarren zegoen Probidentzia Andra Mari aurkitu zuten. Hezkuntza aldetik oso onak zirela entzun zuten nonbait Basconiakoek, eta hala harremanetan jarri ziren Basaurin eskola bat sortzeko“, dio Etxebarriak. Gauzak horrela, 1932ko urtarrilaren 9an ireki zituen ateak Probidentzia eskolak Basaurin: “Eskolako lehenengo zuzendaria Maria Carmen Peña Garikano izan zen eta 1934ra arte iraun zuen. Ondoren Madre Margarita de Jesus monja asturiarrak hartu zuen zuzendari kargua 1955era arte“.
Hasierako antolaketa
1932an hiru ikasgela baino ez zituen eskolak: 6 urtera artekoa (mistoa), 6 eta 8 urte bitarteko nesken beste bat eta 9 eta 14 urte arteko nesken beste ikasgela bat. Hiru ikasgela horiek beheko solairuan zeuden eta bigarren solairuan hasierako urteetan Basconiak baimena eman zien mojei eskola partikularrak emateko, “irakaskuntza berezia jasotzen ari ziren neska ikastunentzako“. Irakaskuntza berezi horiek ziren: frantsesa (Probidentzia Andra Mari kongregazioa frantsesa delako), brodatuak eta pintura.
Probidentzia ikastetxeko eraikina 30. hamarkadan // Probidentzia Andra Mari ikastetxea
Irakaskuntza berezi hori Gerra Zibila piztu arte eskaintzen zen Probidentzia eskolan: “Ondoren, Basconiako langileen seme-alabentzako zen, eskola partikularrik gabe“, dio Etxebarriak: “Irakaskuntza zein materiala, dena doakoa zen ikasleentzat“. Gerra garaian eskola itxi egin zuten eta 1937an berriro ireki zituen ateak. “1937an haurrentzako bi gela, umeentzako hiru ziklo eta 14 urtetik gorako neskei zuzendutako lan-berezientzako klase bat eskaintzen hasi ziren: bertan berriro ere ikasten zuten brodatuak egiten, pintura eta frantsesa. Brodatuen eta pinturen erakusketa urtean behin antolatzen zuten eta Basconiako kontseiluko kideak erakusketara etortzen ziren. Era berean, 14 urtetik gorako beste neska batzuk Bilbora joaten ziren magisteritza ikastera“, dio Etxebarriak.
Eskola 1932an ireki zenean 120 ikasle zeuden matrikulatuta eta gerraostean ia bikoiztu egin zen matrikulazioen kopurua: “Gerra Zibila bukatuta, 225 ikasle matrikulatu ziren gurean eta horietatik 50 mutilak ziren. Ministerioko exijentziak gero eta handiagoak ziren eta Lehen Hezkuntzako sei klase izatera iritsi zen ikastetxea. 60ko hamarkadan 14 urterekin eskola bukatzen zutenean sekretaritza ikasten zuten ikasleek. Bertan, kultura generala, mekanografia, takigrafia, frantsesa, kontularitza, kalkulua, korrespondentzia eta heziketa erlijiosoa eskaintzen zituzten“, dio Etxebarriak.
Probidentzia ikastetxea Mojen eskola bezala ezagunagoa da basauriarren artean eta heziketa erlijiosoak garrantzia handia izan du beti hezkuntza-proiektuaren barruan: “Mojak garenez, beti irakatsi izan dugu heziketa erlijiosoa. Ikastetxe honek beti izan du harremana Basauriko parrokiarekin eta bertako abadeak jarraipena egiten zien ikasleei. Gaur egun modu ezberdin batean irakasten dugu erlijioa: batik bat baloreetan oinarritzen dugu heziketa, hau da, Jesusek pertsona bezala erausten dizkigun baloreetan. Batez ere, umeek proiektuka lan egiten dute baloreak ardatz hartuta“, dio Etxebarriak.
Probidentziatik San Josera
70eko hamarkadan Oinarrizko Hezkuntza Orokorra (OHO-EGB) hezkuntza-sistema ezarrita zegoen eta zortzi ikasturtek osatzen zuten, normalean 6 urtetik 13 urtera bitartean. “Gelak 40 ikaslez osatzen ziren garai haietan“, gogorarazi du Etxebarriak. Zuzendariak gaineratu duenez, “1971an S.A Basconia lantegia Altos Hornos de Vizcaya enpresak barne hartu zuen eta ondorioz baita Probidentzia Andra Mari ikastetxea ere. 1974an, Altos Hornosek Hezkuntza Ministerioari bere eskola guztiak eman zizkion, baina Probidentzia Andra Mariko kongregazioa eskolako titular modura geratu zen“.
Ondoren, 1984an Hezkuntza Ministerioak ezarri zituen xedapen berrien ondorioz, zentroa Haur Hezkuntzako ikastetxe izendatu zuten. “Orduz geroztik Probidentzian Haur Hezkuntza eskaintzen da, eta Lehen Hezkuntza eta Bigarren Hezkuntza San Jose ikastetxean”, dio Etxebarriak. San Jose ikastetxea Probidentzia baino bi urte geroago zabaldu zuten San Viatorreko elizgizonek: “Bertan Lehen Hezkuntza eta Arteak eta Ofizioak eskaintzen zituzten, gero bertako mutilek Basconia lantegian lan egin zezaten prestatzeko“. Gauzak horrela, Probidentzian neskek ikasten zuten bitartean, San Jose ikastetxean mutilek ikasten zuten.
Gaur egun eskola biak mistoak dira eta bi ikastetxeen arten hitzarmena dago ikasleak zentro batetik bestera zuzenean pasatzeko. Urte batetik 6 urtera bitarteko neska-mutilek ikasten dute Probidentzian eta gero San Jose ikastetxera salto egiten dute Lehen Hezkuntza eta Bigarren Hezkuntza egiteko.
Euskararen arloa 1974. urtera arte ez zen hezkuntza-proiektuan sartu. “Ikastetxean zegoen Irene Renteria Meza andereño elantxobetarra euskara ikasleen artean bultzatzen hasi zen eta euskara ikasgai bezala ematen zuen harrez geroztik“, dio Etxebarriak. 1987/1988 ikasturtean B eredua ezarri zuten eta 2000. urtetik aurrera D eredua. Gaur egun 224 ikasle daude matrikulatuta Probidentzian.
85. urteurrena
Apirilaren 21ean, larunbatez, ospatuko du Probidentzia ikastetxeak bere sorreraren 85. urteurrena. “Ikasleak, anai-arrebak, ikasle ohiak edota irakasleak elkartuko gara urtebetetzea ospatzeko“, dio Amaia Etxebarria ikastetxeko zuzendariak. Datuak datu, 235 lagun inguru elkartuko dira ikastetxearen 85. urteurrena ospatzeko bazkarian.
Ondorengoa izango da ospakizun-jaiko egitaraua: 10:30ean meza San Pedro elizan, 11:30ean antzinako argazkien eta objektuen erakusketa eta haurrentzako tailerrak Probidentzian, eta 15:00etan bazkaria San Jose ikastetxean.
San Migeleko jaietan Playback lehiaketa antolatu dute eta txapeldun izan da Los Gambas kuadrilla. Jon Salguero eta Maialen Barredo Los Gambas kuadrillako kideekin berba egin dugu.
San Migeleko jaietan Playback lehiaketa antolatzen du Mikelatsek. Aurten lau kuadrillak hartu dute parte: Los Gambas (txapeldunak), Uholdeak, Los Tenderetes eta Las Maris (aurten La Mari).
☉ Basauri
Basauriko ikastetxeen arteko Esku Pilota txapelketa jokatuko da San Migeleko jaietan
Urriaren 6an, igandez, izango da txapelketa eta Basauriko Lehen Hezkuntzako bederatzi ikastetxeak gonbidatu ditu Bidebieta Pilota Taldeak
Basauriko ikastetxeen arteko Esku Pilota txapelketa jokatuko da San Migeleko jaietan, urriaren 6an. Bidebieta Pilota Klubak antolatuta, aurtengoa hirugarren edizioa da, eta urtero bezala, Basauriko Lehen Hezkuntzako bederatzi ikastetxeak gonbidatu dituzte: Etxegarai, Soloarte, Sofia Taramona, Basozelai-Gaztelu, Bizkotxalde, Arizko Ikastola, Kareaga Goikoa, San Jose eta Basauri Ikastetxea.
Lehen Hezkuntzako 5. eta 6. mailako ikasleei dago zuzenduta txapelketa: “Partida laburrak izango dira, sei edo zazpi puntura. Bikote bakoitzak bi partida jokatuko ditu, eta ligaxka formatuan kanporaketak egongo dira, 5. mailako eta 6. mailako txapeldunak izan arte”, azaldu dio GEURIAri Mikel Karrillo Bidebideta Pilota Klubeko ordezkariak.
Txapelketa 10:00etan hasiko da 5. mailakoekin, eta 12:00etan 6. mailakoekin. “Espero dugu ikastetxe guztiak animatzea. Umeek oso ondo pasatuko dute eta gainera esku pilota eta kirola sustatzeko aukera ezin hobea da”, dio Karrillok.
☉ Basauri
Etxe Maitiako azterketa “deialdi bakar gisa” tipifikatuta dagoela dio Basauriko Udalak
Azterketa beste data batean egitea edo beste azterketa bat egitea baimenduz gero, berdintasun-printzipioa urratu eta hautagai guztientzat diskriminazioa eragin dezakeela argudiatu du Basauriko Udalak
Basauriko Etxe Maitia Udal Egoitzako Erizaintzako Laguntzaile lanposturako EPErako azterketa erditze egunean egitea beste aukerarik eman ez ziotela salatu du basauriar batek.
Basauriko Udalak adierazi duenez, prozesu horren azterketa “deialdi bakar gisa” tipifikatuta dago: “Hau da, hautagai guztiek egun berean egin behar dute proba bera. Pertsona batek beste data batean egitea edo beste azterketa bat egitea baimenduz gero, berdintasun-printzipioa urratu eta hautagai guztientzat diskriminazioa eragin dezake, emakume erreklamatzailearentzat barne, izangai guztiak ez baitziren parametro berberekin baloratuko”, diote udal ordezkariek.
“Epaimahaiak, Osakidetzak aplikatzen duen protokolo bera jarraituz, azterketa ospitalean bertan egiteko aukera eskaini zion emakumeari, baina berak uko egin zion, eta sine die atzeratzeko eskatu zion, azterketa egiteko moduan egon arte”, diote.
“Ebazpen loteslea”
Enplegua egonkortzeko Etxe Maitiako epaimahaia organo “burujabea eta autonomoa” dela gogorarazi du Basauriko Udalak: “Eta mota horretako prozesuak arautzeko orduan dagoen ordenamendu juridikoan oinarritutako ebazpenak emateko balio du”, diote.
“Politikoen jarraibideen mende ez dauden profesional teknikoek osatutako organoa da. Enplegatu Publikoaren Oinarrizko Estatutuaren Legeak 2007an erabaki zuen ordezkari politiko edo sindikal bakar batek ere ezin zuela parte hartu horrelako epaimahai batean, prozesuaren objektibotasuna, inpartzialtasuna eta profesionaltasun teknikoa zaintzeko. Hori dela eta, gobernu-organoek ezin diete jarraibiderik eman hautaketa-epaimahaiei, ezta beren erabakietatik aldendu ere. Administrazio-errekurtsoren bat jarriz gero bakarrik berrikusi ahal izango dira, administrazio-prozedura erkidearen araudiaren bidez”, azaldu dute udal ordezkariek.
Ildo horretan, epaimahaiak ematen duen edozein ebazpen organo politikoentzat loteslea dela adierazi dute Basauriko udal arduradunek, eta gai horri buruzko informazio zehatza Etxe Maitia Egoitzaren hurrengo Kontseilu Errektorean emango duela adierazi dute.
☉ Basauri
Etxe Maitiako EPE azterketa erditze egunean egitea beste aukerarik eman ez ziotela salatu du basauriar batek
LAB sindikatuaren ustez, “zuzeneko diskriminazio” kasu bat da, ez ziotelako beste aukerarik eman, eta kexa jarri du Arartekoan
Basauriar batek ezin izan du bere lanpostua egonkortzeko azterketarik egin, azterketa eguna bere erditze egunarekin bat egin zuelako, eta LAB sindikatutik salatu dutenez, ez ziotelako beste irtenbiderik eman: “Zuzeneko diskriminazio kasu bat da”.
Z.G.G. basauriarra Basauriko Etxe Maitia Udal Egoitzako Erizaintzako Laguntzaile lanposturako aldi baterako enplegua egonkortzeko prozesura aurkeztu zen; azken urteetan aldi baterako kontratuak bete izan ditu egoitza horretan, eta lanpostua egonkortzeko azterketa egiteko izena eman zuen.
“Nire bikoteak izena eman eta azterketa erditze-egunarekin bat egiteko aukera zegoenez (azkenean hori gertatu zen) Auzitegiari eskatu genion neurriren bat har zezan, azterketan parte hartu ahal izateko. Eskaini zioten irtenbide bakarra izan zen azterketa ospitalean bertan egitea, erditze egunean bertan. Noski, ezetz esan zuen”, adierazi dio GEURIAri Z.G.G.-ren bikotekideak.
LABek adierazi duenez, emakumeak bi aldiz jakinarazi zion epaimahaiari bere haurdunaldiaren egoera, baita erditzearen balizko data ere, azterketa egunarekiko (irailak 12) denbora gutxiko aldea zegoela aintzat hartuta, eta informazioa eskatu zuen hautaketa-prozesuan parte hartuko zuela bermatzeko har zitezkeen neurriei buruz.
Irailaren 10ean, azterketaren data baino bi egun lehenago, epaimahaia bildu zen, eta erantzun zion azterketa eta erditzea aldi berean gertatuz gero, epaimahaia ospitalera joan zitekeela proba gainerako izangaien ordutegi berean egin zezan.
Epaimahaiak irailaren 10ean erantzun zionerako, Z.G.G.-ri irailaren 12rako eman zioten erditzea eragiteko data. “Kontua da egun horretan bertan egin behar zela Erizaintzako Laguntzailearen azterketa. Beraz, Z.G.G.-k egoera horren berri eman zion berriro ere Auzitegiari. Eta epaimahaiak, berriz ere, aukera bakarra eskaini zion: azterketa ospitalean egitea, azterketaren ordua aldatuta. Egoera horren aurrean, proba modu duinean egina ahal izateko alternatibarik ematen ez ziotela ikusita, ez aurkeztea erabaki zuen Z.G.G.-k”, diote LABetik.
“LABen uste dugu egoera hori zuzeneko diskriminazio kasu argi bat dela. Sindikatu honen ustez, azterketa bat egitea erditu behar duzun egun berean aukera bakar bezala ematea neurri diskriminatzailea da sexuarekin zuzenean lotutako arrazoiengatik, hala nola, haurdunaldiarekin edo amatasunarekin, gizon eta emakumeen arteko berdintasunari buruzko 1/2023 Legegintzako Dekretuari jarraikiz”, salatu dute.
Ildo horretan, kexa jarri du LABek Arartekoan, “Z.G.G.-ri urratu zaizkion eskubideak berrezartzeko neurri egokiak har ditzan”.
“Neurri egoki horiek dira deialdi bakarraren ondoren hautaketa-prozesuaren azterketa egin ahal izatea, egiaztatu delako ezin izan duela deialdi horretara joan haurdunaldiagatik eta amatasunagatik. Neurri horiek hartu ezean, hautaketa-prozesuan plaza bat lortu ahal izateko eskubidea urratuko litzaioke. Halaber, Lan Poltsan sartzeko eta Etxe Maitia Udal Egoitzan aldi baterako lan-eskaintzetarako deitua izateko eskubidea ere urratuko litzaioke”, diote LABetik.
Udalak bilerak egingo ditu auzo ezberdinetan prozesu parte-hartzailea herritarrei hurbiltzeko
Bideoa / Jon (Los Gambas): “Playbackean pailazoarena egitea da gehien gustatzen zaiguna”
Zeberioko Santa Kurtze ermitako lanak hilabete bukaeran amaituko dituzte
Argazkiak / San Migeleko jaietako Playback lehiaketan ere txapeldun Los Gambas kuadrilla
Argazkiak / Los Gambas kuadrilla izan da txapeldun San Migeleko jaietako Olinpiadetan
