Sareak

☉ Zaratamo

Argazkiak / Vulcanizados Zuloagako dibidenduak “opakutasunez banatzeko erabakien arabera” egiten direla salatu dute langileek

|

Zaratamoko Vulcanizados Zuloagako greba mugagabean dauden 22 langileek protesta-martxa egin dute gaur Ugaotik Zeberiora. Zazpi kilometroko ibilbidea egin dute Bi-3524 errepidetik zehar, Zeberioko Udaleko patrulla biz lagunduta. Errepidean zehar aldarrikapenak egin dituzte eta baita pegatinak jarri eta petardoak bota dituzte. Ordu biko ibilbidearen ostean Zeberioko udaletxera heldu eta adierazpenak egin dituzte udaletxearen aurrean, kaltetutako langileen gaur egungo egoera azalduz, enpresako jabeak bizi diren herriaren plazan bertan.

Enpresako kontuak, plazan

117 egun daramatzate langileek greba mugagabean, eta Zubialdeko plazan euren egoera azaldu ostean, Vulcanizados Zuloaga enpresako kontuak irakurri dituzte ozen: “Vulcanizados Zuloagako langileak gara, ezagutzen ez gaituzuenontzat, eta automobilgintzarako piezen bulkanizazioan behar egiten dugu. 117 egun daramatzagu greba mugagabean eta pasa den egunean enpresako kontuen balantzea irakurtzeko aukera izan genuen, eta gure nagusiak herri honetan bizi direnez kontu horien berri ematera etorri gara Zeberiora”, azaldu dute kaltetutako langileen ordezkariek mikrofono eta bozgoragailu batez baliatuta. “Ugaotik Zeberiora etorri gara lan-baldintza duinak aldarrikatzeko. Gaur egun Estatuko Kimika Hitzarmena aplikatzen digute enpresako langileoi eta honek ez du bizi dugun errealitate ekonomikoa eta gizarte errealitatea islatzen”.

Zeberiora hurbildu diren langileak urte asko daramatzate Vulcanizados Zuloagan eta gaur egun 1.100 euro baino gutxiago kobratzen dute: “Greba mugagabean gaude enpresa hitzarmen propio bat dugulako helburu”. Langileen arabera, pasa den asteko asteazkenean komunikatu bat irakurri zuten enpresako plantillaren artean. Bertan Vulcanizados Zuloagak merkataritza Erregistroan argitaratutako enpresako balantzearen nondik norakoak ageri ziren. “Orain arte, bagenekien enpresak 485.000 euroko mozkinak zituela, baina oraingoan gure ekonomisten gabineteak sortutako informea irakurriko dizuegu ozen”. Ordezkariek azpimarratu du Zeberiora martxa egin duten langileak “talde eredua” direla eta ekintzak “modu baketsuan burutzen ari direla, “enpresak bere mozkinen zati bat langileon artean banatzearren, azken batean mozkin horiek gure lanaren ondorioak dira”.

Langileen arabera, “enpresak azken hiru hilabeteetan euren bizkarrera jokatu du enpresa pantailez baliatuta”. Plazan irakurritako informea 2017, 2018 eta 2019 urteetan egindako jardueraren ingurukoa da. “Galdu-irabazien kontuen arabera, 4.934.754,07 euroko salmentak izan ditu enpresak 25 milioi euro brutoko marjinagaz eta emaitza netoa 484.098 eurokoa izan zen 2020an. Kaudimendun enpresa dela bagenekien”, azaldu dute langileek.

“2020ko abenduaren 31ko datuen arabera, enpresa honek 4,9 milioi euroko irabaziak zituen garai hartan, 2019an baino %7,83 gutxiago. Hala ere, aurreko urtean izandako jaitsiera %13,24koa baino handiagoa izan zen. Beraz, esan daiteke 2020ko atzeraldi ekonomikoa Covid-19agatik izan dela gehienbat eta urte horretako jaitsiera ez dirudi hain larria”. Langileen arabera, enpresa eskaintzaren jaitsierara moldatzen jakin izan du: “Marjin gordina handitu eta errentabilitate oso positiboa eskuratu du, 2017ko kopuruak gaindituz. Gauzak horrela, enpresak 1,5 milioi euroko mozkin garbia irabazi ditu 2016 eta 2020 urteen artean”. Gastu-taldeen analisiari dagokionez, langileen arabera 2,380.000 euro ditu enpresak hornikuntzan, 1.213.000 euro langile gastuetan, 580.000 euro ustiaketa gastuetan eta 176.000 euro mobilizatuaren amortazioetan: “Gastu-taldeek enpresaren baliabideen antzeko proportzioa kontsumitzen dute aztertutako aldian, 2020 urteko hornikuntzen joera salbuespen bezala. Gainontzeko gastu-taldeek antzeko dinamika koherentea dute ustiaketako diru-sartzeekin. Beraz, enpresak egiten duen jarduerarekin bat datorren baliabide-zatia kontsumitzen du”.

Txostenaren arabera, enpresak 42.000 euro ordaintzen dizkio urtero I.Z.S. Vulcanizados Zuloaga enpresako jabeari, “lokalaren errentamendu” gisa. “Horrez gainera, 64.581,29 euroko ordainketa egiten dio enpresak 2020an jabeari “zerbitzugintza” gisa. Horrez gainera, beste 78.854 euro ordaintzen dizkio M.C.R.M (I.Zren emazteari), kontzeptu beragatik. Bestalde, enpresak 200.000 euro inguru ordaintzen dizkio Zuloaga Auto Recambios S.L enpresari (I.Zren semearen enpresari)“.

Langileek irakurri dute enpresak 2020an 44 osoko lanaldiak egin dituela batezbesteko, “2019an egin ziren berdinak, zehatz meatz. Langile bakoitzeko kostuak gora egin du: gaur egun langile bakoitzeko 27.000 euro ordaintzen du enpresak eta horren truke 112.000 euroko mozkina eskuratzen du. Hala ere, langile bakoitzeko 27.000 euroko gastu horiek zuzendaritza altuko langileen soldatak hartzen dituzte barne. Horrek esan nahi du langile bakoitzaren batezbesteko kostu hori goranzkoa izan litekeela“.

Datuak zentzu literalean plazaratu ostean, Vulcanizados Zuloagako langile kaltetuek adierazi dute enpresak diru-sartze handiak dituela eta mozkinak jasotzen dituela, “2019tik joera beheranzkoa bada ere. Hala ere, 2020an errentabilitateak eta irabaziek gora egin dute aurreko urtearekin alderatuta. Enpresa errentagarria da eta ez du finantza-arriskurik azaltzen eta ondare-egitura sendoa dauka eta Vulcanizados Zuloagak dibidenduak banatzen ez baditu ere, urtean 350.000 euro inguru ordaintzen dizkie administratzaileei edo familiako senideei kontzeptu desberdinengatik. Hori dela eta, enpresaren etekina mugatu liteke, ez merkatuko irizpideen arabera, baizik eta dibidenduak opakutasunez banatzeko erabakien arabera“.

 

 

☉ Zaratamo

Upoko jaia ospatuko dute Zaratamon, uztailaren 21ean

|

Upo mendiko gailurra // Utzitakoa

Upoko jaira joan nahi duten herritarrek ez dute aitzakiarik izango, Udalak berak garraio zerbitzua antolatu baitu, goizeko 11:15etan eta 12:00etan, hain zuzen ere.

Behin bertan, eta tradizioari men eginez, hainbat ekintza antolatu dituzte, hurbiltzen diren guztien gozamenerako: trikitilariak, txozna, erromeria, umeentzako jolasak, eta meza (12:30ean).

 

Osorik irakurri

☉ Zaratamo

Zaratamoko udal bulego berriek ateak zabaldu dituzte Arkotxan eta irailean hasiko dute zerbitzua

Udal bulego berriak aitzakia modura hartuta, Zaratamoko udal ordezkariek azken urteetan Arkotxan egindako inbertsioak ezagutzeko ibilbidea egin dute auzotik

|

Udal bulego berria eta Olaganeko oinezkoentzako pasabidea // Zaratamoko Udala

Zaratamoko Udalak bulego berriak inauguratu ditu Arkotxako 86. zenbakian administrazioko harrera zerbitzua, gizarte langilearen bulegoa, hezitzaile soziala eta bilerak egiteko gelekin. Bilerak egiteko gela anitzean, Pradera Hermanoseko enpresako beirate zaharra ere badago. Udalak 81.609 euro inbertitu ditu bulego berri hauen lanetarako.

“Irailetik aurrera hamabostean behin bertan egongo dira herritarrak eta eragile sozialak hartatzeko eta Egun zehatz batean goiz osoan egongo dira herritarrekin harreman zuzena izateko”, azaldu dute Zaratamoko Udaletik.

Inaugurazio egunean, ekainaren 19an, Arkotxan burutzen ari diren proiektuetatik ibilbidea egin zuten udal ordezkariek. Izan ere, Ibilbidea Osasun Kontsultategian hasi zuten. Bertan kokatuta egon dira orain bi urtera arte gizarte zerbitzuak osasun kontsultategiarekin batera eta udal ordezkariek nabarmendu dute zerbitzu biak bereizteko “ahalegin berezia” egin dutela.

Osakidetzak eskatuta, udalak Arkotxako eskola zaharren egoitza Osasun Kontsultategia izateko obrak hasi zituen 2020an eta horrekin batera egoera probestu zuen udal bulego berria egiteko Arkotxako 86 zenbakian. “Horrela eskola zaharretan osasun zerbitzuak egongo dira eta Arkotxa 86an zerbitzu sozialez gain, udalaren bulegoa, Arkotxako auzokideek udalarekin izan behar dituzten harreman guztiak auzoan bertan egin ahal izateko”.

Zaratamoko Udala: “Irailetik aurrera hamabostean behin bertan egongo dira herritarrak eta eragile sozialak hartatzeko eta Egun zehatz batean goiz osoan egongo dira herritarrekin harreman zuzena izateko”

Arkotxako kontsultategiko obrak martxan daude oraindik, GEURIAn duela egun batzuk iragarri lez, eta ondo bidean irailean inauguratuko dute. “Osasun kontsutategi eroso eta modernoa izango da, energetikoki efizientea. Uztailean hasiko dituzte azken faseko obrak: barruko kontsulten gelak, administrazioaren gela, almazena eta bilera gela. Urte amaierarako espero da obrak amaituta izatea”, azaldu dute udal ordezkariek. Guztira 351.044 euro bideratu dituzte proiektu honetara.

Kontsultategitik 2023an Olaganen inauguratutako pasabide berrira abiatu ziren. Udalak 220.792 euro bideratu ditu azpiegitura horretan: “Irisgarritasunean hobera egin badugu ere, badugu zer hobetu, batez ere, Santa Barbara auzoan. Eta auzotik Olaganerako pasabidera joateko dagoen irisgarritasun arazoari irtenbide arina eman behar zaiola ikusi dugu”, aitortu dute ordezkariek.

Olaganeko parkeko obrak bisitatu zituzten, bertan umeentzako parkea eraikiko dutelako. Tartean San Vicente Iragorri elizatik igaro dira. Udalak 32.993 euro bideratu ditu tenpluko Energia sistema aldatzeko: “Lehen gasoila erabiltzen zen eta orain gas naturala”. Elektrizitate sistema zaharkitua zegoen eta berriztu dute eta bestalde, eliza barruko zorua konpondu dute.

Osorik irakurri

☉ Zaratamo

Zaratamoko Arkotxa auzoko udal bulegoa inauguratuko dute asteazkenan

Inaugurazio egunean ibilbide bat antolatu du Udalak Arkotxan martxan dauden proiektuak bisitatuz: Olaganeko pasabidea, irailean inaugururatuko dute kontsultorio berria eta eliza

|

Olaganeko pasabidea, iaz // Geuria

Ekainaren 19an Arkotxako udal bulegoa inauguratuko dute. 11:00etan ibilbide txiki bat antolatu du Zaratamoko Udalak bertan burutzen ari diren proiektuak bisitatuz: datorren irailean amaituko duten kontsultorioaren lanak, joan den urrian bukatutako Olaganeko pasabidea, eliza…

12:00etan Udal bulegoaren inaugurazio ekitaldiari hasiera emango diote eta luntx bat prestatu dute bertan.

Osorik irakurri

☉ Zaratamo

Maria Guemes zaratamarra Euskadiko Irristaketa Txapelketan txapeldunorde izan da

Mariaren hurrengo helburua 2025eko otsaileko Euskadiko Txapelketan eta martxoko Espainiako txapelketan parte hartzea da, laukoteetan

|

Joan den ekainaren 1ean eta 2an Euskadiko Irristaketa Txapelketa antolatu zuten Bilboko La Casilla kirol pabilioian, eta Maria Guemes (Zaratamo, 2006) txapeldunordea izan da emakumezkoen Junior kategorian. Denbora gutxi falta izan zaio Zaratamokoari txapelduna izateko (eta beraz, Zaragozan antolatutako Espainiako txapelketan parte hartzeko aukera galdu du), baina Guemes, hala ere, poz pozik dago lortutako emaitzarekin. Garailea Leire Calvo izan da, Mariaren laguna eta irristaketa klubeko kidea gainera. Izan ere, harreman oso ona dute neska biek klubean eta baita klubetik kanpo.

Euskadiko txapelketa egiten dutenean kirol proba bi antolatu ohi dituzte: programa laburra (larunbatekoa) eta luzea (igandekoa). Larunbateko sailkapenean lehen postua eskuratu zuen Mariak eta puntu bateko tartea zeukan bigarren postuarekin. Baina igandeko proban aurkariak aurrea hartu eta, kontaketa orokorraren ostean, Maria bigarren izan zen.

Mariaren amak alabaren lehen urteak ekarri ditu gogora: “Arkotxan jarduera gutxi daude egiteko baina gaur egun klubeko entrenatzailea den Irune Monje Arrigorriagako irristalariak lehiaketa alde batera utzi eta haurrak entrenatzen hasi zen Zaratamoko auzoan”, azaldu du Laura Pajares Mariaren amak. Klase horiek emateko, lagun batek Arkotxa gomendatu zion eta Irunek eskaera egin zion Zaratamoko Udalari Hiru Aldapa izeneko patinaje kluba sortu eta Arkotxako frontoia entrenamenduetarako erabiltzeko.

Laura Pajares: “Denbora gutxi falta izan zaio Mariari Euskadiko txapelduna izateko”

Maria 8 urterekin hasi zen irristaketan Arkotxako frontoian eta Irune izan zen bere entrenatzailea. “Urteek aurrera egin ahala umeak, bakoitza bere konpromisoak zirela eta, alde egiten hasi ziren eta Arkotxako taldea 10 haurrekin lotu zen”, azaldu dio amak GEURIAri. Hori dela eta, entrenatzaileak Irrisbizi Bilbao izeneko irristaketa eskola zabaldu zuen Bilbon eta Maria Zaratamotik bertara joaten mantentzen den ikasle bakarra da gaur egun.

Ama eta alaba, Euskadiko txapelketa amaitutakoan // Utzitakoa

Zaratamotik kanpo

Urtean zehar Estatuko hainbat hiri bisitatzen ditu Mariak, txapelketaz txapelketa: Madril, Zaragoza, Valentzia, Murtzia… “Ikasketetan denbora emateaz gainera irristaketak leku askotara eramaten ditu eskolako haurrak”, dio Laurak. “Euskadiko Txapelketara heldu ahal izateko ordu mordoa eman dituzte patinak jantzita!”.

Aurten Espainiako txapelketak ihes egin badio ere, irristalariak jo eta su jarraituko du entrenatzen eta hurrengo urtean berriro saiatuko da garaipena lortzeko. Momentuz, hurrengo helburua 2025eko otsaileko Euskadiko Txapelketan eta martxoko Espainiako txapelketan parte hartzea da, baina oraingo honetan txapelketa ez da banakakoa izango, launaka baizik: “Taldean Maria eta Leire ageri dira, beste bi lagunekin batera, beraz, ezagunak denak”, azaldu du Laurak.

Osorik irakurri

☉ Zaratamo

Mikel Atxa zaratamarrak Euskadiko Urpeko Arrantza Txapelketa irabazi du 23 urtetik beherakoetan

Zaratamarraren hurrengo helburua Cadiz da, bertan jokatuko baitu Espainiako Txapelketa

|

Mikel Atxa, Gipuzkoan egindako Euskadiko Txapelketan // Utzitakoa

Mikel Atxak (Zaratamo, 2003) joan den ekainaren 8an Pasaian (Gipuzkoa) jokatutako Euskadiko Ur azpiko Arrantza Txapelketa irabazi du Sub23 kategorian: “Poz-pozik nago joan den asteburuan Euskadiko Ur azpiko Arrantza Txapelketa irabazteagatik”, azaldu du Zaratamokoak.

Arrantza gunea Pasaiatik Turulla lurmuturrerainokoa izan zen, Jaizkibeletik igaroz. Guztira 14 lehiakidek hartu zuten parte txapelketan 09:00etatik 12:00ak arte. “Momentura arte ez diot behar besteko garrantzirik eman arrantzari baina Euskadiko Txapelketa gogotsu prestatu dut”, azaldu dio GEURIAri Zaratamokoak.

Mikelek aitortu du lehiaketa honetan parte hartu baino lehen “urduri” zegoela: “Aurreko aste ia osoa lo egin barik igaro nuen”. Kirol probaren hasieratik ondo ikusi zuen bere burua eta amaierarako bazekien irabazteko aukera handia zuela: “Lehiaketako lehen orduan arrain ugari arrantzatu nituen: lau korrokoi, alpaka bi, muturdun muxar handi bat, muxar handi arrunt bat, … gero arrantzaleak bertatik igaro eta han zeuden arrainak uxatu zituzten”, izan dira Atxaren berbak. “Harrapatu beharreko korrokoien kopurua lortu nuen”.

Mikel Atxa: “Momentura arte ez diot behar besteko garrantzirik eman arrantzari baina Euskadiko Txapelketa gogotsu prestatu dut”

Portura heltzean arrainen pisatze lanak egin zituzten eta Atxa Txapelketako irabazle izendatu zuten: “Eta ez hori bakarrik, zozketa bat egin zuten ekitaldiaren amaieran eta fusil bat tokatu zitzaidan!”, azaldu du poz-pozik.

Mikel Atxa, txapelketaren amaieran // Utzitakoa

Hurrengo helmuga: Cadiz

Hurrengo helmuga udan jokatuko den Espainiako Txapelketa da Mikelentzat. Hitzordua Cadizen izango da, uztailaren 6an eta GEURIAri azaldu lez, gazteak bertan “ezer lortzeko” aukera izango duela uste du.

Mikel Atxak, urpeko arrantzaz gainera mendiko motorrak gustuko ditu eta horen haritik elkarrizketa egin genion GEURIAn, iazko irailean.

Mikel Atxa, motorrarekin, Zaratamon // Geuria

Osorik irakurri