Basauriko udalbatzak Edesaren bideragarritasunaren aldeko “apustu sendoa eta erreala” egin dezan eskatuko dio CNA taldeari

Joan den ostegunean, Edesa Industrial enpresak -lehen, Fagor Etxetresnak- Arrasateko Garagartza lantegia itxiko zuela jakinarazi zuen. Horren harira, Basauriko Edesa lantegiaren etorkizunaren aldeko adierazpen instituzionala publikatu du Udalak. Horren bitartez, babesa adierazi die udalbatzak bertako langileei eta Edesa udalerrian jarraitzeko apustua egiten dute, “ekoizpen datuek Basauriko lantegiaren bideragarritasuna bermatzen baitute“, diote udalbatzatik.

Modu horretan, Basauriko lantegiaren aldeko “apustu sendoa eta erreala” egin dezala eskatuko dio Udalak CNA talde titularrari, haren jarraikortasuna udalerrian ziuratzeko eta lanpostuak bere horretan mantentzeko. Era berean, Eusko Jaurlaritzak eta Bizkaiko Foru Aldundiak Edesa Basauriren inguruko bideragarritasun planak edota proiektuak babes dezaten eskatuko die Basauriko Udalak, “ekoizpenaren jarraikortasuna eta langileria bermatze aldera“.

Osoko bilkuran aurkeztu zuten atzo adierazpena eta EAJren, PSEren, Basauri Bairen, EH Bilduren eta PPren aldeko botoekin berau onartu zuten. Sergio Recio zinegotziak kontran bozkatu zuen.

Kantatuaz Arrigorriaga kalera irten da beste behin ere. Oraingoan Madalenak jaietan. Euskal abestien laguntzaz kalejira egin dute herriko kaleetatik. [Argazkiak]

San Fausto, Bidebieta eta Pozokoetxe plan estrategikoari buruzko herri-kontsulta abenduaren 17an izango da. Lehen herri-galdeketa izango da Basaurin

Basaurik lehen herri-kontsulta hartuko du urte amaieran. Iaz egitekoa zen San Fausto, Bidebieta eta Pozokoetxe inguruko eremua eraberritu ahal izateko herri galdeketa, baina geldiarazi egin zuten. Joan den astean, baina, Ministro Kontseiluak berau burutzeko baimena eman zuen. Kontsulta egin ahal izateko gutxieneko 90 egun balioduneko legezko epea kontuan hartuta, abenduaren 17an ospatuko da herri-galdeketa.

Galdera ondorengoa izango da: “Ados zaude San Fausto, Bidebieta eta Pozokoetxe berroneratzeko proiektu hau aurrera eramatearekin?”. Kontsulta politikoki loteslea izan dadin, biztanleen %20ak hartu beharko du parte, gutxienez, eta gehiengo kalifikatua lortu beharko du -proiektuaren aldeko edo kontrako botuen diferentzialak, gutxienez, %5ekoa izan beharko du-. Iaz parte-hartzea %30ean zehaztuta zegoen, “Euskadiko hauteskundeekin batera ospatzekoa zelako eta parte hartzea egun horretan handiagoa izango zelako“, dio Andoni Busquet alkateak.

Fagor-CNA taldeak Euskal Herrian dituen lantegien ekoizpenaren zati handiena eten egin du. Langileak ez dira gaur lanera joan Enplegua Erregulatzeko Espedientea ezarri baitiete

Fagor-CNA taldeak Euskal Herrian dituen lantegietako ekoizpenaren zatirik handiena eten egin du, “osagaiak erosteko diru faltagatik“. Geldialdi honek guztiz kaltetu du Basauriko Edesa fabrika. Izan ere, erabat gelditu du bertako produkzioa (labeak eta sukaldeak).

Basauriko lantegiaz gain, Arrasateko Garagartzako (garbigailuak) ekoizpena ere geldiarazi du CNA taldeak. Gainera, Bergarako Geyser lantegiaren produkzioaren (berogailuak) zati bat ere eten dute. Soilik Eskoriatzako lantegia ari da %100ean (presio-eltzeak).

Dirudienez, Enplegua Erregulatzeko Espedientea (EEE) ezarri die CNA taldeak langileei (2016ko urrian iragarritakoa). Zentzu horretan, langileak ez dira gaur lanera joan. Sindikatuek adierazi dutenez, CNAk ez die zehaztu noiz itzuliko diren beharrera.

Enpresa-batzordea langileekin bilduko da egun hauetan Fagor-CNA konpainiaren azken erabakiak aztertu eta mobilizazioak abiarazteko.

Uztaila hasieran jakinarazi zuenez, CNA taldeak Edesaren aldeko bideragarritasun plana landuko omen zuen -nahiz eta 100 milioi inguruko zorra duen-. Hartzekodunen aurrekonkurtsoa aurkeztu zuen hasieran, baina Basauriko Edesa ez zela hartzekodunen konkurtsoan sartuko aurreratu zuen uztailaren 6an. Talde kataluniarraren adierazpenen arabera, Basauriko lantegia “ez da itxiko, Bizkaiko Foru Aldundiaren laguntza tarteko“.

Uztailaren 10ean hasiko ditu Adif Trenbide Azpiegituren Administratzaileak Pozokoetxeko trenbide multzoa desmuntatzeko lanak, baita bertako bagoiak txatarrera eramatekoak ere. Lanak abuztuaren 17ra arte luzatuko dira eta denbora tarte horretan aparkalekua ezin izango da erabili.