Bizkaia Kopako lehen edizioa antolatu zuten joan den asteburuan Bilboko Miribilla estadioan eta bertan Arrigorriagako CD Taekwondo Garrikoko 14 kirolarik hartu zuten parte. Guztira 8 domina eskuratu zituzten Arrigorriagakoek.

Maialen Sanchezek urrezko domina irabazi zuen 63kgko junior kategorian; Naroa Ballesterok, Izei Intxaurragak, Adriana Andresek eta Lur Guerrak zilarrezkoak; Markel Garciak, Aitzol Portugalek eta Jon Ander Urdak brontzezkoak.

Bizkaia Kopako lehen edizio honetan Espainia, Frantzia eta Portugaleko taldeak iegon dira.

Urtarrilaren 25ean Niere bandaren kontzertua eskaini du Soinuarri Elkarteak Arrigorriagako Edurne Garitazelaia kultur etxearen atzeko aldean.

Kontzertuaa 19:30ean antolatu dute, Kallejeros Pajeros zikloaren bigarren edizioan. Lehena iazko urriaren 26an izan zen eta bertan The Cowboy Angels taldeak jo zuen. Kallejeros Pajeros zikloak herriko taldeen kontzertuak antolatzea du helburu.

Gaur goizean Ausartak Mendi Lasterketaren seigarren edizioa aurkeztu dute Arrigorriagako osoko bilkuren aretoan.

Datorren urtarrilaren 18 eta 19an antolatu dute aurtengo lasterketa. Aurtengoa, antolatzaileen arabera, edizio jendetsuena izango da.

Aurtengo edizioan orotara 755 pertsonak hartuko dute, iazkoan baino 155 kirolari gehiago (iaz 600 lagunek hartu zuten parte). Igandeko lasterketarako, esaterako, 2024an baino 200 dortsal gehiago saldu dituzte aurten. Horrez gain, arrigorriagarren parte-hartzeak ere gora egin du aurten eta, guztira, herriko 103 pertsonak hartuko dute parte. Joan den urtean, 74 izan ziren.

Gainera, gogoratu beharrekoa da lasterketa honek izaera solidarioa duela: izen-emate bakoitzetik euro bi ‘Ane Síndrome Rett’ ekimenari bideratuko dira. Aurtengo izen-emateen arabera, 1.200 euro inguruko donazioa egitea espero dute Ausartak Mendi Lasterketatik. Gainera, txakurren adopzioa sustatzen duen Weimaraner Rescue Spain elkarteari pentsu zaku batzuk oparituko dizkiote.

Txakurkros proba, iaz // Geuria

Egunez egun

Urtarrilaren 17an, ostirala, prestaketa lanak egingo dituzte antolatzaileek: “Egun garrantzitsua izango da”, azaldu du Xabi Gonzalezek antolaketa taldetik. “18:00etatik 20:00ak arte lasterketaren antolatzaileek txakurkroseko kirol materialaren eta albaitaritzaren kontrola egingo dizkiete parte-hartzaileei. Dortsalak ere banatuko dituzte”.

Urtarrilaren 18an, larunbata, Canicros txakurkrosa probari hasiera emango diote. Aurten, berritasun modura Ausartak Mendi Lasterketa Euskal Herriko eta Kataluniako ligarako puntuagarria izango da, Kopa Vasco-Catalana ekimen berriaren Euskal Herriko egoitza izango baita eta Hurrengo urtean beste herri bateko lasterketa izango da.

Ibilbideak 6 kilometroko luzera eta 150 metroko desnibel positiboa izango du. 11:30ean Txakurkros eta trail herrikoiaren proba prestatu dute: “14 eta 18 urte bitarteko Arrigorriagako gazteak: urtarrilaren 18an Mendikosolon ospatuko den gure trail herrikoian doan parte hartu ahal izango duzue!”, azaldu dute antolaketa taldetik.

“Modalitate honetan korrikalariek txakur batetik tiraka korrika egiten dute, eta hiru lasterketa izango dira”, zehazztu dute elkartetik: “Lasterketa nagusia den Euskal-Katalunia Koparako puntuagarria den txakurkrosari (5,5 km 100+) 10:00etan emango zaio hasiera, eta, jarraian, txakurkros eta trail herrikoia, eta haurrentzako lasterketa egongo dira, beraien txakurrekin edo txakur gabe egin dezaketena”.

Arratsaldez, segurtasunari buruzko hitzaldi teknikoa antolatu dute 20:00etan Edurne Garitazelaia kultur etxean. Gainera, 18:00etatik 20:00etara, hurrengo eguneko martxa eta mendi lasterketetako dortsalak jasotzeko aukera egongo da.

Hurrengo egunean, hilaren 19an, hiru proba egingo dituzte guztira: herritarrek aurreko urteetan eskatutako Mendi martxa. Martxazaleek txakurrekin hartu ahal izango dute parte, betiere, kontrolatutak eta lotutak, txakurkros / dog-walking / kirol arnesak erabiltzea gomendatuz, baita txakurraren zein parte-hartzaileen segurtasuna eta ongizatea bermatzen duten beste elementu batzuk ere, hala nola uhal elastikoak… besteak beste. Proba hau 09:00etan hasiko da eta 20 kilometroko luzerakoa.

Segurtasuna, lehenik

Segurtasun-batzordearen gomendioei jarraituz, aurten eten-denbora egongo da proba honetako 14. kilometroan. “Puntu horretatik beranduago igarotzen denari, segurtasun-arrazoiak direla medio, dortsala kenduko zaio eta laburrago eta zailtasun tekniko gutxiago duen ibilbide alternatibo batetik jaitsiko da. Era berean, 4x4etan jaisteko aukera egongo da ere, korrikalariaren baldintza fisikoak egokiak ez badira, korrikalariak berak eskatzen badu edo osasun boluntarioek gomendagarria dela erabakitzen badute”, argitu dute Ausartaketik.

10:30ean, Mendi Maratoi Erdiaren txanda izango da eta Hasiberri Trailari, 11:00etan emango diote hasiera. 9,5 kilometroko luzera eta 500 metroko desnibel positiboduna izango da azken hau.

Plazak, auzoak eta herriak koloreztatzeaz bizi dira Aztarnak Muralismokoak. Talde hau Iker Martinek (Arrigorriaga, 1978), Andoni Ortizek (Ugao, 1987) eta Iñigo Modregok (Arrigorriaga, 1991) osatzen dute. Hiri modernoen kolore lau eta grisetatik ihes egiten dute muralista hauek eta herrietako txokoak kolore biziko horma-irudi erraldoiak sortuz.

Ikerrek denetarik egin du bere bizitza profesionalean: etxetresna elektrikoak muntatu, furgonetak muntatu… gaur egun ikus-entzunezkoen industrian egiten du lan eta horma-irudiak egitearekin bateratzen du. Andonik, ostera, eskualdeko enpresa batean egiten zuen lan eta behar barik gelditu zenean bere norabidea muralismoan oinarritu zuen. Iñigok urteak daramatza muralismoaz “bizirauten” eta horrela jarraitzea espero du.

Profil ezberdin horiek badute amankomunean gauza bat: txikitatik kaleetan grafitiak egiten zituztela eta zaletasun hura bere ogibide bihurtu dutela 2008an hasitako proiektutik. Harrezkeroztik denetarik margotu dute eskualdean, Bizkaian, Araban eta harago: fatxadak, tunelak, zubiak, hainbat negoziotako pertsianak, logelak… proiektu bakoitza erronka bat da beraientzat.

Iazko azken egunetan lau horma-irudi egiteko enkargua jaso zuten Arrigorriagako Udaletik: Lanbarketako tunelean, trenbide azpiko oinezkoen tunelean, Lamiaena emakumeen etxe ondoko igogailuaren fatxadan eta Aixarte tunelean. Lan egiten ikusi dituen inork badaki arrigorriagar hauek ez dutela publizitatearen beharrik enkarguak jasotzeko, bere feeda herriko hormak direlako eta folowerrak, herritarrak beraiek.

Andoni, Iker eta Iñigo, Aixarteko tunelean // Geuria

Iazko azken egunetan Arrigorriagan ibili zineten lanean. Zertan zehazki? Iñigo Modrego: Arrigorriagako Aixarteko tunela margotu berri dugu. 400 metro karratu inguruko azaleradun mihisea izan da.

Azalera handiko murala, gero!Baina ez da izan urte amaierako bakarra zuen herrian, ezta? Andoni Ortiz: Ez, lau mural handi margotu ditugu 2024ko azken bi hilabeteetan Arrigorriagan, Udalarekin berarekin urte erdialdean adostutakoak: Lanbarketako tunelean, Kuboko oinezkoen igarobidean, Lamiaenako igogailuan eta Aixarteko tunelean. Herrian zenbait jarduketa egiteko asmoa zuten Udaletik eta guk duela urte batzuk herriko horma batzuetan margoketa lanak egiteko proposamenak egin genizkienez, kontuan hartu zizkiguten.
I.M: Azken batean gu herrikoak gara eta hainbat horma margotu ditugu bertan: Olatxu auzoko horma bat, Abusuko Zentro Soziokulturaleko eraikineko fatxada, Gaztegunea, Kiroldegiko fatxada handia…Egin ditugu gauzak, egia esan!

Nola hasi zen muralak egiteko ideia original hau? A. O: Guk betidanik egin izan ditugu grafitiak han eta hemen. Egun batean, Olatxuko auzo elkarteak gurekin ipini ziren harremanetan, eraikin batzuen atzeko aldeko hormak margotzeko asmoa zutelako. Izan ere, horma hori trenbideen parean kokatuta dagoen 100 metro baino luzera handiagoko karga-horma bat da. Udalaren babesarekin ikuskizun formatuko margoketa lana egin genuen bertan: gremioko 30 margotzaile ekarri genituen Abusura eta harrera oso ona izan zuen ekimenak. Jarduera horri esker Udalak gure lana ezagutu zuen. Lan hartatik abiatuta jaio zen Abusuko Zentro Soziokulturala margotzeko proiektua.

Eta zer kontatu zenuten Zentro Soziokulturaleko horma-irudian? A. O: 1983. urteko uholdeak baino lehen zeuden eraikinak, trenbideak, Olatxu, Ollargan, mehatzetara lan egitera etorri ziren etorkinak… gogora ekarri genituen.Iragana eta etorkizuna lotu, nolabait esatearren.

Pintura boteak // Geuria

Hormetan lantzen dituzuen gaiei dagokienez. Eszena horiek zuen bezeroek proposatzen dizkizuete edo zuen ekarpenak dira? I. M: Batzuetan bezeroen proposamenak dira, beste batzuetan gureak… eta alde bien arteko ekarpenak izatea eman daiteke ere. Adibide bat ematearren, Lanbarketako tunelean auzoa erakusteko antzinako irudiak nahi zituzten, baina aldi berean hitzaren esanahitik abiatzeko aukera eskaini ziguten, eta Lanbarketaren jatorria “lamien erreketan” dagoenez, mitologiaren esparruan kokatutakoa askoz egingarriagoa ikusi genuen bigarren aukera hura. Kontuan izan beharrekoa da Lanbarketako tunelean dagoen espazio handiena zabaia bera dela eta bertan antzinako argazkiak margotzekotan lana ez zen uste bezain ondo apreziatuko. Beraz, lamien gaiari eutsi genion.
Iker Martin: Kuboko oinezkoen pasabidean dibertsitatea izan zen gaia. Bertan, kolore argitsuak, figura “abstraktuak”… margotu ditugu eta helburu nagusia mezu hau zabaltzea zen: “Kontuz, tunel hau iluna da eta edonor igaro daiteke bertatik”. Kolore lauak erabili ditugu bertan eta garbiketa lanak egin genituen ere.
A. O: Gainera, pintada asko egin diren lekua da Kuboko oinezkoentzako igarobidea eta bertan egin dugun diseinua “konpontzeko erraza” da. Horrela, horma-irudiaren iraupena luzatzea espero dugu. Eta ez hori bakarrik, Urte amaieran egindako lau muraletatik hiru leku ilunetan izan dira (tunel bi eta igarobide bat). Leku horietan, dekorazio lanak egiteaz gainera kolore argiak erabili ditugu, giroari argi ukitu bat emateko.

Materialaren aukeraketa // Geuria

Lamiaena ondoan dagoen igogailuaren grafitia, ostera, zeru zabalean dago eta bertan landutako gaia genealogia feminista da. I. M: Hala da, mural horren kasuan Udalak argi eta garbi zeukan zer egin nahi zuen bertan.
A.O: Arrigorriagako emakumeen genealogia irudikatu nahi zuen Udalak. Udal ordezkariekin izandako bilera batean esan ziguten herriko antzinako emakumeek bendeja saltzen zutela eta etxekoandre moduan egiten zutela lan askok. Gauza da denborak aurrera egin duen heinean bizimodu hori aldatuz joan dela eta horixe erakutsi nahi izan zuten Udaletik. Muralean adin ezberdinetako emakumeak ageri dira eta irudi bakoitzeko emakumeak aurrekoan du begirada, iraganari keinua eginez, emakumeek historian zehar izan duten genealogia feminista erakutsiz.

Alde handia dago grafitiak eta muralak egitearen artean. Margotzeko modu oso ezberdin bi dira baldintzei dagokienez. Bateragarriak al dira? I. M: Zaletasuna eta lana dira.
A.O: Zenbat eta askatasun kreatibo handiago, orduan eta erosoago sentitzen gara margotzen. Gu, kolektibo modura Arrigorriagan egindako lanak bilatzen saiatzen gara eta horregatik bezeroak eskatzen duen hori egiten saiatzen gara, gure ukituarekin betiere. Askatasun hori bezeroak mugatzen du. Errotulazioek, esaterako, askatasun gutxi ematen digute. Bezero batek bere logoa eskatu izan digu behin baino gehiagotan bere negozioaren pertsianan. Bertan ezin da elementu askorekin jokatu orokorrean.

Materiala furgonetan sailkatzen // Geuria

Baina Arrigorriagako Udalak eskatutako enkarguetan sormen-lan hori nabarmentzekoa da. A. O: Bai, hala da. Hainbat enkargu egin ditugu Udalarentzat eta badakite nola egiten dugu lan. Horrek askatasun handiagoa ematen digu horma-irudiak egiteko orduan.
I.M: Erraza da beraiekin lan egitea: azken batean, ideia pare bat botatzen dizkigute eta gero guk gure proposamenak digitalean botatzen dizkiegu eta horietan modifikazioak egiteko aukera eskaintzen dugu. Aukeratutako proposamena gure estiloan lantzen dugu.
A.O: Proposamen digitalak begiak zabaltzen dizkio bezeroari. Aixarteko tunelean horrelaxe egin genuen: proposamenean aipatutako elementuak modu digitalean kokatu genituen tunela margotzen hasi baino lehen bertan egin genuen argazki batean. Bertan ere kolore gama proposatzen dugu.

Gainera, zuek eskuz egindako diseinu bat tamaina erraldoiko mihise batera eramaten duzue: azalera handiko hormetara. Benetan zaila izan behar da zuena. I.M: Lanbarketako tunelean, esaterako, Lamia bi ageri dira. Tunel osoko hormak margotu genituen eta elementu horiek sabaian ageri dira. Gorantza begira margotu genuen eta erronka handia izan zen guretzat, ezin ginelako sabaitik “urrundu” perspektiba izateko. Era horietako lanak egiten ditugunean koadrikularekin funtzionatzen dugu, bestela zoramena izan daiteke.
A.O: Burutik oinetara 12 metroko luzera dute lamiek eta Iñigok dioena da azkenean: ezinezkoa da perspektibarekin lan egin sabaira itsasita zaudenean.
I.M: 13 egun eman genituen bertan, gora begira margotzen.
I.Ma: Lanbarketako tunelaren zailtasuna horixe zen. Aixarten, ostera, horma-irudiaren elementu gehienak hormetan daude kokatuta eta perspektiba hartzeko aukera ematen du: eskaileratik jaitsi eta urruntzeko aukera dago.

Lanerako prestatzen // Geuria

Aixarteko tunelean gauez ibili zineten margoketa lanak egiten, bertatik errepidea igarotzen delako eta trafikoa derrigorrez moztu behar delako. Baina egunez lan egin izan duzuenean zer diote auzotarrek herriko hormak margotzen ikusten zaituztenean? A.O: Gure diseinuen lehen marrak egiten hasten garenean normala izan ohi da inork herriko hormak “zikintzen” ari garela pentsatzea. Baina diseinu horrek itxura hartzen duen heinean lan “serio” batean ari garela ikusten dute eta zoriontzen gaituzte. Behin baino gehiagotan gertatu zaigu.

Iñigo, lanean // Geuria

Pintatzea zuen lana da, baina ez bakarra, ezta? I.M: Denetarik egiten dugu: presioko ur pistola baten bidez hormak garbitu egiten ditugu. Ondoren inprimazio geruza bat ipintzen diegu hormei. Gero pintura plastikoko beste geruza bat gehitzen diogu arrabola eta brotxaren bidez. Hori guztia eginda, sprayarekin margotzen hasten gara.

Andoni Ortiz: “Muralen arerio nagusia kalea bera da: bertan eguzkia eta hezetasuna ageri dira”

Margolariek denboraren faktorea kontran duzue beti. Mural bat amaitu duzuelarik mantenu lanak egin behar dituzue urteek aurrera egin ahala? I.M: Gure lanek iraupen handia izan ohi dute, oro har, baina egia da Arrigorriagako oinezkoen tunela margotu dugunean bertan errepaso lanak egingo ditugula esan diegula Arrigorriagako Udaleko ordezkariei. Azken batean bertatik jende asko igaro da eta ziur gaude inork pintadak egingo dituela gure lanaren gainean, laster edo berandu. Gainontzeko lanei dagokienez ez dizkiegu mantenu lanik egiten, salbuespenak salbuespen: horma irudi bati egun osoan zehar eguzkia ematen badio edo azpiegituran hezetasunak ageri badira, esaterako, mantenu lan horiek egin beharrekoak dira.
A.O: Muralen arerio nagusia kalea bera da: bertan eguzkia eta hezetasuna ageri dira. Eguzkiak koloreak desgastatzen ditu eta hezetasunak pintura hondatu dezake. Horregatik margotu aurretiko prestaketa lan guztiak berebizikoak dira.
I.M: Denborak muralismoan profesionalizatu gaitu. Azken batean, grafiti bat egiteko ez dituzu faktore horiek kontuan izaten: grafitiak berehalakoak dira eta ez duzu margotu beharreko azalera hori zertan prestatu behar.
I.Ma: Aixarte tuneleko muraleko prestaketa lanak egiteko hiru egun eman ditugu.

Andoni eta Iker // Geuria

Zuen lanak kalean daudela esan duzue eta eguzki eta hezetasunez gain grafiteroak ere badaude. Ba al dago kode berezirik grafiteroen artean margolari bakoitzaren lana errespetatzeko? A.O. Denetarik dago.
I.Ma: Hori da: mural bat norbaiten lana dela pentsatzen duenik dago, baina baita bertan edozeinek pinta dezakela pentsatzen duenik ere. Denetarik dago eta ezin gara jende guztiaren aurka borrokatu.
I.M: Hala ere hau ez da Madril edo Bartzelona eta Hego Uribe bezalako eskualde batean elkarren artean ezagutzen gara grafiteroak.
A.O: Egia esateko ez dugu inolako arazorik izan gure muralekin, Basauriko trenbideen azpiko tunelean izandako arazotxo bat izan ezik.

Zuek gainera Euskal Herriko grafiteroak batzen dituen Urban Festaren sortzaileak zarete. I.M: Jai horren helburua grafitiak egiten dituen jendea elkartzea da.
A.O: Gure asmoa grafitiak eta muralak egitearen kultura zabaltzea da, sormen askatasunaren alde betiere. Bizi naizen lekua politagoa ikusi nahi dut eta muralismoarekin horixe da lortzen duguna: mundu koloretsuagoa, eta ez hain gris edo zikina. Pena ematen du kaletik joan eta itxita dauden kolorerik gabeko negozioak ikustea. Bilboko Irala auzoan, adibidez, bertako negozioen pertsianak margotzeko ekimena martxan jarri dute eta horrek bizitza ematen die auzoei.
I.Ma: Gainera, pertsiana horiek margotzen dituztenak grafitien mundutik datozen margolari esperientziadunak izan ohi dira.
A.O: Horregatik da hain garrantzitsua Urban Festa bezalako ekimenak ezagutzera ematea eskualdeko beste herrietan antolatuz. Muralismoaren munduan sartu nahi duenarentzat erreminta oso garrantzitsuak dira Urban Festa edo Galdakaon antolatzen den Grafesta. Gainera, esan beharrekoa da gero eta muralismo lan gehiago ikusten direla herrietan. Nork ez ditu Gasteizko muralak eta bertatik egiten diren bisita gidatuak ezagutzen? Erritmo honetan jarraituz gero bisita gidatuak Arrigorriagan ere antolatu beharko genituzke! (barreak).

Spray boteak probatzen // Geuria

Eskualdekoak zarete zuek eta bakoitzak bere estilo propioa izango du hormak margotzeko orduan. Nola adosten duzue horma batek bezero batentzat jantziko duen estiloa? I.M: Gure artean adosten dugun kontua izan da. Batzuetan bezero batentzat lan egiten dugunean hainbat proposamen helarazten dizkiogu eta aukeratutako proposamenaren estiloari jarraitzen saiatzen gara. Beste batzuetan hiruron artean adostu dugu proposatutako lehen diseinua.

Andoni, pintatzen // Geuria

Bakoitzaren estiloa muralismoarekin hasi baino lehen kalean bizi izandako esperientziarekin lotuta egongo da, ezta? A.O: Kalean grafitiak egin ditugu urte askoz muralismoan hasi baino lehen. Gure artean nahiko ondo konpondu izan gara betidanik eta hormetan hiru estilo horiek nolabait elkartzeko gaitasuna lortu dugu. Aztarnak Muralismo taldearen bidez askotariko enkarguak egin ditugu (horma-irudiak, letteringak, espazio jakin batzuen margoketa) eta horrek indartu du gure lan egiteko modua.
I.M: Gure estiloa errealismo eta komik errealismoaren artea koka daiteke, orokorrean.

Asko aldatu da horma-irudiak ikusteko ohitura zuek pintatzen hasi zinenetik? I.M: Bai, noski!
I.Ma: Abusun oso gutxi ginen. Nire kasuan hainbat kolektiborentzako muralak egiten nituen: Gaztetxeek Garai hartan diru gutxi uzten zuten, baina behintzat margoa ordaintzeko ematen ziguten lanak egiten genituen.
I.M: Horrelakoak izan ziren gure lehen lanak: materialak ordaintzeko ez geneukan dirurik ere! Gazteak ginen eta maite dugun hori egiteagatik ordaintzen ziguten (barreak).
A.O: Orain, lanean hasi baino lehen aurreikuspen sakon bat egiten dugu: leku batera joan behar izatekotan ordaindu beharrekoa, bertan eman behar ditugun egunen eta horien kostuen estimazioa.

Iñigo eta Iker // Geuria

2024ko azken proiektuak Arrigorriagan izan dituzue baina beste leku askotan ere izan zarete lanean. A.O: Laudioko Isasi auzoan, Bilboko Artxanda funikularreko tunelean.

Funikularreko tunela? A.O: Bai, kanpoko aldean harri batzuk margotu genituen Koronabirusaren garaian eta tunelean barrena paisai bat margotu genuen. Bertan ere gauean egin behar izan genuen lan, neguan eta funikularreko mantenu-lanak egiten zituzten bitartean.
I.M: Aire korronteek eta hotzak gogor astindu gintuzten proiektu hartan.

Andoni, eguzkilori bat margotzen // Geuria

Ba al dago ametsetako lekurik bertan horma-irudirik egiteko zuen buruan? I.Ma: Zaletasun modura edonon, eta lan modura deitzen gaituzten edonora.
A.O: Niri gure lanak ikustea gustatzen zait. Ni Santa Isabelekoa naiz eta burura datorkidan margotzeko lehen lekua auzoan dagoen biribilgunetik bueltan ikus daitekeen horma da. Gaur egun leihorik gabeko eta kolore lauko espazioa da. Guztiok ikusi dugu fatxada hura eta ilusio handia egingo lidake nire gurasoek nik neuk koloreztatutako horma-irudia egunero ikustea. Bertan margotu nahi izanez gero auzo elkartearekin berba egin beharko genuke eta ez da lan erraza izaten normalean.
I.M: Polita da auzoan bertan gure horma-irudiak ikustea. Nork esango liguke guri antzinako lokaletik gertu, non eta Lanbarketa tunelean horma-irudi erraldoia egingo genukeenik? 17 urterekin egunero igarotzen ginen tunel hartatik.

Andoni Ortiz: “Ilusio handia egingo lidake nire gurasoek nik neuk koloreztatutako horma-irudia egunero ikustea”

2025a hasi berri dugu. Nolako egutegia daukazue urte berriari begira? A.O: Itxita momentuz ez baina ideia bat daukagu buruan bueltaka: saskibaloi kantxa bateko zorua margotzea gustatuko litzaiguke. Denbora asko daramagu ideia horren atzean eta horma eta sabai asko margotu baditugu ere, momentura arte ez dugu kirol pista bateko zorua margotzeko aukerarik izan.

Andoni // Geuria

Zapaldu egiten den azalera da. Erronka handia izan behar da zuentzat! A.O: Hori da. Margo mota espezifiko (eta garesti) bat erabili behar da horretarako. Leku bakoitzak teknika eta material jakin bat eskatzen du. Horixe litzateke gure hurrengo erronka: margoketa ezberdinak leku arraroetan egitea.
I.M: Saskibaloi pista bezalako azaleretan margotu behar dugunean margo hornitzailearengana jo dugu gomendioen bila. Harreman ona dugu berarekin.
I.M: Konfiantza osoa dugu, batzuetan margotu beharreko lekuetara hurbiltzen da bera, aukeratu beharreko materialak eta pinturak aproposenak izan daitezen.

Koloretako mundu honetan murgildu zinetenetik asko ikasi eta hobekuntzak gehitu dituzue zuen proiektuetan. Bistan da. A.O: Profesionalizatu gara. Maite dugun zaletasun honetaz bizitzen ari gara eta gure lanak herriaren parte izatera igaro dira. Zoragarria da hori.

Aixarte tuneleko 3D aurre-diseinua // Geuria

Urtarrilaren 18an Song Writers KM. 0 izeneko kontzertuan joko du Iñigo Riki zaratamarrak Neftali Marin & The Cowboys Angels-ekin.

Arrigorriagako Soinuarri elkarteak antolatutako kontzertua 19:30ean izango da Lonbo aretoan eta sarrera doakoa izango da bertara hurbildu nahi dutenentzat.