Otsailaren 1ean Herri Basoen landaketa egingo dute Ametzetan (Upon), bertako lurrak berreskureatzea xede. Udaletik herritarrak deitu dituzte pagoak, zedroak, urkiak, gerizondoak, sagarrondoak, lizarrak eta bestelako espezietako zuhaitzak landatzeko. Hitzordua 10:00etan ipini du Udalak eta ordubeteko lanak aurreikusi ditu Upon.

Upoko San Segismundo ermitarako bidean (Moiordinetik gora), 13. zenbakiko herri basoan 13A3p eta 13C3ax unadak birlandatzeko proposamena ageri da Zaratamoko 176 eta 13 herri basoen Kudeaketa Planean. Unada horietan, Zaratamoko udal ordezkariek azaldu lez, lurra eskasa eta sakonera gutxikoa da.

Azken 100 urteetan Upoko lurretan gorabeherak izan dira abeltzaintza-, baso- eta meatze-erabileren eraginez eta momentura arte, Zaratamoko Erabilera Publikoko Mendi Antolaketa Planaren helburua baso-jardueran oinarritu izan da: pinuak eta eukaliptoak bezalako kanpotik etorritako espezieak (eta baita bertako ekoizpenerako espezieak ere, pagoak kasu) landatu dira etekina ateratzeko helburuarekin.

“Landaketa honen helburua basoaren naturalizazioa lortzea da”, azaldu du Alberto Ugarriza Zaratamoko alkateak. “Azken urteetan basoetatik etekina ateratzea zen helburua. Upoko lurra berreskuratzeko ekoizpenerako ez diren zuhaitzak landatu behar dira. Orain arte espezie autokntonoak eta koniferoak izan dira bertan, baina helburua ekoizpena zen: egurraren ekoizpena, hain zuzen ere”.

Baina helburuak aldatu egin dira orain: Zaratamoko Udalak Foru Aldundiarekin elkarlanean onartu berri duen Kudeaketa Plan berrian herri basoen erabilera anitza bilatu da. “Erabilera anitz horretan lurraren berreskurapena da ardatz nagusia”, azpimarratu du Ugarrizak.

13A3p unada 2,8 hektareako azalera dauka eta 1.100 landare hektareako dentsitatea aurreikusten dute. 13C3ax unada 1,4 hektareakoa da. Guztira 4,2 hektareako azaleran egingo dituzte landaketa lanak.

Iazko maiatza amaieran GEURIAn aurreratu lez, asmoa espezie autoktonoen landaketa egitea da Upoko unada horietan: “Konifero eta hostozabal espezieen nahasketa bat egitea da helburua, konifero eta hostozabalen ilarak alternatuz. Hostozabalen ilaran ametza izango litzateke espezie nagusia, urkiarekin alternatuta, baina errekastoaren inguruan bestelako espezieak sar daitezke (lizarrak eta astigarrak, kasu). Koniferoen ilaran, zedroa landa daiteke, Pagasarrin antzeko lurretan emaitza onak izan dituztelako bertako landaketek. Koniferoak arinago hazten direnez hostozabalentzako alboko babesa eta itzal erdia bermatuko lukete, hostozabalak zuzen haztera behartuz”.

Arrigorriagako gazteek logo lehiaketa ipini dute martxan kamisetak sortzeko.

Bertan parte hartu nahi duten interesdunek ‘Arrigo’ edo ‘Arrigorriaga’ hitza daukan diseinua bidali beharko dute arrigorriagakogazteak@gmail.com helbide elektronikora.

Fondorik gabeko logotipoa PNG edo JPG formatuan bidali beharko dute parte-hartzaileek otsailaren 23a baino lehen: “Lehiaketan parte hartuko dutenak herrikoak izan behar dira eta irabazleak 50 euroko saria eta bere logoa inprimatua duen kamiseta jasoko du”, azaldu dute antolaketa taldetik.

Joan den asteburuan (urtarrilaren 18an) Bizkaiko pilotako eskuz banakako txapelketako maila ezberdinetako finalak jokatu zituzten Basaurin eta Lemoan. Enaitz Arandia (Zeberio, 2002) txapelduna izan zen nagusien hirugarren mailan. Arandiak Mungiako klubean jokatzen du baina izatez zeberioztarra da.

Arhane Mendibil (Zeberio, 2010) txapeldunorde izan zen Lemoan jokatutako nesken kadete-gazte mailan. “Finalean ez zen gustura sentitu Arhane, partidaren emaitza sakean erabaki zelako bereziki”, aitortu du Aitziber Mendibil Arhaneren aitak. Finalera heltzeko partida “gogorrak” irabazi ditu Arhanek Sestaon, Markinan…

“Final batean faktore asko jokoan daude: jokatzeko modua, urduritasuna… Hala ere, eta finalera heldu arteko lan gogorraren erakuslea izan ez bazen ere, frontoian egoten badakiela erakutsi zuen Arhanek”.

Goizean Basaurin jokatu zituzten finalak (lau guztira) eta arrastian Lemoan antolatu zituzten beste lau partida. Zeberioko Mandoia Pelota Klubetik azpimarratu dute klubentzako oso onuragarriak izan direla joan den asteburuan jokatutako partidak: “Azken batean, Zeberion herritarrak diren pilotariak mugitzen ditugu bakarrik; kanpotik neska bakarra etorri ohi da klubera”, azaldu diote GEURIAri Mandoia Pelota klubetik.

Aitziber Mendibilek Beñat García Zeberioko Mandoia Pelota Klubeko entrenatzailearen lana goraipatu du: “Arhaneren erreferentea Beñat da. Izugarri laguntzen dio. Guraso moduan esan dezaket ondo entrenatzeaz gainera sekulako balioak transmititzen dituela. Umeek benetan maite dute”.

Berbalagunak martxan dira urritik Hego Uribe eskualdean, eta Gurasolagunak ere hasiko dira urtarriletik aurrera elkartzen.

Galdakaon urtarrilaren 24an antolatu dute ikasturteko lehen tailerra: Igel mihiluzeak. Barandiaran AEK Euskaltegian izango da tailerra, 17:15etik aurrera.

Tailerra 3 eta 9 urte bitarteko umeentzat eta euren familientzat dago zuzenduta. Materiala bertan jasoko dute.

“Ikasturteko lehen tailerra izango da. Beraz, proiektua ezagutzeko aukera paregabea izan daiteke. Euskaraz aritzea eta ondo pasatzeko gogoa izatea da eskatzen dugun bakarra”, diote Hego Uribeko Berbalagunetik.

Azaroan Zinebin estreinatu ondoren, Itoiz euskal taldearen jatorriari buruzko ‘Itoiz. Udako sesioak’ dokumentala urtarrilaren 24an helduko da zinema aretoetara.

Basaurin sei egun geroago ikusi ahal izango da Social Antzokian, Zine Kluba programaren barruan: urtarrilaren 30ean, ostegunez, 17:30ean eta 20:00etan. Sarrera 5 euroan dago salgai eta Socialeko bazkideek sarrera doakoa dute.

Bestetik, Galdakaon ere proiektatuko dute dokumentala, Torrezabalen: urtarrilaren 26an 20:15ean eta urtarrilaren 27an 20:00etan. Sarrerak 4 euroan daude salgai.

70eko hamarkadaren erdialdean eztanda egin zuen bandak eta euskal musikaren panoraman erreferente bilakatu zen Itoiz. 10 urteko historia labur baina arrakastatsuaren ondoren, Juan Carlos Perezek abentura amaitutzat eman zuen. Kritikari eta zaleen harridurarako, unerik gorenean erabaki zuen ibilbidea etetea. Itoizeko partaide izan zen Jose Garate sanmigeldarra ‘Foisis’ ezizenez ezaguna dena.