☉ Arrigorriaga
Antzerkia, dantza, magia eta zirkua Arrigorriagako XX. Clown eta Pailazoen Nazioarteko Jaialdian
Maiatzaren 8tik 10era bitartean ospatuko da Arrigorriagako Clown eta Pailazoen Nazioarteko Jaialdia. Aurten 5 artista euskaldun arituko dira, tartean, Deabru Beltzak.
Arrigorriagako Clown eta Pailazoen Nazioarteko Jaialdiaren hogeigarren edizioa hemen da. Gaurtik hasita eta maiatzaren 10era arte, antzerkia, dantza, magia eta zirkua biltzen dituzten lanak ikusteko aukera izango dute Arrigorriagara hurbilduko direnek, umorea ezaugarri nagusi harturik. Emanaldiak doakoak izango dira.
Aurtengo edizioan Euskal Herriko 5 taldek hartuko dute parte, Andaluziako eta Kataluniako bana eta beste 5 nazioartetik: Frantziatik 3 eta Suitzatik eta Brasiletik bana. Euskaraz ikuskizun bakarra antzeztuko da, bost izango dira testurik gabeko lanak edo hizkuntza zehaztu gabe dutenak eta sei gaztelerazkoak. Ikuskizunak herriko hiru gunetan burutuko dira: Juan XXIII plaza, udaletxe plaza eta Kiroldegia.
DEABRU BELTZAK ETA MATHIEU MOUSTACHE
Maiatzak 8
18:30 Mathieu Moustache: “Dans tous ses états”, Juan XXIII plazan
Malabareak, bihurrikatzeak, dantza, antzerkia eta zuzeneko musika biltzen dituen obra barregarri honek irudizko unibertso bat ezagutzeko aukera emango du: tibetar batek aulkiekin dantza egingo du, arrano bat danbor bihurtuko da eta musikak malabareak egingo ditu espazioarekin.
19:45 Deabru Beltzak: “Drumbreak”, Juan XXIII plazan
Hitzik gabeko ikuskizun honek break dance eta perkusioa fusionatzen ditu, erritmoen eta koreografien borroka eskainiz. Eskuak lurretik altxatu eta musikaren konpasean bihurrikatzen dira. Neurrigabe egiten dute dantza, begirada finkoarekin eta burdinazko ausardiarekin, askorentzat ekintza suizida izango litzatekeenaren aurrean. Konpainiak ikuskizun harrigarria sortzen du, non musikak ikusleak hipnotizatzen dituen.
EKINTZA PARALELOAK
Ikuskizunez gain, hiru ekintza paralelo eskainiko ditu Jaialdiak. Programazioaren barne dagoen Cie Cacahuète konpainiak kale antzerkiko “L´enterrement de Maman XXL” ikastaroa eskainiko du; ostiralean Tiritirantes konpainiak “Cirqueamos” haurrentzako zirku tailerra eskainiko du Herri Ikastetxean; eta “Igelen metamorfosia” Corrado Masacciren txotxongiloen erakusketa ikusgai izango da maiatzaren 13ra arte Udaleko Erakusketa Gelan.
☉ Arrigorriaga
Irizpide feministak adosteko prozesua abiaraziko dute Arrigorriagan, jai ereduari buruzko hausnarketa errealista xede
Elkarlanerako gune honek hiru hitzordu antolatu ditu Lamiaenan: urriaren 14an, azaroaren 12an eta abenduaren 10ean
Zer ekitaldi antolatzen ditugu Arrigorriagan?, Nortzuk dira protagonistak?, Nola hartzen dira erabakiak?. Galdera horiei erantzuna emateko Arrigorriagako jaiak berdintasunean izeneko irizpide feministak adosteko prozesua abiaraziko du Udalak.
“Jaietan egiten diren ekintza guztiak (kirol arlokoak, erlijiosoak, gastronomikoak, musikalak…) gure kulturaren bereizgarri diren esanahi sinboliko handiko kultur adierazpenak dira”, azaldu dute udal ordezkariek. “Guzti honetaz hausnartzeko elkarlanerako gunea sortzea da helburua, jai ereduari buruzko hausnarketa errealista egiteko eta Madalenak feministak egiteko oinarrizko irizpide batzuk adosteko”.
Prozesu hau herritar orori zabalik dago eta hiru hitzordu izango ditu Lamiaenan: lehena urriaren 14an izango da eta gainontzekoak azaroaren 12an eta abenduaren 10ean. Saioak 18:00etatik 20:00ak arte antolatu dituzte eta izena ematea beharrezkoa da berdintasuna@arrigorriaga.eus helbidearen bidez edo 944 020 200 telefono zenbakira deituz.
☉ Arrigorriaga
Zabaldu dute Arrigorriagako Ausartak Mendi Lasterketan izena emateko epea
Aurtengo edizioa urtarrilaren 18an eta 19an antolatu dute eta Canicross ETL txakurkrosa, Txakurkros eta trail herrikoia, Mendi Martxa, Mendi maratoi erdia eta Hasiberri traila prestatu dituzte
Arrigorriagako Ausartak Mendi Lasterketa 2025eko urtarrilaren 18 eta 19an antolatu dute eta bertan izena emateko epea zabaldu dute SportManiacs.com webgunean.
Iaz bezala, kirol probak egun bitan antolatu dituzte, betiko probekin: Canicross ETL txakurkrosa, Txakurkros eta trail herrikoia, Mendi Martxa, Mendi maratoi erdia eta Hasiberri traila.
Egutegia | Ausartak Mendi Lasterketa 2025
Urtarrilak 18, larunbata
– 10:00 Canicross ETL txakurkrosa (6k 150+)
– 11:30 Txakurkros eta trail herrikoia (2,5km)
Urtarrilak 19, igandea
– 09:00 Mendi martxa (20k 1.000+)
– 10:30 Mendi maratoi erdia (21k 1.100+)
– 11:00 Hasiberri trail (9,5k 500+)
☉ Arrigorriaga
Arrigorriagarren argazkiek osatuko dituzte 2025eko udal egutegiaren irudiak
Gaia “Arrigorriagako auzoak, jendea eta txoko ezkutuak” izango da eta argazkiak bidaltzeko azken eguna urriaren 27a
Arrigorrigako Udalak argazki-lehiaketa bat antolatu du irudi onenekin 2025eko udal egutegia osatzeko. “Helburua da herritarrek Arrigorriagari eta bere jendeari buruz duten ikuspegi berezi eta bakarra jasotzen duen egutegia sortzea”, azaldu dute udal ordezkariek. “Arrigorriaga bere biztanleen begiradaren bidez ezagutu ahal izatea”.
Gaia “Arrigorriagako auzoak, jendea eta txoko ezkutuak” izango da eta argazkiak bidaltzeko azken eguna urriaren 27a. Epea itxita, epaimahai batek azala eta hilabete bakoitzeko argazkiak aukeratuko ditu.
Udaletik baldintza batzuk azpimarratu dituzte interesdunek parte hartu ahal izateko: bidali beharreko argazkiak formatu horizontalean egindakoak izan beharko dira eta Euskara Zerbitzura bidali beharreko e-postan hurrengo informazioa gehitu beharko dute parte-hartzaileek:
– Izen abizenak (eta goitizena, aukeran)
– Helbidea
– Telefono zenbakia
– Argazkia ateratako lekua eta data
☉ Arrigorriaga
Malmasingo Lagunak elkarteak hitzaldi zikloa ekarriko du Arrigorriagara Europako Jardunaldietan
‘Komunitate sareak ehuntzen: Abrisketatik Malmasinera’ izeneko hitzaldi zikloan Jagoba Hidalgok, Josu Narbartek, Maite Iris Garciak eta Teresa Campos arrigorriagarrek hartuko dute parte
Ondarearen Europako Jardunaldiak antolatu ditu berriro Bizkaiko Foru Aldundiak urrian zehar lurraldeko 71 udalerritan. Aurten, “Bide, sare eta loturen ondarea” izango da jardunaldien gaia, eta Hego Uribe eskualdean hamaika jarduera antolatu dituzte.
Hitzaldiak, bisita gidatuak eta ihes gelak izango dira hilabetean zehar Arrigorriagan, Etxebarrin, Galdakaon, Ugaon eta Zeberion.
Arrigorriagan ‘Komunitate sareak ehuntzen: Abrisketatik Malmasinera’ izeneko hitzaldi zikloa antolatu dute:
Malmasinen eta Abrisketako Done Perin egiten ari diren lanei buruzko azken datuak ezagutaraziko dituzte hitzaldi-ziklo baten bitartez. Bertan Jagoba Hidalgok, Josu Narbartek, Maite Iris Garciak eta Teresa Campos-Lopez arrigorriagarrek hartuko dute parte.
Hitzaldi zikloa Edurne Garitazelaia kultur etxean antolatu dituzte urriaren 23an, 24an, 29an eta 30ean eta ez da beharrezkoa izango izena ematea.
Teresa Campos // Geuria
Egitaraua | Komunitate sareak ehuntzen: Abrisketatik Malmasinera
Urriak 23, 19:00-20:30: Malmasinetik Burdin Aroari begirada bat. Jagoba Hidalgo
Urriak 24, 19:00-20:30: Erdi Aroko paisaiak eraikitzen Euskal Herrian. Josu Narbarte
Urriak 29, 19:00-20:30: Zer esaten digu osteoarkeologiak? Arbasoak, nola bizi eta nola hil ziren. Maite Iris Garcia
Urriak 30, 19:00-20:30: Abrisketa, zer berri? Nora goaz? AR.GU.I.A. Proiektua: ibilbide berriak. Teresa Campos-Lopez
Izena ematea: malmasingolagunak@gmail.com (ez da erreserbarik egin behar)
☉ Arrigorriaga
Ibilbide historiko-toponimikoak antolatu dituzte Arrigorriagan, larunbatean
Ordubete inguruko ibilbidearen helburua Arrigorriagaren historia eta toponimia ezagutaraztea da, Malmasingo Lagunak elkartearen eskutik
Malmasingo Lagunak elkarteak ibilbide historiko-toponimikoak antolatu dituzte Arrigorriagan datorren urriaren 5ean. Hitzordu bi prestatu dituzte, euskaraz eta erdaraz. Ibilbidea doakoa izango da eta edonork hartu ahalko du parte bertan.
Euskarazko txanda 12:00etan izango da Argala plazako udaletxeko arkupeetan (erdarazkoa 10:00etan izango da). Bertan Asier Ibarretxe eta Juanjo Agirre kideek hizlari lanak egingo dituzte Arrigorriagako kaleetatik ibilbidea egiten duten bitartean. Ibarretxek ‘Arrigorriagako Hiztegi Toponimikoa’ argitaratu zuen 2021ean eta Agirre ‘Toponimia de la anteiglesia de Arrigorriaga’ liburuaren egilea da.
“Ordubete inguruko ibilbidearen helburua Arrigorriagaren historia eta toponimia ezagutaraztea da”, azaldu du Asier Ibarretxek Malmasingo Lagunak elkartetik. “Denboraren poderioz desagertu edo aldatu diren izenak berreskuratu nahi ditugu ere”, gehitu du Asierrek.
Ibilbidea herri osotik egingo dute eta bidean zehar topatuko dituzten etxeak, baserriak, eraikin edo leku jakin batzuen inguruko azalpenak egingo dituzte.
Irizpide feministak adosteko prozesua abiaraziko dute Arrigorriagan, jai ereduari buruzko hausnarketa errealista xede
Urtzi Verak maila guztietako zaleentzako argazkilaritza monografikoa eskainiko du Ugaon
Haurren beharrizan berrietara egokitzen ari da Zaratamo Arkotxako Olagane parkea
Argazkiak / San Migeleko jaietako Playback lehiaketan ere txapeldun Los Gambas kuadrilla
Argazkiak / Los Gambas kuadrilla izan da txapeldun San Migeleko jaietako Olinpiadetan
