Arrigorriagako Udaletik jakinarazi dute ezezagun batzuek Udalaren izenean informazio konfidentziala eskatzen ari direla etxez etxe.

“Udalak ez du inolako kanpainarik abiatu datu horiek eskatzeko”, argitu dute udal ordezkariek eta datu pribaturik ez ematea ohartarazi dute.

“Horrelakorik gertatuz gero, deitu berehala Udaltzaingora”, gomendatu diete herritarrei. Horretarako telefono zenbaki bi ahalbidetu dituzte: 944 020 201 eta 651 705 970.

Datorren martxoaren 27an ‘Harri, Egur eta Bihotz’ izeneko dokumentala emango dute Arrigorriagako Jasoka Herri Kirol Klubeko kirolariek Lonbo aretoan, 18:00etan.

Zinta horretan, Argentinako Tandil hirira egindako bidaia kontatuko dute Arrigorriagako elkartekoek: “Gure Tandileko Euskal Asteko bizipenak kontatuko ditugu lehen pertsonan: zelan bizi izan genuen, ezagutu genituen pertsonen testigantzak ezagutuko ditugu… denetarik!”, aurreratu dute Jasokatik.

“Bizitza osorako markatu gaituen bidaia baten kontakizuna da honako hau. Herri kirolak Argentinara eramatearen emozioa, Tandilgo Euskal Astean egindako erakustaldia, eta milaka kilometrora egon arren, euskal diasporarekin herri bereko kide sentitzearen indarra”.

Dokumentalaren helburua bidaia hura egiteko laguntza eman zuten pertsona, denda, taberna… jende guzti horri eskertzea dela azaldu dute Jasokatik. “Nahiko hunkigarria izango da”, aurreratu dute. “Gure ahotsarekin entzungo dalako euskal diasporak emandako harrera”.

GEURIAk iazko martxoan izan zuen Argentinara egin beharreko bidaia honen berri, Jasokako Marta Camacho eta Nerea Espinosa kirolarien eskutik. Izan ere, horren inguruko berbaldia izan genuen beraiekin.

Al Borde Films ekoiztetxeak telefono mobilen bidezko ikus-entzunezko sorkuntza tailerra eskainiko die Arrigorriagako 12 eta 16 urte bitarteko neskei, euskara hutsean.

Tailerra apirilean eta maiatzean egingo dute Lamiaenan, 17:00etatik 19:00ak arte. Izan ere, apirilaren 16an, 23an eta 23an eta maiatzaren 7an, 14an eta 21ean antolatu dituzte.

Tailer honek ikus-entzunezko sorkuntza kolektiboaren esperientzia proposatzen du, ikuspegi feministarekin. “Prozesu osoan zehar, parte-hartzaileek ikus-entzunezko ekoizpenaren eta garapenaren fase guztiak aztertuko dituzte —gidoitik ediziora arte—, mugikorra tresna nagusi gisa erabiliz”, azaldu dute Lamiaena Arrigorriagako Emakumeen Etxetik.

Emaitza taldean sortutako ikus-entzunezko piezak izango dira: “Pieza hauek Arrigorriagako umorezko laburren jaialdian agertzeko aukera izango dute. Sormen adierazpena eta talde-lana sustatzeaz gain, espazio hau gizartea eraldatzeko tresna gisa planteatzen da, zinema feminista sortzea eta ikus-entzunezkoen bidez ahalduntzea helburu duen prestakuntza-esperientzia gisa”.

Lamiaena: “Parte-hartzaileek sortutako bideo piezak Arrigorriagako umorezko laburren jaialdian agertzeko aukera izango dute”

Tailerraren inguruko informazioa handitzeko ipini kontaktuan Lamiaenarekin lamiaena@arrigorriaga.eus helbide elektronikora idatziz edo 747 444 898 telefono zenbakira deituz.

Martxoaren 11n Arrigorriagako herri inauterietako balorazio-bilera antolatu dute Arrigorriagako Gazteek Edurne Garitazelaia kultur etxean, 19:00etan. Saioa herritar guztientzat zabalik egongo da.

Arrigorriagako inauteriak joan den otsailaren 14an egin zituzten eta herritarrek kolorez jantzi zuten udaletxeko plaza eta inguruak.

Goizetik inauteriak girotzen hasi ziren eta arrastirako bero-bero egon zen giroa herrigunean. Elkarretaratzearen ostean (eta iragarritakoa baino zertxobait lehenago), kalejira hasi zuten Odolemaileen plazatik. Bertatik Urgoiti pasealekura igaro dira eta artez artez udaletxeko plazara heldu dira.

Bertan, Ibarra inkisidorearen herri-epaiketaren antzezpena eta Gautegun erromeriaz gozatzeko aukera izan zuten herritarrek.

GEURIAk egun horretako argazki galeria egin zuen.

Joan den Martxoaren 8an elkarretaratzea egin zuten Arrigorriagako udaletxearen plazan. Bertan ‘Emakumeok plazara!’ izeneko kontzentrazioa eta Berdintasun Kontseiluaren adierazpenaren irakurketa egin zuten.

Jarraian ‘Emakumeon eskubideen alde dantzan’ erromeria egin zuten leku berean, Aritz Berri dantza taldearen eskutik.

Hurrengo egunetan jarduera gehiago antolatu dituzte herrian.

Egitaraua | Emakumeen Nazioarteko Eguna Arrigorriagan 2026

Martxoak 11, asteazkena
17:00 Umeentzako ipuin kontalaria (Virginia Imaz): ‘Bigarren printzesa’, Lamiaena
Euskara eta Berdintasun Saila

Martxoak 21, larunbata
19:30 Antzerkia: ‘R&J’ La dramática errante, Lonbo aretoa
Kultura Saila