☉ Arrigorriaga
Adinekoen bakardadea prebenitzeko Bizkaiko lehen proiektua hasi dute Arrigorriagako Lanbarketan eta Kubon
Udalak eta Grupo SSI enpresak Bizkaia Saretu II programa jarriko dute abian Arrigorriagan, herritarren artean adinekoen bakardadeari muga jartzeko sare kolektiboak osatzeko
Arrigorriagako Osasun Foroa sortu zenetik, herritarrek gero eta argiago ikusi dute adinekoen artean badagoela askori eragiten dion “gaitz ikusezin” bat: bakardadea. Auzotar asko isolamendu eta hauskortasun egoeran bizi direla erakutsi dute datuek, eta zenbait gizarte zerbitzuetatik kanpo gelditzen direnez, horien detekzioa eta prebentzioa egitea zaila dela, bereziki laguntzarako “sare lokal indartsurik” sortzen ez bada. Horri muga jartzeko, Udalak eta Grupo SSI enpresak Bizkaia Saretu II programa jarriko dute abian Arrigorriagan; Ermuan egingo den programarekin batera, bakardadea identifikatzeko eta ekiditeko ekintza komunitarioak bultzatzeko egingo den bi proiektuetako bat.
Programaren bigarren edizioaren aurkezpena gaur, otsailak 15, egin dute Udaleko eta erakundeetako ordezkariek. Eta hemendik aurrera herrian egingo dituzten esku hartzeen nondik-norakoak azaldu dituzte Joana Etxebarria Udaleko Politika Feminista eta Gizarte Ekintzako Zinegotziak, Isabel Massa Saretu proiektuaren buruak eta Ixone Zubieta BBKko Pertsonen Sailaren arduradunak.
Joana Etxebarriak azaldu duenez, Osasun Foroa azarotik ari da lanean adinekoen beharrizanak aztertzeko, eta egindako behaketen ondoren, bi gune identifikatu dituzte Sareturen bidez ekintza esparrua bertara eramateko: Lanbarketa eta Kubo auzoak. “Forora goazen herritarren artean ikusi dugu gune hauetako biztanleria bereziki zaharra dela, gainontzeko auzoekin alderatuta”, azaldu du Etxebarriak. Gainera, Lanbarketa eta Kubo langileen auzoak dira, ez daukate gainontzeko guneek dituzten zerbitzurik eskura, horregatik, laguntzarako auzotarren sareak sortzea zailagoa da bertan.
Eragileen sareak
Bakarde egoeren “identifikaziorako, prebentziorako eta gizarte promoziorako”, baina, ezinbestekoa da eragileak inplikatzea eta batera lan egitera bultzatzea. Horrela adierazi du Isabel Massa Saretuko arduradunak. “Osasun Foroak eginda zeukan diagnostikoa beharrizanekin osatu ondoren, programaren markoa definitu dugu, eta sentsibilizazioan lagunduko duten eragile ezberdinak integratu nahi ditugu bertan”, esan du Massak. Foroan soslai ezberdina duen jendea bilduta, proiektuarekin lortu nahi dutena eragile horiek norbere espazioan “modelo” lana egitea da, gerora, pertsona gehiago laguntza kolektibora batu daitezen lortzeko. “Gazteguneko neska-mutilak, adibidez, programaren parte izan daitezke, bakardadearen aurka egin ditzakegun ekintzak definitzeko eta erreferentziako agenteen sarea sortzeko”.
Momentuz, egitasmoa Arrigorriagan integratzeko hastapen fasean daude. 2019 urtearen amaieran, Bizkaia Saretu I edizioaren barruan, Gizarte Zerbitzu Integratuen Taldea eta BBK Fundazioa adineko biztanleen talde batekin bildu zen 18 hilabetez, beren esperientziak eta erronkak ezagutzeko. Ikasketa eta hausnarketa bilera horietatik jasotako emaitzak dira, hain zuzen, Arrigorriagako proiektuaren oinarria definitzen dutenak.
Dena den, Ixone Zubieta BBK Fundazioko kideak azaldu duen moduan, esku hartzeak herriarentzako espezifikoak izango dira: “Esan genezake lehen Saretutik jaso genuena praktikara ekarri eta udalerri ezberdinetako egoeretara nola egokitzen den ikusiko dugula”. Horrela, Arrigorriagan eta Ermuan egiten ari diren bezala, martxan jarri duten proiektua hasiera izan daiteke maila zabalagoan bakardadeari aurre egiteko plan eraginkorragoak bultzatzeko.
Invisible soledad
Lehen pausotzat, Arrigorriagako herritarrek egitasmoa ezagutu dezaten eta daukan garrantziaz jabetu daitezen, Udalak eta BBK Fundazioak lankidetzan jarri dute martxan hastapeneko sentsibilizazio kanpaina, erakusketa formatuan. Invisible soledad lana Rubén Orozco artista mexikarraren obra da, eta Mercedes (argizarizko emakume figura hiper errealista) dauka protagonista. Erakusketa (udaletxean bertan ikusgai) bakarrik hil zen emakume nagusi baten isla da: “Ukitu egin dezakegu, ia sentitu, eta bera pentsatzen ari dena ere imajina dezakegu”— azaldu du Ixone Zubietak, erakusketaren arduradunak— “Mercedesek ezin hobeto transmititzen du lurralde honetan milaka pertsonak bizi duten bakardade isil hori”.
☉ Arrigorriaga
Txakurkros hastapen Ikastaroak martxan jarriko ditu KorriCanek Arrigorriagan, gazteentzako
Foru Aldundiak eta Bizkaiko Neguko Kirolen Federazioak abiarazitako kirol jarduera berri honek saio teoriko-praktikoak izango ditu Mendikosolo parkean
Bizkaiko Foru Aldundiak eta Bizkaiko Neguko Kirolen Federazioak KorriCan izeneko txakur krosako eskola kirol jarduera jarri dute martxan. Ikastaro hau Eskola Kirola Programaren ‘Hastapen eta Josteta’ jardueren bitartez aurrera eramango dute Arrigorriagako Mendikosolo parkean.
Txakurkrosean hasteko KorriCan izeneko ikastaro hauek Bizkaiko Neguko Kirolen Federazioko monitoreek eskainiko dituzte eta hiru orduko iraupena izango dute, hurrengo gaiak jorratuz: formakuntza teoriko-praktikoa, txakurren heziketarekin eta etologiarekin lotutako praktika eta txakurkros praktika.
Ikastaro hau 2009tik 2012ra bitartean jaiotako gazteei zuzenduta dago eta lau saiotan banatu dituzte: azaroaren 3an, azaroaren 17an, abenduaren 15ean eta 2025eko otsailaren 16an. Klaseak 10:00etatik 13:00ak arte izango dira. “Bertan formakuntza teoriko bat eskainiko da, bideo batzuk proiektatuko ditugu jarraian eta txakurkrosean erabiltzen den materiala aztertuko dute ikasleek”, azaldu du KorriCaneko Xabi Gonzálezek. “Lasterketa simulakroa egingo dugu ere eta gure monitoreen laguntza edukiko dute parte-hartzaileek”.
Xabi Gonzalez: “Ikastaroan formakuntza teoriko bat eskainiko da, bideo batzuk proiektatuko ditugu jarraian eta txakurkrosean erabiltzen den materiala aztertuko dute ikasleek, besteak beste”
Izena emateko interesa dutenek bizkaia.eus/eskolakirola webgunera jo beharko dute, entitate baten izenean edo banaka. Antolaketa taldetik iragarri dute taldeak gutxienez sei lagun eta gehienez 16 izan beharko dituela egun bakoitzeko.
☉ Arrigorriaga
Arrigorriagak 7.000 Arrigobono ipiniko ditu eskuragarri herriko 40 saltokitan
Aurtengo kanpaina urriaren 7tik 24ra egingo dute, bonuak lehenago agortzen ez badira
Tokiko merkataritza bultzatzea helburu duen Arrigobonoen kanpainak 7.000 bono banatuko ditu Arrigorriagako 40 saltokietan, urriaren 7tik 24ra. Udalak Adecka merkatari elkartearekin urtero abiarazten duen kanpaina da Arrigobonoena. Kanpainaren informazio guztia jasotzeko webgune hau ahalbidetu dute.
Erosleek bono mota bi erosi ahalko dituzte astelehenetik aurrera: 30 eurokoa (bezeroak 20 euro gastatu eta 10 euro hobaria jasoko du trukean) eta 10 eurokoa (bezeroak 7,50 euro gastatu eta 2,50 euroko hobaria jasotzen du). Bonuak saltokietan bertan banatuko dituzte eta erabiltzaile bakoitzak gehienez 30 euroko bono bi eta 10 euroko lau erosi ahalko ditu.
“Tokiko ekonomiaren aldeko apustua egiteaz gain, merkatari eta ostalariek udalerriari egiten dioten ekarpena balioan jarri nahi dugu”, azaldu du gaur goizean Maite Ibarra Arrigorriagako alkateak.”Bereziki, merkatarien eta bizilagunen artean sortzen duten konfiantza- eta hurbiltasun-giroa. Ez digute bakarrik kalitatea eskaintzen, modu arduratsuan kontsumitzeko aukera ere eskaintzen digute. Eta gure ardura da, Udaletik, ekimen hau bultzatzea”.
Maite Ibarra: “Herriko merkatariek ez digute bakarrik kalitatea eskaintzen, modu arduratsuan kontsumitzeko aukera ere eskaintzen digute”
Urtero lez, gaurko prentsaurrekoan Jose Cebrecos Adeckako idazkaria izan da ere: “Ekonomikoki zaila den une honetan, espero dugu bonuak oxigeno-kolpe bat izatea guztiontzat”, azpimarratu du.
☉ Arrigorriaga
Irizpide feministak adosteko prozesua abiaraziko dute Arrigorriagan, jai ereduari buruzko hausnarketa errealista xede
Elkarlanerako gune honek hiru hitzordu antolatu ditu Lamiaenan: urriaren 14an, azaroaren 12an eta abenduaren 10ean
Zer ekitaldi antolatzen ditugu Arrigorriagan?, Nortzuk dira protagonistak?, Nola hartzen dira erabakiak?. Galdera horiei erantzuna emateko Arrigorriagako jaiak berdintasunean izeneko irizpide feministak adosteko prozesua abiaraziko du Udalak.
“Jaietan egiten diren ekintza guztiak (kirol arlokoak, erlijiosoak, gastronomikoak, musikalak…) gure kulturaren bereizgarri diren esanahi sinboliko handiko kultur adierazpenak dira”, azaldu dute udal ordezkariek. “Guzti honetaz hausnartzeko elkarlanerako gunea sortzea da helburua, jai ereduari buruzko hausnarketa errealista egiteko eta Madalenak feministak egiteko oinarrizko irizpide batzuk adosteko”.
Prozesu hau herritar orori zabalik dago eta hiru hitzordu izango ditu Lamiaenan: lehena urriaren 14an izango da eta gainontzekoak azaroaren 12an eta abenduaren 10ean. Saioak 18:00etatik 20:00ak arte antolatu dituzte eta izena ematea beharrezkoa da berdintasuna@arrigorriaga.eus helbidearen bidez edo 944 020 200 telefono zenbakira deituz.
☉ Arrigorriaga
Zabaldu dute Arrigorriagako Ausartak Mendi Lasterketan izena emateko epea
Aurtengo edizioa urtarrilaren 18an eta 19an antolatu dute eta Canicross ETL txakurkrosa, Txakurkros eta trail herrikoia, Mendi Martxa, Mendi maratoi erdia eta Hasiberri traila prestatu dituzte
Arrigorriagako Ausartak Mendi Lasterketa 2025eko urtarrilaren 18 eta 19an antolatu dute eta bertan izena emateko epea zabaldu dute SportManiacs.com webgunean.
Iaz bezala, kirol probak egun bitan antolatu dituzte, betiko probekin: Canicross ETL txakurkrosa, Txakurkros eta trail herrikoia, Mendi Martxa, Mendi maratoi erdia eta Hasiberri traila.
Egutegia | Ausartak Mendi Lasterketa 2025
Urtarrilak 18, larunbata
– 10:00 Canicross ETL txakurkrosa (6k 150+)
– 11:30 Txakurkros eta trail herrikoia (2,5km)
Urtarrilak 19, igandea
– 09:00 Mendi martxa (20k 1.000+)
– 10:30 Mendi maratoi erdia (21k 1.100+)
– 11:00 Hasiberri trail (9,5k 500+)
☉ Arrigorriaga
Arrigorriagarren argazkiek osatuko dituzte 2025eko udal egutegiaren irudiak
Gaia “Arrigorriagako auzoak, jendea eta txoko ezkutuak” izango da eta argazkiak bidaltzeko azken eguna urriaren 27a
Arrigorrigako Udalak argazki-lehiaketa bat antolatu du irudi onenekin 2025eko udal egutegia osatzeko. “Helburua da herritarrek Arrigorriagari eta bere jendeari buruz duten ikuspegi berezi eta bakarra jasotzen duen egutegia sortzea”, azaldu dute udal ordezkariek. “Arrigorriaga bere biztanleen begiradaren bidez ezagutu ahal izatea”.
Gaia “Arrigorriagako auzoak, jendea eta txoko ezkutuak” izango da eta argazkiak bidaltzeko azken eguna urriaren 27a. Epea itxita, epaimahai batek azala eta hilabete bakoitzeko argazkiak aukeratuko ditu.
Udaletik baldintza batzuk azpimarratu dituzte interesdunek parte hartu ahal izateko: bidali beharreko argazkiak formatu horizontalean egindakoak izan beharko dira eta Euskara Zerbitzura bidali beharreko e-postan hurrengo informazioa gehitu beharko dute parte-hartzaileek:
– Izen abizenak (eta goitizena, aukeran)
– Helbidea
– Telefono zenbakia
– Argazkia ateratako lekua eta data
Bideoa / Zein da Basauriko jaietako abestirik onena? Herritarrek erantzun eta abestu dute!
Argazkiak / Hasi dituzte sanfaustoak Basaurin!
Bideoa / Gora Basauri! Gora San Fausto!
Argazkiak / Hasi dituzte sanfaustoak Basaurin!
Argazkiak / Etxegarai eta Sofia Taramona garaile, Basauriko ikastetxeen arteko Esku Pilota Txapelketan
Argazkiak / San Migeleko jaietako Playback lehiaketan ere txapeldun Los Gambas kuadrilla
Bideoa / Zein da Basauriko jaietako abestirik onena? Herritarrek erantzun eta abestu dute!
Bideoa / Gora Basauri! Gora San Fausto!
