→Arrigorriaga

Egitarua | Arrigo Gazte Gaming jarri dute martxan, nerabeak eta familiak teknologia berrietan hezteko

Lehenengo ekintzak bihar (azaroak 22) hasiko dituzte eta abenduaren bukaerara arte egongo dira martxan. Izen-ematea zabalik dago

Umeak #BasauriBizirik gune birtualean, 2021ean // Geuria

Arrigorriagako Udalak bideo-jokoen eta sare sozialen “erabilera kritiko eta osasungarria” sustatzeko ekimena jarri du martxan: Arrigo Gazte Gaming (AGG). Proiektua herriko nerabeei eta haien familiei zuzenduta dago, eta Informazioaren eta Komunikazioren Teknologiek (IKT) eskura jartzen dituzten aukerak aztertzeko eta sortu ditzaketen arriskuak prebenitzeko hezkuntza baliabideak eskainiko ditu.

Lehenengo ekintzak bihar (azaroak 22) hasiko dituzte eta abenduaren bukaerara arte egongo dira martxan. Hilabetean zehar, IKTek hainbat arlotan dituzten erabilerak izango dituzte hizketagai: enplegagarritasuna, kultura, kontsumoa, aktibismoa zein aisia. Azken horri, gainera, garrantzi berezia eman nahi izan diote Udaleko gazteria sailetik, eta gazteengana bideratuta dagoen ekimena izanik, ekintza praktikoen bidez egingo dituzte prestaketetako hainbat.

Abenduaren 12tik 16ra, “tailer didaktikoen astea” egingo dute hirigunean eta Abusun. Beste beste, Instagram aplikazioko profilaren segurtasunaz, sare sozialetako algoritmoen funtzionamenduaz, Twitch-eko edukien sorkuntzaz, metabertsoko enplegu aukerez eta bideokurrikulum, blog zein podcast propioak sortzeaz hitz egingo dute. 16tik 18ra, berriz, bideo-jokoak sortzeko tailerra egingo dute, eta abenduaren 26tik 28ra, bideo-jokoen txapelketa.

Hitzaldiak, bihar

Jardunaldiak, baina, hitzaldi zikloarekin hasiko dira bihar, azaroaren 22an. Bideo-jokoen munduak edukiak eta enplegua sortzeko dituen aukerez hitz egingo dute esparruan aditu diren hiru gonbidatuk. Alex Robleñok (Twitcheko Partner jokalari profesionala, aurkezlea eta Caster goi errendimenduan aditua) El streaming y otras actividades ligadas al ámbito de los videojuegos hitzaldia eskainiko du. Ondoren, Nerea Viejo Cactusconflorrek (Twitch-eko Partnerra eta Keres esports leveled up by Visa- Club-eko zuzendaria), La creación de contenidos en un club de esports jardunaldian hartuko du hitza. Bisons Eclub elkarteko komunikazio eta marketin zuzendariak, Ane Miren Castillok, Oportunidades profesionales y de negocio en entorno a los esports hitzaldiarekin itxiko du eguna.

Hiru ponentziak Edurne Garitazelaia Kultur Etxean egingo dituzte, 18:30etik 20:30era bitartean. Parte hartu ahal izateko, izena aldez aurretik eman beharko da, online formularioa beteta.

ARRIGO GAZTEGAMING JARDUNALIA, 2022 | PROGRAMAZIOA

Azaroak 22, asteartea

18:30-20:30. Edurne Garitazelaia kultur etxean.
Proiektuaren aurkezpena eta bideo-jokoen esparruan edukiak eta enplegua sortzeko jardunaldia. Hiru hitzaldi:

  • El streaming y otras actividades ligadas al ámbito de los videojuegos
    Alex Robleño, Twitcheko Partner jokalari profesionala, aurkezlea eta Caster goi errendimenduan aditua
  • La creación de contenidos en un club de esports
    Nerea Viejo Cactusconflor, Keres esports leveled up by Visa- Club-eko zuzendaria eta Twitch-eko Partnerra
  • Oportunidades profesionales y de negocio en entorno a los esports
    Ane Miren Castillo, Bisons Eclub, Club de esports (LVP) elkarteko komunikazio eta marketin zuzendaria

Abenduak 12-16
Tailer didaktikoen astea
Instagram seguruaren profila, algoritmoen funtzionamendua sare sozialetan, Twitcherako edukien sorkuntza, metaversoan enplegu-aukerak eta bideokurrikulum, blog edo podcast propioa sortzea
Hirigunean eta Abusun

Abenduak 16-18
Bideo-jokoak elkarlanean sortzea.

Abenduak 26-28
Bideo-jokoen txapelketa

Gora

Geuria Laguntzaileak Geuria Laguntzaileak