Sareak

☉ Arrigorriaga

Arrigo Korrika: terapia onena, zapatilak jantzita

Korrika egitea modan dagoela diote ArrigoKorrika Emakume Korrikalarien taldeko kideek. Azken urteetan, lasterketen eskaintzak gora egin du modu nabarmenean eta jende gehiagok izena ematen du korrika egiteagatik, emakumeak barne

|

ArrigoKorrikako neskak, ibai ondoko pasealekuan // Geuria

Korrika egitea modan dagoela diote ArrigoKorrika Emakume Korrikalarien taldeko kideek. Azken urteetan, lasterketen eskaintzak gora egin du modu nabarmenean eta jende gehiagok izena ematen du korrika egiteagatik, emakumeak barne. ArrigoKorrikako Emakume Korrikalarien artean adin askotako kirolariak daude, 27 urtetik 57ra: “Kirola egiteko ez dago adinik”, diote barrezka. Aisialdiko jarduera bezala korrika egiten hasi baziren ere, gaur egun makina bat lasterketa entzutetsuetan parte hartu dute. Euren helburua taldeko ateak emakume gehiagori zabaltzea eta burutzen duten jarduera osasuntsu hau ikustaraztea da, ondo pasatzea ahaztu barik.

Kilometroak korrika egitea maite dute Arrigo Korrikaneko neskek, eta euren energia ikustea besterik ez dago. Elkarrizketa egiteko Arrigorriagako Udal kiroldegian lotu ginen, korrika taldeko bi kidekin, eta azken momentuan ia talde osoa azaldu zen bertan, korrika egiteko ekipazioa jantzita eta guzti, ‘argazkirako’. Baina, usteak erdi ustel, argazkia ez ezik (eta zorionez) solasaldi interesgarria bezain atsegina izan genuen adin askotako kirolari adoretsu hauekin, udal kiroldegiaren sarreran bertan.

Korrika taldean neskek eta mutilek parte hartu dezaketen arren, formazioa neskena izan zen hasiera batean: “Gure asmoa ez zen nesken taldea izatea soilik”, azaldu du Mari Carmen Risoto Ruiz kideak (Laudio, 1964). Mari Carmen ama eta amama da eta korrika egitea bere bizitzaren alde garrantzitsua da.

Taldea berez kiroldegi barneko korrika talde bezala sortu zen, neskei bakarrik zuzenduta. Gaur egun, kiroldegi barneko taldea berez emakumezkoena da, baina kiroldegitik kanpo kilometro ugari egiten dituzte bertako korrikalariek eta ateak zabalik daude bertara hurbildu nahi diren kirolariei, emakumezkoak zein gizonezkoak izan: “Kalean korrika egiten dugunean Osasunaldeko kirolariekin batu egiten gara eta primeran pasatzen dugu elkarrekin”, gehitu du Agurtzane Urbina García kideak (Bilbo, 1966).

“Zuen bezalako emakume korrikalarien talderik ba al dago eskualdean?” galdera egitean, baietz erantzun dute ArrigoKorrikaneko emakume guztiek aldi berean, ‘ziur’. Baina pentsatzen hasi bezain pronto zalantza guztiak agertu dira: “baina talde hori mistoa da, eta beste hori ere”. Barreak eta zalantzak nahastu egiten dira eta minutu batzuetan inork ez daki ezer eskualdeko emakumez osatutako korrikalarien taldeen inguruan.

Argazki-saioa, Arrigorriagan // Geuria

Elkartzea, aitzakia
Duela urte batzuk, korrika egiteko elkartu ohi ziren emakume batzuk Arrigorriagan: “Ni Bilbon bizi nintzen lehen eta bertan egiten nuen korrika”, azaldu du Agurtzanek. Bizitzaren gorabeherak zirela eta ama izan zela medio, alde batera utzi zuen korrika Agurtzanek: “Arrigorriagara bizitzera etorri nintzenean emakume talde bat korrika egiten ikusi nuen. Eurengana hurbildu eta korrika egiten zuten bakoitzean ni abisatzea eskatu nien. Horrela elkartu ginen herriko hainbat emakume”. Emakume bakoitzak bere lagun eta bizimodu propioak dauzka, eta korrika taldeak emakume horiek guztiak uztartzen ditu. Elkarren artean korrika egitea arrazoi nagusia da eta asteburuetan irteten ziren kirola egitera elkarren artean, denborapasa.

Errutinak aurrera egin ahala, aisialdiko jarduera hau forma hartuz hasi zen eta 2018ko Herri krosean emakumeek parte hartzeko aitzakiagaz taldea osatu zuten Udal kiroldegian. Herriko emakumeek izena ematen hasi ziren. Gaur egun 22 lagunek osatzen dute ArrigoKorrikan taldea eta euren ospea gero eta handiagoa da, gainontzeko korrikalari taldeek ez bezala euren eguneroko kontuak Instagrameko @arrigokorrikan-en kontatzen dituztelako: entrenamendu-saioak, lasterketetako parte-hartzeak, irteerak… “Aktiboak gara sare sozialetan”, oihukatu dute gainontzeko kirolariek atzekaldetik, “eta ikusgarritasun handiagoa eskatzen dugu Udalak babes gehiago emateko eta jende gehiagok ezagutu gaitzan”.

Egun hauetan Arrigorriagako ibaiaren ertzeko paseoan ikusi ditugu korrika, baina duela egun batzuk ibiltzen, korrika eta saltoka ikusi genituen alboko mendietan barrena. Emakumeen arabera, kide gehiago eskuratu nahi dituzte taldean, eta “ez bakarrik korrika egiteko; bazkariak, asteburuko irteerak egiteko… elkarren artean ondo pasatzea da proiektu honen ezaugarririk aipagarriena”.

Euren zapatilek makina bat lasterketetako errepide eta pistetan hartu dute parte, Arrigorriagako Herri Krosaz gainera eta egutegiko asteburu asko beteta dauzkate korrikalariek urte hasieratik: Arrigorriagako Ausartak Mendi Lasterketa, Behobia-Donostia, Santurtzi-Bilbao, Areeta-Bilbao, Donostiako Lilatoia… eta badirudi horiekin aski ez dutela eta euren ematsetan ospe handiko kirol probak daude, behar bezala entrenatu eta denbora daukatenean parte hartzeko.

Arrigorriagako Udal kiroldegian dauzenetik astean bitan egiten dituzte entrenamendu-saioak. Horrez gain, asteburu askotan ere elkartu ohi dira kilometroak tipi tapa egiteko: “Whatsapp taldea daukagu kontu hauetarako eta proposamen guztiak bertan egiten ditugu, ahal duenak parte hartzeko”.

 

Korrikalariak; ez runnerrak
“Ez gara runnerrak; guk korrika egiten dugu” diote Agurtzanek eta Mari Carmenek barrezka, runnerren ezaugarriak zeintzuk diren galdetuz. Inglesezko hitz arraroz inguratuta bizi garen mundu anglosaxoi honetan korrika egiten dute Arrigorriagako taldekoek, besterik gabe. Ez dituzte puntako teknologiako gailu arrarorik erabiltzen: “Erlojua erabiltzen dugu entrenamendu-saioetako ariketak neurtzeko, besterik ez”. Mendira doazenean GPSa eramaten dute ere, ez galtzeko, badaezpada.

Laguntza bakarra korrika taldeko entrenatzaileak dituzte: duela urte batzuk Zuriñe de la Fuente izan zen eta azken garaian Maria Delgado Gilekin egiten dituzte kilometroak (aurtengo Herri Krosaren irabazlea) eta poz-pozik daude kirolariak. “Niretzat ArrigoKorrikarekin lan egitea oparia da: ez da korrika egitea bakarrik; lagunekin egotea eta euregaz berba egitea eta ondo pasatzea da”, azaldu du Maria Delgado Gil entrenatzaileak. “Korrika egiteak garrantzi izugarria dauka guretzat, psikologoarenera joatea bezalakoa da, terapia modura. Alde batetik, gorputza sasoian mantentzen dugu. Beste alde batetik, pozik sentitzen gara”, dio Mari Carmenek. “Terapeutikoa da!” ohikutzen dute atzeko aldetik. Energia positiboa airean da, hori bistan da.

Espero genuen bezala, Korrikaren 22. edizioan ere korrikan ibili ziren, Ugaotik Arrigorriagara gauerdian eta baita apirilaren 6an ere, Korrika Bilbotik igaro zen egunean bertan: “Egun txarra izan zen goizeko ordu txikietan tokatu zaigulako aurten, baina tira: Korrika da!” Kide animatu batek ere kilometroa erosi zuen kuadrilarekin, non eta Nafarroan.

Talde argazkia // Geuria

Etorkizuneko proiektuez berba egitean, emakumeen egutegiak ideiez beteta dituzte: “Gasteizko Mendiak, Santoñako Maratoi Erdia, WOP Walk On Project errelebo bidezko maratoia, Osasunaldeko mutilekin batera… topera gaude”, diote barrez. Horiez gainera Gijoiko Villa Jovellanos Erdi Maratoia, Donibane Lohizune-Hondarribia, Ondarroa-Lekeitio, Euskal Herria Mendi Erronka eta abar luze bat inoiz egiteko asmoa azaldu dute neskek. “Denbora gutxi lasterketa mordoa egiteko, gero!” esan diegu. “Lehentasunak bereizten ditugu eta gauza batzuk egiteari utzi diegu korrika egin ahal izateko. Bestela, ez dago den-dena egiteko astirik”.

ArrigoKorrika Emakume Korrikalarien Taldean gero eta kide gehiago daude eta etorkizunean kluba sortzeko asmoa plazaratu dute kirolariek. Gaur egun, aire zabalean korrika egiten dute, baina epe luzera begira euren jarduera garatzeko azpiegiturak izatea gustatuko litzaieke ArrigoKorrikakoei: “Kalean korrika egitea gustuko dugu, baina badira entrenamenduko saio jakin batzuk, serieak kasu, pista batean burutzea egokiagoak liratekeenak. Gainera, jende askok korrika egiteko egokiagoak dira pistak”. Momentuz, datorren urteko Emakumeen Nazioarteko Egunean Donostiako Lilatoia lasterketara irteera prestatzea proposatu zuten Arrigorriagako Emakumeen Etxearen inguruko bileran, joan den apirilean.

Momentura arte ekipazio propioa sortu dute (argazkian ikusgai) eta kide berriak ekarri nahi dituzte Arrigorriagako taldera: “Neska gazteak behar ditugu bereziki”, dio Agurtzanek. “Eskolatik irten eta nagusiak egin arte badago adin tarte bat zeinean gazteek ez dute kirolarik taldean praktikatzen eta aukera gutxi dauzkate: oso zaila da euren artean elkartu eta kirola taldean praktikatzea eta nire ustez horixe sustatu beharko litzateke Arrigorriagan”.

// ArrigoKorrika

 

// ArrigoKorrika

 

// ArrigoKorrika

 

// ArrigoKorrika

 

// ArrigoKorrika

☉ Arrigorriaga

Arrigorriagako Taekwondo Openak estatu mailako 208 kirolari hartuko ditu asteburuan

Otsailaren 24an Arrigorriagako Taekwondo Openaren 20. edizioa ospatuko dute kiroldegiko frontoian, 09:00etatik aurrera

|

Iazko openeko momentu bat // Garriko Taekwondo Taldea

Otsailaren 24an Arrigorriagako Taekwondo Openaren 20. edizioa ospatuko dute kiroldegiko frontoian, 09:00etatik aurrera: “Marka hautsi dugu, izena emateko epea bukatu eta hiru egunera Estatu osoko eta Andorrako 27 taldeko 208 kirolari egongo dira pilotalekuan”, azaldu dute Garriko Taekwondo Taldetik, jardueraren antolaketatik.

“Euskadiko taekwondo-txapelketarik zaharrenaren hogeigarren edizioa eta Espainian tradizio handiena duenetako bat harrera ikusgarria izaten ari da taekwondo nazionalaren munduan”, azaldu dute Garrikotik.

“Gaur egun, Katalunia, Aragoi, Errioxa, Gaztela eta Leon, Kantabria, Balearrak, Andorra eta Euskadiko selekzio nazionala lehiatuko dira”. Kategoria bi egongo dira zapatuan: kadete eta junior. “Arrigorriagara jende asko hurbiltzea espero dugu”, azaldu dute Garrikotik. “Garrikok podiumean egoteko borrokatuko diren 14 kirolariz osatutako taldearekin hartuko du parte”.

Garriko Taekwondo Taldea: “Garrikok podiumean egoteko borrokatuko diren 14 kirolariz osatutako taldearekin hartuko du parte”

Iazko openeko momentu bat // Garriko Taekwondo Taldea

Osorik irakurri

☉ Arrigorriaga

Abusuko inauterietako marrazki bizidunek Arrigorriagako auzoaren kaleak hartu dituzte

Abusuko inauterietako kalejira Ollargan, Olatxu eta Santa Isabel auzoetatik igaro zen eta amaieran txokolatada egin zuten haur eta helduentzat

|

Abusuko inauteriak // Idoia Molina

Abusuko inauteriek eskualdeko mozorro jaiei amaiera eman diete asteburu honetan Etxebarrirekin batera. 14:45etan inauterietako bazkaria egin zuten Santa Isabel auzoko frontoian.

Arrigorriagako auzoko jaietako kalejira Ollargan, Olatxu eta Santa Isabel auzoetatik igaro zen eta amaieran txokolatada egin zuten haur eta helduentzat. Ibilbidea Tarumba percusión taldearekin egin zuten, Ollargango plazan.

Osorik irakurri

☉ Arrigorriaga

Foru Aldundiak espedientea ireki dio Arrigorriagako adinekoen egoitzari, zenbait familiren kexak jaso ostean

“Ikuskapena egin da, eta dagoeneko zenbait neurri zuzentzaile jarri dituzte abian, eta antzemandako akatsak konpontzeko epeak ezarri dituzte”, azaldu du Maite Ibarra Arrigorriagako alkateak

|

Adinekoen egoitza // Gmaps

Duela hilabete, Arrigorriagako adinekoen egoitzako erabiltzaile batzuen zenbait familiak udal gobernuarekin harremanetan ipini ziren zerbitzuak dituen “hutsuneengatik” kezkatuta. Egoitza kudeatzeko ardura berez Bizkaiko Foru Aldundiari dagokio, baina Arrigorriagako gobernu taldeak adinekoen zentroko erabiltzaileen senideekin konpromisoa hartu zuen beren kezkak Foru Aldundira helarazteko, egoerari irtenbidea emateko.

“Egoitzako erabiltzaileei ematen zaien zerbitzua eta tratua berebiziko garrantzia du”, azaldu du Maite Ibarra Arrigorriagako alkateak. “Herriko adinekoak dira, zaintza duina eta kalitatezkoa behar dutenak. Familiei laguntzen jarraituko dugu berme guztiak lortu arte”.

Maite Ibarra: “Herriko adinekoak dira, zaintza duina eta kalitatezkoa behar dutenak. Familiei laguntzen jarraituko dugu berme guztiak lortu arte”

Arazoa azaleratu zenetik hiru bilera egin dituzte elkarlanerako eta zerbitzua hobetzeko ekarpenak egiteko helburuarekin: “Horri esker, Bizkaiko Foru Aldundiak espediente bat ireki du egoera ikertzeko”, azaldu dute Udaletik. “Ikuskapena egin da, eta dagoeneko zenbait neurri zuzentzaile jarri dituzte abian, eta antzemandako akatsak konpontzeko epeak ezarri dituzte”.

Egoitzako erabiltzaileak, 2020an // Geuria

Sinadura bilketaren ondorioa

Urtarrilaren amaieran azaleratu zen Arrigorriagako edadekoen egoitzan gertatzen ari diren gorabeherak, GEURIAn azaldu bezala. Zentroko erabiltzaileen senideek sinadura bilketa abiarazi zuten zerbitzuaren gaur egungo egoera salatzearren. Behin eta berriro errepikatzen den problema nagusia mediku falta da, bertako lan-baldintza kaskarrei egotziz.

Zentroko erabiltzaileen senide batzuk, Maite Ibarrarekin lagunduta Itziar Garamendi Azpiegiturak saileko zuzendari kudeatzailearekin batu ziren egoeraren berri izan zutenean.

Osorik irakurri

☉ Arrigorriaga

Iratxe Fresnedak ‘Tetuan. Kanpoaldea/Barnealdea. Eguna’ argazki-erakusketa hasi du Arrigorriagan

Otsailaren 29ra arte Tetuan filmaren grabazioan egindako argazkiak ikusteko aukera izango dute herritarrek, astelehenetik igandera

|

Argazki-erakusketako obretako bat // Iratxe Fresneda

Arrigorriagako udaletxeko Euskaldun Berria aretoak Iratxe Fresneda zinemagilearen Tetuan. Kanpoaldea/Barnealdea. Eguna izeneko argazki-erakusketa abiarazi du. Otsailaren 29ra arte Tetuan filmaren grabazioan egindako argazkiak ikusteko aukera izango dute herritarrek, astelehenetik larunbatera 18:00etatik 20:00ak arte eta domeketan, 12:00etatik 14:00ak arte.

“3.000 argazki baino gehiago ditut eta horien arteko aukeraketa bat izan da Arrigorriagako udaletxean ikusiko direnak”, azaldu dio zinemagileak GEURIA komunikabideari. Aukeraketa hori Saioa Etxebarria komisarioarekin egin zuen Fresnedak 2023ko apirilaren 20tik maiatzera 6ra Donostiako Alderdi Eder Udal Liburutegi Nagusian egindako erakusketarako. Arrigorriagako Euskaldun Berrian Fresnedak berak egindako 100×70 zentimetroko formatuko 20 argazki ikusi ahal izango dituzte bertara hurbilduko direnek: “Filmaren grabaketarako bide pilo bat exploratu genituen, grabaketetan fase asko daudelako: lokalizazio lanetarako, produkzio lanetarako… Harrera-lekuak, igarotze-lekuak eta pertsonak, haien lagunak eta senideak dira erakusketaren begiradaren xede”.

Iratxe Fresneda: “3.000 argazki baino gehiago ditut eta horien arteko aukeraketa bat izan da Arrigorriagako udaletxean ikusiko direnak”

Arrigorriagarraren ‘Tetuan’ filma martxoaren 2an proiektatuko dute Arrigorriagako Lonbo aretoan, eta horren haritik prestatu dute dokumentalaren filmaketan egindako argazkiak. “Lanaren eragilea munduan zehar gertatzen ari den pertsonen mugimenduari lotutako aurpegien eta paisaien bilaketa da. .

Iratxe Fresneda // Geuria

‘Tetuan’ bere hirugarren lana da eta Arrigorriaga herria du proiektuaren ardatzetako bat, dokumentalaren protagonistetako bat, Carmelo Fresneda, Iratxeren aita, herrikoa baitzen. Filmak Bilboko Zinebi jaialdian egin zuen estreinaldi bikoitza 2022an, GEURIAn jaso bezala, eta harrezgeroztik hainbat zinema-jaialditan lehiatu da. “Bizitzaren bidaia” bezala definitu zuen Fresnedak bere filma. Dokumentalean bertan, aita migratzailearen istorioaren jakin-minak gidatua, zuzendariak  iraganeko eta orainaldiko istorioen berreraikitzea eta bilaketa-bidaia kontatzen du.

Argazki-erakusketako lan bat // Iratxe Fresneda

Tetuanetik mundura

Saioa Etxebarria komisarioaren arabera, “Tetuán ez fikziozko film bat da, baina road movie bat da ere. Bertan, begirada pertsonalbatetik autoreak atzeman eta aztertzen dituen lekuak igarotze-lekuak eta etxeinprobisatuak dira aldi berean. Tetuánek egiten duen bidaia zinemagilearen aitarenarrastoei jarraitzeko ekindako prozesu bat da, bidaia zinematografiko bati ekiteko aitzakia.Tarteka, begirada behatzaile eta partehartzaile batetik, filmaren protagonisten bidelagungisa jarduten du Fresnedak, eta haien erregistroa egiten du Danubio ibaiaren ertzetatik, Madrilgo kaleetatik, Saharako basamortutik, Tetuango zokotik eta Euskal Herriko parajeetatik. Jasotzen dituen bat-bateko irudiak organikoak dira eta panpina errusiar batenantzera biltzen dituzte barnean begiradak, paisaiak, herriak, eguneroko bizitzak,mugimendua, argiak eragiten dion lilura eta bazterretako istorioei darien edertasuna. Zinemaren eta argazki sorta honen arteko ezinbesteko loturak, filmaketaren egunkari gisaez ezik, besteen bizitzako uneak atzemateko ere balio izan dio, gero gure esperientzienparte bihurtzeko”.

Osorik irakurri

☉ Arrigorriaga

Arrigorriagako EAJk gobernu taldearen osasun zentro eta kiroldegi berriaren proiektuak kritikatu ditu

Oposizioaren arabera, gobernu taldeak “promesa huts asko egin ditu, komunikatzen dituzten planteamenduetako batek ere ez duelako ez bideragarritasun-proiekturik ez finantzaketa-planik atzean”

|

Arrigorriagako herritar bat, gaur egungo osasun zentroaren aurrean // Geuria

Alberto Ruiz de Azua Arrigorriagako EAJko bozeramaileak gobernu taldeak osasun zentroarentzat eta kiroldegi berriarentzat dituen proiektuak “promesa huts” moduan definitu ditu: ” komunikatzen dituzten planteamenduetako batek ere ez duelako ez bideragarritasun-proiekturik ez finantzaketa-planik atzean”, izan dira jeltzalearen berbak. “Eta hori guztia prozesu parte-hartzaileen amaierarik gabeko batekin ondu da, erabakiak hartzeko gaitasunik ez dutela estali nahian”.

Arrigorriagako osasun zentro berriarei dagokionez, oposiziotik osasun zentro berri baten beharra berretsi dute, baina aldi berean gobernu taldearen “negoziatzeko borondate eza” salatu dute ere: “Gainera, publikoki aipatu zuten proiektua URArekin eta Osakidetzarekin partekatu zutela. Kontuz: gauza bat partekatzea da, eta beste bat, oso desberdina, adostu izana eta aldeko txostena izatea”, nabarmendu du Azuak.

Osasun zentro berriaren kokalekuari dagokionez, oposizioak udal gobernuak aukeratutako lursailaren “desegokitasuna” aipatu du: “2023ko ekainaren 18an ikusi genuen nola urak gainez eginten zuela osasun-zentro berria planteatzen duten lursailean”.

Horrekin batera eraikin berria lursail horretan egin beharko liratekeen aldaketak gehitu dituzte jeltzaleek: “Tamaina handiko zuhaitzak moztu beharko lirateke, dozenaka urte daramatzatenak. Inkongruentea da herri-administrazio guztiek hiriguneetan berdeguneak sortzeko lan egitea eta Arrigorriagako gobernu-taldeak herrian geratzen den birika berde bakarrenetako batean eraikitzea planteatzea”.

Alberto Ruiz de Azua: “Inkongruentea da herri-administrazio guztiek hiriguneetan berdeguneak sortzeko lan egitea eta Arrigorriagako gobernu-taldeak herrian geratzen den birika berde bakarrenetako batean eraikitzea planteatzea”

Kiroldegi berriari dagokionez, joan den legegintzaldian prozesu parte-hartzailea martxan ipini zuen EH Bilduk proiektua garatzeko: “20 milioi euroko oinarrizko diseinua sortu zuten. Badakigu Eusko Jaurlaritzarekin eta Bizkaiko Foru Aldundiarekin bildu ondoren konturatu direla beren planteamenduarekin ezin izango dituztela 12 milioi inguru izan. Berriz hasi behar dira eta guztion artean lana egitea nahi dute. Gure erantzuna ezetz izango da”.

Proposamena, erdigunean

Joan den urtarrila amaieran Arrigorriagako udal gobernuak osasun zentro berriaren proposamenaren berri eman zuen, GEURIAn azaldu bezalaxe. Gaur egungo eraikinaren egoera “txarra” salatu dute herritarrek azken urteetan: “Aspalditik datorren kontua da hau”, azaldu dio Jon Txarroaldek GEURIAri. “Azken urteetan okerrera egin duela uste dut. Gainera, zerbitzuei begira justu gelditu da eta egoera horren aurrean Osakidetzak berriro planteatu behar du osasun zentro bati begira arrigorriagarrok zer nolako zerbitzuak behar ditugun gure herrian”.

Osasun zentro berria lursail honetan proposatu du gobernu taldeak // Geuria

GEURIA Maite Ibarra herriko alkateagaz elkartu zen urtarrila amaieran, osasun zentroaren alboan: “Argi eta garbi, urteak dira Arrigorriagak osasun zentro berria behar duela”, aitortu zuen Ibarrak. “Aspalditik gaude Osakidetzarekin elkarlanean proiektu honekin: eskualdeko arduradunekin eta baita oposizioarekin ere kontrastea egin dugu eta orain Eusko Jaurlaritzako arduradunekin bilera izango dugu laster, gure proposamena aurkezteko”.

Maite Ibarra: “Aspalditik gaude Osakidetzarekin elkarlanean proiektu honekin: eskualdeko arduradunekin eta baita oposizioarekin ere kontrastea egin dugu eta orain Eusko Jaurlaritzako arduradunekin bilera izango dugu laster”

Udaleko teknikariekin hainbat aukera aztertu eta zenbait irizpide kontuan hartu ostean, udal gobernuaren proposamen hori gaur egungo osasun zentroaren alboan dagoen lursail zati bat Osakidetzari lagatzean datza: Frontoitik Teodosia Ortega parkea hasi baino lehen dagoen eszenatokidun lursail hori, hain zuzen ere. “Lurzoru hau proposamen bat besterik ez da”, argitu zuen Maitek. “Hala ere, argi eta garbi esan behar da azken hitza Osakidetzarena izango dela, berak eskatu baitio udal gobernuari udal lurzoru hori. Guk geure lanak bete ditugu”. Hori horrela, gobernu-taldearen proiektua litzateke hutsik geratuko litzatekeen eraikinean (egungo osasun-zentroa) etxebizitza-jarduketa bat garatzea

“Azken hitza Osakidetzarena izango da, berak eskatu baitio udal gobernuari udal lurzoru hori. Guk geure lanak bete ditugu”

Herriko alkateak esan du aukera “oso ona” dela honako hau erdigunean kokatuta dagoelako eta irisgarritasun onekoa delako, besteak beste. Udal gobernuak URA agentziarekin aztertu du eremu hau eta Ibarraren hitzetan “printzipioz ez dago arazorik”.

Iazko maiatza hasieran HAPOn sartu zuen gobernu taldeak osasun zentro berriaren proiektua eta laster onarpena emango zaiola aurreratu du Arrigorriagako alkateak.

 

Osorik irakurri