☉ Arrigorriaga
Arkaitz Zipitria, Iker Garitagoitia eta Maider Altuna arrigorriagarrak, Bizkaiko Bertso Txapelketako sailkapen fasean
Maiatzaren 4an hasiko da Udabarria Bertsotan, Bizkaiko Txapelketarako sailkapen fasea, eta 48 bertsolarik hartuko dute parte bertan
Maiatzaren 4an hasiko da Udabarria Bertsotan, Bizkaiko Txapelketarako sailkapen fasea, eta 48 bertsolarik hartuko dute parte bertan; tartean, Maider Altuna, Iker Garitagoitia eta Arkaitz Zipitria arrigorriagarrak egongo dira. Jardunaldia zortzi saiok osatuko dute, eta lau egunetan egingo dituzte. Eskualdeko hiru bertsolariak lehen hiruretan lehiatuko dira.
Irekiera egunean, maiatzaren 4ko saioan (osteguna), egongo dira bertsotan Altuna eta Zipitria. Altunak A multzoan hartuko du parte, eta Urdulizko Kultur Etxean (18:30ean) neurtuko zaie beste bost bertsolariri: Aissa Intxausti Aburruza (Lekeitio), Beñat Bilbao Landa (Gernika-Lumo), Igor Galarza Intxausti (Abadiño), Illart Gumuzio Larrazabal (Igorre) eta Jone Larrinaga Dañobeitia (Mungia).
Zipitriak, berriz, B multzoan jardungo du, egun eta ordu berean, baina Durangoko Plateruena Kultur Etxean (Aterpean) jokatuko den sailkapen saioan. Bertan, Araitz Katarain Mugarza (Mallabia), Bikain Urkiri Etxebarria (Ondarroa), Imanol Arrutia Azkueta (Zalla), Peru Irastortza Santxo (Getxo) eta Unai Mendiburu Valor (Algorta) bertsolariekin aurrez aurre egongo da arrigorriagarra.
Iker Garitagoitiak maiatzaren 11ko (osteguna) sailkapen fasean jokatuko du, A multzoarekin, Dimako eskolan egingo den saioan (18:30ean). Aitor Arrutia Azkueta (Orozko), Ander Sarriugarte Garcia (Durango), Iñaki Iturriotz Zuluaga (Igorre), Koldo Gezuraga Seijido (Gernika-Lumo) eta Peio Lago Iturriaga (Getxo) dira lehian izango dituen bost bertsolariak.
13 sailkatu
Bi multzo hauetan puntu gehien lortzen dituzten bertsolariak izango dira hurrengo faserako sailkatuko direnak. Horrela, Udabarria Bertsotan jardunaldian dauden 48 lehiakidetik, gutxienez, 13 sailkatuko dira; 2023ko Bizkaiko Txapelketarako dauden izen-emateen kopuruaren arabera, gehiago edo gutxiago.
Sailkapen faseko azken saioa maiatzaren 25ean (osteguna) egingo dute, eta hor erabakiko dute nortzuk joango diren udaberrian antolatuko den txapelketa nagusira. Arrigorriagarren nondik-norakoak jarraitzeko eta saioak zuzenean ikusi ahal izateko, sarrerak apirilean jarriko dituzte salgai (orokorrak, hiru eurotan; bian, bazkideentzako; eta doan, 18 urtetik beherakoentzako) www.bertsosarrerak.eus webgunean.
☉ Arrigorriaga
40. urteurrena herri bazkariarekin ospatuko du Adiskideak Arrigorriagako emakumeen futbol taldeak
Larunbatean, umeen futbol partidak, nagusienak eta beteranoenak jokatuko dituzte. Igandean, herri bazkaria eta kontzertua egongo dira
“Dena hasi zen senarrek egindako apustu batengatik”, dio Maria Torres CD Adiskideak taldeko presidenteak, klubarentzako egindako elkarrizketa batean. Montefuerteko (Oiargan) futbol zelaian zeudela, gizonek emazteei txantxetan esan zieten ez zeukatela ausardiarik belarretara praka motzetan irteteko. Baina emakumeek, egin. Eta horrela hasi zen, 1982an, Arrigorriagako emakumeen futbol taldearen ibilbidea, Torresek, eta zuzendaritzan Begoña Gallego eta Lourdes Teomiro jokalariek, lagunduta. Lau hamarkadaren ondoren, hastapen horiek oroitzeko eta ospatzeko elkartuko dira ekainaren 3an eta 4an.
Larunbatean, haur mailako futbol 11ko txapelketa jokatuko dute Montefuerte zelaian, 09:00etatik hasita. Igandean, berriz, triangular motako lehiaketa jokatuko dute Adiskideak taldeak, SD Lagunak taldeak eta CD Aurrera Vitoriak (10:00etan). Ondoren, 13:15ean, beteranoen futbol 7 partida egongo da. Kirol ekitaldien bukaeran, herri bazkaria egingo dute 15:00etan, eta 17:00etatik aurrera Alberto Cowboyren kontzertua egongo da.
Maria Torres Maite Ibarra alkatearekin “Kirolariak plazara” omenaldi ekitaldian // Geuria
Apustutik sortua
Taldeak herritar guztiak eta jokalariak gonbidatu ditu ospakizunera. Egun, klubak 45 jokalari eta 12 entrenatzaile dauzka, kategoria txikietan eta nagusienetan banatuta. Beteranoenak Lehen Erregional mailan jokatzen dute, eta horraino heltzeko bidean, hainbat lorpen egin dituzte, Maria Torresek berak Arrigorriagako Udalari azaldu dion bezala. Bizkaiko Kopan “96-97 denboraldian Txapeldunorde geratu ziren, penaltietan galdu eta gero, eta 98-99 denboraldian txapeldun izan ziren; 2012-2013 denboraldian Liga irabazi zuten; 2017-2018 denboraldian multzoko txapeldun izan ziren, eta 2019-2020 denboraldian, txapeldun, bigarren fasean”.
☉ Arrigorriaga
Porrotx eta Marimotots Arrigorriagan egongo dira pailazo taldearen 35. urteurrena ospatzeko
Ikuskizuna kiroldegiko kantxa urdinean egingo dute, 17:30ean, eta doakoa izango da
Porrotx eta Marimotots pailazoek Urteak bete, abenturak bizi! antzerkia ekarriko dute Arrigorriagara ekainaren 9an (ostirala). Ikuskizuna kiroldegiko kantxa urdinean egingo dute, 17:30ean, eta doakoa izango da.
Pailazoen taldeak 35. urteurrenaren harira egingo du ospakizuna. “Sudurgorrion bizitzan lagun egin ditugun hainbat etorriko dira bisitan”, esan dute artistek. “Urteak betetzea garrantzitsua bada, are gehiago abenturak bizitzea. Eta hori izango da gure ospakizuna: beste abentura bat bizitzea!”.
☉ Arrigorriaga
BIDEOA | Maite Ibarra (EH Bildu Arrigorriaga): “Emaitza historikoak lortu ditugu Arrigorriagan”
2.357 botorekin eta 7 zinegotzirekin, aurreko urteko marka hobetzeaz gain, EAJk baino eserleku eta boto gehiago lortu ditu EH Bilduk
Bukatu dira udal hauteskundeak Arrigorriagan. Eta emaitzak espero baino hobeak izan dira EH Bildurentzat. Maite Ibarrak beste behin jaso du herritarren babesa, 2.357 botorekin eta 7 zinegotzirekin aurreko urteko marka hobetzeaz gain (6 zinegotzi izan zituzten), EAJk baino eserleku eta boto gehiago lortu baititu.
EH Bildu ospakizunetan Arrigorriagan / Geuria
“Oso pozik gaude: emaitza historikoak lortu ditugu Arrigorriagan”, onartu du Ibarrak. “Eskerrik asko Arrigorriagako auzokide eta biztanle guztiei gugan konfiantza osoa jarri duzuelako”. Zerrendaburuak “urte zail” hauetan gobernuaren kargu egin duten lana ere ekarri nahi izan du lehen planora: “EH Bildu akordioen eta kontsetsuen aldeko alderdia dela erakutsi dugu, eta herritarren kezkei erantzuteko indar guztia jarri dugula”.
#M28 | Arrigorriaga | Maite Ibarra bigarrenez aukeratu du herriak (% 100)
☉ Arrigorriaga
BIDEOA | Alberto Ruiz de Azua (EAJ Arrigorriaga): “Guztion helburua da zinegotzi gehiago lortzea, baina gu pozik gaude datuekin”
42 boto behera egin du Arrigorriagako EAJk aurtengo udal hauteskundeetan
Aurtengo hauteskundeetan behera egin du Arrigorriagako EAJk. 1.871 boto lortu ditu gaurko bozetan; 2019an baino 42 gutxiago. EH Bilduren igoerarekin, gainera, 6 zinegotzi mantendu arren, koalizio ezkertiarrak baino bat gutxiago dauka.
“Guk errepikatu egin ditugu emaitzak; hori izan da gure asmoa”, azaldu du Alberto Ruiz de Azua zerrendaburuak. “Guztion helburua da zinegotzi gehiago ateratzea, baina gu pozik gaude datuekin”. Oraindik ezin da esan udal gobernua nola antolatuko den Arrigorriagan: “Ez dugu pentsatu zer egin behar dugun, baina datozen astean edo egunetan ikusiko dugu”.
#M28 | Arrigorriaga | Maite Ibarra bigarrenez aukeratu du herriak (% 100)
☉ Arrigorriaga
#M28 | Arrigorriaga | Maite Ibarra (EH Bildu) bigarrenez aukeratu du herriak
#M28 | Arrigorriaga | Udal hauteskundeak 2023 | Emaitzak. Hautagaiak, alderdiak, boto kopurua, zinegotziak, datu historikoak, aurreko hauteskundeak.
