Sareak

☉ Arrigorriaga

Arrigorriagako osasun zentro berria eraikitzeari argi berdea eman diote HAPOa onartu ondoren

670 etxebizitza berri ahalbidetzea, hiru aparkaleku egitea edo egokitzea eta hainbat auzo berrurbanizatzea ere aurreikusten du HAPOak

|

Idoia Molina Auzoak, Hirigintza eta Etxebizitza Zinegotzia, Maite Ibarra alkatea eta Maria Jesus Acedo alkateordea // Geuria

Etorkizuneko Arrigorriaga diseinatzen lagunduko duen plana aho batez onartu du Udalak ostegunean (martxoak 30) egindako osoko bilkuran. Gobernu taldeak (EH Bildu eta Arrigorriaga Gara), EAJk, PSEk eta NOAk baietz bozkatu diote osasun zentro berria, aparkalekuak eta berrurbanizazioak lehentasuntzat izango dituen HAPOari (Hiri Antolamenduko Plan Orokorra).

Maite Ibarra alkateak eta María Jesús Acedo alkateorde eta Garapen iraunkor eta Ingurumen zinegotziak ostiral honetan egin dute aurkezpena, planak definituko dituen jarduketei buruzko azalpenak emateko; besteak beste Urgoitiko zentroaren inguruan. “Gaur, Osakidetzari jakinaraziko diogu hartutako erabakia, eta lehenbailehen bilduko gara osasun zentro berria egiteko eman beharreko urratsak erabakitzen hasteko”, azaldu du Ibarrak, Jaurlaritzaren esku baitago zentro berriaren diseinua definitzea. Gainera, Adifekin ere bilerak egin dituztela azaldu du alkateak: “Trenbidea bertatik igarotzen denez, akordioetara heldu behar gara, eta aurrerapausoak ematen joango gara”.

Maria Jesus Acedo alkateordea, Maite Ibarra alkatea eta Idoia Molina Auzoak, Hirigintza eta Etxebizitza Zinegotzia // Geuria

Osasun zentroaz gain, HAPOak aparkalekuen arazoari konponbidea emateko esku hartzeak ere planteatzen ditu. Baruatorre kalean disuasiorako balioko duen azpiegitura garatzea, Lonboko aparkalekua hobetzea (maila ezberdinetan) eta Aixarten horretara bideratuta dagoen sailean egin nahi duten ibilgailuentzako gunea izango dira jarduketetako batzuk. Hiri Mugikortasun Jasangarriko Planean (HMJP) ere aurreikusi dituzte horiek, herritarren proposamenak ebaluatu ostean.

Auzuneak eta aparkalekuak

Halaber, bizilekuei eta auzuneei zuzenean lotutako esku hartzeak aipatu dituzte gaurko aurkezpenean. Erdigunean, Abusun eta Martiartun, libreak, babestuak eta mistoak izango diren 670 etxebizitza berri atontzea ahalbidetuko du HAPOak. Era berean, Osasun eta higiene, Pedro Muro, La Papelera, Kubo eta Ollargan auzoetan berrurbanizatzeko lanak egingo dituzte. Osasun eta higienen, adibidez, proiektua eginda dago, eta fase administratiboa baino ez da geratzen aurrera eramateko (300.000 euroko aurrekontua izango duen obrarekin).

Auzune horren egokitzea egiteko, hain zuzen, Udalkutxaren likidazio positibotik (258.037 €) eta diruzaintzako gerakinaren zati batetik (673.460 €) datorren aurrekontua baliatuko dute. Gobernu taldeak eta NOA taldeak akordioa erdietsi ondoren, martxoaren 30eko bilkuran bozkatu dute ikasturteko gerakina nora bideratu erabakitzeko proposamena, eta PSEren abstentzioarekin eta gainontzeko alderdien onespenarekin egin du aurrera planak. Berrurbanizazioei lotuta, bertan aurreikusi dute HAPOn bildutako San Juan auzoa egokitzeko prozesuaren hasiera (40.000 eurorekin) ere.

Maite Ibarra alkatea eta Maria Jesus Acedo alkateordea gaurko aurkezpenean // Geuria

HAPOa, “ezinbestekoa”

Ibarrak adierazi duenez, gobernu taldearentzako oso pozgarria da “legegintzaldi zail” baten ondoren, lau urteen hasieran planteatutako “ezinbesteko” neurri hau aurrera atera izana: “Arauak baimentzen digunaren eta herritarrek luzatu dizkiguten beharrizanen artean oreka lortu dugu”. Horrela, “arduratsuagoa, justuagoa, kohesionatua, jasangarriagoa eta parekideagoa” den herria marraztuko dutela esan du alkateak.

Alkateordeak, berriz, gogoratu du HAPOak 24 urte daramatzala aldatu gabe, eta, beraz, “garai berrien irizpideetara eta erronketara” egokitu dutela onartu berri dutena. “Planak udalerria egiteko eta ulertzeko modu desberdina izatea suposatzen du”, azaldu du Acedok. “Egitera goazenaz gain, nola egingo dugun definitzeari denbora asko eman diogu”.

☉ Arrigorriaga

Arrigorriagako Gure Magalean boluntario bila dabil eskolako guraso elkartearen desagerpena ekiditeko

Ziklo berriari aurre egiteko belaunaldi aldaketa hori gertatu ezean guraso elkartea desagertuko litzatekela azaldu dute Gure Magaleanetik

|

Ikasle bat, amarekin, eskolako sarreran // Geuria

Gure Magalean Arrigorriagako eskolako guraso elkarteak bilera deitu du gaur arratsaldean, 17:00etan, eskolako musika gelan, guraso elkarteak gaur egun duen “boluntario faltari aurre egiteko”. Izan ere, gaur egungo batzordearen ziklo amaiera uztailean izango da eta Gure Magaleanetik elkarteak jendea behar duela adierazi dute.

“Gure eskola zentro oso handia da eta guraso elkarteak zerbitzu ugari eskaintzen ditu, eskola askotan baino askoz gehiago”, azaldu du Aitor Arenas kideak. “Hori posible izateko koordinazio lan handia egin behar da eta lan hori egiteko jendea behar da”. Arenasen arabera eskolako guraso elkarteak antzeko egoera bizi zuen duela bizpa hiru urte, “baina azkenean beti agertzen da laguntzeko prest dagoen inor”.

“Guk boluntarioz osatutako talde handia behar dugu Gure Magaleanek eskaintzen dituen zerbitzuak behar bezala mantentzeko”. Gaur egun kontu administratiboak egiteko pertsona bat kontratatuta dauka guraso elkarteak baina elkarteko kidearen arabera jende gehiago behar da lana banatu ahal izateko. “Pozik gaude badakigulako Arrigorriagako gurasoak laguntza horren alde agertzen direlako beti, baina beren inplikazioa behar dugu zuzendaritza organoetan”.

Guraso elkartetik aldaketa eman behar dela aldarrikatzen dute. “Lantaldeak aldaketa hori halabeharrez eduki beharko luke bizpa hiru urte ostean: gure umeek laster edo berandu eskola uzten dute alde batetik eta lan piloa egiten delako taldea koordinatzen, bestetik”.

Aitor Arenas: “Belaunaldi aldaketa gertatu ezean guraso elkartea desagertuko litzateke, horrek dakarren ondorio guztiekin”

Ziklo berriari aurre egiteko belaunaldi aldaketa hori gertatu ezean guraso elkartea desagertuko litzatekela azaldu dute Gure Magaleanetik: “Guraso elkarteak Goizeko Gela, eguerdiko eta eskolaz kanpoko jarduerak, seguruaren antolaketa, txangoetan beherapenak eskuratzea… bezalako kontuak kudeatzen ditu eta horren guztiaren atzean haurren ongizatea dago”.

Gaur egungo batzordearen zereginen artean eskolaren irudiaren berriztapena, eskolaz kanpoko ekintza berriak ezarri eta funtzionatzen ez zutenak kendu dituzte, besteak beste.

Arrigorriagako eskola // Geuria

Eskola Eguna, ekainean

Guraso elkarteko lana “polita” dela dio Arenasek. Izan ere, momentu honetan ekainaren 9an egingo duten Eskola Eguna antolatzen ari dira. Kide bakoitzak ahalegin guztiak ipintzen ditu urtean behin antolatzen duten jai handi hau prestatzeko: “Antzina Liburu Eguna antolatzen genuen, Eskola Eguna bezalako egun berezi bat. Ikasleek urtean zehar egindako lanen erakustaldi bat zen, komunitatea sortzeko aukera paregabea: ikasleak, irakasleak, gurasoak, jantokiko langileak…”.

Aurten ere ikasleentzako jolasak, puzgarriak, liburu salmenta, herri kirolak, eta ikasturtean zehar egin dituzten jardueren erakustaldiak antolatu dituzte: irristaketa, xakea… “Ate irekien jardunaldia ere egongo da eta guretzat benetan garrantzitsua da. Iaz harrera ona izan zuen eta bertan eskola ikusteko aukera dago. Ikaslei asko gustatzen zaie eta ekitaldi berean irakasle eta gurasoekin elkartu egiten dira”, azaldu du Arenasek.

Eguerdi aldera bazkaria, zozketa bat eta bazkalosteko parranda prestatu dute DJ baten saioarekin eta, egun borobil bati merezitako amaiera emateko: “Bazkarian parte hartzeko tiket gutxi geratzen dira eta gaur bertan eskolatik irtetean eskuratzeko aukera egongo da. Gure jaira etortzeko gonbidapena luzatzen diegu ikasle eta guraso guztiei”.

Osorik irakurri

☉ Arrigorriaga

Arrigorriagak 300.000 euro jarriko ditu herritarren eskura aurrekontu parte-hartzaileetan

Herritarrek proposamenak egiteko epea ekainaren 30a arte luzatuko dute, eta diru partida bikoiztu egingo da, 300.000 eurotaraino

|

Proposamenak egin eta jasotzeko web orria jarri dute herritarren eskuragarri / Geuria

2022an egin zituzten lehen aldiz aurrekontu parte hartzaileak Arrigorriagan, eta udal ordezkarien arabera “parte hartzea oso positiboa” izan zela kontutan hartuta,  2025eko aurrekontuari begira apustua indartzea erabaki dute: diru partida bikoiztuko dute, 300.000 eurotaraino, eta proposamenak egin zein bozkatzeko epea luzatuko dute. Horiek dira berritasun nagusiak, propio sortu duten web orriarekin batera.

Web berri honetan herritarrek euren proposamenak egin ahalko dituzte, eta baita egin diren proposamenak bozkatu ere. Ez da bide bakarra izango, ordea: udal eraikinetan hautestontziak jarriko dira, inprimakiak bete eta bertan sartu ahal izateko.

Proposamenak egiteko epea gaur hasi da, eta ekainaren 30an bukatuko da. Lehen fase honen ondoren balorazio tekniko bat egingo da, proposamenek zehaztuta dauden irizpideak betetzen dituzten ikusteko: gutxienez 1000 euroko kostua izatea, zehatzak eta udalaren eskumenekoak izatea, eta bideragarritasun teknikoa, ekonomikoa eta jasangarria izatea.

Behin hori eginda, eta irailaren 1etik 30ra proposamenak bozkatuko dira, behin betiko Aurrekontuan sartzeko. Herrian erroldatuta dauden 16 urtetik gorako arrigorriagarrek gehien jota hiru proposamen bozkatu ahal izango dituzte.

Udaletik azpimarratu duten lez, proposamenak ez dira soilik “hirigintza arloari dagozkionak izan behar”, eta udalerriaren beharrizanen isla izatea nahi dute. Maite Ibarra alkateak eta Peio Garmendia zinegotziak zehaztu duten bezala, “udal gobernuaren 95. neurrian jasotako konpromisoen artean dago aurrekontu parte-hartzaileena”.

 

Osorik irakurri

☉ Arrigorriaga

Arrigorriagako Garrikoko kirolariek brontzezko dominak eskuratu dituzte Espainiako Taekwondo txapelketan

Itxaso Hernándezek brontzezko domina bi eskuratu zituen: bat bakarkako borrokan eta bestea bikoteka, Sergio Pachorekin, Euskal Herriko Unibertsitatea ordezkatuz. Maider Castrok beste brontzezko domina bat ekarri du etxera

|

Unibertsitate arteko txapelketako Garrikoko kirolariak, Toledon // CD Garriko

Joan den asteburuan Unibertsitate arteko Espainiako Taekwondo txapelketa jokatu zuten Toledon eta Arrigorriagako CD Taekwondo Garrikoko Itxaso Hernández, Sergio Pacho, Maider Castro eta Iker Sevillano kirolariek bertan hartu zuten parte.

Itxaso Hernández galdakoztarrak brontzezko domina bi eskuratu zituen: bat bakarkako borrokan eta bestea bikoteka, Sergiorekin, Euskal Herriko Unibertsitatea ordezkatuz. Gainera, Maider Castro arrigorriagarrak beste brontzezko domina bat eskuratu zuen Deustuko Unibertsitatearen izenean.

Bizkaiko Haurren Borroka-txapelketa // CD Garriko

Zortzi, Bilbon

Joan den igandean Bizkaiko Haurren Borroka-txapelketa antolatu zuten Miribillako frontoian eta Arrigorriagako klubeko kirolariek zortzi domina eskuratu zituzten: Adriana Andresek, Iker Ubedak, Markel Garciak, Izei Intxaurragak, Aitzol Portugalek, Hegoi Dominguezek eta Julen Fernandezek urrezko domina bana eskuratu zuten eta Lur Guerrak zilarrezko bat lortu zuen.

Osorik irakurri

☉ Arrigorriaga

32. Ume Mendi Ibilaldia antolatu du Arrigorriagako Padura Mendi Taldeak

Maiatzaren 26an antolatu dute 32. edizioa eta urtero lez, proba laburra eta luzea izango ditu

|

Pastorekorta // Geuria

Maiatzaren 26an 32. Ume Mendi Ibilaldia antolatu du Arrigorriagako Padura Mendi Taldeak. Urtero lez, kirol proba honek kategoria bi izango ditu, eta biak Arrigorriagatik abiatuko dira: Laburra (7,81km eta 214 metroko desnibelekoa) eta Abrisketako Done Peritik, Benta Handia eta Mendikosolotik igaroko da. Luzea, ordea, (11,64km eta 535 metroko desnibelekoa), Otxandioko Atxatik, Pastorekortako tontorretik eta Txus iturritik igaroko da.

“Luzeak, anoa-gune bat izango du ibilbidean. Laburrak, ordea, ez”, azaldu dute Euskal Mendi Federaziotik. “Baina, amaieran, ibilbide bietako parte-hartzaileek indarrak berreskuratzeko jakiak izango dituzte helmugan, baita opari-poltsa bat ere”.

Izen emateak eta ibilbideen trackak Euskal Mendi Federazioaren webgunearen bidez ikus daitezke.

Osorik irakurri

☉ Arrigorriaga

Arrigorriagako Abusu Casting Klubak Arrantza Opena egingo du taldearen 25. urteurrenean

Hitzordua ekainaren 23an izango da eta 450 euro eta kirol materiala banatuko dituzte sarietan

|

Abusu Castingeko Mikel Jimenez kidea // Abusu Casting Klub

Abusu Casting Klubak mende laurdena bete du aurten eta ospakizun modura Arrantza Open 25 jarduera prestatu dute Arrigorriagako auzoan. Hitzordua ekainaren 23an izango da eta 450 euro eta kirol materiala banatuko dituzte sarietan.

“25. urteurrenean egun berezia antolatu dugu Abusun”, azaldu dute elkarteko ordezkariek. “Hori horrela, herritarrak gonbidatu nahi ditugu Korrokoiak arrantzatzera”. Jardueran parte hartzeko arrantza klubarekin harremanetan jartzea eskatu dute 678 51 84 64 telefono zenbakira deituz.

Lehen saria 200 euro, txapela eta trofeoa izango da; bigarrena 150 euro eta trofeoa; hirugarrena 100 euro eta trofeoa. Laugarren postutik hamargarreneraino kirol materiala banatuko dituzte parte-hartzaileen artean. “Parte-hartzaile guztiek saria jasoko dute hala ere”, gehitu dute arrantza taldetik.

Osorik irakurri