Sareak

☉ Arrigorriaga

Vicente Leal eta Miren Ajangiz arrigorriagarrek ‘Hegazti Ikusezinak’ argazki-erakusketa eskaini dute

Bien artean Bilbo Handiko 30 hegazti espezieren erretratuak ipini dituzte Arrigorriagako kultur etxean

|

Vicente Leal eta Miren Ajangiz, Edurne Garitazelaian // Geuria

Arrigorriagako Edurne Garitazelaia kultur etxeak ‘Hegazti Ikusezinak’ izeneko argazki-erakusketa hartu du Vicente Leal (Abusu, 1960) eta Miren Ajangiz (Bilbo, 1962) herritarren eskutik. Vicente argazkilaria da eta Miren, behatzaile-dokumentalista. Bien artean Bilbo Handiko 30 hegazti espezieren erretratuak ipini dituzte Arrigorriagako kultur etxean, 30x40zmko tamainan. “Bilbo Handian bertan ehunka hegazti espezie ikus daitezkela erakutsi nahi dugu argazki erakusketa honen bidez”, azaldu dute Arrigorriagakoek, eta hala da: Edurne Garitazelaian Montefuerten, Abusuko ibaiertzean eta Bolintxu inguruan ateratako argazki zoragarriak ikusteko aukera egon da. “Bolintxun bertan atera izan dugu bertan bizi den Martin Arrantzalea (Alcedo Atthis)”, dio txundituta txoriaren argazkia erakusten duen bitartean: “Lerro zuzenen bidez eraikitzen ditu bere ibilbideak, intsektu bat izango balitz. Zoragarria da”.

Bikoteak www.txoritxikiak.com webgunea sortu zuten duela bost urte, eta bertan, txorien inguruko artikulu labur eta interesgarriak igotzen dituzte: “Artikulu atseginak eta dibertigarriak dira, teknikotasunetatik urrun, edonork ulertu ahal izateko”, azpimarratu du Lealek. Proiektua Econoja azokan jaio zen: “Olympus markako CEOarekin berba egiten hasi nintzen, nik erabiltzen nuen kamera hobetzen jarraitu ez zutelako eta “haserre” nengoen”, azaldu du barre egiten Vicentek. “Kamera bat utzi zidaten eta frogak egiten hasi nintzen. Hura bai zela kamera harrigarria”.

Vicente Leal: “Olympusek kamera bat utzi zidan eta frogak egiten hasi nintzen. Hura bai kamera harrigarria”

Martin Arrantzalea // Vicente Leal

Vicentek 9 urterekin hasi zen argazkilaritzan, esparru horretan lan egiten ez badu ere. Estilo askotako argazkiak egin ditu bizitzan zehar, baina inbertsio garrantzitsu bat egin zuen kamera erosi zuenetik: teleobjektibo bat. “Momentu hartatik aurrera hegaztiei argazkiak egiteko zirrara sentitu nuen, mundu zoragarria delako. Hegaztia ezagutu behar da: bere bizimodua, elikadura… “. Zaletasun honetan denbora eta pazientzia asko inbertitu du Abusukoak.

Bere zorroan kamera bat eraman ohi du beti gainean. Txoriak harrapatzeko Olympus OM1 gorputza erabili ohi du 300mmko teleobjektibo batekin. Kameraren mikro 4/3 sentsoreak 600mmko teleobjektibo batean bihurtzen du Lealen tramankulua eta biderkatzaile batekin batera 1.200mmko lentea du emaitza modura. Beste hitz batzuetan: urruneko distantziatik tiro egiteko eta hegaztia fondotik ezberdintzeko aukera ematen dio argazkilariari, besteak beste.

Miren eta Vicente // Geuria

Argazkilari eta behatzaile

Vicenteren lanak, baina, funtsezko beste elementu bat du: Miren Ajangizen begiak. Mirenek, hainbat liburu ikasi ostean, hegaztiak eta euren bizimoduak aztertu ditu eta prismatikoekin txoriak detektatu eta errekonozimendu lanak egiten ditu, Vicenteri tiro egiteko agindua emanez. Behatzaile lanak egiteaz gainera webguneko eta Instagram kontua kudeatzeaz arduratzen da.

Argazkilaritza mota honek lasaitasuna eta begi ona eskatzen diete profesionalei eta modu bitan praktikatu ohi da: zelatan edo mugimenduan. Abusuko bikoteak menditik paseoak egiten dituzten bitartean egiten du lan, horrela hegaztia “modu naturalean” harrapatu daitezkelako. Hori bai, arintasuna funtsezko osagaia da horretarako.

‘Hegazti Ikusezinak’ erakusketak hainbat erakusgela ikusi ditu momenturarte. Aurtengoei dagokienez, azkenak Bilboko Expodistriton (urtarriletik martxora arte San Inazio, Errekalde, Castaños eta Otxarkoagako udaltegietan) eta apirilean Abusuko Zentro Soziokulturalean. “Gure txoriak erakusgela gehiagotara eramatea gustatuko litzaiguke, eta proposamenetarako zabalik gaude”.

☉ Arrigorriaga

Su ta Gar, Fetitxe eta Beranduegi eta Gautegun erromeriek girotuko dituzte Arrigorriagako Madalenak

Urtero lez, eskualdeko taldeak eta bandak nabarmendu ditu Udalak jaietako programazioan eta txosnagunean zein kaleetan ere ez da animazioa faltako uztailaren 19tik 25era

|

Su ta Gar // sutagar.com

Arrigorriagako jaiak ate joka daude eta uztailaren 19tik 25erako gauak girotuko dituzten kontzertuak iragarri ditu Udalak. Su ta Gar, eszenatokietara itzuli behar diren Fetitxeko mutilak eta eskualdeko Gautegun eta Beranduegi erromeriek udaletxeko plaza eta txosnagunea hankaz gora ipiniko dituzte.

Gustu guztietarako menua prestatu du Udalak aurten ere eta urtero lez, eskualdeko taldeak eta bandak nabarmendu ditu jaietako programazioan. Txosnagunean eta kaleetan ere ez da animazioa faltako eta Paté de Rata eta Garena taldeen kontzertuak ikusiko dira.

Laster jaietako programa osoa iragarriko du Arrigorriagako Udalak.

Egitaraua | Madalenetako kontzertuak 2024

Uztailak 19, ostirala
Puro Relajo
Akerbeltz (erromeria)
Txosnetan: Erdoil, Ganibet, Fetitxe

Uztailak 20, larunbata
Ostrich Wedding
Su ta Gar
Lehian erromeria

Uztailak 21, igandea
Piano kontzertua
Kale kontzertuak: Paté de Rata + Garena
Verbena Vulkano

Uztailak 22, astelehena
Bilboko Akordeoi Orkestra Sinfonikoa
Beranduegi Erromeria

Uztailak 23, asteartea
Txosnetan: bertsio gaua

gautegun erromeria // Utzitakoa

Uztailak 24, asteazkena
Galimatias (musika afrikarra)
One Love (Bob Marleyri tributua)
Kontzertuak txosnetan: Empire of Disease, Silitia, Gautegun Erromeria
DJ Markelin

Uztailak 25, osteguna
Kantatuaz

Osorik irakurri

☉ Arrigorriaga

Programa / Lanbarketako jaiak 2024

Ekainaren 14tik 16ra izango dira aurtengo jaiak eta haurrentzako ekintza mordoa, lehiaketak, kalejirak, herri bazkaria eta kontzertuak antolatu dituzte Arrigorriagako auzoan

|

Haur bat, apar festa batean // Geuria

Asteburu honetan, ekainaren 14tik 16ra, San Antonioak ospatuko dituzte Arrigorriagako Lanbarketa auzoan. Ostiraletik domekara arte askotariko jarduerak prestatu dituzte: haurrentzako ekintza mordoa, lehiaketak, kalejirak, herri bazkaria…

Zapatuko gauan kontzertuak izango dira nagusi eta 23:00etatik aurrera Unicorn Riders, Eztandap eta Very Txarrak taldeek iksukizuna eskainiko dute Pedro Muro kalean.

Egitaraua | Lanbarketako jaiak 2024

Ekainak 14, ostirala
19:30 Txupinazoa eta kalejira Lanbarketa, Salud eta Higiene eta Lepantotik
20:45 Urdaiazpiko, patata, olibak, ardoa eta muztioaren dastaketa, Telefonica
22:30 Jaikide diskofesta, Pedro Muro

Ekainak 15, zapatua
11:00 Puzgarriak, San Antonio plaza
12:00 Pintakarak, San Antonio plaza
12:00 Herri kirolak, San Antonio frontoia
14:00 Herri bazkaria
17:00 Mus txapelketa, Geltoki taberna
17:30 Apar festa, San Antonio frontoia
19:00 Kalejira Lanbarketatik, Danbayan batukadarekin + buruhandiak
19:30 Umeentzako talo-tailerra, Ikusi tabernaren ondoan
20:30 Txorizoa sagardoarekin, ardoa eta muztio banaketa, Telefonica
23:00 Unicorn Riders + Eztandap + Very Txarrak, Pedro Muro

Ekainak 16, domeka
11:00 Esku pilota partidak, San Antonio frontoia
13:30 Potxin Patxin pailazoak, Pedro Muro
17:00 Igel txapelketa, Ikusi taberna
17:30 Buruhandiak + Samasiku fanfarrea
19:30 Izozki banaketa, San Antonio frontoia
21:30 Jai-amaiera

Osorik irakurri

☉ Arrigorriaga

Arrigorriagako Gazte Egunak Bertso bazkaria eta Rally48ren kontzertua ekarriko ditu Gaztetxera

Gazte Egunak, jokoak, bertso bazkaria, musika, Pintxopotea eta kontzertuak ekarriko ditu Arrigorriagako Gaztetxera ekainaren 22an

|

Arrigorriagako Gazte Egunean Bertso-bazkaria antolatu dute Gaztetxean // Gaztetxea

Gazte Egunak Pintxopotea, jokoak, bertso bazkaria eta kontzertuak ekarriko ditu Arrigorriagako Gaztetxera ekainaren 22an. Urteroko Hockey Txapelketak emango dio hasiera Gazte Egunari, Agapita plazan.

15:00etan bertso bazkaria prestatu dute Iker Garitagoitia, Jone Larrinaga eta Asier Alcedorekin. Bazkariak 13 euroko prezioa du eta txartelak Aldapa eta Sorgiñe tabernetan eskuratu daitezke.

19:00ak aldera Baflepoteoa hasiko dute Arrigorriagako kaleetatik zehar eta kaleko jaiak 22:00ak arte iraungo du. Bertatik Gaztetxera itzuliko dira gazteak, ordu horretan hasiko baitira gaueko kontzertuak: eskualdeko Rally48 (VillaSoundBilbao lehiaketaren laugarren edizioko irabazleak), Altxa Porru Erromeria eta Painapple.

Egitaraua | Arrigorriagako Gazte Eguna 2024

Ekainak 22, larunbata

10:00 Hockey Txapelketa, Agapita plaza

15:00 Bertso bazkaria, Gaztetxea

19:00 Bafle poteoa, herrian

20:00 Pintxopotea, Gaztetxea

22:00 Kontzertuak: Rally48 + Altxa Porru Erromeria + Painapple

Osorik irakurri

☉ Arrigorriaga

Arrigorriagako Madalenetako kuadrillen arteko Ligatxoan izena emateko epea zabaldu dute

Uztailaren 19tik hasita Gazte Olinpiadak, Barredora, Oliba-hezur jaurtiketa, Playback lehiaketa, Mozorro Eguna, Tortilla eta paella lehiaketa eta Tiragoma proba prestatu dituzte Madalenetan

|

Gazte Olinpiadak, iaz // Geuria

Uztailaren 19tik 25era ospatuko dituzte aurtengo Arrigorriagako Madalenak eta gazteek Kuadrillen arteko Ligatxoan parte hartzeko datak kaleratu dituzte.

Uztailaren 19an hasiko dira jaiak eta egun berean, urtero lez, kuadrillen jaitsiera eta argazkia egingo dute. Horrez gainera, Kuadrillen arteko Ligatxoaren lehen froga egingo dute. Hurrengo egunetik aurrera Gazte Olinpiadak, Barredora, Oliba-hezur jaurtiketa, Playback lehiaketa, Mozorro Eguna, Tortilla eta paella lehiaketa eta Tiragoma proba prestatu dituzte.

“Jaietan zehar antolatuta dauden ekintzek puntuazio ezberdina jasoko dute (parte hartzeagatik) eta gainera, ekintza hauetan hoberen sailkatuta geratzen diren kuadrillek ere puntu extrak jasoko dituzte”, azaldu dute antolakuntza taldetik. Kuadrilla irabazleak bazkari edo afari bat irabaziko du Elizondo tabernan eta bigarren postua eskuratuko duen kuadrillak, ostera, tortilla bat.

Gazte Olinpiadak, iaz // Geuria

Izen emateak zabalik daude esteka honetan eta hauxek dira bete beharreko baldintzak Ligatxoan parte hartzeko:

  • Kuadrilla bakoitzak gutxienez bost lagun izan beharko ditu eta kide bakoitzak, gutxienez 16 urte
  • Ez dira jarrera LGTBIfobikoak, matxistak, xenofoboak zein arrazistarik onartuko
  • Ezin izango da inorenganako indarkeriarik erabili
  • Gainontzekoen askatasun eta eskubideekiko errespeturik eza ez da baimenduko

Egutegia | Kuadrillen arteko Ligatxoa 2024

Uztailak 19, ostirala
– Kuadrillen jaitsiera + argazkia
– Lehenengo froga

Uztailak 20, larunbata
– Gazte Olinpiadak

Uztailak 21, igandea
– Barredora

Uztailak 22, astelehena
– Oliba-hezur jaurtiketa
– Playback lehiaketa

Uztailak 24, asteazkena
– Mozorro Eguna: musika, abestiak, bideoklipak…

Uztailak 25, osteguna
– Tortilla eta paella lehiaketa
– Tiragoma

Osorik irakurri

☉ Arrigorriaga

Arrigorriagako Gazte Egunako Hockey txapelketan izena emateko epea zabaldu dute

Parte hartzeko bost lagunez osatutako taldeak eratu behar dira. Izena emateko azken eguna ekainaren 16a izango da

|

Hockey materiala // Colin Czerwinski, Unsplash

Ekainaren 22an antolatu dute aurtengo Gazte Eguna, Arrigorriagako Gaztetxean. Eguneko jarduera guztiak jasotzen dituen programa laster kaleratuko dutela iragarri dute Gaztetxetik.

Horien artean urteroko Hockey Txapelketa dago. Izan ere, Agapita plazan 10:00etan egingo duten lehiaketan izena emateko epea zabaldu zuten atzo sare sozialetan: “Badator Gazte Eguna! horretarako egitarau genial bat prestatu dugu, baina hori erakutsi baino lehen… urteroko hockey txapelketan parte hartzera animatzen zaituztegu!”, azaldu dute lehiaketako arduradunek.

Lehiaketan parte hartzeko bost pertsonez osatutako taldeak eratu behar dira taldearen beraren eta berau osatzen duten kideen izenak arguiagazte@gmail.com helbide elektronikora bidali behar dira. Telefonoz deitzeko aukera dago ere 722 700 928 zenbakira deituz.

Izena emateko azken eguna ekainaren 16a izango da.

Osorik irakurri