☉ Arrigorriaga
Arrigorriagak indarkeria matxistaren biktimei laguntzeko eta entzuteko gune “intimoa” sortuko du
Proiektuaren helburua indarkeria matxistari aurre egiten ari diren Arrigorriagako emakumeen ahalduntze indibidual eta kolektiboko prozesuan tresnak ematea da
Arrigorriagako Berdintasun Sailak indarkeria matxistaren biktimei laguntza eskaintzeko programa abiarazi gura du, horretarako bost eta hamabi emakume bitarteko talde ireki bat sortuz, gune “goxo” batean elkartzeko: “Talde honen helburua ez da talde terapia bat izatea, baizik eta, indarkeria matxistari aurre egiten ari diren Arrigorriagako emakumeen ahalduntze indibidual eta kolektiboko prozesuan tresnak ematea, erreparazio-prozesu baten parte gisa”, azaldu dute proiektuaren ekintzaileek. Horretarako, une eta gune goxo bat sortu nahi dute, anonimotasuna bermatuz, “barruko guztia hustu eta bizi esperientzietatik ikasteko”. Zerbitzua indarkeria matxista pairatu edo pairatzen ari den edozein emakumei zuzenduta dago, indarkeria mota eta eremua edozein delarik edo gizarte zerbitzuan edo bestelako zerbituetan egon den kontua hartu barik.
“Gizarteak orokorrean tamalez ez dauka enpatiarik eta ez du epaitu barik laguntzen”
“Gizarteak orokorrean tamalez ez dauka enpatiarik eta ez du epaitu barik laguntzen. Hori dela eta, eta errudun eta lotsa sentimendua nagusiki direlako, gertatutako kontatzea zaila da”, azaldu dute Berdintasun Sailetik.
Bost eta hamabi emakume bitarteko taldea Udaletik bideratuko dute, bai gizarte-arloko erakundeetan parte hartzen dutelako, bai oinarrizko gizarte-zerbitzuen erabiltzaileak direlako. Gidaria indarkeria matxistaren arloan kanpo aholkularitzako aditu bat izango da
Pausuz pausu
Saioetan parte hartzeko asmoa uten emakumeek Berdintasun Saileko orddezkariekin ipini beharko dira harremanetan 747 456 114 telefono zenbakira deituz edo berdintasuna@arrigorriaga.eus helbidera idatziz. Taldean honako gai hauek jorratuko dituzten, partaideen oniritziarekin: taldearen helburua definitzea, generoaren sozializazioa eta emakumeen subjektibotasuna, ikasitako genero-kalteberatasuna, bizi-proiektua eta gorputza eta nahia berreskuratzea, besteak beste.
Guztira zortzi saio aurreikusi dituzte Aste Santuko oporretatik bueltan. Lehenik eta behin aurkezpen-saioak egingo dituzte eta taldeen helburuen eta metodologien inguruan berba egingo dute bertan. Parte-hartzaileen interes zehatzak jorratuko dira, eta ondorengo saioen edukia eta garapena zentratzeko gida gisa hartuko dira. Bi saio izango dira, emakumeekin eta haien artean lehen hurbilketa egiteko.
Apirila eta maiatza artean autokontzientziaren esparruan lan egingo da tratu onaren bidez eta generoaren sozializazioa, ikasitako generoaren kalteberatasuna, subjektibitate femeninoaren eraketa, bizitza-proiektua, nahiaren berreskurapena eta autozaintza bezalako gaiak landuz.
Une eta gune goxo bat sortu nahi dute, anonimotasuna bermatuz, “barruko guztia hustu eta bizi esperientzietatik ikasteko”
Maiatza eta ekaina artean itxiera-fasea izango du proiektuak eta helburua prozesuan azaleratzen joan den guztia balioan jartzea eta jasotzea izango da: “Orainaren eta etorkizunaren arteko begiradarekin eta gorputz-dinamikekin, ikaskuntzak integratzen eta talde-ezagutza biltzen lan egingo da, nork bere burua zaintzeko eta etorkizunean tratu ona emateko tresnak sortzeko”. Itxiera amaituta amaierako memoria egingo dute.
☉ Arrigorriaga
Irizpide feministak adosteko prozesua abiaraziko dute Arrigorriagan, jai ereduari buruzko hausnarketa errealista xede
Elkarlanerako gune honek hiru hitzordu antolatu ditu Lamiaenan: urriaren 14an, azaroaren 12an eta abenduaren 10ean
Zer ekitaldi antolatzen ditugu Arrigorriagan?, Nortzuk dira protagonistak?, Nola hartzen dira erabakiak?. Galdera horiei erantzuna emateko Arrigorriagako jaiak berdintasunean izeneko irizpide feministak adosteko prozesua abiaraziko du Udalak.
“Jaietan egiten diren ekintza guztiak (kirol arlokoak, erlijiosoak, gastronomikoak, musikalak…) gure kulturaren bereizgarri diren esanahi sinboliko handiko kultur adierazpenak dira”, azaldu dute udal ordezkariek. “Guzti honetaz hausnartzeko elkarlanerako gunea sortzea da helburua, jai ereduari buruzko hausnarketa errealista egiteko eta Madalenak feministak egiteko oinarrizko irizpide batzuk adosteko”.
Prozesu hau herritar orori zabalik dago eta hiru hitzordu izango ditu Lamiaenan: lehena urriaren 14an izango da eta gainontzekoak azaroaren 12an eta abenduaren 10ean. Saioak 18:00etatik 20:00ak arte antolatu dituzte eta izena ematea beharrezkoa da berdintasuna@arrigorriaga.eus helbidearen bidez edo 944 020 200 telefono zenbakira deituz.
☉ Arrigorriaga
Zabaldu dute Arrigorriagako Ausartak Mendi Lasterketan izena emateko epea
Aurtengo edizioa urtarrilaren 18an eta 19an antolatu dute eta Canicross ETL txakurkrosa, Txakurkros eta trail herrikoia, Mendi Martxa, Mendi maratoi erdia eta Hasiberri traila prestatu dituzte
Arrigorriagako Ausartak Mendi Lasterketa 2025eko urtarrilaren 18 eta 19an antolatu dute eta bertan izena emateko epea zabaldu dute SportManiacs.com webgunean.
Iaz bezala, kirol probak egun bitan antolatu dituzte, betiko probekin: Canicross ETL txakurkrosa, Txakurkros eta trail herrikoia, Mendi Martxa, Mendi maratoi erdia eta Hasiberri traila.
Egutegia | Ausartak Mendi Lasterketa 2025
Urtarrilak 18, larunbata
– 10:00 Canicross ETL txakurkrosa (6k 150+)
– 11:30 Txakurkros eta trail herrikoia (2,5km)
Urtarrilak 19, igandea
– 09:00 Mendi martxa (20k 1.000+)
– 10:30 Mendi maratoi erdia (21k 1.100+)
– 11:00 Hasiberri trail (9,5k 500+)
☉ Arrigorriaga
Arrigorriagarren argazkiek osatuko dituzte 2025eko udal egutegiaren irudiak
Gaia “Arrigorriagako auzoak, jendea eta txoko ezkutuak” izango da eta argazkiak bidaltzeko azken eguna urriaren 27a
Arrigorrigako Udalak argazki-lehiaketa bat antolatu du irudi onenekin 2025eko udal egutegia osatzeko. “Helburua da herritarrek Arrigorriagari eta bere jendeari buruz duten ikuspegi berezi eta bakarra jasotzen duen egutegia sortzea”, azaldu dute udal ordezkariek. “Arrigorriaga bere biztanleen begiradaren bidez ezagutu ahal izatea”.
Gaia “Arrigorriagako auzoak, jendea eta txoko ezkutuak” izango da eta argazkiak bidaltzeko azken eguna urriaren 27a. Epea itxita, epaimahai batek azala eta hilabete bakoitzeko argazkiak aukeratuko ditu.
Udaletik baldintza batzuk azpimarratu dituzte interesdunek parte hartu ahal izateko: bidali beharreko argazkiak formatu horizontalean egindakoak izan beharko dira eta Euskara Zerbitzura bidali beharreko e-postan hurrengo informazioa gehitu beharko dute parte-hartzaileek:
– Izen abizenak (eta goitizena, aukeran)
– Helbidea
– Telefono zenbakia
– Argazkia ateratako lekua eta data
☉ Arrigorriaga
Malmasingo Lagunak elkarteak hitzaldi zikloa ekarriko du Arrigorriagara Europako Jardunaldietan
‘Komunitate sareak ehuntzen: Abrisketatik Malmasinera’ izeneko hitzaldi zikloan Jagoba Hidalgok, Josu Narbartek, Maite Iris Garciak eta Teresa Campos arrigorriagarrek hartuko dute parte
Ondarearen Europako Jardunaldiak antolatu ditu berriro Bizkaiko Foru Aldundiak urrian zehar lurraldeko 71 udalerritan. Aurten, “Bide, sare eta loturen ondarea” izango da jardunaldien gaia, eta Hego Uribe eskualdean hamaika jarduera antolatu dituzte.
Hitzaldiak, bisita gidatuak eta ihes gelak izango dira hilabetean zehar Arrigorriagan, Etxebarrin, Galdakaon, Ugaon eta Zeberion.
Arrigorriagan ‘Komunitate sareak ehuntzen: Abrisketatik Malmasinera’ izeneko hitzaldi zikloa antolatu dute:
Malmasinen eta Abrisketako Done Perin egiten ari diren lanei buruzko azken datuak ezagutaraziko dituzte hitzaldi-ziklo baten bitartez. Bertan Jagoba Hidalgok, Josu Narbartek, Maite Iris Garciak eta Teresa Campos-Lopez arrigorriagarrek hartuko dute parte.
Hitzaldi zikloa Edurne Garitazelaia kultur etxean antolatu dituzte urriaren 23an, 24an, 29an eta 30ean eta ez da beharrezkoa izango izena ematea.
Teresa Campos // Geuria
Egitaraua | Komunitate sareak ehuntzen: Abrisketatik Malmasinera
Urriak 23, 19:00-20:30: Malmasinetik Burdin Aroari begirada bat. Jagoba Hidalgo
Urriak 24, 19:00-20:30: Erdi Aroko paisaiak eraikitzen Euskal Herrian. Josu Narbarte
Urriak 29, 19:00-20:30: Zer esaten digu osteoarkeologiak? Arbasoak, nola bizi eta nola hil ziren. Maite Iris Garcia
Urriak 30, 19:00-20:30: Abrisketa, zer berri? Nora goaz? AR.GU.I.A. Proiektua: ibilbide berriak. Teresa Campos-Lopez
Izena ematea: malmasingolagunak@gmail.com (ez da erreserbarik egin behar)
☉ Arrigorriaga
Ibilbide historiko-toponimikoak antolatu dituzte Arrigorriagan, larunbatean
Ordubete inguruko ibilbidearen helburua Arrigorriagaren historia eta toponimia ezagutaraztea da, Malmasingo Lagunak elkartearen eskutik
Malmasingo Lagunak elkarteak ibilbide historiko-toponimikoak antolatu dituzte Arrigorriagan datorren urriaren 5ean. Hitzordu bi prestatu dituzte, euskaraz eta erdaraz. Ibilbidea doakoa izango da eta edonork hartu ahalko du parte bertan.
Euskarazko txanda 12:00etan izango da Argala plazako udaletxeko arkupeetan (erdarazkoa 10:00etan izango da). Bertan Asier Ibarretxe eta Juanjo Agirre kideek hizlari lanak egingo dituzte Arrigorriagako kaleetatik ibilbidea egiten duten bitartean. Ibarretxek ‘Arrigorriagako Hiztegi Toponimikoa’ argitaratu zuen 2021ean eta Agirre ‘Toponimia de la anteiglesia de Arrigorriaga’ liburuaren egilea da.
“Ordubete inguruko ibilbidearen helburua Arrigorriagaren historia eta toponimia ezagutaraztea da”, azaldu du Asier Ibarretxek Malmasingo Lagunak elkartetik. “Denboraren poderioz desagertu edo aldatu diren izenak berreskuratu nahi ditugu ere”, gehitu du Asierrek.
Ibilbidea herri osotik egingo dute eta bidean zehar topatuko dituzten etxeak, baserriak, eraikin edo leku jakin batzuen inguruko azalpenak egingo dituzte.
Irizpide feministak adosteko prozesua abiaraziko dute Arrigorriagan, jai ereduari buruzko hausnarketa errealista xede
Urtzi Verak maila guztietako zaleentzako argazkilaritza monografikoa eskainiko du Ugaon
Haurren beharrizan berrietara egokitzen ari da Zaratamo Arkotxako Olagane parkea
Argazkiak / San Migeleko jaietako Playback lehiaketan ere txapeldun Los Gambas kuadrilla
Argazkiak / Los Gambas kuadrilla izan da txapeldun San Migeleko jaietako Olinpiadetan
