☉ Arrigorriaga
Arrigorriagako Jai Batzordeak askatasunez lan egin duela aldarrikatu du gaurko Osoko Bilkuran
Maite Ibarra herriko alkateak Jai Batzordeak urtero egiten duen lana nabarmendu du eta Vulkano orkestraren harira sortu den polemikak Madalenak baldintzatu ez ditzala eskatu die arrigorriagarrei
Jakina denez, azken egunetan zalaparta handia sortu du Vulkano orkestra Arrigorriagako jaietako kontzertuen egitarautik kendu izanak.
Gaur, uztaileko udalbatza egin dute Arrigorriagan eta gela jendez lepo egon da. Bertara hurbildu diren herritar guztien artean Arrigorriagako Jai Batzordeko kideak izan dira. Galde eskeen ostean, Maite Ibarra herriko alkateak hitza eman dio Ane Agirre Jai Batzordeko bozeramaileari.
“Arrigorriagako Jai Batzordea herritarrei irekia den erabaki organo autonomo eta burujabea da”, azpimarratu du Agirrek. “Bere jardunean erabakiak kontsentsuaren bidez hartzen dira, iritzi anitzak entzun eta adostasunak bilatuz”.
Madalenen egitarauari dagokionez, zera nabarmendu nahi izan du: “programatutako jarduera bakar batean ere ez dela inolako kontraturik hautsi, eta kontzertuen eta gainerakoen inguruko erabakiak Jai Batzordean hartu dira: ez dira Udalak inposatutako erabakiak izan”.
Jai Batzordea: “Erabaki guztiak jai batzordeak hartu ditu, ez dira Udalak inposatutakoak izan”
Horrela, Jai Batzordetik, herritar guztiei luzatu diete gonbidapena bertan parte hartzera: “ekarpenak egin eta udalerriko jaien antolakuntzan modu aktiboan inplikatzeko”.
Udalari dagokionez, Maite Ibarrak Jai Batzordeak urtero egiten duen lana nabarmendu du: “Gobernu taldearen izenean, Jai Batzordearen lanari gure babesa eta aitortza adierazi nahi diogu: lan boluntarioa, eskuzabala eta batzuetan konplexua egiten du, baina ezinbestekoa, aldi berean, jai bizia, anitza eta parte-hartzailea izan dezagun. Herritar guztiei luzatzen diegu gonbidapena jaiak antolatzen parte hartzera, Batzordearen parte izatera eta euren ideiak eta proposamenak ekartzera. Ateak irekita daude jai herrikoi eta inklusiboak eraikitzeko modurik onena parte hartze aktiboa delako”.
“Denok elkarrekin lan eginez bakarrik lortuko dugu nahi ditugun jaietara hurbiltzea: berdintasuneko jaiak, errespetuzkoak eta anitzak, pertsona guztiek bere burua eroso eta ordezkatua senti dezaten eta guztion artean eraikitzen ari garen bizikidetza eta berdintasun balioekin bat etor daitezen. Horregatik, egoera honek, Madalenak baldintzatu ez ditzala eskatzen dugu, jaiak elkarrekin partekatzeko, gozatzeko eta gure komunitateko loturak sendotzeko unea baita”.
Arrigorriagako alkateak hausnarketa batekin amaitu du bere ekarpena: “Egunotan zentsuraz hitz egin duzuenoi, titularretatik edo irakurketa azkarretatik harago begiratzea proposatzen dizuegu. Gure ustez, askoz eraikitzaileagoa izango litzateke eztabaida gure jaiak denon artean hobetzen jarraitzeko moduan zentratzea: izan ere, jaiak parte hartuz, batuz eta elkarrekin lan eginez eraikitzen dira; ez polemiken bidez edo kanpotik kritikak eginez”.
Joana Etxeberria Berdintasun zinegotziak, bere aldetik, ekaineko osoko bilkuran emandako datu bat zuzendu nahi izan zuen: “Vulkano orkestra egitarautik kanpo utzi izanaren erabakia ez zen aho batez onartu, baina gehiengo zabal batek babestu zuen proposamena”.
Oposizioaren arabera, “moral bikoitza”
Oposizioaren partetik, “hausnarketa egitera” gonbidatu ditu herritarrak Ainara Saez jeltzaleen bozeramaileak: “Kontu honekin ez dugu polemika gehiago sortu nahi eta gauzak egiten ditugun eraren inguruan hausnarketa egitea gustatuko litzaiguke”, zehaztu du EAJko bozeramaileak.
“Kasu konplexua da esku artean daukagun hau, eta gizarte moduan hausnarketa eskatzen du. Gure ustez, berdintasun-politikei lotutako erabakiak ezin dira zuriak edo beltzak izan; dakizuenez, mendeetan zehar hedatu den kultura patriarkal batetik gatoz. Beraz, ezin dugu pentsatu pertsonen pentsamoldea gauetik goizera alda daitekeenik. Horregatik, pedagogian jarri behar dugu arreta, gizabanakoak eta kolektiboak eraldatzeko, eta ez zentsuran, hori baita jendeak ulertu duena”.
“Guk horrela ulertu genuen, uste dut jendeak ere horrela ulertu duela: sare sozialak ikusi besterik ez dago. Ni ez naiz ezer asmatzen ari. Era berean, horrelako neurri batek herritarrengan eta musika-taldean izan dezakeen eragina neurtzen jakin behar dela uste dugu”.
Jeltzaleen arabera, erabakiak herritarren artean “polarizazioa” sortu du. “Eta, horren ondorioz, moral bikoitz antzeko bat sortu da: alde batetik, emakumeen itxurak, jarrerak eta janzkerak aurrez ez epaitzeko mezua zabaldu da jaien programan, eta bestetik Vulkano ez ekartzea erabaki duzue, “emakumeen hipersexualizazioa dela eta”.
☉ Arrigorriaga
Doako edoskitze tailerra antolatu du Arrigorriagan Altzoan Zaintza Sareak
Tailerra interesa duten emakume guztientzat antolatu dute otsailaren 12an, 17:00etan eta aurretiko esperientziarik ez dela behar nabarmendu dute Altzoanetik
Altzoan Zaintza Sareak, Ene Amatxorekin elkarlanean eta Arrigorriagako Udalaren zein Rural Kutxaren babesarekin doako edoskitze tailerra antolatu du Lamiaena emakumeen etxean.
Tailerra interesa duten emakume guztientzat antolatu dute otsailaren 12an, 17:00etan eta aurretiko esperientziarik ez dela behar nabarmendu dute Altzoanetik.
“Edoskitzea elikadura baino askoz gehiago da: lotura, informazioa, erabakiak eta laguntza ere bai”, iragarri dute Altzoan Zaintza Saretik. “Horregatik, edoskitze tailer honetara gonbidatzen zaitugu, interesa duten pertsona guztientzat irekia: haurdun egon edo ez, edoskitze prozesuan ari direnak, etorkizunean ama edo aita izan nahi dutenak, edo, besterik gabe, jakintza handitu eta lagundu nahi dutenak”.
Gune segurua, errespetuzkoa eta inklusiboa izango da, errealitate eta ibilbide ezberdinetatik hitz egiteko eta zalantzak partekatzeko. “Zure zain gaude!”.
Izena emateko Instagram bidez idatzi ahal dute interesdunek edota 660 202 438 telefono zenbakira Whatsappa bidali (Eneritz @eneamatxo)
☉ Arrigorriaga
Arrigorriagako Garrikoko kirolariek 21 domina eskuratu dituzte Euskadiko Teknika Txapelketan
Urrezko zortzi domina, zilarrezko beste zortzi eta brontzezko bost eskuratu dituzte joan den asteburuan, Bilbon
Joan den asteburuan Taekwondoko Euskadiko Teknika Txapelketa antolatu zuten Bilboko Miribilla pilotalekuan eta bertan izan ziren Arrigorriagako Garriko Taekwondoko kirolariak.
Guztira 21 domina eskuratu zituzten: urrezko zortzi, zilarrezko beste zortzi eta brontzezko bost.
Hauek izan ziren domina horiek eskuratu zituzten borrokalariak, kategoria bakoitzeko:
Emakumezkoen hirukotea, Bilbon // Garriko Taewkondo taldea
Kadeteak emakumezkoak
– Lur guerra urrea
Kadete mutilak
– Izei Intxaurraga: urrea
Kadeteak A emakumezkoak
– Aiara Alves: zilarra
– Leire Perea: brontzea
Kadeteak A mutilak
– Julen Fernandez: zilarra
– Iago Garcia: brontzea
Bikote kadetea
– Iago Lur: urrea
– Julen Aiara: zilarra
– Izei Leire: brontzea
Junior emakumezkoak
– Laura Ferreira: urrea
– Irati Amador: zilarra
Junior mutilak
– Iñigo Pereira: urrea
– Haritz Amador: zilarra
Senior emakumezkoak
– Itxaso Hernandez: urrea
– Irati Velada: zilarra
– Ariane Martinez: brontzea
– Izaskun Velez 6
– Elaia Garcia 7
– Andrea Barona 8
– Nahia Agirre 9
Hirukote emakumezkoak
– Itxaso, Ariane, Irati: urrea
– Nahia, Izaskun, Elaia: zilarra
Senior gizonezkoak
– Javier Rodriguez 4
Bikote Junior
– Laura Ferreira Iñigo Pereira: urrea
– Irati Amador Haritz Amador: brontzea
Bikote Senior
– Andrea Barona Javier Rodriguez: zilarra
☉ Arrigorriaga
Bideoa | 824 partaide eta txakurkros proba luzeagoa eskainiko du Arrigorriagako Ausartak Mendi Lasterketaren zazpigarren edizioak
Asteburu honetan 583 gizonek (% 70) eta 241 emakumek (% 30) hartuko dute parte urteroko “derrigorrezko” hitzorduan bilakatu den Ausartak Mendi Lasterketan
Ausartak Mendi Lasterketaren zazpigarren edizioa aurkeztu dute gaur, Arrigorriagako udaletxeko osoko bilkuren aretoan eta asteburu honetan parte-hartzaileek jantzita eroango duten kamiseta teknikoaren eredu baten ondoan.
Urtarrilaren 17an eta 18an antolatu dute zazpigarren edizioa eta 824 korrikalari izango ditu, 2025ean baino 100 gehiago. “Arrigorriaga kirolaren eta mendiaren hiriburu bihurtuko da berriro”, iragarri du pozik Maite Ibarra herriko alkateak. Igandean espero da jende gehien: bertan izena emateko epea iazko urriaren 1ean zabaldu ziren eta aste bitan saldu ziren denak. Larunbateko proban 173 pertsonak eman dute izena (116 gizon eta 57 emakume). Igandekoan 654 parte-hartzaile egongo dira (464 gizon eta 190 emakume). Laburbilduz, 583 gizonek (% 70) eta 241 emakumek (% 30) hartuko dute parte asteburu honetako probetan.
“Kirol eskaintza zabala” eskainiko duen asteburua izango dela aurreikusi du Ibarrak, edozein adineko eta prestaketa maila duten pertsonei zuzendua, hain zuzen.
Mikel Fuentes Ausartak Mendi Lasterketako kideak xehetasun guztiak eskaini diezkie komunikabideei: “Urtez urte, Ausartak Mendi Lasterketak hazkunde nabarmena izan du”, azaldu du elkarteko kideak. “Ez bakarrik parte-hartzaileen kopuruari dagokionez; baita antolakuntzaren kalitateari, ingurue naturalaren konpromisoari eta segurtasunaren aldeko apustuari dagokionez ere”.
Mikel Fuentes, gaurko prentsaurrekoan // Geuria
Makina bat berritasun
Aurtengo edizioa berrikuntzez josita dator. Lehena, txakurkros ibilbidearen aldaketa da: 5,5 kilometro eta 120 metroko desnibel positiboa izatetik 12,2 kilometro eta 440 metroko desnibel positibokoa izatera igaroko da, parte-hartzaileen iradokizunei kasu eginez.
Bigarrena, Txakurkros lasterketaren itzulera Euskadiko Txakurkros Ligara (ETL).
Hirugarrena Mendikosolo Trail Pilotoa da: “Harrera ona izatekotan, azken proba hau iraunkorra bihurtuko dugu”, azpimarratu du Fuentesek.
Laugarren berritasuna segurtasuna indartzea izango da. Bexen Cardiorekin egindako elkarlanaren ondorioz, desfibriladore bi ipiniko dituzte Arrigorriagako proban.
Bosgarrenez, lasterketaren sarrera ofiziala etiketa berdearekin egingo dute aurten. Honek esan nahi du ingurumenarekin konpromisoa berretsiko duela asteburuko probak.
Solidaritatea, ardatz
Lasterketaren ekimen solidarioa ahaztu behar ez den beste kontu bat da: aurten ere, jasoko den diruaren zati bat Ane Sindrome Red ekimenari bideratuko diote Ausartakekoek: izen emate bakoitzak euro biko prezioa izango du. “Horrek egiten du Ausartak-en proba hain berezia parte-hartzaileen artean”, azpimarratu du Maitek eta eskerrak eman dizkio Ausartak Ludiko Kirol Elkarteak egindako lanari.
Egitaraua | Ausartak Mendi Lasterketa 2026
Urtarrilak 17, larunbata
10:00 Ausartak Canitrail
10:30 Mendikosoko Trail (proba pilotoa)
Urtarrilak 18, igandea
10:30 Mendi Maratoi Erdia
11:00 Hasiberri Trail
11:10 Martxa Laburra
☉ Arrigorriaga
Arrigorriagako Amalur liburudendak aitortza berezia jaso du Merkataritza Jaialdian euskararen alde egindako lanagatik
Gainera, udalerriko Kreta Loreak saltokia finalista izan da Bizkaiko Erakusleiho Lehiaketan
Bizkaidendak elkarteak Merkataritza Jaialdia antolatu du duela egun batzuk eta Arrigorriagako Amalur liburudendak aipamen berezia jaso du euskararen alde egindako lan eta konpromisoagatik. Amalurrek 1995ean zabaldu zituen ateak lehen aldiz eta gaur egun arte euskarazko liburu eta jolas ugari dituzte adin guztietako haurrentzat. Iker Albizua Uriondo da liburutegiaren jabea eta bertako produktu guztiak ezagutzen ditu, bezero bakoitzari gomendioak emanez.
Bestalde, Kreta Loreak saltokia finalista izan da Bizkaiko Erakusleiho Lehiaketan.
Maite Ibarra Arrigorriagako alkatea eta Gaizka Ibarretxe Ekonomia zinegotzia Bizkaidendak elkarteak antolatutako ekitaldian izan ziren: “Harro gaudezuen lanaz eta herriari ematen diozuen biziagatik”, azaldu zuten.
☉ Arrigorriaga
Argazkiak | Errege Magoen Kabalgatak eta epifaniak jendez bete du Arrigorriagako plaza
Arrigorriagarrek harrera beroa egin diete Errege Magoei udaletxe aurreko plazan, 3ºtan
Iritsi dira Hiru Errege Magoak Arrigorriagara! Beste urte batez, Arrigorriagako udaletxeko plaza jendez beterik egon da 19:00etan eta hotzak ez du ikuskizuna geldiarazi.
Aurtengo 51. edizioan 150 pertsona baino gehiagok hartu dute parte eta haurrek Meltxor, Gaspar eta Baltasar herrian ikusteko aukera izan dute. Urtero lez, udaletxeko plaza antzinako herri batean bihurtu da,
19:00ak aldera 3ºC erregistratu dituzte termometroek, azken urteetako tenperatura hotzenak.
Bideoa | Abeltzainak eta mendizaleak, oreka zailean Upon gora
Urtarrilaren 19an zabalduko ditu ateak Ugaoko kiroldegi eraberrituak
Doako edoskitze tailerra antolatu du Arrigorriagan Altzoan Zaintza Sareak
Argazkiak | Errege Magoek ilusioa eta gozokiak banatu dituzte Galdakaoko kabalgatan
Argazkiak | Errege Magoen Kabalgatak eta epifaniak jendez bete du Arrigorriagako plaza
Argazkiak | Errege Magoek ehunka gozoki eta konfeti banatu dituzte Basauriko kabalgatan
Bideoa | Abeltzainak eta mendizaleak, oreka zailean Upon gora
Eder Lozano Heras: “Gure helburua da umeek 112ra deitzen ikastea eta larrialdi-zerbitzuak heldu aurretik zer egin behar duten jakitea”
