☉ Arrigorriaga
Erreportajea | Alfonbra gorria Javi Chuecari Lonbo Aretoan
Javi Chueca aktore arrigorriagarra “El Poder del Silencio” filmaren protagonistetako bat da. Aitzakia horrekin, bere sorterrira ekarri zuten aurrestrenaldia, eta Lonbo Aretoa lepo bete zen filma ikusteko eta ondoren egin zuten mahai-inguruaz gozatzeko
“El Poder del silencio” Saul Perez zuzendari espainiarraren aurreneko film luzea da. Pederastia, ustelkeria eta komunikabideen jarduna ardatz dituen thrillera da, eta azaroaren 7an estreinatuko dute estatu mailako 60 zinematan, ekoizpen independiente batek nekez gainditzen duen langa, dena esate aldera.
Filmak irratsaio bat du ardatz, hasi eta buka garatuko den elkarrizketa eskandalagarria baita “El poder del silencio”ren azala eta mamia: Nuria Santos aktorea urkia da, Maira Damas kazetariaren paperean, eta Javi Chueca arrigorriagarra, aldiz, ifrentzua, Santiago Rueda funtzionario ustelaren azalean.
Rueda biharamunean epaitu behar dute, eta epaiketaren atarian estatu mailako handi mandi talde bati eragiten dion (tartean elkarrizketa egingo dion irrati katearen buruari) pederastia eta ustelkeria sare bat azaleratzea erabakiko du, horretarako irratsaioa bera eta sare sozialetan zabalduko duen bideo sorta erabiliz. Bere jarreraren atzean damua, interesa edo beste ezer ezkutatzen den elkarrizketak aurrera egin ahala jakingo du ikusleak.
Kazetariak berak ere zalantza egingo du filmaren hainbat unetan, aurrera jarraitu ala ez, bai estudio barruan eta bai kanpoan giroa gaiztotuko duten gertakariak kateatuko baitira: mehatxuak, azpijokoak, hilketak… Filmaren hirugarren hanka Jonatan Fernandez Txakartegi aktore bizkaitarrak osatzen du: irratsaioko teknikaria da, eta minutuek aurrera egin ahala pisu handia hartuko du bere pertsonaiak.
Gidoia ardatz
Filma zuzentzeaz harago, gidoiaren ardura ere Saul Perezena da. Emanaldiaren atarian GEURIAri azaldu bezala, buruan zeukan proiektuak “leherketak, jazarpenak eta tiroketak” zituen ardatz, baina gidoia filmagarria izan zedin hainbat egokitzapen egin behar izan zituen, “azken finean, 40.000 euro genituen proiektua aurrera eraman ahal izateko”. Zinema aretoetara helduko den luzemetraiak gidoia, eta batez ere hiru aktoreen lana, bereziki Santosena eta Chuecarena, du ardatz.
Zentzu horretan, eta agian hori da proiektu honen indargune nagusia, filmak irauten duen ordu bat eta erdia ez zaio luze egingo ikusleari: irrati estudio horretan bizi den giro itogarria ondo baino hobeto islatzen dute bi aktore protagonistek, euren ahots sarkorrek lagunduta. Perezek berak filmaren osteko solasaldian aipatu zuen Chueca eta Santos aukeratzerako orduan kontutan hartu zituen aldagaietako bat hori izan zela: “Irratsaio bat izanda, argi neukan ahotsari berebiziko garrantzia eman behar geniola. Zentzu horretan, bete-betean asmatu genuela argi daukat. Lan ikusgarria egin dute, filmak momentu bakoitzean eskatzen zuen ñabardura emanez”.
Lehen aldia
Aktoreen lana goraipatzerako orduan, Perez ez zen ahotsera mugatu, eta suziri batekin alderatu zituen Chueca eta Santos,”eztanda egin dute,nik orbitan jarri ditut, eta ziur naiz hemendik aurrera oso goian egingo dutela hegan”.
Lantaldeko kideak, filmaren osteko solasaldian // Bruno Itxaso Caldevilla
Bai batarentzat zein bestearentzat euren ibilbideko lehen paper protagonista izan da “El poder del silencio”n jokatu dutena. Chuecaren arabera, “erronka handia” izan da Santiago Ruedaren azalean sartzea: “bat-batean 80 orrialdeko gidoi pisutsua jartzen dizute eskuen artean, eta orduan konturatzen zara zure ardura dela hori guztia buruz ikasi bakarrik ez, baizik eta zure egitea ere”.
Bere pertsonaiari buruz galdetuta, ohi duen zintzotasunez erantzun zuen Chuecak: “Rueda putaseme galanta da”, zehaztu zuen, baina “ez Teleberrietan eta ikusten ditugunen oso ezberdina”, eta “esaten duenagatik baino isiltzen duenagatik balio” duten horietakoa, nahiz eta isiltzen duen hori pederastia sare erraldoi bat izan.
Txanponaren beste aldean Maira dago, “egiaren eta kazetaritza zintzoaren alde lan egiten duen profesionala”, Nuria Santos aktorearen hitzetan. “Desinformazioaren garaian bizi gara, eta bera bezalako kazetariak behar-beharrezkoak dira kontrabotere moduan, edo behintzat gezurra guztiz gailendu ez dadin” borobildu du. Asmo horrekin aurre egingo dio Ruedari film osoan zehar, argi izan gabe funtzionari ustela biktima edo borreroa den, edo biak aldi berean.
Bi protagonisten arteko ahari talkak betetzen du pantaila ia luzemetrai osoan zehar, “oso bitxia izan dena”, zuzendariaren arabera: “Javi txantxazale hutsa da, alaia eta filmaketan giro ona sortzen duten horietakoa. Berak eta Ruedak ez dute ezertan antzik, eta ikusgarria zen grabaketa hasten zenean bere baitan ematen zen eraldaketa bertatik bertara bizitzea”.
Eraldaketa horrek eman zuen zeresana Lonbo Aretoan batu ziren ikusleen artean ere. Irteeran batek baino gehiagok onartu zuen filmean murgiltzea kostatu egin zitzaiola hasierako minutuetan, ohikoa duen umoretik eta komediatik guztiz aldendu baita Chueca azken lan honetan.
“Bizipen zeharo ezberdina izan da, arrisku puntu batekin, zure erosotasun eremutik atera behar zarelako, baina baita oso aberasgarria ere” adierazi zuen aktore arrigorriagarrak aurrestreinaldiaren osteko solasaldian. “Egia esan, pertsonaia prestatzea oso erraza izan da, telebista piztu, irratia entzun eta egunkaria irakurri besterik ez dago. Ustelkeria, mota guztietako gehiegikeriak, boteretsuen zigorgabetasuna… gaurkotasun handiko gaiak dira, gure egunoroko ogia, protagonista Rueda edo Abalos dela ere”.
Boterearen eta boteretsuen alde ilun eta ankerrena ondo baino hobeto ezagutzen duten horietakoa da Santiago Rueda, eta urteetan zehar pilatu duen informazio eta zabor guztia bere alde baliatzen saiatuko da, helburu bakar batekin: onik ateratzea. “Damututa dagoen edo ez… batek daki. Batzuetan badirudi baietz, eta bestetan kontrakoa ematen du. Kontraesan eta ñabardura horiek aberastasuna ematen diote Ruedari, eta aktore batentzat opari bat da hainbeste geruza dituen norbaiten azalean sartzea” nabarmendu zuen Chuecak.
Azkar eta ondo
Aho bizarrik gabe aritu ziren “El poder del Silencio”ko lan taldeko kideak solasaldian, eta halako proiektu bat aurrera eramateak sorrarazi dizkien arazoak, kezkak eta buruhausteak azaldu zituzten, umoretik baina aho bizarrik gabe. Saul Perez gidoilari eta zuzendariak hartu zuen hitza lehenik eta behin: “Proiektu honek pandemian zehar hasi zuen bere bidea. Egia esan, oso aspertuta nengoen, eta lanari ekin nion. Aurretik banuen gidoia pentsatuta eta erdi idaztear, eta 20.000 euro aurreztuta. Diru horrekin film bat ekoiztea ia ezinezkoa da, bataz beste bi miliotik gorako aurrekontua izaten baitu zinema aretoetara heltzen den proiektu batek. Horrela ikusita, zorakeria zirudien, ameskeria hutsa, baina aurrera jotzea erabaki genuen”. Filmak ez du diru laguntzarik jaso, eta horrek zailtasun ekonomikoak areagotu dituen arren, “askatasun erabatekoa eman digu, gauzak nahi ditugun eran egin eta antolatzeko”.
Film honen atzean dagoen barne bulkada ere argi eta garbi azaldu zuen Perezek: “isiltasun handia dago pederastiaren inguruan, ez dakit oso ondo zergatik. Hau da, ulertzen dut egiten dutenek ezkutatzea, baina tira, gizarte moduan gure ardura da haien kontra egitea, aurre egitea, isiltasun hori pitzatzea”.
Alfonbra azpian ezkutatzen den “kaka” guzti hori haizatzeko asmo horrekin lanean hasi ziren 2023ko udan. Aurrekontu eskasiak berarekin dakarren denbora eta lokalizazio faltari “irudimenez” eta “aktoreen prestaketa lan handiarekin” aurre egin zioten. Are gehiago, “behin bakarrik irakurri genuen gidoia denon artean, ikusi genuelako buruz zekitela, hasi eta buka, hitzez hitz. Lehen egunetik filmatzeko prest zeuden”.
Filmaketaren oroitzapen bikaina gordetzen dute hiru aktoreek, baina hainbat unetan zalantza handiak izan zituztela ere onartu zuen Nuria Santosek: “Egia esan, kosta egiten zitzaidan ulertzea zergatik Mairak ez duen hasieratik pikutara bidaltzen Santiago Rueda. Zentzu horretan, asko eskertu nuen Saulek nirekin egindako lana, nire pertsonaia hobeto ezagutzeko behar nituen heldulekuak eman zizkidalako”. Ia bi urte hauen errepasoa borobiltzerako orduan, eta Jonatan Fernandezek “negar ez egiteko” promesa egin arren, hunkituta agertu ziren aktoreak, “esperientzia ahaztezina” izan delako eurentzat, “arrastoa uzten duen horietakoa”.
Soinu banda Arrigorriagatik
Arrigorriagak protagonismo handia izan zuen “El poder del silencio” filmaren aurrestreinaldian, ez bakarrik Javi Chuecaren parte hartzeagatik edo Lonbo Aretoa lepo bete zelako. Soinu bandaren zati bat ere, bukaerako abestia, hain zuzen ere, Boogie Riders taldearen “Who´s goona save your soul”kanta ederra da. Bluesrockean kokatzen dute euren burua arrigorriagatarrek, eta abesti honek ere kutsu hori bera dauka. Taldeko kideak eszenatokira igo ziren argiak piztearekin batera, lan taldearen eskutik, eta zuzendariak egindako “lan bikaina” eskertu zien. Herritarren txalo zaparrada jaso zuten trukean.
Alfonbra gorria jarri zion Arrigorriagak “El poder del silencio” filmari. Berau iragartzeko trailer eta iragarkietan zera aipatu izan dute etengabe: “Hau da zuk ikustea nahi ez duten filma”. Javi Chuecaren sorterrian, baina, asko dira filma ikusteko eta gozatzeko irrikitan daudenak, eta datorren azaroaren 7an zinema aretoetara hurbilduko direnak, Santiago Ruedak ezkutzatzen dituen sekretu guztiak ezagutu nahian.
☉ Arrigorriaga
‘Emakumeok plazara’ ekitaldiak eta erromeriak jendez bete du Arrigorriagako udaletxeko plaza, M8an
‘Emakumeok plazara!’ izeneko kontzentrazioa eta Berdintasun Kontseiluaren adierazpenaren irakurketa egin zuten, eta jarraian erromeria
Joan den Martxoaren 8an elkarretaratzea egin zuten Arrigorriagako udaletxearen plazan. Bertan ‘Emakumeok plazara!’ izeneko kontzentrazioa eta Berdintasun Kontseiluaren adierazpenaren irakurketa egin zuten.
Jarraian ‘Emakumeon eskubideen alde dantzan’ erromeria egin zuten leku berean, Aritz Berri dantza taldearen eskutik.
Hurrengo egunetan jarduera gehiago antolatu dituzte herrian.
Egitaraua | Emakumeen Nazioarteko Eguna Arrigorriagan 2026
Martxoak 11, asteazkena
17:00 Umeentzako ipuin kontalaria (Virginia Imaz): ‘Bigarren printzesa’, Lamiaena
Euskara eta Berdintasun Saila
Martxoak 21, larunbata
19:30 Antzerkia: ‘R&J’ La dramática errante, Lonbo aretoa
Kultura Saila
☉ Arrigorriaga
Arrigorriagako Udalak eta Foru Aldundiak Abusuko babestutako 50 etxebizitzen arazoari irtenbidea eman gura diote, elkarlanean
David Cidre zinegotziaren arabera, helburua da lursailaren jabetza erabat udalarena izatea, Eusko Jaurlaritzarekiko kudeaketak arintzeko
Martxoaren hasieran GEURIAn iragarri lez, joan den astean Maite Ibarra Arrigorriagako alkatea eta David Cidre Auzoetako eta Etxebizitza zinegotzia Bizkaiko Foru Aldundiko Elixabete Etxanobe Ahaldun Nagusiarekin batzartu ziren helburu zehatz batekin: Abusuko babestutako 50 etxebizitza berrien proiektuan aurrera egitea.
Bilera hartan “desberdintasun teknikoak gainditzeko borondatea berretsi dela” azaldu dute Arrigorriagako Udaletik. Izan ere, lurraren jabetzaren auzia konpontzeko hainbat aukera aztertu ziren.
Joan den urtarrileko Osoko Bilkuran Arrigorriagako Udal Gobernua Abusun babestutako 50 etxebizitza eraikitzeko proiektua jasaten ari den atzerapenaren inguruan aritu zen: Arrigorriagak 2024an onartu zuen HAPOan etxebitza babestua eraikitzeko hainbat lursail lagatzen zizkion Eusko Jaurlaritzari, horien artean Abusukoa. Egitasmo honek, baina, urtebete baino gehiago darama geldirik.
David Cidre zinegotziak Osoko Bilkuran zehaztu zuenaren arabera, “lurraren jabetzea osoa ez da udalarena, erdibana dauka Aldundiarekin. Lurzorua lagatzeko Aldundiak etxebizitza kopuru bat eskatzen du trukean, guk bete ezin duguna. Eusko Jaurlaritzak, bere aldetik, eta Denis Itxaso buru duenetik, lursaila doan ematea eskatzen du”.
Joan den asteko bileran, Udalak gaur egun Aldundiarena den zatiaren doako lagapenaren aldeko lehentasuna helarazi zuen, “baina foru erakundeak ez zuen aukera hori onartu. Hala ere, Aldundiak prestasuna agertu du proiektua bideragarri egingo duen akordio batera iristeko baldintzak malgutzea ahalbidetuko duten formulak aztertzeko”, gehitu dute Arrigorriagako udal ordezkariek. “Fase honetan oraindik ez dago akordio itxi bat mekanismo zehatzari buruz,
ezta inplikatutako lursailen inguruan ere. Bi aldeak bat etorri dira lanean jarraitzeko, bai
teknikoki bai politikoki, aurrera egitea ahalbidetuko duten alternatibak arakatzeko”.
Blokeotik irteten
Bilera positibotzat jo arren, Udaletik azaldu dute lana dagoela gogorarazi dute. Eta datorren fasean bi erakundeetako zerbitzu teknikoek bi aldeentzat asebetegarria izango den akordio bat gauzatzea ahalbidetuko duten aukerak aztertuko dituztela iragarri dute.
“Urrats garrantzitsua eman dugu, borondate politikoa badagoela ikusi baitugu”, izan dira Maite Ibarraren berbak. “Orain, lanean jarraitzea dagokigu lurraren titulartasuna ebatziko duen formula bat zehazteko eta gure gazteek eta familiek behar dituzten 50 etxebizitzak lehenbailehen bideratzeko”.
Maite Ibarra: “Lanean jarraitzea dagokigu gazteek eta familiek behar dituzten 50 etxebizitzak lehenbailehen bideratzeko”
“Topaketa honek lan-esparru bat irekitzen du akordio baterantz joateko. Helburua da jabetza erabat udalarena izatea, Eusko Jaurlaritzarekiko kudeaketak arintzeko. Oraindik bidea badago ere, bide hori elkarrekin egiteko konpromisoa dugu”, azaldu du Cidrek.
☉ Arrigorriaga
Arrigorriagako Padura Futbol Taldea: “Guk dakigula ez dago gure jokalarien kontrako salaketarik”
Futbol klubetik adierazi dute Urruma Talde Feministako eta Bidaure elkarteko komunikatuak “frogarik eta egiaztatu gabeko informazioa” duela
Padura klubeko zuzendaritza batzordeak jakinarazpen ofiziala egin du mutil adingabeko batzuek emakumezkoen taldeko jokalari adingabeko bati egindako sexu eraso baten haritik. Guztira bost mutil adingabe salatu dituzte gertaera honen haritik. Ertzaintzak ikerketa abiarazi zuen eta kasua Adingabeen Fiskaltzara bideratu du.
Berriak bazterrak astindu ditu eta Arrigorriagako Urruma Talde Feminista eta Bidaure elkarteak egindako komunikatuaz gainera Udalak ere babesa eskaini die erasotutako neskari zein bere familiari. Gainera, Udaletik “beharrezko neurriak hartzea” eskatu diote Padura futbol klubari.
Erantzun modura, Arrigorriagako futbol taldeak jakinarazpen ofiziala argitaratu du martxoaren 6an, ostirala, 21:00ak aldera.
“Lehenik eta behin, klubak gogor gaitzesten du edozein eraso mota, bai eta egoera hori eragin duen bideoaren hedapen arduragabea ere”, izan dira lehen hitzak, eta material horren zabalpenak, bereziki adingabeei eragiten dienean, “ekintza guztiz arduragabea” dela azaldu dute.
“Era berean, Padura klubak irmo gaitzesten ditu Bidaure elkarteak eta Urruma elkarte feministak zabaldu dituzten funtsik gabeko akusazioak”, jarraitu du iragarpenak. “Informazio faltsua edo kontrastatu gabea zabaltzeak errealitatea desitxuratzeaz gain, kalte larria eragiten die adingabeei, haien familiei eta kirol-komunitate osoari”, gehitu dute eta Bidaurek zein Urrumak egin duten komunikatuak “frogarik eta egiaztatu gabeko informazioa” duela seinaleztatu dute.
Bestalde, hainbat kontu argitu nahi izan dituzte Arrigorriagako futbol taldetik: “Bideoa ez zuen Padura klubeko jokalarik zabaldu; Ez dago jasota gure instalazioetan inolako sexu-erasorik -jazarpenik edo indarkeriarik- gertatu denik; Klubak gaur egun ez du gure jokalarien aurkako salaketarik egiaztatu izanaren berririk; Aipatutako gertakariak ez ziren klubaren jardueren esparruan gertatu, ezta haren ikuskaritzapean ere”.
Azarotik, jakitun
Klubeko ordezkarien arabera, iazko azaroan izan zuten jokalari bat inplikatzen zuen bideo baten berri: “Egoera horren aurrean berehala aktibatu ziren babeserako barne-protokoloak eta prebentzio neurri zehatzak hartu ziren ingurune zehatz bat bermatzeko”. Neurri horien artean entrenamendu-ordutegien aldaketa partziala ageri da, Bidaure elkarteak lehen momentutik gaitzetsi duena.
Futbol taldetik ere adierazi dute gertaeren berri izan zenetik klubak “familiarekiko elkarrizketa eta lankidetza bide guztiak” ireki dituela, “etengabe komunikatuz eta informazio zehatza eskatuz, lege esparruaren barruan eta adingabeen eskubideak errespetatuz”.
Komunikatuaren azken lerroetan, klubetik dagozkion lege-akzioak abiarazteko eskubidea beretzat gordetzen dituztela adierazi dute, “informazio faltsua zabaltzen duten edo gertaera horien erabilera desegokia egin duten pertsona fisiko edo juridiko guztien aurka”.
☉ Arrigorriaga
Arrigorriagako Udalak “hainbat gaztek” eduki sexualeko bideo bat baimenik gabe zabaldu izana deitoratu du
Udalak neskari eta bere familiari babesa eskaini die eta Padura Futbol Taldeari beharrezko neurriak hartzeko eskatu dio
Arrigorriagako Udalak “kezka eta erabateko gaitzespena” adierazi ditu ustez “hainbat gaztek” eduki sexualeko bideo bat baimenik gabe zabaltzearekin eta horren ondoren biktimak jasan duen jazarpenarekin lotuta.
“Halako jokabideek pertsonen intimitatea, duintasuna eta eskubideak urratzen dituzte, eta
indarkeria matxistaren adierazpen gisa ulertu behar dira. Gainera, horrelako ekintzek
ondorio larriak izan ditzakete biktimentzat, batez ere adingabeak tartean daudenean”, adierazi dute udal ordezkariek.
Guztira bost mutil adingabe salatu dituzte. Ertzaintzak ikerketa abiarazi zuen eta kasua Adingabeen Fiskaltzara bideratu du.
“Arrigorriagako Udalak argi adierazi nahi du: ez dugu onartzen indarkeria matxistaren
adierazpenik, ez espazio publikoan, ez pribatuan, ezta ingurune digitalean edo kirolesparruan ere”, diote.
“Beharrezko neurriak hartzea”
Udal arduradunek adierazi dutenez, gertaeren berri izan duten momentutik bitartekaritza-lanak egin dituzte neskaren familiarekin eta Padura Futbol Taldearekin.
“Bilera horien helburua izan da egoera hau gaitzestea, familiari babesa eskaintzea eta futbol taldeari beharrezko neurriak hartzeko eskatu zaio”, diote.
Kirol eta Berdintasun arloak elkarlanean daudela jakinarazi dute Udaletik, eta elkarrekin “hainbat ekimen” ari direla sustatzen esan dute: “Emakumeen kirolari benetako babesa eta ikusgarritasuna emateko ekintzak, aholkularitza juridiko zein teknikoa eta emakume taldeentzako autodefentsa feminista tailerrak, besteak beste”.
“Ildo horretan lanean jarraituko dugu, kirolean ere berdintasunezko jarrerak sustatuz eta indarkeria matxistaren aurkako politikak bultzatuz”, gaineratu dute.
“Udal honek, bere eskumenen esparruan eta indarrean dagoen legeria aplikatuz, gero eta
bidezkoagoa, berdinzaleagoa eta indarkeriarik gabeko gizartea eraikitzen laguntzeko
ekintzak sustatzen jarraitzeko erantzukizuna hartzen du bere gain”, diote.
Gaitzespena eta babesa
Emakumeen aurkako edozein indarkeria-adierazpen gaitzesten duela adierazi dute Arrigorriagako Udaletik: “Ez dugu onartu behar, ez dugu isilik geratu behar, eta gure babesa adierazi behar diegu indarkeria jasan dutenei edo jasaten ari direnei. Azken batean, banakako zein kolektiboki erantzukizuna hartu behar dugu eraso matxisten aurrean”.
“Udalak, halaber, babesa eta elkartasuna adierazi nahi die biktima eta familiari, eta gogorarazi nahi du biktimaren errua edo erantzukizuna bilatzea indarkeria berriro errepikatzea dela. Horregatik, herritar guztiei dei egiten zaie arduraz jokatzeko eta zurrumurruak ez elikatzeko, bereziki, biktima izan daitezkeenekin zerikusia duten informazioari dagokionez”, adierazi dute.
Indarkeria matxista gizarte osoari eragiten dion egiturazko arazoa dela esan dute udal ordezkariek.
☉ Arrigorriaga
Ertzaintzak Adingabeen Fiskaltzara bideratu du Arrigorriagako sexu-erasoaren kasua
Bost adingabe salatu dituzte Arrigorriagan, beste adingabe baten aurka sexu-jazarpena leporatuta
Sexu-eraso bat salatu dute Urruma Arrigorriagako Talde Feministak eta Bidaure genero indarkeriaren biktima diren haurrak babesteko elkarteak, atzo GEURIAn publikatu bezala.
Padura Futbol Klubeko mutil adingabe batzuek emakumezkoen taldeko jokalari adingabe baten aurka egin dute sexu-jazarpena: “Jokalari horiek adingabea jazarri dute entrenamendu saioetan eta horrek adingabeak jasaten duen egoera larriagotu baino ez du egin”, salatu dute bi elkarteek, eta “irmotasun falta” leporatu diote kirol erakundeari.
Guztira bost mutil adingabe salatu dituzte. Ertzaintzak ikerketa abiarazi zuen eta kasua Adingabeen Fiskaltzara bideratu du.
Padura Kirol Klubak otsailean iragarri zuen genero-berdintasun eta indarkeria matxistaren aurkako protokoloa sortuko duela, baina Urrumak eta Bidaure elkarteek salatu dute “ez dutela eman kasu hauetan espero zitekeen erantzunik, indarkeria matxistaren aurkako protokoloetan eta sustatu nahi omen dituen printzipioetan oinarrituta”.
“Eskura dauden neurri guztiak ez aktibatzea eta biktimari bizkarra ematea onartezina eta umiliagarria da emakume guztiontzat, eta gizartearentzat, oro har. Gainera, Klubaren ekintzek eredu izan beharko lukete Kluba osatzen duten pertsona guztientzat, gehienak adin txikikoak izanik”, adierazi zuten Bidauretik, eta haurrak babestea eta indarkeria matxista desagerraraztea ezin direla irudi-kanpainak izan nabarmendu dute: “Erantzukizun etikoa, soziala eta legezkoa dira”.
Usansoloko EAJk etxebizitza eskuratzeko “plan integral bat” egitea proposatuko du osoko bilkuran
Bideoa | Silvia Gomez, Ekain Perrinoren ama: “Epaiketan bizi izan duguna oso gogorra izan da”
Argazkiak | Ekain Perrino herrikideari babesa adierazteko elkarretaratzea egin dute Basaurin
Argazkiak | Ekain Perrino herrikideari babesa adierazteko elkarretaratzea egin dute Basaurin
Argazkiak | Ugaotarrek “Egunak eta gauak gureak dira” oihukatuz hartu dituzte herriko kaleak, M8an
Argazkiak | Borroka feministaren aldeko murala eraiki dute piezaz pieza gaur Basaurin
Bideoa | Silvia Gomez, Ekain Perrinoren ama: “Epaiketan bizi izan duguna oso gogorra izan da”
Bideoa | Martxoaren 8a “espazioak hartzeko eguna” ere badela azaldu dute Ugaoko Emahots Talde Feministatik
