Arrigorriagako gazteek logo lehiaketa ipini dute martxan kamisetak sortzeko.

Bertan parte hartu nahi duten interesdunek ‘Arrigo’ edo ‘Arrigorriaga’ hitza daukan diseinua bidali beharko dute arrigorriagakogazteak@gmail.com helbide elektronikora.

Fondorik gabeko logotipoa PNG edo JPG formatuan bidali beharko dute parte-hartzaileek otsailaren 23a baino lehen: “Lehiaketan parte hartuko dutenak herrikoak izan behar dira eta irabazleak 50 euroko saria eta bere logoa inprimatua duen kamiseta jasoko du”, azaldu dute antolaketa taldetik.

Arrigorriagako Udalak Zainduz programa abiaraziko du beste urte batez herrian. Ekimen honek tailerrak eta prestakuntzak, zaintzaileentzako laguntza psikologikoko taldeak edo aholkularitza-zerbitzuak eskaintzen dizkie menpekotasuna edota ezgaitasunen bat duten familia-inguruneei.

Udaleko datuen arabera, 2024an 91 herritarrek hartu zuten parte (75 emakume eta 16 gizonek), 2023an baino zortzi pertsona gehiago. 2025ari begira, eta berritasunei dagokienez programa ostegunetan eskainiko dute, eta lehendik zeuden zerbitzuak mantenduko dituztela azaldu dute udal ordezkariek.

“Gainera, programa indartzea erabaki du, laguntza psikologikoko banakako saioak ugarituz; gainera, laguntza-taldeen zerbitzua asterokoa izango da”, gehitu dute.

Horrez gain, aurreko urtean bezala, tailerretako bat Abusu auzoan eskainiko dute.

Hiru ardatz

Programak hiru ardatz ditu: mendekotasuna duten pertsonen eta, oro har, herritarren autonomia pertsonala sustatzea; zaintzaileei prestakuntza eta informazioa eskaintzea; eta zaintzaileen ongizate emozionala eta psikologikoa bultzatzea.

Gauzak horrela, Zainduz-ek bost zerbitzu mota eskaintzen ditu: aholkularitza, prestakuntza, laguntza taldea, bnakako saioak eta adinekoentzako tailerrak.

“Behar gehien dituztenei eskaintzen zaizkien udal-baliabideak handitzeko konpromisoari eusten jarraitzen dugu eta horretan dihardugu, zerbitzu publikoak handitzen eta duintzen. Gure ustez, Arrigorriagako herritarren bizitzak erdigunean jartzeko beste neurri bat da. Zaintzaileak zaintzea ere ezinbestekoa delako”, azaldu du Joana Etxeberria Politika Feminista eta Gizarte Ekintza zinegotziak.

Informazioa handitu nahi dutenek 634 633 882 telefono zenbakia ahalbidetu dute Arrigorriagako Udaletik. Aurrez aurre elkartzeko aukera ere badago, Gizarte Zerbitzuetako bulegoan, Urgoiti Pasealekuko 55-1 zenbakian.

Arrigorriagako Udalak martxan jarriko du Gazte Foroa, 16 eta 35 urte bitarteko gazteek udalerabakietan parte-hartzeko ekimena.

“Arrigorriagako Udalak Gazte Foroa abiatuko du, herriko gazteek aukera izan dezaten udal- erabakietan aktiboki parte hartzeko, bai gazteriari eragiten dizkioten gaien inguruan, bai herriari eta gainerako herritarrei eragiten dizkiotenen inguruan”, azaldu dute Udaletik.

Lehenengo bilera urtarrilaren 27an antolatu dute, 17:30ean, Arrigorriagako Gaztegunean. Bertan 16 eta 35 urte bitarteko herritarrek hartu ahalko dute parte.

Helburua 16 eta 35 urte bitarteko gazteentzako parte-hartzerako espazioa sortzea da: proposamenak egin, iritziak trukatu, ekarpenak egin, elkarren artean eztabaidatu…, eta, horrela, elkarrekin gazteentzat eta gure herriarentzat onena dena erabakitzeko”.

Joan den urtarrilaren 13an Iris Sariak banatu zituen Telebista eta Ikus-entzunezko Zientzien eta Arteen Akademiak. Bertan Aitor Albizua arrigorriagarrak zuzendutako ‘Cifras y Letras’ programak Prentsa Espezializatuaren saria jaso zuen eta GEURIA arrigorriagarrarekin berba egin du.

“Sari hau jasotzea oso berezia izan da bai niretzat, bai talde guztiarentzat”, azaldu du Albizuak. “Kazetarien partetik jasotzeagatik, alde batetik, eta programan urtebete egindako lanarekin kointziditzeagatik, bestetik. Eskertzen da eta oso garrantzitsua da guretzat”.

Sariaz harago, Aitorrek azken urte honetan lantaldearekin egindako lorpena azpimarratu du: “Jendearen egunerokotasunean sartu gara: astelehenetik ostiralera jende askok afal orduan edo ohera joan baino lehen ikusi du gure saioa. Datuen aldetik, azken 17 urteetan ordu tarte horretan eta La2 katean daturik onenak lortu ditugu. Hori era honetako proiektu txiki batekin lortzea (kultura, dibulgazioa…) benetan berezia izan da”.

Cifras y Letraseko lantaldea // Ikus-entzunezko Zientzien eta Arteen Akademia

Izan ere, TVEra itzuli eta ia urtebetera, ‘Cifras y letras’ La2ren arrakasta handienetako bat da. Arrigorriagakoak aurkezten duen lehiaketak % 5,4ko audientzia eta 710.000 ikusle lortu zituen iazko abenduaren erdialdean, Kantar Mediako datuen arabera.

Aitor Albizua: “Azken 17 urteetan ordu tarte horretan eta La2 katean daturik onenak lortu ditugu Cifras y Letras programarekin”

Arrigorriagakoak espero du sari honek programaren norabide hori jarraitzea: “Espero dugu hau hasiera bat izatea. Oso eskertuta eta pozik gaude!”.

Gure Magalean elkarte arrigorriagarrak urte osoko programa iragarri berri du eta Padura Mendi Taldearekin batera lehen irteera Jakara antolatu dute, bertan eskia egiteko asteburu oso batean.

Otsailaren 21etik 23ra antolatu dute txangoa eta irteera 18:00etan egingo dute osasun zentrotik. Izena emateko azken eguna otsailaren 12a izango da eta 42 lagunentzako lekua egongo dela iragarri dute mendi taldetik. Federatuek 120 euro ordaindu beharko dituzte eta ez federatuek 130 euro.

Ostatua eta mantenua Jakako aterpetxean egingo dute, zapatuan pentsio erdian (gosaria eta afaria) eta domekan gosaria barne. Itzulera otsailaren 23an egingo dute eta 20:30ean helduko dira parte-hartzaileak Arrigorriagako osasun zentrora.

Zapatuko ekintzei dagokienez hainbat aukera daude: Formigaleko pistan eskiatzea edo Portaleten inguruan eskia edo erraketekin zeharkaldia egitea. Domekan, ostera, Astuneko pistan eskia egitea edo inguruko mendietan eskia edo erraketekin ibilaldia egitea.

2025eko egutegia | Gure Magalean

Otsailak 21-23
Asteburuko eski irteera Jakara

Martxoak 23, domeka
Ibilbide zirkularra: Santa Luzia, Goikogane, Mugarriluze, Kamaraka (Araba)

Apirilak 6, domeka
Alen eta Artatxo tontorrak (Bizkaia)

Maiatzak 11, domeka
Arnotegi Bolintxutik (Bizkaia)

Ekainak 22, domeka
Tontorramendi (Ondarroa)

Irailak 21, domeka
Saldropo-Otzarreta (Bizkaia)

Urriak 12, domeka
Garrastatxu (Baranbio, Araba)

Azaroak 16, domeka
Iluntzar (Nabarniz, Bizkaia)

Abenduak 31, asteazkena
Xanpain Eguna (Artanda)