Herriko emakumeak eta mugarri feministak ikusarazteko, Arrigorriagako Udalak espazio publikoetan emakumeen izenak erabiltzeko prozesua jarri zuen martxan. Arrigorriagarrei hainbat izen proposatu zizkieten orduan, eta bozketa egin eta gero, 23 lagunek herriko figurarik gogokoena hautatu dute: Teodosia Ortega emagina. Ikur feministaren deiturak Barua parkea berrizendatzeko erabiliko dituzte.
Aldaketa martxoaren 25etik (larunbata) aurrera egingo da ofizial, Udalak orduan egingo baitio omenaldia Ortegari, Lamiaena Emakumeen Etxearen ondoko parkean. Inaugurazio ekitaldia 12:00etan hasiko da, eta figura gogora ekartzeaz gain, bere biografia jasoko duen totema jarriko dute parkean. Bertan egongo dira herri gobernuko eta Berdintasun Kontseiluko ordezkariak eta baita emaginaren familiako kideak ere.
Joana Etxeberria Politika Feminista eta Gizarte Ekintzako zinegotziak azaldu duenez, egunean egingo duten ekintza “xumea” izan arren, “benetan pisu handikoa da Arrigorriagarentzat”. Udalerrian egondako emakumeen bizipenak jasotzea eta “orain arte izan ez duten aitortza ematea” garrantzi handikoa dela esan du zinegotziak, eta helburu horrekin omenduko dutela Teodosia Ortega.
Teodosia Ortega
Ortega Burgosen jaio zen arren (1890ean), luze bizi izan zen Arrigorriagan, Justo Liceranzu senar durangarrarekin eta haien zortzi seme-alabekin batera. Emagin ikasketak zituenez, herriko Udal Ongintzaren emagin lanetan jardun zuen, baina Basurtuko Ospitalean eta Frantziako ospitale batean ere egin zuen lan. Teodosia Ortega oso maitatua izan zen, batez ere herrian, erditzeetan laguntzeko zuen prestasunagatik, bai eta emakumeei ematen zien arretagatik eta prestakuntzagatik ere. Bere alabak azaldu moduan, Teodosia Ortega “emakume modernoa eta harroa zen, bizia, langilea eta zoriontsua”.
Hala ere, 1937an, Frantziara alde egin behar izan zuen gerra garaian. Eta ondorioz, Gonzalo Vila Arrigorriagako alkate frankistak bere kargua eta ordura arteko lan eskubideak kendu zizkion. Azkenean, 1943ko urtarrilean itzuli zen Arrigorriagako emagin kargura, eta 1960ko martxoan erretiroa hartu zuenera arte, etenik gabe jardun zuen. Ortega 1983ko irailaren 4an hil zen, 93 urte zituela.
