Arrigorriagako Gobernu taldeak 2026ko aurrekontua onartu du joan den azaroaren 27an egindako ez ohiko osoko bilkuran, EH Bildu, Arrigorriaga Gara eta NOA alderdien aldeko botoekin eta EAJ eta PSEko ezezkoarekin. 17.646.735 milioi eurokoa izango da, 2025eko baino % 7 handiagoa.

Peio Garmendia Ogasun zinegotziak aurrekontu “anbiziotsuak” lez definitu ditu: “Aurrekontu hauek Arrigorriagaren garapena eta herritarren ongizatea bermatzeko pentsatuta daude. Helburua da Arrigorriaga bateratuago, inklusiboago eta jasangarriago bat eraikitzea”. Aurrekontu hauek “orekatuak” ere badirela gehitu du Garmendiak: “Herritarren egunerokotasuna hobetuko dute”.

“Aurrekontu hauek Arrigorriaga kohesionatuagoa, inklusiboagoa eta jasangarriagoa eraikitzeko borondatez diseinatu ditugu. Herri gisa aurrera egiteko eta gure auzokide guztien bizi-kalitatea hobetzeko funtsezko tresna dira”, aurreratu zuen Maite Ibarra Arrigorriagako alkateak joan den azaroaren 18an egindako prentsaurrekoan.

“Aurrekontuak funtsezkoak dira herri gisa aurrera egiteko eta gure auzokide guztien bizi-kalitatea hobetzeko”, laburbildu du Arrigorriagako alkateak. “Aukera emango digute Arrigorriaga kohesionatuagoa, inklusiboagoa eta jasangarriagoa eraikitzeko”.

Arrigorriagako udal-aurrekontuaren proposamena 2026

– Hirigintza eta Auzoak: Arlo honetara milioi bat euro baino gehiago bideratuko ditu gobernu-taldeak eta hiru ekintza nabarmendu dituzte: Osasun eta Higiene auzoko espazio publikoen irisgarritasuna eta kalitatea hobetzeko obrak egitea; eskolako patioa gune inklusiboagoa eta birnaturalizatuagoa bihurtzea, eta hirugarrenik, “kluben eta erabiltzaileen beharrak aseko dituen” kiroldegi berriaren lehen fasea eraikitzeko proiektuaren idazketa martxan jartzea: “Ongi diseinatutako patio bat jolasteko eremu bat baino askoz ere gehiago da: hezteko ingurune bat da, errespetuan oinarritua, barrerarik gabe ikasteko eta garatzeko aukera eskaintzen duena”, nabarmendu du Peiok eskolako proiektuari dagokionez.

Kiroldegiko igerilekua // Geuria

– Politika Feministak: Arlo honek 155.450 euroko partida jasoko du. 2019 urtearekin alderatuta diru kopurua bikoiztu dutela iragarri du Garmendiak.

– Gizarte Politikak: zaintza komunitarioen aldeko apustu irmoa egin dute, eta Zaindu Arrigorriaga izena izango duen proiektu bat jarriko da abian. Proiektu honek ‘Zainduz’, ‘Herri Lagunkoia’, ‘Zu Nagusi!’ eta ‘GEUna’ lan-programa batuko ditu. “Horri esker, programa guztien arteko lotura eta koherentzia lortu ahal izango da, udalerri solidarioago eta zainduago baterantz urrats garrantzitsua eginez”.

– Ekonomia eta Enplegua: esparru honetara 45.500 euro bideratuko dute enplegu-prestakuntzarako eta laneratzeko ikastaroak egiten dituztenentzako laguntza ekonomikoetarako. Bestalde, ArrigoBono kanpaina egiten jarraituko dutela iragarri dute, “tokiko merkataritzari bultzada emateko”.

2026rako udal-aurrekontuaren proposamenak Ingurumenera, Euskarara, Kulturara, Kirolera eta
udalerriaren garapenerako funtsezkoak diren beste arlo batzuetara bideratutako partidak ere
jasotzen dituela gehitu du Maite Ibarrak.

Gobernu taldea joan den irailean hasi zen udal aurrekontua prestatzen eta urrian lehen zirriborroa bidali zioten oposizioko alderdiei, horiek aztertzeko bilera batera gonbidapena eginez.

Kritikak, oposiziotik

EAJk eta PSE-ek gobernu taldeak onartu berri duen udal aurrekontua gaitzetsi dute, “estrategiarik gabeko, zorroztasun teknikorik gabeko, lehentasun argirik gabeko eta gardentasun eta leialtasun instituzionalik gabekoa delako” eta auzitan ipini dute udal gobernuak “aurrekontu anbiziotsuak” bezala definitu izana.

“Aurrekontua handitzea ez da gobernu-taldearen lanaren emaitza, Udalkutxaren hazkundearena baizik”, azaldu du Ainara Saez EAJko bozeramaileak. “Diru-sarrera guztien % 61 transferentzia horren menpe daude. Ez dago euro bakar bat ere Europako funtsetakoa, ez hitzarmenik, ez finantzaketa-lerro berririk. Horrela, Arrigorriagak ezingo du inoiz proiektu handiei ekin”.

Kiroldegi berria diseinatzeko proiektuaren testuinguruan, jeltzaleek “benetako proiekturik ez dagoela” salatu dute: “80.000€ bakarrik kantxak birmoldatzeko proiektu baterako dira. Ez faserik, ez obra-planik, ez memoria ekonomikorik, ez urte anitzeko finantzaketarik. Ez dago kiroldegi berrirako proiekturik. Existitzen den bakarra, eslogan bat da”.

Eskolako patio inklusiboari dagokionez, 2024ko gerakinarekin kontura gauzatu behar zen proiektua dela gehitu du Saezek: “Hori egin ez denez, 400.000 euro blokeatu dira orain, premiazko beste behar batzuei erantzutea eragozten dutenak, hala nola Labarketako irisgarritasunari”, eta EAJ aldertditik obra hori uda bitan faseatzea proposatu du “2026an baliabideak askatzeko, proiektuari uko egin gabe”.

Segurtasunaren alorrean, udal gobernuak partida % 36 murriztu duela azaldu dute oposiziotik: “Euskadin segurtasunik ezari buruzko kezka handitzen ari den testuinguru batean, Arrigorriagako udaltzainek segurtasun-gabeziako giroagatik babes gabezia salatu duten une honetan”.

EAJren zuzenketak

EAJk “hutsuneak” ikusi ditu ere gardentasunaren, zorroztasun faltan eta negozioatzeko borondatean eta zortzi zuzenketa aurkeztu ditu: “Aurkeztutako proposamenek 570.000 euroko balioa dute, eta alderdi jeltzaleak Erregistroan aurkeztutako proposamenean zehaztu du zenbateko hori nondik atera daitekeen beste partida batzuk egokituz gero”. Partida horrekin honako zuzenketak aurkeztu ditu:

– Pedro Muro eta Osasuna eta Higienea lotzeko irisgarritasun-azterlana
– Abusuko Zentro Soziokulturaleko instalazioak eta altzariak berritzea
– Kubo auzoa hirigunearekin lotuko duen pasabide estali berri baten azterketa, egungoa ordezkatuz.
– Tokiko merkataritza bultzatzea
– Hiri-altzariak, asfaltatzea eta bide-seinaleak hobetzea
– Auzo batzuetako argiztapena hobetzea
– Hiriguneko Tailer Etxea eta Tailer Etxearen eta Emakumeen Topalekuaren irisgarritasuna hobetzeko estudioa konpontzea.
– Ollargan eta Abusu lotzen dituen pasabide estali berri baterako azterlana, egungoa ordezkatuz