Arrigorriagako Udalak Ollargan eta Haurreskolako haur-parkeak konpontzeko asmoa azaldu du, udalerriko jolasguneen azterketa​ egin ostean. Lizitazio prozesua martxan ipini dute eta aurrekontua 229.000 eurokoa izango dela iragarri dute: “Enpresek irailaren 25era arte dute eskaintzak aurkezteko”.

Proiektu honek udalerriko haur-parkeak egokitu eta berritzea dela azaldu dute Udaletik eta horrekin batera Arrigorriagako haurrentzako jolas-eskaintza zabaltzea.

Ollarganeko parkearen kasuan parkea “nahiko hondatuta” dagoela jakinarazi dute udal ordezkariek: “Gainera, auzoko haur gehienek erabiltzen dute”.

Arrigorriagako Udala: “Ollarganeko parkea nahiko hondatuta dago eta auzoko haur gehienek erabiltzen dute”

Haurreskolako parkeak, udal ordezkarien aburuz, ez ditu ohiko erabiltzaileen beharrak asetzen eta “ez da egokia 0 eta 2 urte bitarteko haurtxoentzat eta gainera parkeak ez du itzalgunerik: ondorioz eguzki eta bero handiko egunetan ezin dute erabili”. Arazo hori konpontzeko itzalgune bat ipiniko dute.

Herriko gainontzeko haur-parkeei dagokienez, egun hauetan Abusuko Santa Isabel kaleko jolasgunea eraberritzen ari da Arrigorriagako Udala, eta GEURIAri azaldu lez, hurrengo hilabeteetan Lonbo auzoko haur-parkearekin hasiko dira: “Gainerakoak hurrengo urtean berrituko ditugu”, azaldu dute udal ordezkariek. “Gainera, kontua izan behar da aurrekontu parte-hartzaileen bozketa fasean gaudela eta emaitzak itxaron behar ditugu”.

Lamiaena Arrigorriagako emakumeen etxeak ikasturte hasierako jaia egingo du datorren irailaren 28an, Teodosia Ortega parkean. Egun erdiko ospakizuna antolatu dute eta jarduera nagusia urteroko hitzordua bilakatu den Emakume Sortzaileen Azoka izango da.

Aurtengoa hirugarren edizioa izango da eta Joana Etxeberria Arrigorriagako Udaleko Politika feministako zinegotziak emakumeen etxearen jardueren aurkezpenean azaldu bezala, Emakume Sortzaileen Azokak harrera ezinhobea izan du aurreko urteetan. Izan ere, aurten 25 saltoki egongo dira, eskaini daitekeen kopuru handiena.

Joana Etxeberriaz gain, Lamiaenako ikasturtearen aurkezpenean Maite Ibarra Arrigorriagako alkatea eta Ane González, Berdintasun saileko teknikaria izan dira eta egitarau anitza eta erakargarria diseinatu dutela iragarri dute: “Aurtengo egitarauan ikastaro, hitzaldi, solasaldi, zinema, erakusketa eta liburuen aurkezpenak eskainiko dira”, azaldu dute. “Gehienak proposamen berriak dira, Lamienakideek proposatutakoak batzuk, Berdintasun Sailetik behar espezifikoetara erantzuteko diseinatuak besteak”.

Ane González: “Aurtengo egitarauko jarduera gehienak proposamen berriak dira, Lamienakideek proposatutakoak batzuk, Berdintasun Sailetik behar espezifikoetara erantzuteko diseinatuak besteak”

Etxeberriak 11 eta 14 urte bitarteko neska gazteentzako ‘Esperimentatzera!’ laborategia goraipatu du. Urriaren 18 eta 25ean eta azaroaren 8an eta 15ean antolatu dute Lamiaenan, 17:30etik 19:30ak arte: “Eskua eta adimena askatzeko jarduera izango da. Hitzak, objektuak eta hainbat material erabiliko ditugu neska gazteok kontatu nahi duguna ilustrazioen bidez adierazteko”. Marrazketa tailerraz harago doa eta euskara hutsean eskainiko dute Limoi Zurrusta Kultur Elkartearen eskutik: “Guztion artean jolasteko topalekua sortu nahi dugu, ikasteko eta gozatzeko”.

Emakume bi, Lamiaenako egoitzaren aurrean // Geuria

Urte bi borrokan

Lamiaena 2022an inauguratu zuten herriko emakumeek. Aurretik, jakina denez, Arrigorriagako kultur etxea zen baina gaur egungo eraikinak ez du aurreko urteetako etxearen arrastorik, goitik behera eraberritu baitute herriko emakumeek: bilerak egiteko gelak, egongelak, terraza… eraikinak ez du ezer faltan.

Lamiaenaren hazkundea ere nabarmendu beharrekoa da eta sorreratik Etxebarriak balantze “oso positiboa” izan duela azpimarratu du: “Lamiaena sortu zenetik 310 Lamiakide elkartu ditu. Datu kuantitatiboak oso garrantzitsuak dira guretzat baina esan beharrekoa da ere gero eta gehiago direla Lamiaenara hurbiltzen ari direnak”, eta bakardadeari aurre egiteko gero eta emakume gerturatzen direla gehitu du politika feministako zinegotziak: “Lamiaenak emakume gehiago ezagutzeko aukera ematen die eta onuragarria da beraientzat”.

Joana Etxeberria: “Lamiaena sortu zenetik 310 Lamiakide elkartu ditu eta gero eta gehiago dira Lamiaenara hurbiltzen ari diren emakumeak”

Aurtengo ekimen feministetan izena emateko epea datorren irailaren 30ean zabalduko dute, Lamiaenan bertan arratsaldeko ordutegian (astelehenetik ostegunera 17:00etatik 20:30ak arte eta ostiraletan 20:00ak arte). Abusuko Zentro Soziokulturalean egiteko aukera ere badago (astelehenetik ostiralera 08:00 – 14:45)

Egitaraua | Lamiaenako Ikasturte Hasierako Jaia

Irailak 28, larunbata

11:00 Emakume Sortzaileen III. Azoka
12:00 Txosna irekitzea
12:30 Kancaneo Teatroren ikuskizuna

Egun erdiko ospakizunak Lamiaenako ikasturteko programazioari hasiera emango dio.

Gaur Bosteko Erakusketa ibiltariaren aurkezpena egin dute Leioako Kultur Etxean: “Gaur Leioan izan gara Bosteko erakusketa ibiltariaren edizio berriaren aurkezpenean”, azaldu dute udal ordezkariek. Irailetik abendura, erakusketa bost udalerritatik pasatuko da, ordena honetan: Leioa, Amorebieta-Etxano, Getxo, Arrigorriaga eta Basauri. Arrigorriagan azaroaren 28tik abenduaren 18ra antolatu dute udaletxeko Euskaldun Berria aretoan. Basaurin abenduaren 23tik 2025eko urtarrilaren 19ra arte egongo da.

Bost udaletako (Amorebieta-Etxano, Arrigorriaga, Basauri, Getxo eta Leioa) bost erakusketa-aretoren artean antolatzen eta koordinatzen den erakusketa ibiltaria da BOSTEKO eta Bizkaiko Foru Aldundiko Kultura Sailaren babesa du.

Bosteko 1998an sortu zen eta, ordutik hona, 76 artista euskaldunen lanak hartu ditu. Hala, Bizkaiko testuinguru kulturalean erakusketa sendoa bihurtu da. Ekimena euskal artista plastiko ospetsuen artelanak ikusgai jartzen ditu eta Bizkaiko Lurralde Historikoko udalerrietan ezagutzera eman eta zabaltzeko plataforma interesgarria da. Aurten, erakusketa irailetik abendura pasatuko da aipatutako udalerrietatik, ordena honetan: Leioa, Amorebieta-Etxano, Getxo, Arrigorriaga eta Basauri.

Iaz, Bosteko 2023. Kaosetik Kosmosera: Unibertsoko Paisaiak izeneko 26. edizioan, Iñigo Sarriugarte izan zen erakusketaren komisarioa eta María Alonso Páez, Gorka Gondra, Victor Arrizabalagaren lanak ikusi ahal izan ziren.

Arrigorriagako Udalak 476.437 euro bideratuko ditu Jose Mª Makua, Santa Isabel eta Urgoiti pasealekuan argiteria indartzeko. Lizitazioa martxan ipini dute eta enpresek irailaren 30era arte aurkeztu ditzakete proposamenak.

Arrigorriagako zenbait auzotako herritarrek beren egonezina azaldu dute azken egunetan. Kuboko hainbat auzotarren arabera argiztapen falta izan dute azken asteetan tunelean, zubian eta Barzubia baserriaren inguruetan: “Arriskutsua da argirik ez izatea tunelean, zubian, Barzubia zonaldean…”, kexatu da herritar bat. “Udalak egoeraren berri du, Kuboko bizilagunen kexak jasotzen ari baita. Gure auzoan ere baditugu “Puntu Beltzak” eta ez da batere atsegina mugikorreko argiarekin joan behar izana ez erortzeko edo zerbait okerragoa ez gertatzeko”. Udala jakinaren gainean dagoela azaldu dio GEURIAri eta abisua eman dutela jakinarazi du.

2020an presio baxuko sodiozko lurrunezko lanparen ordez LED teknologiako argiztapen eraginkorragoa instalatu zuten kale horietan IDEAk emandako Udalerrietako kanpoko argiztapen-instalazioak berritzeko laguntza-programaren bidez. Baina Arrigorriagako udal ordezkarien arabera horrekin ez da nahikoa izan gaur egungo arazoari irtenbidea emateko: “Jarduketa horrek ez zuen balio izan udalerriko hiri-bilbean lehenagotik zeuden argiztapen-arazo guztiak zuzentzeko”.

Kuboko herritarrak: “Kubon ere baditugu ‘Puntu Beltzak’ eta ez da batere atsegina mugikorreko argiarekin joan behar izana ez erortzeko edo zerbait okerragoa ez gertatzeko”

Trenbideen azpiko lurpeko pasabidea, Arrigorriagan // Geuria

Horiek horrela, Jose Mª Makua, Santa Isabel eta Urgoiti pasealekuko argiztapena egungo estandarretakoarekin alderatuta “eskasa” dela ikusita, zonalde horietako argiteria indartzeko asmoa azaldu dute Udaletik, argi berriak instalatuz: “Helburua puntu ilunak ezabatzea eta kaleetan segurtasun-pertzepzioa handitzea da, egungo estandarretarako argiztapena eskasa den lekuetan argi berriak instalatuz”, azaldu dute ordezkariek.

Joan den irailaren 14an, 21 urtez azpiko Taekwondoko Espainiako Txapelketa antolatu zuten Torreviejan (Alakant) eta Izarbe Cimadevilla arrigorriagarrak (Garriko Taekwondo Taldeko kirolaria) brontzezko domina lortu zuen. Iaz sari bera eskuratu zuen. Aurten Kataluniako ordezkariaren aurka galdu du borroka Alakanten, final erdietan.

Bestalde, Arrigorriagako klubeko Maider Castrok eta Daniel Zaldivarrek final-laurdenetan galdu zuten eta podiumaren atarian geratu ziren biak. Maiderrek Kataluniako ordezkariaren aurka galdu zuen eta Danielek Extremadurakoaren aurka.