→Arrigorriaga

Uraren ozonifikazio sistema instalatuko dute Beteluriko estazioan, Arrigorriagan

Zadorra eta Nerbioi ibaiko uretan dauden metalak filtratuko dituzte eta material organikoa zein gainontzeko substantzia kutsakorrak kendu

Beteluriko Ur Edangarria Tratatzeko Estazioa (UETE) // Bilbao Bizkaia Ur Partzuergoa

Bilbao Bizkaia Ur Partzuergoak Cadagua eta Ferrovial Contrucción enpresek osatutako Aldi baterako enpresa-elkarteari (ABEE) adjudikatu dizkio Arrigorriagako Beteluriko egokitzapen obrak. Ur Edangarria Tratatzeko Estazioan (UETE) ozonifikaziorako sistema ezarriko dute, Zadorra eta Nerbioi ibaietatik datorren ura garbitu eta giza kontsumorako erabilgarria egiteko, bereziki, lehorteengatik ur eskasia dagoen egoeretan.

Sistema berriarekin, iragazi gabeko ura desinfektatuko dute. Ibaiko urak dituen metalak (burdina eta manganesoa kasu) filtratuko dituzte eta izan ditzakeen material organikoa zein gainontzeko substantzia kutsakorrak kendu. Horretarako, instalazioak 40 kilo ozono erabiliko ditu orduko, aurre-ozonizazio eta tarteko ozonizazio prozesuen bidez.

Ostiral honetan, Ferrovial bera izan da obra eskuratu duela jakinarazi duena, eta zehaztu ez badu ere, 6,6 milioi inguruko aurrekontua izango du instalazioa martxan jartzeko; hori da, gutxienez, eskaintza publikoan hasiera batean zehaztu zena. Lizitazioa 2021eko abenduan atera zuten, eta enpresek otsailera arte izan dute epea eskaintzak aurkezteko.

Gainontzeko obrak

Aldaketen helburua, Beteluriko planta uren tratamentuko azken araubidera egokitzea da: Europako Parlamentuaren 2020/2184 Zuzentaraura eta Kontseiluak 2020ko abenduaren 16an giza kontsumorako uren kalitatearen inguruan onartutakora, hain zuzen. Ozonifikazio sistema ezartzea da egokitzapenetarako azken pausoetako bat, hauts forman dagoen ikatz aktiboa dosifikatzeko sistemarekin batera. Azken obra hori ere Cadagua enpresari esleitu diote.

Gora

Geuria Laguntzaileak Geuria Laguntzaileak