→Arrigorriaga

Arrigorriagako Triatloi Txikia egingo dute irailean, 7 eta 14 urte bitarteko haurrentzako

Urbiko Triatloi taldeak antolatuta, lasterketa irailaren 10ean (larunbata) egingo dute. 2008-2015 urte bitarteetan jaiotako umeek hartu ahalko dute parte, bi kategoria ezberdinetan: banaka (X. Triatloi Txikian) edo taldeka (IV. Triatloi Familiarrean).

Arrigorriagako Triatloi Txiki, 2017 // Geuria

Urbiko Triatloi Taldeak antolatuta, Arrigorriagan 2008-2015 urte bitarteetan jaiotako umeentzako triatloia egingo dute irailaren 10ean, larunbatean. Haurrak bi kategoriatan lehiatu ahalko dira, banaka (X. Triatloi Txikian) edo taldeka (IV. Triatloi Familiarrean), adinaren arabera banatutako luzera desberdineko ibilbideetan. “Triatloia maite dut” lelopean, umeak kirola egitera bultzatzeko ekimenaren parte izango da lasterketa, eta edozein haurrek parte har dezan prestatuta egongo da.

Lasterketa Arrigorriagako Udal Kiroldegian hasiko da. Igeriketa proba kanpoko igerilekuan egingo da, eta gero, umeek bizikletaz ibili beharko dute ibaiko paseotik Lonbo aretora arte. Eraikinaren inguruko ibilbidea txirrindulaz egin ondoren, ibaiko paseoa eta udal kiroldegiko pista korrika egin beharko dituzte, lasterketa bertan bukatzeko.

Triatloi Txikia 16:00etan hasiko da, 2008-2009 bitartean jaiotako neska-mutilekin (umeen kategoria). Lasterketako nagusienak izanik, Ibilbiderik luzeena egingo dute hauek: 80 metro igerian, 3.000 metro bizikletan eta 1.000 metro korrika. 16:15ean, kimuen kategoriakoek (2010-2011) jarraituko dute ibilbidea: 60 metro igerian, 1.500 metro txirrindulaz eta 750 metro korrika. Benjaminek (2012-2013), berriz, 40 metro egingo dituzte igerian, 1.000 metro bizikletaz eta 500 metro korrikan, 16:45etik hasita. Azken kategoriak 17.45ean itxiko du jardunaldia. 2014-2015 urteen artean jaiotako benjaminaurrekoek 20 metro egingo dituzte igerian, 500 metro bizikletan eta 250 metro korrikan.

Banakako probak bukatu ostean, 18:00etan, Triatloi Familiarra hasiko da, Triatloi Txikiaren ibilbide berarekin. 2012 eta 2015 urteen artean jaiotako haurrek 40 metro egin behako dituzte igerian, eta 2008 eta 2011 bitartean jaiotakoek, 80. Korrikan, berriz, gazteenek 500 metro egingo dituzte, eta nagusienek, 1.000. Bizikletaz egin behar den distantziaren arabera, bi ibilbide desberdin egongo dira: batetik, A Triatloi Familiarra, 750 metrokoa, 2012-2015 bitartean jaiotako umeentzako; bestetik, B ibilbidea, 1.500 metrokoa, 2008-2011 urteen artean jaiotakoentzako. Ibilbide familiarrean edonork parte hartu ahal badu ere, bizikletaz egin behar den atala horretako umea derrigorrez izan beharko da lehenago Triatloi Txikia egin duen haurretako bat.

Izen-ematea

Lasterketa egin ahal izateko, umeek norbere kaskoa eraman beharko dute, eta bizikletaz zein korrikan egindako zatietan, kamiseta, triatloiko monoa eta bainujantzia (ez bikinia) jantzita eraman beharko dute derrigorrez. Bi lasterketetan izena emateko epea irailaren 8ra arte egongo da zabalik, Urbiko Triatloi Taldearen webgunean; dortsalak lasterketaren egunean bertan banatuko dituzte, 15:00etatik aurrera.

Gora

Geuria Laguntzaileak Geuria Laguntzaileak