Maiatzaren 14an, larunbatez, Arrigorriaga izango da Bizkaiko Bertsolari Txapelketako sailkatze-saioei dagokien azken-aurreko hitzordua hartzeko egoitza. Kanporaketa 17:30etan hasiko da Lonbo Aretoan.
Urte birik behingo zitaren edizio honetan formatua aldatu eta beste fase bat gehiago gehitu dute, apirilaren 10ean Berrizen hasi zena. Arrigorriagara iritsi arte Berriz, Bermeo, Erandio, Ondarroa eta Derio igaro ditu dagoeneko, eta datorren asteburuan Gueñes eta Orozko bisitatuko ditu. Udabarriko Fase berri hori Getxon amaituko da, maiatzaren 22an.
Sailkatze-saioetako hasierako fase honetan, guztira, 56 bertsolarik eman dute izena. Sailkatze-saioen ostean, puntuaziorik onenak lortzen dituztenak sailkatuko dira, bederatzi hitzorduak aintzat hartuta. Ondoren, urrian, Udagoieneko Fasea iritsiko da. Aurretik Bizkaiko finalen batean egon direnak zuzenean sartuko dira fase horretara, non bost kanporaketa eta hiru finalaurreko egingo diren. Finalaurrekoetara, berriz, 2014. urtean, finalista izandakoak sartuko dira zuzenean. Final handia abenduan izango da, eta bertan zortzi bertsolarik bakarrik izango dute txapela lortzeko aukera.
ARRIGORRIAGAKO BERTSOLARIAK
Arrigorriagan, zehazki, hauexek izango da Udagoieneko Faseko kanporaketetara iristeko ahalegina egingo duten bertsolariak: Ander Aldazabal Olabarri (Durangaldea), Arkaitz Zipitria Mendizabal (Hego Uribe), Galder Bilbao Martínez “Txapi” (Uribe Kosta), Igor Galartza Intxausti (Durangaldea), Joseba Artza Zubillaga (Lea-Artibai) eta Unai Mendiburu Valor (Uribe Kosta).
Lonbo Aretoko emanaldiaz gozatzeko, sarrerak txarteldegian erosi ahal izango dira ekitaldia hasi baino ordu batzuk lehenago, ez baitira sarrerak aurretiaz salduko. Sarreren prezioa 3 eurokoa izango da oro har, baina antolatzeaz arduratu den Bizkaiko Bertsozale Elkarteko kideek 2 euro ordaindu beharko dituzte, eta 16 urtetik beherakoak doan sartu ahal izango dira.
