☉ Arrigorriaga
Eder Olivencia: “120 rubik kubo baino gehiago ditut etxean”
Bilbao Open Rubiken lehenengo edizioko txapelduna da Eder Olivencia arrigorriagarra. 19 urterekin Euskal Herriko eta Espainiako txapelketa asko irabazi ditu eta bere asmoa Europan lehiatzea da.
Bilbao Open Rubiken lehenengo edizioko txapelduna da Eder Olivencia arrigorriagarra. 19 urterekin Euskal Herriko eta Espainiako txapelketa asko irabazi ditu, Orain Europan lehiatu gura du.
Erno Rubik arkitekto eta eskultore hungariarrak sortu zuen Rubik kuboa, 1974an. Kubo magikoa deitu zion berak diseinatu berri zuen 3×3 laukiko kuboari. Kolore zuri, gorri, urdin, laranja, berde eta horiekin margotu zuen, sei alde eta bederatzi laukitxo alde bakoitzean. Alde guztietan kolore bereko kubo guztiak elkartuz lortuko zenuen kuboa askatzea. Erno Rubikek berak hilabete bat baino gehiago behar izan zuen kuboa askatzeko. Eder Olivenciak (Arrigorriaga, 1999) 10 segundo baino gutxiago behar ditu egun. Bilbao Open Rubik txapelketaren irabazlea dugu Ollarganeko bizilaguna eta Rubikaren inguruko kontuak inork baino hobeto azaldu dizkigu.
Eder Olivencia, Bilbo Open Rubikeko lehenengo edizioko txapeldun nagusia. Kategoria askotan nagusitu zara, Eder.
Hala da bai. 3×3, 4×4, 5×5 eta 7×7 kategoriak irabazi ditut. Egia esateko, besteren bat irabazteko ere esperantza nuen… Bartzelonako lagun batekin aspaldiko lehia nuen 6×6 kategoria nork irabaziko… Berak irabazi du oraingoan eta ni haren atzetik sailkatu naiz, bigarren. Ikusiko dugu hurrengoan…Hala ere, ezin kexatu, oso pozik nago lortutako emaitzekin, asteburu itzela izan da.
10, 3 segundo behar izan dituzu, bataz beste, 3x3ko kuboa askatzeko. Ti-ta.
Bai, eta azkarrago ere askatu dezaket. Lehiaketan 9, 46 segundotan askatzea lortu dut, baina txapelketetan denborarik onena ez da kontuan hartzen. Kategoria bakoitzean bost aldiz askatu behar duzu kuboa. Horietako bakoitzean erabili duzun denbora neurtzen da eta horietatik onena eta txarrena alde batera uzten dira. Erdiko hirurak erabiltzen dira kategoria horretan izan duzun bataz besteko denbora neurtzeko.
Alde bakoitzean zenbat eta kubo gehiago izan, zailago?
Ez nuke esango zailagoa denik… 3×3 eta 4×4 laukiko kuboak askatzen ikasita, 1000×1000 laukiko kuboa askatzen ere jakingo duzu. Zailtasun handiagoa baino, pazientzia eta denbora gehiago behar duzula esango nuke. 4x4ko kuboa askatzeko, adibidez, 32 segundo behar izan nituen Bilboko txapelketan.
Nolakoa da lehiaketa?
Bilbo Open Rubikean adibidez, 14 kategoria daude eta izena nahi duzun guztietan eman dezakezu. Kategoria guztietako dinamika bera da: kuboa estalita uzten dute mahai gainean eta prest zaudenean, izaratxoa kendu eta 15 segundo ematen dizkizute kuboa behatzeko. Denbora tarte horretan kuboa askatzeko erabiliko dituzun lehenengo mugimenduak planifikatu behar dituzu, bi askoz jota. Hortik aurrera, “look ahead” delakoa egiten duzu. Mugimendu bat egin bitartean, hurrengoan pentsatzen ari zara, ez duzu apenas laukien koloreak behatzeko astitik, buruan imajinatu behar duzu guztia.
Bilboko lehiaketak oihartzun handia izan du, baina aurretik ere beste txapelketa batzuetan lehiatu zara.
2012an hasi nintzen lehiaketetan parte hartzen, Basaurin. Ordutik etengabe ibili naiz, hara eta hona. Euskal Herrian hainbat txapelketa irabazi ditut: bi aldiz Basaurin, behin Plentzian, beste bat Portugaleten eta azkena Bilbo Open Rubikean. Espainiako txapelketara ere birritan aurkeztu naiz, Madrilen eta Valentzian. Bosgarren sailkatu nintzen Valentzian, hirugarren postutik oso hurbil. Nire asmoa Estatuko txapelketetan emaitza hobeak lortzea eta Europara salto egitea da.
Ibilbide honek baina, badu bere hasiera.
13 urte bete berri nituela, Rubik kuboa oparitu zidan lehengusinak. Pare bat aldiz saiatu nintzen kuboa askatzen, baina gainontzeko trasteekin batera ahaztuta utzi nuen. Egun batean nire aitak kuboa berreskuratu eta askatzen ikasi zuen. ‘Eder, saiatu zaitez, ez da horren zaila’, bota zidan amua. Orduantxe hasi nintzen ikasten, aitak zirikatuta. Youtuben bideo tutorial onak daude ikasteko eta apurka-apurka kuboa menperatzen hasi nintzen. Egun 120 kubo ezberdin baino gehiago ditut etxean.
Eta orain, metodo irabazlea zein den ikasi duzu.
Nire ustez, ez dago metodo irabazlerik. Hau da, txapelketetan erabiltzen dudan metodoa Rubik mundua ezagutzen duen edonorrek ezagutzen du. Ehunka bide daude kuboa askatzeko, sinpleenak geldoagoak dira, eta badaude konplexuagoak eta azkarragoak ere, baina praktikatuta, edonor da kapaza metodo konplexu hori ikasteko. ‘Algoritmoa’ deitzen diogu Rubik kuboa askatzeko aukeratzen dugun mugimendu sekuentziari. Arraroa ematen badu ere, matematikak gorroto ditut.
Hara! Askok pentsatuko dute kalkuluekin abila izan behar dela Rubik kuboa menperatzeko…
Bai, askotan esan didate hori, baina mito hutsa da. Kontzentrazioa beharrezkoa da, noski, eta algoritmoen oinarrian matematika dagoela ezin uka, baina algoritmoak diseinatuta daude jada eta nire ustez gakoa eskuetan duzun abilezian dago. Papiroflexia egitea izugarri gustatzen zait eta nahiko lan txukunak egiten ditut. Horrez gain, gitarra jotzen dut eta punteoak egiten abila naiz. Atzamarrak, beraz, azkar mugitzen ditut, baita kuboa askatzean ere. Hala ere, abilezia hori edonorrek landu dezake, nahiz eta traketsa zarela pentsatu, ahaleginarekin asko hobetu daitekeen zerbait da.
Nola animatuko dugu jendea Rubik kuboa egitera?
Harrigarria bada ere, gehienok daukagu Rubik kuboren bat etxean galduta. Emaiozue aukera bat, mugikorretik, telebistatik edo ordenadoretik deskonektatzeko bada ere. Afizio polita da oso, osasungarria eta doakoa. Eta kasu egidazue, ‘adikzioa’ sortzen du. Gure artean, tamalez, ezezaguna da Rubik mundua. Batzuek pentsatuko dute afizio bakartia edo frikia dela, baina Rubikarekin hasi nintzenetik lagun piloa egin ditut: lehiaketetan, elkarteetan, elkarretaratzeetan … Izugarrizko giroa dago jokalarien artean. Ez izan beldurrik eta probatu!
☉ Arrigorriaga
Doako edoskitze tailerra antolatu du Arrigorriagan Altzoan Zaintza Sareak
Tailerra interesa duten emakume guztientzat antolatu dute otsailaren 12an, 17:00etan eta aurretiko esperientziarik ez dela behar nabarmendu dute Altzoanetik
Altzoan Zaintza Sareak, Ene Amatxorekin elkarlanean eta Arrigorriagako Udalaren zein Rural Kutxaren babesarekin doako edoskitze tailerra antolatu du Lamiaena emakumeen etxean.
Tailerra interesa duten emakume guztientzat antolatu dute otsailaren 12an, 17:00etan eta aurretiko esperientziarik ez dela behar nabarmendu dute Altzoanetik.
“Edoskitzea elikadura baino askoz gehiago da: lotura, informazioa, erabakiak eta laguntza ere bai”, iragarri dute Altzoan Zaintza Saretik. “Horregatik, edoskitze tailer honetara gonbidatzen zaitugu, interesa duten pertsona guztientzat irekia: haurdun egon edo ez, edoskitze prozesuan ari direnak, etorkizunean ama edo aita izan nahi dutenak, edo, besterik gabe, jakintza handitu eta lagundu nahi dutenak”.
Gune segurua, errespetuzkoa eta inklusiboa izango da, errealitate eta ibilbide ezberdinetatik hitz egiteko eta zalantzak partekatzeko. “Zure zain gaude!”.
Izena emateko Instagram bidez idatzi ahal dute interesdunek edota 660 202 438 telefono zenbakira Whatsappa bidali (Eneritz @eneamatxo)
☉ Arrigorriaga
Arrigorriagako Garrikoko kirolariek 21 domina eskuratu dituzte Euskadiko Teknika Txapelketan
Urrezko zortzi domina, zilarrezko beste zortzi eta brontzezko bost eskuratu dituzte joan den asteburuan, Bilbon
Joan den asteburuan Taekwondoko Euskadiko Teknika Txapelketa antolatu zuten Bilboko Miribilla pilotalekuan eta bertan izan ziren Arrigorriagako Garriko Taekwondoko kirolariak.
Guztira 21 domina eskuratu zituzten: urrezko zortzi, zilarrezko beste zortzi eta brontzezko bost.
Hauek izan ziren domina horiek eskuratu zituzten borrokalariak, kategoria bakoitzeko:
Emakumezkoen hirukotea, Bilbon // Garriko Taewkondo taldea
Kadeteak emakumezkoak
– Lur guerra urrea
Kadete mutilak
– Izei Intxaurraga: urrea
Kadeteak A emakumezkoak
– Aiara Alves: zilarra
– Leire Perea: brontzea
Kadeteak A mutilak
– Julen Fernandez: zilarra
– Iago Garcia: brontzea
Bikote kadetea
– Iago Lur: urrea
– Julen Aiara: zilarra
– Izei Leire: brontzea
Junior emakumezkoak
– Laura Ferreira: urrea
– Irati Amador: zilarra
Junior mutilak
– Iñigo Pereira: urrea
– Haritz Amador: zilarra
Senior emakumezkoak
– Itxaso Hernandez: urrea
– Irati Velada: zilarra
– Ariane Martinez: brontzea
– Izaskun Velez 6
– Elaia Garcia 7
– Andrea Barona 8
– Nahia Agirre 9
Hirukote emakumezkoak
– Itxaso, Ariane, Irati: urrea
– Nahia, Izaskun, Elaia: zilarra
Senior gizonezkoak
– Javier Rodriguez 4
Bikote Junior
– Laura Ferreira Iñigo Pereira: urrea
– Irati Amador Haritz Amador: brontzea
Bikote Senior
– Andrea Barona Javier Rodriguez: zilarra
☉ Arrigorriaga
Bideoa | 824 partaide eta txakurkros proba luzeagoa eskainiko du Arrigorriagako Ausartak Mendi Lasterketaren zazpigarren edizioak
Asteburu honetan 583 gizonek (% 70) eta 241 emakumek (% 30) hartuko dute parte urteroko “derrigorrezko” hitzorduan bilakatu den Ausartak Mendi Lasterketan
Ausartak Mendi Lasterketaren zazpigarren edizioa aurkeztu dute gaur, Arrigorriagako udaletxeko osoko bilkuren aretoan eta asteburu honetan parte-hartzaileek jantzita eroango duten kamiseta teknikoaren eredu baten ondoan.
Urtarrilaren 17an eta 18an antolatu dute zazpigarren edizioa eta 824 korrikalari izango ditu, 2025ean baino 100 gehiago. “Arrigorriaga kirolaren eta mendiaren hiriburu bihurtuko da berriro”, iragarri du pozik Maite Ibarra herriko alkateak. Igandean espero da jende gehien: bertan izena emateko epea iazko urriaren 1ean zabaldu ziren eta aste bitan saldu ziren denak. Larunbateko proban 173 pertsonak eman dute izena (116 gizon eta 57 emakume). Igandekoan 654 parte-hartzaile egongo dira (464 gizon eta 190 emakume). Laburbilduz, 583 gizonek (% 70) eta 241 emakumek (% 30) hartuko dute parte asteburu honetako probetan.
“Kirol eskaintza zabala” eskainiko duen asteburua izango dela aurreikusi du Ibarrak, edozein adineko eta prestaketa maila duten pertsonei zuzendua, hain zuzen.
Mikel Fuentes Ausartak Mendi Lasterketako kideak xehetasun guztiak eskaini diezkie komunikabideei: “Urtez urte, Ausartak Mendi Lasterketak hazkunde nabarmena izan du”, azaldu du elkarteko kideak. “Ez bakarrik parte-hartzaileen kopuruari dagokionez; baita antolakuntzaren kalitateari, ingurue naturalaren konpromisoari eta segurtasunaren aldeko apustuari dagokionez ere”.
Mikel Fuentes, gaurko prentsaurrekoan // Geuria
Makina bat berritasun
Aurtengo edizioa berrikuntzez josita dator. Lehena, txakurkros ibilbidearen aldaketa da: 5,5 kilometro eta 120 metroko desnibel positiboa izatetik 12,2 kilometro eta 440 metroko desnibel positibokoa izatera igaroko da, parte-hartzaileen iradokizunei kasu eginez.
Bigarrena, Txakurkros lasterketaren itzulera Euskadiko Txakurkros Ligara (ETL).
Hirugarrena Mendikosolo Trail Pilotoa da: “Harrera ona izatekotan, azken proba hau iraunkorra bihurtuko dugu”, azpimarratu du Fuentesek.
Laugarren berritasuna segurtasuna indartzea izango da. Bexen Cardiorekin egindako elkarlanaren ondorioz, desfibriladore bi ipiniko dituzte Arrigorriagako proban.
Bosgarrenez, lasterketaren sarrera ofiziala etiketa berdearekin egingo dute aurten. Honek esan nahi du ingurumenarekin konpromisoa berretsiko duela asteburuko probak.
Solidaritatea, ardatz
Lasterketaren ekimen solidarioa ahaztu behar ez den beste kontu bat da: aurten ere, jasoko den diruaren zati bat Ane Sindrome Red ekimenari bideratuko diote Ausartakekoek: izen emate bakoitzak euro biko prezioa izango du. “Horrek egiten du Ausartak-en proba hain berezia parte-hartzaileen artean”, azpimarratu du Maitek eta eskerrak eman dizkio Ausartak Ludiko Kirol Elkarteak egindako lanari.
Egitaraua | Ausartak Mendi Lasterketa 2026
Urtarrilak 17, larunbata
10:00 Ausartak Canitrail
10:30 Mendikosoko Trail (proba pilotoa)
Urtarrilak 18, igandea
10:30 Mendi Maratoi Erdia
11:00 Hasiberri Trail
11:10 Martxa Laburra
☉ Arrigorriaga
Arrigorriagako Amalur liburudendak aitortza berezia jaso du Merkataritza Jaialdian euskararen alde egindako lanagatik
Gainera, udalerriko Kreta Loreak saltokia finalista izan da Bizkaiko Erakusleiho Lehiaketan
Bizkaidendak elkarteak Merkataritza Jaialdia antolatu du duela egun batzuk eta Arrigorriagako Amalur liburudendak aipamen berezia jaso du euskararen alde egindako lan eta konpromisoagatik. Amalurrek 1995ean zabaldu zituen ateak lehen aldiz eta gaur egun arte euskarazko liburu eta jolas ugari dituzte adin guztietako haurrentzat. Iker Albizua Uriondo da liburutegiaren jabea eta bertako produktu guztiak ezagutzen ditu, bezero bakoitzari gomendioak emanez.
Bestalde, Kreta Loreak saltokia finalista izan da Bizkaiko Erakusleiho Lehiaketan.
Maite Ibarra Arrigorriagako alkatea eta Gaizka Ibarretxe Ekonomia zinegotzia Bizkaidendak elkarteak antolatutako ekitaldian izan ziren: “Harro gaudezuen lanaz eta herriari ematen diozuen biziagatik”, azaldu zuten.
☉ Arrigorriaga
Argazkiak | Errege Magoen Kabalgatak eta epifaniak jendez bete du Arrigorriagako plaza
Arrigorriagarrek harrera beroa egin diete Errege Magoei udaletxe aurreko plazan, 3ºtan
Iritsi dira Hiru Errege Magoak Arrigorriagara! Beste urte batez, Arrigorriagako udaletxeko plaza jendez beterik egon da 19:00etan eta hotzak ez du ikuskizuna geldiarazi.
Aurtengo 51. edizioan 150 pertsona baino gehiagok hartu dute parte eta haurrek Meltxor, Gaspar eta Baltasar herrian ikusteko aukera izan dute. Urtero lez, udaletxeko plaza antzinako herri batean bihurtu da,
19:00ak aldera 3ºC erregistratu dituzte termometroek, azken urteetako tenperatura hotzenak.
Bideoa | Abeltzainak eta mendizaleak, oreka zailean Upon gora
Urtarrilaren 19an zabalduko ditu ateak Ugaoko kiroldegi eraberrituak
Doako edoskitze tailerra antolatu du Arrigorriagan Altzoan Zaintza Sareak
Argazkiak | Errege Magoek ilusioa eta gozokiak banatu dituzte Galdakaoko kabalgatan
Argazkiak | Errege Magoen Kabalgatak eta epifaniak jendez bete du Arrigorriagako plaza
Argazkiak | Errege Magoek ehunka gozoki eta konfeti banatu dituzte Basauriko kabalgatan
Bideoa | Abeltzainak eta mendizaleak, oreka zailean Upon gora
Eder Lozano Heras: “Gure helburua da umeek 112ra deitzen ikastea eta larrialdi-zerbitzuak heldu aurretik zer egin behar duten jakitea”
