☉ Arrigorriaga
Arrigorriaga, inoiz baino antolatuago erantzun irmo baten alde
Urtarrilaren 12an pintada matxistak agertu ziren, bigarren aldiz, Arrigorriagako Institutuan. Pintadek herri osoaren gaitzespena jaso zuten.
“Emakumeek gona eta elastikoak eramaten dituzue ipurdia erakusteko, baina gero ez duzue bortxatuak izan nahi”; edo zakila baten irudiaren ondoan idatzitako “honek mundua menperatzen du”. Horrelako pintadekin esnatu zen urtarrilaren 12an Arrigorriagako institutua, bigarren aldiz. Horiez gain, “arriba España” eta “fuck etarras” hitzak ere irakurri ahal ziren marrazki txikiagoetan. Gertakariaren irudiak eta esaldiak azkar zabaldu ziren sare sozialen bidez, ekintza horri eta haren egile anonimoari mezu gaitzesgarriak igorriz.
Nazka, tristura eta haserrea ziren nagusi. Gertakizunak Arrigorriagako emakumeak, zein arrigorriagarrak orokorrean, elkartu zituen, horrelako ideologia duten pertsonek herrian lekurik ez zutela serio esanez. Eguna hasi eta ahalik eta azkarren ezabatu zituzten Arrigorriagako langileek eraikinaren hormetan agertutako pintada matxistak. Institutuko koordinazioak adierazi duenez, mezu horiek ikasleengan izan zezaketen efektua ahalik eta azkarren “desagertzeko” ahaleginak egin zituzten. Noski, ondoren, haiekin gai horren inguruan lan egin zuten. Bestalde, gertatutakoa eskola publikoarekin eta institutuarekin zer ikusirik ez duen ekintza dela nabarmendu dute, bertan arnasten den atmosferan horrelako ideiak zabaltzen dituzten pentsaerek ez baitute tokirik.
2018an egindako pintada Arrigorriagako institutuan / Sare sozialak
HERRIAREN GAITZESPENA. Arestian aipatu bezala, herritarrak, pintaden zein horietan agertutako mezuen kontra agertu ziren, indarrez. Arrigorriagako Urruma Asanblada Feministak, Madalen eta Loturarik Gabe elkarteek, Udaleko Berdintasun Sailak eta herriko hainbat emakumek ere gogor gaitzetsi zuten gertakaria. Aurreko horiek guztiak elkartu eta mezuak baloratu ondoren, “zekenak” izateagatik arreta deitzen zutela adierazi zuten, pintadak egin zituztenen “maila baxua” agerian jartzen zutela gaineratuz.
Bestalde, horrelako mezuek herrian inolako babesik ez dutela baieztatu zuten talde feministek eta Berdintasun Sailak. “Arrigorriagako emakumeak inoiz baino antolatuago gaude, ahaldunduak eta elkartuak gure eskubideak lortzeko borrokan”, esanez erantzun zieten pintadei. Horrez gain, nahi bezala janzten jarraituko dutela, eta nahi duten pertsonekin nahi duten eran erlazionatzen segituko dutela nabarmendu zuten. Aurreko guztiarekin, atzera bueltarik ez duen bidea egiten ari direla argi utzi zuten, eta beraz, haien eskubide eta askatasunen alde indarrez borrokatzen jarraituko dutela baieztatu zuten.
Udalak ere gogor egin zuen pintaden kontra, Arrigorriagan horrelako ekintzek lekurik ez dutela esanez eta institutuan agertutako pintada matxistak “ekimen isolatuak” ez direla adieraziz. Izan ere, mezu horiek gero eta gehiago indartzen ari den jarrera bati erantzuten diotela jakinarazi zuten. “Inpunitate osoz ari dira eskuin muturrean kokatzen diren agenteak gero eta eraso gehiago egiten emakumeen aurka, garai bateko jarrerak gaur egunera ekartzen”, adierazi zuten Arrigorriagako Udaletik. Horrekin batera, udal gobernuak herrian oinarri eta balore jakin batzuk sustatu nahi dituela azaldu zuten, berdintasunean eta pertsona guztien errespetuan oinarritutako herria eraikitzea baita haien asmoa. Beraz, horrelako gertakariaren aurrean “beharrezkoak diren neurriak” hartzeko prest zeudela garbi utzi zuen Udalak. Hala ere, modu horretako ekintzek “denon erantzuna” behar dutela gogorarazi nahi izan zuten, eta horren ondorioz, arrigorriagarrek “nahi eta merezi” duten herria sortzeko helburuarekin herriko eragile sozialekin batera lan egingo duela gehitu zuen Udalak.
Zaratamoko eskolan agertutako pintadak 2019an / Zaratamoko eskola
PINTADEN AURREKARIAK HEGO URIBEN. 2018. urteko abenduaren 3an, Euskararen Egunean gertatu zen aurrenekoz Arrigorriagan. Kasu horretan, “feminismoa bai, baina bortxatuak izatea gogoko duzue” mezua zabaltzen zuen pintadarekin agertu zen institutuko euskal hizkuntzaren aldeko horma-irudi bat. Dena den, Arrigorriagako institutua ez da horrelako ekintzak jasan dituen Hego Uribeko zentro bakarra, joan den urteko martxoan Zaratamoko eskola izan baitzen mezu matxista hauen jomuga: ‘Stop feminaziak’, ‘Babestu umeak orain!’, ‘Scolae planari ez’, ‘Mutilek zakila dute. Neskek alua’ eta ‘Haurren mutilaziorik ez. Haurren hormonatzerik ez’ izan ziren kasu hartan genero berdintasunaren kontra agertutako mezuak.
Guraso elkarteak berdintasunaren alde eta martxoaren 8aren harira egindako hainbat ekintzen ondoren agertu ziren pintadak. Zaratamon emandako gertakari horrek ere zaratamarren gaitzespen osoa jaso zuen. Horren eraginez eta jarrera eta ekintza horien kontra, une hartan alkatea zen Jon Ajuriak premiazko bilera deitu zuen, eta bertan Udalak Besopean Guraso Elkartearekin, eskola zuzendaritzarekin eta Berdintasun Batzordearekin batera elkarretaratzea deitu zuen Elexaldeko plazan, herritar guztien artean gertakari hura gaitzetsi zezaten.
☉ Arrigorriaga
Delituek % 13,5 baino gehiago egin dute behera Arrigorriagan 2025ean
Kriminalitate tasa 32,28koa da eta gobernu taldetik ondorioztatu dute Arrigorriaga “herri segurua” dela
Ertzaintzak eta Arrigorriagako Udaltzaingoaren datuen arabera, delituek % 13,53 egin dute behera iaz, 2025ean. Datuen arabera, Beherakada hau Bizkaiko lurraldean izandakoa (% 1,44) baino askoz handiagoa da, eta Arrigorriaga inguruko herri seguruenen artean kokatzen du, udal ordezkarien aburuz.
Kriminalitate tasari dagokionez (hots, delitu kopurua 1.000 biztanleko) 32,28koa da Arrigorriagan, Bizkaiko batezbestekoa % 48,3koa izanik. Horrek, gobernu taldearen arabera, Arrigorriaga “herri seguru” bezala berresten du.
Azken urteetako bilakaerari dagokionez, arau-hauste penalek behera egin dute poliziak helaraziko datuen arabera: 2022an 436 arau-hauste penal egon ziren (36,47 biztanleko milako tasa); 2023an 423 (35,39 biztanleko milako tasa); 2024an 436 (36,28 biztanleko milako tasa); eta 2025ean 377 (32,28 biztanleko milako tasa). Datu horiek Raul Lopez Arrigorriagako Udaltzainburuak datu horiek guztiak helarazi dizkie Udalean ordezkaritza duten talde politiko guztiei egin berri diren batzordeetan.
Maite Ibarra: “Segurtasuna herritarren pertzepzioen gainetik eraikitzen da, eta datu hauek lasaitasuna eman behar diote gure gizarteari”
“Datu objektiboek erakusten dute Arrigorriaga herri segurua dela”, ondorioztatu du Maite Ibarra herriko alkateak. “Ez bakarrik gure inguruko herriekin alderatuta, baita Bizkaiko batezbestekoarekin alderatuta ere. Segurtasuna herritarren pertzepzioen gainetik eraikitzen da, eta datu hauek lasaitasuna eman behar diote gure gizarteari”
☉ Arrigorriaga
Zabalik da Arrigorriagako ‘Oporretan ere, euskaraz’ udalekuetan izena emateko epea
Helburua herriko haurrek apirileko oporraldiaz euskaraz gozatzea da, aisialdi giroan, eskola-girotik kanpo hizkuntzaren erabilera indartuz”, azaldu dute udal ordezkariek
Martxoaren 18ra bitartean zabaldu dute Arrigorriagako ‘Oporretan ere, euskaraz’ udalekuetan izena emateko epea.
“Ekimen honen helburua 2015 eta 2020 urteen artean jaiotako herriko haurrek apirileko oporraldiaz euskaraz gozatzea da, aisialdi giroan, eskola-girotik kanpo hizkuntzaren erabilera indartuz”, azaldu dute udal ordezkariek.
Udalekuak apirilaren 7tik 10era antolatu dituzte 09:30etik 13:30ak bitartean. Izena emateko modu bi daude: udaletxeko HAZen (08:00-13:00ak bitartean) edo Abusu zein herriguneko kultur etxeetan (16:00etatik 20:00ak bitartean). Beste aukera bat telematikoki egitea da arrigorriaga.eus webgunearen bidez.
Bete beharreko baldintzak
Arrigorriagako Udaletik azaldu lez, parte hartu nahi duten haurrek Arrigorriagan erroldatuta egon behar dute, 2015 eta 2020 urteen artean jaioak izan (6 eta 11 urte bitartekoak) eta eskolan B edo D ereduetan ibili. “Gainera, begiraleekin eta taldekideekin moldatzeko ahozko euskara maila egokia izatea eskatzen da”, gehitu dute.
Onartuen zerrenda martxoaren 23an argitaratuko dute udal webgunean. Edukiera mugatua izango da. Beraz, epeak errespetatzea eskatu dute udalekuetako antolatzaileek.
☉ Arrigorriaga
M17ko grebak eragina izango du Arrigorriagako udal-zerbitzuetan
Gobernu-taldeak bat egin du greba orokorrarekin eta Arreta Zerbitzuan (HAZ), kultur etxeetan, kiroldegian edo udal bulegoetan gorabeherak egon daitezkeela deitoratu du
Arrigorriagako udal gobernu taldeak bat egin du Hego Euskal Herriko gehiengo sindikalak datorren martxoaren 17rako deitu duten greba orokorrarekin eta aldi berean iragarri du horrek eragina izango duela zenbait udal zerbitzuetan.
EH Bilduk, Arrigorriaga Garak eta NOAk osatutako Arrigorriagako udal-gobernuak bat egiten du eskakizun honekin, “justizia sozialean eta langileen eskubideen defentsan oinarritutako politika publikoen aldeko konpromisoa berretsiz”, eta, horregatik, greba egingo dute asteartean.
Grebaren eraginez gorabeherak egon daitezke Arreta Zerbitzuan (HAZ), kultur etxeetan, kiroldegian edo udal bulegoetan, aldaketa edo etenekin. “Barkatu greba-eskubidea erabiltzeak sor ditzakeen eragozpenak”, iragarri dute Arrigorriagako udal ordezkariek.
Gutxienezko soldata, ardatz
Datorren martxoaren 17an, greba orokorra ELA, LAB, Steilas, Hiru eta Etxalde sindikatuek deitu dute, gutxieneko soldata propioaren alde. Deialdiaren leloak (“Gutxieneko soldata hemen erabaki”) jasotzen duen bezala, helburua Hego Euskal Herrian ezarriko den Lanbidearteko Gutxieneko Soldata (LGS) bat lortzea da.
ELAk, greba orokorra deitzen duten gainontzeko sindikatuekin batera, 2026rako 1.500 euroko LGS bat proposatzen du. Mitxel Lakuntza ELAko idazkari nagusiak greba orokorraren aurkezpen ekitaldian parte hartu zuen eta egungo LGSak ez duela bere funtzioa betetzen adierazi zuen. “Inork ezin du errealitate bat ukatu; hemen ezin da 1.184 eurorekin bizi”.
☉ Arrigorriaga
Arrigorriagako Udalaren izenean informazio konfidentziala eskatzen ari direla salatu dute udal ordezkariek
“Udalak ez du inolako kanpainarik abiatu datu horiek eskatzeko”, argitu dute udal ordezkariek eta datu pribaturik ez ematea ohartarazi dute
Arrigorriagako Udaletik jakinarazi dute ezezagun batzuek Udalaren izenean informazio konfidentziala eskatzen ari direla etxez etxe.
“Udalak ez du inolako kanpainarik abiatu datu horiek eskatzeko”, argitu dute udal ordezkariek eta datu pribaturik ez ematea ohartarazi dute.
“Horrelakorik gertatuz gero, deitu berehala Udaltzaingora”, gomendatu diete herritarrei. Horretarako telefono zenbaki bi ahalbidetu dituzte: 944 020 201 eta 651 705 970.
☉ Arrigorriaga
Arrigorriagako Jasokakoek Argentinara egindako bidaiaren inguruko ‘Harri, Egur eta Bihotz’ dokumentala emango dute Lonbon
Martxoaren 27an proiektatuko dute dokumentala Arrigorriagako Lonbo aretoan, 18:00etan
Datorren martxoaren 27an ‘Harri, Egur eta Bihotz’ izeneko dokumentala emango dute Arrigorriagako Jasoka Herri Kirol Klubeko kirolariek Lonbo aretoan, 18:00etan.
Zinta horretan, Argentinako Tandil hirira egindako bidaia kontatuko dute Arrigorriagako elkartekoek: “Gure Tandileko Euskal Asteko bizipenak kontatuko ditugu lehen pertsonan: zelan bizi izan genuen, ezagutu genituen pertsonen testigantzak ezagutuko ditugu… denetarik!”, aurreratu dute Jasokatik.
“Bizitza osorako markatu gaituen bidaia baten kontakizuna da honako hau. Herri kirolak Argentinara eramatearen emozioa, Tandilgo Euskal Astean egindako erakustaldia, eta milaka kilometrora egon arren, euskal diasporarekin herri bereko kide sentitzearen indarra”.
Dokumentalaren helburua bidaia hura egiteko laguntza eman zuten pertsona, denda, taberna… jende guzti horri eskertzea dela azaldu dute Jasokatik. “Nahiko hunkigarria izango da”, aurreratu dute. “Gure ahotsarekin entzungo dalako euskal diasporak emandako harrera”.
GEURIAk iazko martxoan izan zuen Argentinara egin beharreko bidaia honen berri, Jasokako Marta Camacho eta Nerea Espinosa kirolarien eskutik. Izan ere, horren inguruko berbaldia izan genuen beraiekin.
Adiskide Pilota Elkarteak txapelketa berezia martxan jarriko du Galdakaon: 14 eta 99 urte bitarteko jokalariak gonbidatu ditu
Jokalari hauek dira 2026ko Basauriko Selekziorako hautatuak
Txulalai taldeak dantzan jarriko ditu gaur Usansoloko umeak eta familiak
Argazkiak | Emakume Ekoizleen Nekazaritza Azokak ehunka lagun elkartu ditu Ugaoko kaleetan
Argazkiak | Ekain Perrino herrikideari babesa adierazteko elkarretaratzea egin dute Basaurin
Argazkiak | Ugaotarrek “Egunak eta gauak gureak dira” oihukatuz hartu dituzte herriko kaleak, M8an
“Oso eskertuta gaude eskualde honetan Errigorak bere tokitxoa izatea GEURIAri esker”
Bideoa | Besopean Guraso Elkartea: «Herri kirolekin haurren arteko aurrez aurreko harremanak sustatzen ditugu»
