☉ Arrigorriaga
Iraia Urraca: “Herriko mugimendu kulturalak dira ilusio handienarekin hartzen diren proiektuak”
Gizarte zerbitzuetan langilea Arrigorriagan, herriko ekintzetan eta mugimenduetan parte hartzailea eta, tartea libre duenean, aktore. Batean edo bestean, seguru herrian ikusi duzula. Iraia Urracarekin egon gara
Gizarte zerbitzuetan egiten du lan Iraia Urraca Dieguezek (Arrigorriaga, 1984). Gizarte Lanen eta Gizarte Hezkuntzako ikasketak bukatu ostean Arrigorriagako Udalean lan egiten hasi zen. Lanbide egonkorra eskuratu bazuen ere, Urraca betidanik erakarri du kultur mugimenduak eta Kabia Antzerki Konpainiako ikastaro amaierako antzezpen bat egiteko Alopargo taldea sortu zuen ikastaroko lankide batzuekin. Hortik aurrera, bokazioa bere pasioarekin uztartu du arrigorriagarrak: gizarte-lana eta antzerkigintza.
28 urte zenituela murgildu zinen antzerkiaren munduan. Zer dela eta? Neure burua pertsona espresibotzat jo dut betidanik eta jakin-mina betidanik eraman izan dut barruan. Ikasketa kontuengatik Ekuadorrera joan nintzen eta bizitzaren erritmoak egin nahi nuen hori burutzea galarazi zidan, nolabait. 28 urterekin antzerkira salto egiteko erabakia hartu nuen, eta harrez geroztik ez dut pasio hori askatu nahi izan.
Zer nolako ikasketak dituzu? Gizarte Lanen ikasketak burutu nituen eta bukatzean Gizarte Hezkuntzarekin hasi nintzen, lanarekin tartekatuz. Hori izan da berez nire lanbidea ikasketak bukatu nituenetik. Aurrerago, 28 urte nituela antzerkiaren inguruko formazioa jasotzen hasi nintzen. Ez zen araututako formakuntza izan berez, Bilbo Eszenak antolatzen zituen ikastaro batzuk baizik. Ikastaro horietan lehen harremana ezartzen zen antzerkiarekin, eta horrelako zenbait ikastaro egin ostean Kabia Antzerki Konpainiara egin nuen salto eta eurekin Sorkuntza Eszenikoaren lehen ikastaro luzean izan nintzen.
Antzerkiak jaten eman ez arren, lotura indartsua duzu arte eszenikoekin. Ez dut aukera horretan zentratu nahi izan, ez dut antzerkiaren esparruan buru belarri egon nahi izan. Gizarte hezkuntzarekin lotura duen lanean murgilduta nengoen eta arratsaldeak zein asteburuak libre nituen. Horrek aukera ematen zidan antzerkiarekiko formazioa jasotzeko.
Iraia Urraca Dieguez / Geuria
Hala ere, antzerkiko hainbat lanen parte izan zara. Kabian hasi nintzenean ikastaroa antzerki-pieza txiki batekin bukatzen genuen eta nirea Bertolt Brechten ‘Horacios y Curiacios’ izan zen. Kabiako Borja Ruiz zuzendariak obra horretatik hasita lan berri bat egin genezakeela esan zigun, horretarako konpainia propioa sortu behar genuela proposatuz. Alopargo sortu genuen eta gaur egun bertan dihardugu. ‘Horacios y Curiacios’ egin ahal izateko urte bi eman genituen eta emanaldiak egiten ari ginela Gaitzerdi teatrotik deitu ninduten. Eurekin lan egin nuen paraleloan, ‘Expediente 3 2 1’ antzezlanean eta Bilboko Gau Zurian profesional bezala lan egiten, bi urtez jarraian. Alopargorekin ‘Rebelión en La Granja’ ere egin genuen 2020ko maiatzean, estreinaldia Arrigorriagan bertan izanik.
Baina 2020a urte zaila izan zen, gero! Uda ostean areto-antzerkiko mekanismoa martxan jarri zen berriro, baina Koronabirusa dela eta urte bukaerarako eta 2021erako lotuta geneukan bira bertan behera utzi behar izan genuen. Biraz gainera, hainbat emanaldi ere pikutara joan ziren, zoritxarrez.
Nolakoa da Arrigorriagarekin daukazun lotura? Betidanik bizi izan naiz Arrigorriagan eta herriko hainbat mugimendutan egon naiz, eta antzerkiarekin hasi nintzenetik batez ere arlo kulturalean murgilduta egon naiz: inauteri herrikoiak, Gabonak, Euskararen Eguna…
Nola sortu zen Euskararen Eguneko bideoan parte hartzeko ideia? Herri honetako biztanleak ez gara asko eta elkar ezagutzen dugu. Udalak proiektu honen inguruko proposamena egin zion prentsa arloko arduradunari eta nire izena agertu zen. Herritik sortzen diren mugimendu kulturalak ilusio gehienez egiten diren proiektuak dira niretzat, jendeak ilusioa eta orduak ematen dituelako bertan inolako interesik gabe, eta horietan parte hartzeak benetan asebetetzen nau. Kulturgintzan eta sorkuntzan benetan sinisten dut.
Iraia Urraca Dieguez / Geuria
Nola konbinatzen dituzu lanbidea eta teatroa? Teatroarekin ez gara profesionalak gure proiektuek ez dutelako hiruzpalau hilabeteko lana behar estreinaldiak egin ahal izateko. Zentzu horretan amateurrak gara, eta astean behin edo birritan elkartzen gara taldekideok, lana pixkanaka-pixkanaka egiteko: azken batean, gainontzeko taldekideek ere euren lanbide propioa ere badute eta gure obrak zazpi edo zortzi aktorez osatutakoak izan ohi dira, oso koralak.
Koronabirusak zure lana ere baldintzatu izan du azkenaldian. Oso arraroa izan zen Mari Domingi pertsonaia maskararekin antzeztea. Mingarria izan zen niretzat, aktore bati ezin zaiolako ahotsa kendu edo aurpegia estali. Nire aurpegia gorputzaren atal garrantzitsua da adierazpenerako, eta ‘bozal’ hau jartzea benetan gogorra egin zitzaidan. Hala ere, tokatu zaigun egoera dugu honako hau eta osasun-neurriak bete behar ditugu. Koronabirusak bi eratan eragin die arte eszenikoei: kolpe ekonomikoa izan da alde batetik, ikuskizun bakoitzaren atzean langile ugari dagoelako: artea ez da abstraktua zentzu horretan. Beste alde batetik kolpe emozionala jasan dugu, sorkuntza prozesu batean denbora asko egon ostean proiektu bat bertan behera uztea eta etorkizunean zer gertatuko den ez jakitea kolpe izugarria da. Gorabehera emozional ugari sortzen dira orduan.
Nola moldatu zinen itxiera garaian teatroari dagokionez? Momentu hartan ezinezkoa zen etxetik ateratzea. Orduan, antzerkiaren kulturaren inguruko saioak jasotzen hasi ginen Borja Ruizen eskutik. Astean behin bere klaseak izaten genituen, eta kontaktua, dinamika eta gorputza faltan bota bagenituen ere saio horiek oso ondo egon ziren.
Kontakturik gabeko antzerkia egitea posible al da? Sorkuntza prozesu batean murgildu gara duela gutxi eta ez dago zertan kontaktu fisikoa egon beharrik. Kontaktua derrigorrez egon behar denean, osasun-neurriak betetzen dituzten metodoekin egiten dugu lan. Hala ere, sorkuntza ‘mahai gainean’ egiten hasi gara orain eta bufoien inguruko formakuntza-saioa jaso dugu: kontaktu fisikorik gabeko saioak egitea posiblea dela erakutsi digu esperientzia honek. Egoerara moldatzen joan gara astiro-astiro.
Osasun-egoera kili-kolo egon arren, Arrigorriagako Udalak osasun-neurriak betetzen dituen jarduera ugari abiarazi ditu Gabonez geroztik. Bizi dugun egoera txar honetan badira gauza positibo ugari. Antzerkiak eta kulturak orokorrean gizartean duen garrantziaz jabetu gara. Pertsona guztiok sentipenak askatu behar ditugu nolabait eta kulturak hori egiten laguntzen digu. Itxiera garaian musikari esker dantzatu ahal izan dugu eta zinemari esker arazoetatik urrundu egin garela uste dut, besteak beste.
☉ Arrigorriaga
Doako edoskitze tailerra antolatu du Arrigorriagan Altzoan Zaintza Sareak
Tailerra interesa duten emakume guztientzat antolatu dute otsailaren 12an, 17:00etan eta aurretiko esperientziarik ez dela behar nabarmendu dute Altzoanetik
Altzoan Zaintza Sareak, Ene Amatxorekin elkarlanean eta Arrigorriagako Udalaren zein Rural Kutxaren babesarekin doako edoskitze tailerra antolatu du Lamiaena emakumeen etxean.
Tailerra interesa duten emakume guztientzat antolatu dute otsailaren 12an, 17:00etan eta aurretiko esperientziarik ez dela behar nabarmendu dute Altzoanetik.
“Edoskitzea elikadura baino askoz gehiago da: lotura, informazioa, erabakiak eta laguntza ere bai”, iragarri dute Altzoan Zaintza Saretik. “Horregatik, edoskitze tailer honetara gonbidatzen zaitugu, interesa duten pertsona guztientzat irekia: haurdun egon edo ez, edoskitze prozesuan ari direnak, etorkizunean ama edo aita izan nahi dutenak, edo, besterik gabe, jakintza handitu eta lagundu nahi dutenak”.
Gune segurua, errespetuzkoa eta inklusiboa izango da, errealitate eta ibilbide ezberdinetatik hitz egiteko eta zalantzak partekatzeko. “Zure zain gaude!”.
Izena emateko Instagram bidez idatzi ahal dute interesdunek edota 660 202 438 telefono zenbakira Whatsappa bidali (Eneritz @eneamatxo)
☉ Arrigorriaga
Arrigorriagako Garrikoko kirolariek 21 domina eskuratu dituzte Euskadiko Teknika Txapelketan
Urrezko zortzi domina, zilarrezko beste zortzi eta brontzezko bost eskuratu dituzte joan den asteburuan, Bilbon
Joan den asteburuan Taekwondoko Euskadiko Teknika Txapelketa antolatu zuten Bilboko Miribilla pilotalekuan eta bertan izan ziren Arrigorriagako Garriko Taekwondoko kirolariak.
Guztira 21 domina eskuratu zituzten: urrezko zortzi, zilarrezko beste zortzi eta brontzezko bost.
Hauek izan ziren domina horiek eskuratu zituzten borrokalariak, kategoria bakoitzeko:
Emakumezkoen hirukotea, Bilbon // Garriko Taewkondo taldea
Kadeteak emakumezkoak
– Lur guerra urrea
Kadete mutilak
– Izei Intxaurraga: urrea
Kadeteak A emakumezkoak
– Aiara Alves: zilarra
– Leire Perea: brontzea
Kadeteak A mutilak
– Julen Fernandez: zilarra
– Iago Garcia: brontzea
Bikote kadetea
– Iago Lur: urrea
– Julen Aiara: zilarra
– Izei Leire: brontzea
Junior emakumezkoak
– Laura Ferreira: urrea
– Irati Amador: zilarra
Junior mutilak
– Iñigo Pereira: urrea
– Haritz Amador: zilarra
Senior emakumezkoak
– Itxaso Hernandez: urrea
– Irati Velada: zilarra
– Ariane Martinez: brontzea
– Izaskun Velez 6
– Elaia Garcia 7
– Andrea Barona 8
– Nahia Agirre 9
Hirukote emakumezkoak
– Itxaso, Ariane, Irati: urrea
– Nahia, Izaskun, Elaia: zilarra
Senior gizonezkoak
– Javier Rodriguez 4
Bikote Junior
– Laura Ferreira Iñigo Pereira: urrea
– Irati Amador Haritz Amador: brontzea
Bikote Senior
– Andrea Barona Javier Rodriguez: zilarra
☉ Arrigorriaga
824 partaide eta txakurkros proba luzeagoa eskainiko du Arrigorriagako Ausartak Mendi Lasterketaren zazpigarren edizioak
Asteburu honetan 583 gizonek (% 70) eta 241 emakumek (% 30) hartuko dute parte urteroko “derrigorrezko” hitzorduan bilakatu den Ausartak Mendi Lasterketan
Ausartak Mendi Lasterketaren zazpigarren edizioa aurkeztu dute gaur, Arrigorriagako udaletxeko osoko bilkuren aretoan eta asteburu honetan parte-hartzaileek jantzita eroango duten kamiseta teknikoaren eredu baten ondoan.
Urtarrilaren 17an eta 18an antolatu dute zazpigarren edizioa eta 824 korrikalari izango ditu, 2025ean baino 100 gehiago. “Arrigorriaga kirolaren eta mendiaren hiriburu bihurtuko da berriro”, iragarri du pozik Maite Ibarra herriko alkateak. Igandean espero da jende gehien: bertan izena emateko epea iazko urriaren 1ean zabaldu ziren eta aste bitan saldu ziren denak. Larunbateko proban 173 pertsonak eman dute izena (116 gizon eta 57 emakume). Igandekoan 654 parte-hartzaile egongo dira (464 gizon eta 190 emakume). Laburbilduz, 583 gizonek (% 70) eta 241 emakumek (% 30) hartuko dute parte asteburu honetako probetan.
“Kirol eskaintza zabala” eskainiko duen asteburua izango dela aurreikusi du Ibarrak, edozein adineko eta prestaketa maila duten pertsonei zuzendua, hain zuzen.
Mikel Fuentes Ausartak Mendi Lasterketako kideak xehetasun guztiak eskaini diezkie komunikabideei: “Urtez urte, Ausartak Mendi Lasterketak hazkunde nabarmena izan du”, azaldu du elkarteko kideak. “Ez bakarrik parte-hartzaileen kopuruari dagokionez; baita antolakuntzaren kalitateari, ingurue naturalaren konpromisoari eta segurtasunaren aldeko apustuari dagokionez ere”.
Mikel Fuentes, gaurko prentsaurrekoan // Geuria
Makina bat berritasun
Aurtengo edizioa berrikuntzez josita dator. Lehena, txakurkros ibilbidearen aldaketa da: 5,5 kilometro eta 120 metroko desnibel positiboa izatetik 12,2 kilometro eta 440 metroko desnibel positibokoa izatera igaroko da, parte-hartzaileen iradokizunei kasu eginez.
Bigarrena, Txakurkros lasterketaren itzulera Euskadiko Txakurkros Ligara (ETL).
Hirugarrena Mendikosolo Trail Pilotoa da: “Harrera ona izatekotan, azken proba hau iraunkorra bihurtuko dugu”, azpimarratu du Fuentesek.
Laugarren berritasuna segurtasuna indartzea izango da. Bexen Cardiorekin egindako elkarlanaren ondorioz, desfibriladore bi ipiniko dituzte Arrigorriagako proban.
Bosgarrenez, lasterketaren sarrera ofiziala etiketa berdearekin egingo dute aurten. Honek esan nahi du ingurumenarekin konpromisoa berretsiko duela asteburuko probak.
Solidaritatea, ardatz
Lasterketaren ekimen solidarioa ahaztu behar ez den beste kontu bat da: aurten ere, jasoko den diruaren zati bat Ane Sindrome Red ekimenari bideratuko diote Ausartakekoek: izen emate bakoitzak euro biko prezioa izango du. “Horrek egiten du Ausartak-en proba hain berezia parte-hartzaileen artean”, azpimarratu du Maitek eta eskerrak eman dizkio Ausartak Ludiko Kirol Elkarteak egindako lanari.
Egitaraua | Ausartak Mendi Lasterketa 2026
Urtarrilak 17, larunbata
10:00 Ausartak Canitrail
10:30 Mendikosoko Trail (proba pilotoa)
Urtarrilak 18, igandea
10:30 Mendi Maratoi Erdia
11:00 Hasiberri Trail
11:10 Martxa Laburra
☉ Arrigorriaga
Arrigorriagako Amalur liburudendak aitortza berezia jaso du Merkataritza Jaialdian euskararen alde egindako lanagatik
Gainera, udalerriko Kreta Loreak saltokia finalista izan da Bizkaiko Erakusleiho Lehiaketan
Bizkaidendak elkarteak Merkataritza Jaialdia antolatu du duela egun batzuk eta Arrigorriagako Amalur liburudendak aipamen berezia jaso du euskararen alde egindako lan eta konpromisoagatik. Amalurrek 1995ean zabaldu zituen ateak lehen aldiz eta gaur egun arte euskarazko liburu eta jolas ugari dituzte adin guztietako haurrentzat. Iker Albizua Uriondo da liburutegiaren jabea eta bertako produktu guztiak ezagutzen ditu, bezero bakoitzari gomendioak emanez.
Bestalde, Kreta Loreak saltokia finalista izan da Bizkaiko Erakusleiho Lehiaketan.
Maite Ibarra Arrigorriagako alkatea eta Gaizka Ibarretxe Ekonomia zinegotzia Bizkaidendak elkarteak antolatutako ekitaldian izan ziren: “Harro gaudezuen lanaz eta herriari ematen diozuen biziagatik”, azaldu zuten.
☉ Arrigorriaga
Argazkiak | Errege Magoen Kabalgatak eta epifaniak jendez bete du Arrigorriagako plaza
Arrigorriagarrek harrera beroa egin diete Errege Magoei udaletxe aurreko plazan, 3ºtan
Iritsi dira Hiru Errege Magoak Arrigorriagara! Beste urte batez, Arrigorriagako udaletxeko plaza jendez beterik egon da 19:00etan eta hotzak ez du ikuskizuna geldiarazi.
Aurtengo 51. edizioan 150 pertsona baino gehiagok hartu dute parte eta haurrek Meltxor, Gaspar eta Baltasar herrian ikusteko aukera izan dute. Urtero lez, udaletxeko plaza antzinako herri batean bihurtu da,
19:00ak aldera 3ºC erregistratu dituzte termometroek, azken urteetako tenperatura hotzenak.
Doako edoskitze tailerra antolatu du Arrigorriagan Altzoan Zaintza Sareak
Eder Lozano Heras: “Gure helburua da umeek 112ra deitzen ikastea eta larrialdi-zerbitzuak heldu aurretik zer egin behar duten jakitea”
Matxitxako kaleko zubia eraitsiko dute Sarratuko metro geltokia eraikitzeko: obrak bi urtez luzatuko dira
Argazkiak | Errege Magoek ilusioa eta gozokiak banatu dituzte Galdakaoko kabalgatan
Argazkiak | Errege Magoen Kabalgatak eta epifaniak jendez bete du Arrigorriagako plaza
Argazkiak | Errege Magoek ehunka gozoki eta konfeti banatu dituzte Basauriko kabalgatan
Eder Lozano Heras: “Gure helburua da umeek 112ra deitzen ikastea eta larrialdi-zerbitzuak heldu aurretik zer egin behar duten jakitea”
Bideoa | Ana Guerra, Ugaoko Izarra: «Ugaoko familiak kabalgata herrian bertan ikusteko sortu da ideia»
