Koronabirusak eragindako osasun krisiak krisi ekonomikoa dakar berarekin batera. Eta ondorio ekonomiko horiek arintzeko asmoz, 500.000 euro bideratuko ditu Udalak datozen hilabeteotan tokiko merkataritza, enplegua eta egoera zaurgarrian dauden taldeak babesteko, baita desinfektatzeko eta garbitzeko lanak zein gizarte zerbitzuak handitzeko ere. Egoera aldakorra izanda, iazko aurrekontua luzatzeko erabakia hartu du gobernu taldeak, eta aurrekontu horietan bertan zenbait aldaketa egin krisiari egokitzeko asmoz. Aldaketa horiek, albistearen ondoko zerrendan laburbiltzen dira. Neurri hauekin batera, gobernu taldeak iazko aurrekontuak luzatu eta euren gainean aldaketak egiteko erabakia hartu zuten.
Bai milioi erdiko plana, bai aurrekontuen luzatzea eztabaidagai izan ziren maiatzeko osoko bilkuran. Osasun-alarma ezarri zutenetik alderdi politikoen arteko harreman gehienak telematikoak izan dira Arrigorriagan. Deskonfinamenduaren arintze neurriekin batera, joan den astean informazio batzordeak egiten hasi ziren udaletxean eta maiatzaren 28an egin zuten osoko bilkura, alarma egoera hasi zenetik lehenengoa. Udal langile, alderdietako ordezkari eta osoko bilkura ikustera inguratu ziren herritarren arteko segurtasun tartea zainduta eta maskara jarrita egin zen bilkura.
39 puntuko gai-ordena izan zuen osoko bilkurak, tartean, udal aurrekontuko hainbat kredituren aldaketak eta diru-laguntzen plan estrategikoaren aldaketa. Aho batez onartu ziren krisiari aurre egiteko neurriak. “Egindako bilerak eta negoziaketa guztiak aintzat hartzea nahiko nuke. Guztion arteko lan nekeza izan da eta oso harro gaude. Orain aurrera begiratzeko unea da”. Zehazki horiek izan ziren Maite Ibarra alkateak aurrekontuaren eta krisiari aurre egiteko neurrien onarpenaren inguruan esandako hitzak. Aho batez onartu ziren arren, ez zen giro udalbatzan. EAJko Sonia Rodriguez zinegotziak gogor kritikatu zuen negoziaketa bera: “Herriak merezi du akordio hau eta aldeko bozka eman dugu, baina horrek ez du esan nahi ez dugunik kritikarik egingo. Ez da negoziaketarik egon. Orain dela bi hilabeteko neurriak dira onartzen ari garen hauek. Argitaratu zenituzten egunean bertan luzatu zeniguten proposamena eta arratsalderako prentsak argitaratu zituen”. Argoitz Gomez sozialistak, ostera, neurri hauek onartzea herritarren alde egitea dela esan zuen. NOA alderdiko José Ignacio Fernández zinegotziak ere aldeko bozka eman zuen.
Ezkerretik eskumara, Sonia Rodriguez (EAJ), Perio Garmendia (EH Bildu) eta Maite Ibarra alkatea (EH Bildu) / Geuria
ADOSTUTAKO KONTUEI BURUZ. Krisiak eztanda egin aurretik, EH Bilduk eta Arrigorriaga Garak osatzen duten gobernu taldeak gainontzeko indarrekin adostutako aurrekontuak lortu zituela esan zuen EAJk. Bideratuta zeuden kontuak, aldiz, egungo egoerari aurre egiteko erabilgarriak ez zirela azaldu zuen Peio Garmendia Ogasun eta Kontuen zinegotziak: “Bi aukera uzten zizkigun: aurrekontu berri batzuekin hasi, edo ditugunak luzatu, beharrezkoak diren aldaketak eginez. Eta bigarren aukera hobetsi dugu”. Otsailetik oso bilkurarik egin ez arren, alderdien bozeramaileen hamabi batzar egin dituztela zehaztu du gobernu taldeak. Erabakiaren arrazoi nagusiak dira, batetik, herritarrek, merkatariek eta taldeek epe laburrean laguntzak jasotzea; bestetik, “hartutako erabakiak eta neurriak modu arin eta eraginkorrean hartzea”, aurrekontu berri baten prestaketak eskatzen duen lanketa alde batera utzita. Iaztik zehaztuta zeuden inbertsioetatik exekuzio fasean edo diru laguntza jasoko dutenak soilik mantenduko direla adierazi du Udalak.
Jeltzaleek euren haserrea agertu zuten krisi aurretik adostutako aurrekontuak bertan behera utzi dituelako gobernu taldeak: “Akordio ona lortu genuela uste dut. Pena da aurrekontuak luzatzea. Ez dut uste herritarrei mesede egiten dienik, eta uste dut gobernu taldeak bere interesei begiratu diela”. Garmendiak berriro azaldu zuen euren jarrera esanez ez zeukala zentzurik orain aurrekontu berria onartzeak: “Urte hasieran adostutakoa onartu eta ondoren krisiari aurre egiteko neurriak onartzeak edo berriro aurrekontu oso bat negoziatzen hasteak ez du zentzurik. Zertarako nahiko genuke urrian martxan hasiko litzatekeen aurrekontu berri bat?”.
