Sareak

☉ Arrigorriaga

Luken Hernandez: “Beste kiroletan ikusi ez dudan umiltasuna bizi izan dut eskalatzen”

|

Luken Hernandez / Utzitakoa

Txiripaz deskubritu zuen Luken Hernandezek (Arrigorriaga, 1995) eskalada. Saskibaloian aritzen zen bera, Paduran, eta entrenamendu batetik irteterakoan eskalada-murrura (rokodromora) joateko gonbita luzatu zion lagun batek. “Zergatik ez?”, pentsatu zuen, eta han azaldu zen biharamunean, bakeroak jantzita, eskalatzeko prest. “Ordura arte Gabonetako PINean ikusitakoarekin bakarrik identifikatzen nuen eskalada”, aitortu du arrigorriagarrak. Etxera bueltatu zen korrikan kirol zapatila eta praka batzuen bila, eta orduan bai, bere lagunarekin batera eskalatzen hasi zen. Hura izan zen bere lehen eguna, 15 urterekin, eta ordutik ez da gelditu. Eskaladaz eta kirol honen inguruan mugitzen denaz berba egin dugu berarekin.

Txiripaz hasi zinela diozu.
Nahiko modu bitxian hasi nintzen, egia esan. Gogoan dut saskibaloiko entrenamendu batetik irtetean lagun batek esan zidala hurrengo egunean Basauriko rokodromora joan behar zuela, eta ea berarekin joateko interesik nuen. Hormetara igotzea eta lurrera erortzea? Ez, barkatu. Baina, ez dakit zergatik, baliteke entrenamendutik oso motibatuta nentorrelako-edo, ez dakit, proposamena onartu nuen.

Zer behar da eskalatzen hasteko?
Batez ere, motibatuta egotea. Kirol hau ez da beso batekin dominadak egitea bakarrik. Behin eta berriz probatu eta behin eta berriz huts egitea da. Apurka-apurka, baina, bazoaz hobetzen, eta sekulako asebetetzea sentitzen duzu aurrerapauso txikiren bat ematen duzun bakoitzean. Materialari dagokionez, behar duzun lehen gauza oinarrizko katu-oinak dira: Decathloneko 30 eurokoak, adibidez, nahikoa dira eskalatzen hasteko. Magnesioa eta hura gordetzeko zakutxoa ere garrantzitsuak dira, noski, eskuak izerditu ez daitezen. Blokean eskalatu nahi baduzu, ‘crash pad’ bat erosi edo bat baino gehiago duen lagunen batekin joan beharko duzu. Ni sokarekin hasi nintzen, eta horrek material gehiago eskatzen du: soka, arnesa, kilkerra, mosketoia eta express zintak. Hori da, funtsean, soka -edo bloke- saio baterako behar duzun materiala, betiere kontuan hartuta sokarako taldekide bat beharko duzula nahitaez (autoasegururik ez baduzu). Blokerako, berriz, zure kontura joan zaitezke koltxoneta batekin.

Hego Uriben non eskalatu daiteke?
Arrigorriagan nahiko egoera tamalgarrian dagoen rokodromo bat dago. Lastima, gero eta jende gehiagok praktikatzen baitu kirol hau gure herrian. Ni Basaurin hasi nintzen eskalatzen. Rokodromo txikia da, eta presak ez dituzte askotan aldatzen. Gasteizera edo Kataluniara mugitu izan ez banintz… Ez dakit ba nik. Niretzat meritu handia du hemen inguruan bakarrik eskalatzen duen eta oso motibatuta jarraitzen duen jendeak. Dena den, inguruan badaude aukerak, eta horietako batzuk ez daude horren gaizki. Galdakaon kiroldegiko rokodromoa dago, Etxebarrin ere bada beste bat, Ugaon kiroldegikoa eta rokodromo pribatua daude. Aipatutako guztiek “old school” settinga dute. Niretzat, aukera horietatik guztietatik, zalantzarik gabe, Ugaon dagoen rokodromo pribatua da onena. Entrenamendu ona egiteko beharrezko tresnak ditu, eta presak, era askotakoak. Dena den, nik Leioako eta Dimako rokodromoetan entrenatzen dut Arrigorriagan nagoenean. Eta, aukeratzekotan, Katalunia aldea aukeratuko nuke Estatuan.

Besoez eta eskuez aparte, oinak eta hankak oso garrantzitsuak dira kirol honetan, ezta?
Hankek berebiziko garrantzia dute eskaladan. Gorputzaren posizioak eragin zuzena du zure pausoetan, eta beti ez da besoetatik tira egin behar aurrera egiteko (nahiz eta batzuetan ez den beste erremediorik geratzen). Indarrean baino, mugimenduen abilezian dago gakoa. Beraz, ez beldurtu. Besoetan indarrik ez duzula pentsatu arren, proba ezazu eskalatzen. Indarra denborarekin hartuko duzu.

Luken Hernandez / Utzitakoa

Kirol arriskutsua dela ere pentsatuko du askok.
Kanpotik begiratuta, pentsa daiteke hormara igotzen zaren bakoitzean zure lepoa jokatzen ari zarela. Barruan zaudenean baina, konturatzen zara ez dela guztiz horrela. Bistan denez, beti dago arrisku faktore bat, baina oinarrizko segurtasun neurri batzuk betez gero, ez da ondoko herrira autoz joatea baino arriskutsuagoa. Oro har, ezagutza falta handia dago kirol honen inguruan.

Zer eskalada mota praktikatzen duzu zuk?
Kirol eskalada. Hau da, 40 metro inguruko ibilbidea duten hormak eskalatzen ditut soka baten laguntzaz, aurrez harkaitzean finkatuta dauden aingura batzuk baliatuz.Igo ahala, soka aingura finkoetan lotzen dut ‘express’-en laguntzaz. Ibilbidearen amaierara iristean, kate bat dago, eta hortik zintzilikatuta jaisten naiz. Horma luzeetan ez bezala, kirol eskaladan ia denbora gehiago pasatzen duzu lurrean eskalatzen baino, zure kidea horman dagoen bitartean zu soka eman eta estutzen ibili behar zarelako.

Nola igarri duzu eskaladaren eragina zure gorputzean?
Eskalatzaileak, normalean, nahiko gorputz fibratua izaten du. Ez da gihartsuegia izaten eta gantz indize oso txikia du. Hau dena, noski, praktikatzen duzun maiztasunaren araberakoa izaten da. Atzamarrak ere pixka bat loditzen zaizkizu eskuetako tendoiak jasaten duten hipertrofiagatik. Azkenik, gure gorputzaren proportzioa kontuan hartuta besoak luzeak izaten ditugu, eskalatzen ez duen jendearekin alderatuta. Nik ez dut azken baldintza hori betetzen, baina eskaladan aritzen diren kirolarien joera orokortu bat da.

Zer ematen dizu eskaladak?
Kirol honek beste ezerk ematen ez didan lasaitasuna ematen dit. Erabateko deskonexioa da. Horma-bide bat eskalatzen ari zarenean eta hurrengo pausoak ahalegin berezi bat eskatzen dizunean, une horretan modu ikaragarrian fokalizatzen duzu zure arreta. Zure bizitzako gainerako alderdiak bigarren plano batera pasatzen dira; ez dago denborarik, ez dago lanik, ez dago ikasketarik. Zu eta haitza bakarrik zaudete, eta garrantzitsuena hurrengo heldulekura heltzea da. Hori da zure burutik pasatzen den gauza bakarra, besterik ez. Axola duen guztia hemen eta orain dago. Hori da niretzat eskaladak duen gauzarik politena eta sentsazio hori bizitzeagatik bakarrik merezi du eskalada probatzea. Kontzentrazio konstantea behar duzu. Arreta galduz gero, mugimenduak kateatzeko aukera galtzen duzu; eskalatzeko jokoak horrela funtzionatzen du.

Luken Hernandez / Utzitakoa

Ze giro arnasten da rokodromo eta harrizko hormetan?
Giroa asko aldatzen da bata eta bestearen artean, baita rokodromo motaren arabera ere. Nire esperientziaren arabera, rokodromo “komertzialenetan” aisialdi giroa nagusitzen da, jendea ondo pasatzera doa hara. Aldiz, “old school” egitura duen rokodromo batean, oro har, jendea entrenatzera joaten da, kronometro gehiago ikusten dira atsedenaldiak kalkulatzeko… Horrek ez du esan nahi rokodromo komertzialetan ez direnik ikusten, hauetan ere jendea entrenatzen da eta oso indartsu daude. Horma naturala entrenamenduetako rokodromoaren erabateko kontraposizioa da. Jendea patxada gehiagorekin joaten da, kronorik gabe. Bakoitzak behar duen atsedena hartzen du mugimendu eta mugimendu artean, bere gorputzaren arabera egoki deritzona, inolako presarik gabe; nekatuta dagoela ikusten badu, ez du beste ahaleginik egiten. Oro har, bi lekuetan giro polita izaten da. Bizi duzun unearen arabera, hobe bata edo bestea.

Zer nolako pertsonak ezagutu dituzu eskalatzen?
Eskaladaren mundua oso umila da. Oro har, horma naturaletara joanez gero, fama handia duen eskalatzaileekin egingo duzu topo eta naturaltasunez agurtuko zaituzte. Hau ez dut beste kiroletan ikusi; elitea beti dago besteengandik “bananduta”.Eskalada mundu lehiakorra da, baina zuk aukeratzen duzu norekin lehiatu. Hau da, lehiaketa arrunta lehiatu gura ez baduzu, lehia zeure buruarekin egin dezakezu. Bestalde, kultura ezberdinak batzen ditu eskaladak. Gurera nazioarteko jende asko etortzen da eskalatzera, eta komunean duzun faktorea eskalada denez, elkarrizketa abiatzea oso erraza izaten da. Atzerriko lagun asko egin ditut eskalatzen.

☉ Arrigorriaga

Rakel Izquierdo arrigorriagarrak irabazi du Madalenetako kartel lehiaketa “Sokan dantzan” lanarekin

Rakel Izquierdo: “Zapia luzatuz oroitzapen atseginak iristen zaizkigu, hortik dantzariak pintzetan, soka gainean dantzan. Izan ere, gustura zaudenean, edonon dantzatzen duzu”

|

Rakel Izquierdo "Sokan dantzan" kartelarekin // Geuria

Sokan dantzan izeneko kartelak iragarriko ditu aurten Arrigorriagako Jaiak. Madalenetako egitaraua jasoko duen diseinuen proposamena egiteko epea maiatzaren 22ra arte egon da zabalik, eta aukerak baloratu ostean, epaimahaiak ostegun honetan iragarri du erabakia: Rakel Izquierdo arrigorriagarraren lana da 2023ko kartel irabazlea.

Artistak azaldu duenez, Sokan dantzan lanak festetarako prestatzen joan gaitezkeela gogorarazten digu. “Zapia luzatuz, oroitzapen atseginak iristen zaizkigu, hortik dantzariak pintzetan, soka gainean dantzan. Izan ere, gustura zaudenean, edonon dantzatzen duzu”.

Kartelen erakusketa

Kartel hau eta lehiaketan parte hartu duten gainontzekoak ikusteko, Edurne Garitazelaia Kultur Etxean erakusketa antolatuko duten ekainaren 1etik 30era bitartean (18:00etatik 20:00etara). Bertan egongo dira aurkeztu dituzten 7 obrak: Arrigorriagako lagunen 5 kartel, galdakoztar baten lana eta Murtziako parte hartzaile baten diseinua.

Osorik irakurri

☉ Arrigorriaga

#M28 | Berrurbanizazio gehiago eta gazteentzako alokairu sozialak proposatu ditu Arrigorriagako EH Bilduk

Osasun zentro berria martxan jartzea eta auzoetan jarduketekin jarraitzea dira EH Bilduk izango dituen ildo nagusietako batzuk maiatzeko hauteskundeetan

|

Osasun eta Higiene auzoa // Google maps

Datorren legegintzaldirako hauteskunde-programan proposatu dituen azken neurriak kaleratu ditu Arrigorriagako EH Bilduk. Koalizio ezkertiarrak osasunari, erronka ekologikoari, irisgarritasunari eta haurrei zein gazteei zuzendutako proiektuei eskaini nahi die lehentasuna beste behin Udalera heltzen badira.

Jarduketarik garrantzitsuena herrian osasun zentro berria sortzea izango dela azaldu dute: “Behin HAPO onartuta, negoziazioak hasiko ditugu Adifekin eta Osakidetzarekin”. Horrekin batera, zaurgarrienei zuzendutako gizarte zerbitzuak indartzen eta herritarren sare komunitarioa bultzatzen jarraituko dutela gehitu du alderdiak, eta ongizate emozionalari lotuta, nerabeen osasun psikologikoa bermatzeko programa espezifikoak martxan jarriko dituela.

Haurrei eta gazteei zuzenduta, beste zenbait esku hartze proposatu dituzte kideek. Eskola Bidea eta patio inklusiboa bezalako dinamikekin jarraitzeko, “familiekin eta eskolarekin harreman estua” mantentzen jarraitzeko konpromisoa hartuko dute: ikasleen kontseilua martxan jarriko dute erabaki bateratuak hartzeko, eta eskolako patioa eta herriko jolas parkeak berrituko dituzte haien laguntzarekin. Gazteei dagokionez, bi neurri proposatu ditu EH Bilduk datozen lau urteetarako: Kultur Etxeko ikasketa gelan ordutegia malgutzea eta alokairu sozialeko etxebizitzak martxan jartzea.

Auzo irisgarriak

Programaren beste oinarrietako batzuk hirigintza jarduketak eta auzoetako irisgarritasun neurriak izango dira. Horrela, Osasun eta Higieneko eta Oiargango berrurbanizazioekin jarraitu nahi dute, Oiargango geltokia berritu, Lonboko parkinga birmoldatu eta komun publikoak eraiki, Torre de Baruan txandakako parkinga egin, San Juan auzoa berritzeko prozesu parte hartzailea abiatu eta Lanbarketan, Martiartun, Kubo-Larraskon eta Axarten ere hirigintza hobekuntzak martxan jarri.

Erronka ekologikoa

Jasangarritasunari begira, herritarrak aldaketa klimatikoaz kontzientziatzea eta horri aurre egiteko udal politikak garatzea hitz eman du koalizioak. Ibilgailu elektrikoentzako karga puntuak jartzea, eraikin publikoetan panel fotovoltaikoak instalatzea, metrorako lanzadera negoziatzea eta Mendikosolo bezalako ingurune naturaletan esku hartzeekin jarraitzea planteatu dute.

Osorik irakurri

☉ Arrigorriaga

Fernando Diez: «Salba dezagun ondarea, pelikulan Ryan soldadua salbatu behar zen bezala»

Fernando Diez Moyano betidanik ibili izan da kultur-kudeatzaile lanetan. Frankismoaren ostean, Kultur zinegotzia izan zen Udalean; orain, sare sozialetatik egiten du ondarea berreskuratzeko lana Arrigorriaga Antxxineko Projecten

|

Fernando Diez, Arrigorriaga Antxxineko Project-en sortzailea // Geuria

Atzean daukan pantailan kalitate hobea dutela esango du geroago, baina, Facebook orriko argazki galeriak azkarrago ikus daitezke ordenagailu eramangarrian. “Hauek tomavistas delakoarekin atera nituen”, dio Fernando Diezek (Santurtzi, 1956), 1983an egin zituen irudi digitalizatuak banan-banan pasatzen dituela. Bat-batean altxatu eta bulegoko apalategietan bila hasten da; 20 segundotan, bueltan da ordenagailuaren mahaitxo biribilean. “Hau da filmagailua”, dio, kamera eskuetan. “Lagunak autoa gidatzen zuen bitartean, martxan, ni leihotik grabatzen nenbilen uriolek nola utzi zuten Arrigorriaga”.

Bideo horretaz gain, Arrigorriaga Antxxineko Projecten sare sozialean herriaren XX. mendeko historia fotogramekin laburtzen duen trailer bat eta uholdeei buruzko beste bat dauzka Diezek. “Hamar minutuko iraupena zeukan bateriak, eta ahal beste aprobetxatu nuen uriolen bezperako egunean: goizeko zortzietan, itsasoa zirudien guztiak”. Abuztuaren 27 hartatik 40 urte igaro ondoren, berreskuratu egin ditu arrigorriagarrak argazkiok, grabaketak, dokumentuak, hemerografia eta herritarren testigantzak: “Hautsez betetako kartoizko kaxetatik irten nahi duten oroimenak dira, gure arbasoei berreskuratzea gustatuko litzaikeenak”.

Udal hauteskundeak eta gero egin zituen grabaketak Diezek, EAJrekin Arrigorriagako Kultur zinegotzia bihurtu eta hurrengo egunean. “Ez nengoen afiliatuta ere, baina zerrendetan izena eman nuen, hainbat urtez [1970-1980] herriko elkarte kulturaletan ibili nintzenez, Arrigorriagan zer egin zitekeen banekielako”. Garai gogorrak izan ziren 1991ra arte Udalean egin zituenak, Frankismoa eta gero “urte oso politizatuak” bizi izan zituztelako: “Kultura demokratizatzeko beharra zegoen”. Esan eta pantailara begiratzen du, 50etako jaietako kartelari so: bandera gorri-horiaren ondoan iragartzen dira Madalenak, “Programa de fiestas, 1950”.

“Aurkitu nuen jaietako programa horretatik hasi nintzen hariari tiraka, argazkien bila eta jendeari galdezka”, azaldu du. Historia bat kontatzen duenean, testuinguru sozial, politiko eta kulturalean kokatzea beharrezkoa del iritzio dio, eta jubilatu zenetik, orduak eta orduak igarotzen ditu materiala biltzen, formatu digitaletara pasatzen eta sailkatzen. Bulegoko kutxak gainezka ditu herritarrek eman dizkioten zuri-beltzeko argazkiekin. Gordeta dituen azken oroitzapen pertsonalak kutxa batean eraman zizkion bere emaztearen izeba batek, Karmele Albizuak. “Arrigorriagako familia askorekin hitz egin dut, batez ere adineko jendearekin, maitasun handiz eta errespetu osoz” —dio Diezek— “Eta guztiei egin nahi diet omenaldi bat proiektu honetan”.

Jaietako albumean egun herrian bizi diren hainbat lagunen arbasoak agertzen dira. 1949ko argazkian, adibidez, Diezen aitaginarreba dago, lagunekin. “Bazkalostean igelaren jokora jolasten zuten, galaz janzten ziren eta herrira etortzen zen argazkilari batek guztiei batera ateratzen zien eguneko argazkia”. Urteek aurrera egin ahala, “modernizatzen” joan ziren ohiturak, baita Madalenetan ere. Eta 1969an, herritarrek jai paralelo eta ez ofizialak antolatu zituzten, diktadurak zikindutako garaietan. Karrozen desfilean parte hartu zuten denek, Eurovisión lehiaketa irabazi zuen Masielen mozorroarekin, batzuk; estatubatuarrak ilargira heldu zirenean jantzi zituzten astronauten jantziekin, beste batzuk.

Baina Madalenen historia Diezek bildu dituen 17 kontakizunetako bat baino ez da: Uriolek desagerrarazi zuten Ugertzako eskola eta Papelerako haurtxoena, fabrika bera, Baruako jauregi etxeak, Epifania eta beste hainbati buruz egiten du hitz kapituluetan. Mahaitxoko ordenagailuari ere kostatu egiten zaio hainbeste datu kargatzea, 906 irudi baitauzka Diezek sare sozialetan, bakoitza bere azalpenarekin. “Bisuala izatea nahi nuen”, onartu du egileak. Horretarako, narrazio soila baino zerbait gehiago erabili du, “antzerkia, zinema, eta orokorrean, bizitza oinarri duen egitura”. Eszenatokiak, aktoreak eta ekintzak lotuta daude, eta osotasunean egiten dute XX. mendeko Arrigorriagaren irudikapen fidela, ezer galdu ez dadin.

Garai hartako herriarekin alderatuta, “beharbada, orain modernoagoa eta erosoagoa izango da Arrigorriaga, praktikoa, LED argiekin eta zerbitzu hobeekin”, dio Diezek. “Baina, tamalez, nortasun historiko eta balio kultural handiko ondareak ematen zigun identitatea galdu dugu”. Horren adibideak dira Artiach familiak Madalenerrotan zeukan etxearen galera eta Aixarten zegoen monumentu oroigarria herritik kanpo lekualdatzea, eskultorean Jesús Larraza futbolari arrigorriagarra omentzeko beren-beregi herrirako prestatutako artelana izanda.

“Larrazak Athleticekin arrakasta izango zuela esaten zuen jendeak”, gogoratu du Diezek. 1929an berak ezagutu ez bazuen ere, artxiboetako dokumentu guztiek horrela biltzen zuten futbol jokalari gaztearen ibilbidea, merezimenduz josia. “Larrazak motorrak gogoko zituenez, merkatura irten eta jarraian erosi zuen Davidson bat, 16.000 pesetagatik; imajinatu, gaur egungo futbolariek daramatzaten luxuzko autoen parekoa zen orduan”, dio Diezek, prentsako ebakinei begira. Egunkariko zatien artean, 24 urteko futbolariaren eskela ere agertzen da.

Cosme Olabarrieta jokalariarekin zihoala, motorraren kontrola galdu eta Arrigorriagako zementu fabrikatik hurbil izan zuen istripua Larrazak. Bertan hil zen. Athleticek bere izenean monumentu bat egiteko enkargua egin zion eskultore bati, eta Arrigorriagan bertan jarri zuten. “Jendeak argazkiak ateratzen zituen oroigarrian, egunero, baina goizetik gauera, kamioi bat etorri, monumentua hartu eta Lezamara eraman zuen”. Historiaren zati txikia edo ez, galdu egin zen betiko. “Pentsatu nahi dut gaur egun ez litzatekeela horrelakorik gertatuko”, zalantza egin du Diezek. Ez dago seguru.

Zinegotzi zegoen garaian, oraindik gogoan dauka Madalenerrotako Artiach familiaren fabrika mantendu ahal izateko egindako lana: ez zuen lortu. 1704. urtean, errota bat existitzen zen udaletxearen eta errekaren arteko lursailean, eta hori izan zen Juan Cruz Artiach hirin ekoizlearen eskuetara heldu zen eraikina. 1937an, Gerra Zibilaren garaian, familiak Jaurlaritzari utzi zion errekuperazio ospitale gisa erabil zezan: operazio gela zeukan, 120 ohe, erizainak, medikuak eta sukaldariak. “Arkitekturaren aldetik, ez zeukan ezer berezirik, beirategi polit bat bazuen arren”, azaldu du Diezek; dena den, familia bakarraren industria izan zenez, interesgarria zen historiaren museo bilakatzeko.

1987an, Bizkaiko Foru Aldundiak jarri zuen martxan birgaitze proiektua, eta Diez bera bildu behar zen instituzioko ondarearen zuzendariarekin dena hitzartzeko. Baina bezperan, su hartu zuen fabrikak. Edo su eman zioten. “Inoiz ez dugu jakingo zer gertatu zen, edo nork egin zuen, baina seguraski interesen bat zegoen hor atzean: lursail horretan parke bat egiteko, edo batek daki”. Garapen izenean edo hirigintza espekulatiboa bultzatzeko, askok egiten dute ondarearen kontra; beste batzuek ezjakintasunarengatik, bai orain, baita lehen ere.

“Ni udaletxera heldu nintzen garaian, birmoldatu egin zuten eraikina, eta obren artean, argazkiak zituen kaxa bat aurkitu nuen”, dio. “Horiek ere bota egin nahi zituzten”, baina Diezek errekuperatu eta erakusketa bat antolatu zuen haiekin, 1983an bertan proposatu eta inauguratu zuen Kultur Etxean (egun, Lamiaena Emakumeen Etxea). “Uste dut gogoeta estrategiko eta sakona behar dela gelditzen diren ondarearen txatalak (materialak eta ez materialak) babesteko”. Kultur-kudeatzaile lanetan hainbat urtez jardun ondoren —tartean, bere enpresa propioan—, ondo daki eman beharreko pausoak zeintzuk diren: “Salba dezagun ondarea, pelikulan Ryan soldadua salbatu behar zen bezala: kosta ala kosta”.

Diezek eman du lehen horretarako lehen urratsa, Arrigorriaga Antxxinetik Project lanarekin. Momentuz, Facebooken baino ez dago ikusgai, baina etorkizunean, hedatzeko asmoa dauka egileak. “Hasieran, lagun izateko eskaerak banan-banan begiratzen nituen”, dio, barrez. Baina herritar askok erakutsi duten interesa ikusita, publiko egin du perfila, eta 300 jarraitzaile baino gehiago ditu. Orain, blog baten diseinuan ari da lanean, eta Instagram kontua zabaltzea ere ari da aztertzen. “2023an 6 istorio berri eta 3 bideo argitaratzeko asmoa daukat, baina noski, halako bolumena hartzen dutenez, lanez gainezka egongo naiz”.

Osorik irakurri

☉ Arrigorriaga

#M28 | Igogailuak, “Smartkalea” puntuak, Abusuko boulderra eta Lonboko skate pista proposatu ditu Arrigorriagako PSEk

Arrigorriagako sozialistek 11 ildoko hauteskunde-programa prestatu dute datorren legegintzaldirako

|

Lonboko aretoa eta aparkalekua // Geuria

Arrigorriagako sozialistek 11 ildoko hauteskunde-programa prestatu dute datorren legegintzaldirako. Hirigintza eta auzoak; kirola; ingurunea; hezkuntza eta kultura; gizarte harremanak; sustapen ekonomikoa eta enplegua; politika sozialak; kudeaketa ekonomikoa eta ogasuna; gazteria; berdintasuna eta euskara dira planteatu dituzten alorrak. Hauek dira bakoitzean biltzen dituzten esku hartzeetako batzuk:

Hirigintza eta auzoak

  • Oiargan auzoa berrurbanizatu
  • Santa Isabel eta Lanbarketa auzoetan igogailuak eraiki
  • Bidegorrien sarea hobetu
  • Abusuko Zentro Soziokulturala berritu
  • Santa Isabel eta Bolueta lotuko dituen oinezkoentzako bidea
  • Lobon txandakako parkinga
  • Lagunzak etxebizitzetan igogailuak jartzeko
  • Santa Isabelgo parkea eta kirol guneak birgaitu
  • Abusuko TAO
  • Abusun txakurrentzako parkea sortu eta Lonbokoa hobetu (Agility gunea eta dutxa)
  • Oiargango parkea hobetu: makina bio osasungarriak, kalistenia, solarium gunea eta uretako jolasak
  • Karabanentzako parkinga

Kirola

  • Udal kiroldegia birgaitu eta handitu
  • Montefuerte futbol zelaiko belarra aldatu
  • Oiarganen futbol salako zelaia sortu, belar artifizialarekin
  • Santa Isabelgo frontoia hobetu
  • Skate pista Lonbon
  • Abusun boulderra

Ingurunea

  • Plaka fotovoltaikoak instalatzeko laguntzak
  • Udal eraikinetan plaka fotovoltaikoak
  • Udal brigadarako eta obren brigadarako EKO ibilgailuak
  • Elektrolinerak Lonbon

Hezkuntza eta kultura

  • Lonboko agenda kulturala zaindu
  • Herriko bono kulturala sortu
  • Udalerriko Kontseilu Kulturala sortu herritarrekin
  • Aire libreko zine saioak

Gizarte harremanak

  • LGTBIQ+ Kontseilua eta Haurtzaroko Kontseilua sortu
  • Smartkalea puntuak: wifi gunea eta mugikorra kargatzeko gunea
  • Etxebizitzak birgaitzea diruz lagundu

Sustapen ekonomikoa eta enplegua

  • Enplegu planak martxan jarri
  • Gazteentzako enpegua bultzatu
  • Ekintzaileentzako laguntzak eta baliabideak
  • Langabezian dauden herritarrentzako formazioa

Politika sozialak

  • Laguntza psikosozialerako, hezkuntzarako eta legalerako programak
  • Zaurgarrientzako laguntzak
  • Adienkoentzako eta gaixo kronikoentzako programak
  • Tokiko Immigrazio Plana sortu

Kudeaketa ekonomikoa eta ogasuna

  • Aurrekontuetarako parte hartzea bultzatu
  • Lehentasunak ezarri

Gazteria

  • Gaztegunea eta Gaztetxokoa irisgarriagoa eta erakargarriagoa bihurtu
  • Gazteentzako etxebizitzari buruzko informazio zerbitzua
  • Gazteentzako ikastaroak eta lehen enplegurako laguntzak

Berdintasuna

  • Sentsibilizazio kanpainak
  • Berdintasun Planean eta Lamiaenan aurrerapenak

Euskara

  • Normalizazioa bultzatu eta ekintzak antolatu
  • Unibertsitate ikasketak euskaraz egiten dituzten gazteentzako bekak
Osorik irakurri

☉ Arrigorriaga

#M28 | Arrigorriaga | Herritarrek dute hitza: Ibarra eta Ruiz de Azua, buruz buru

#M28 | Arrigorriaga | Udal hauteskundeak 2023 | Emaitzak. Hautagaiak, alderdiak, boto kopurua, zinegotziak, datu historikoak, aurreko hauteskundeak.

|

Arrigorriagan EH Bilduk eta EAJk zinegotzia kopuru bera dute: seina bakoitzak. Bi alderdien artean lehia estua egon liteke bigarren urtez. EH Bilduk Maite Ibarra hautatu du bigarren urtez alkategai bezala eta helburu berarekin egingo die aurre datozenei. EAJk aurpegi ezagun bat aurkeztu du zerrendaburu bezala: Alberto Ruiz de Azua. Arrigorriagako alkate izan zen Ruiz de Azua 1999tik 2011ra arte. Arrigorriaga Gara alderdi moreak hautagai berria du: Irtaxe Rubio, gaur egun Kultura eta Gazteria arloetako zinegotzia. Argoitz Gomez izango da bigarren urtez PSEren hautagaia eta NOAk Jose Ignacio Fernandez aurkeztu du berriro. PPk, nahiz eta gaur egun ordexzkaritzarik ez izan, Arantza Los Arcos hautatu du zerrendaburu beste behin.

Osorik irakurri