Sareak

☉ Arrigorriaga

[MADALENAK 2015] Kirola, gastronomia, musika eta Radio City Music Hall ikuskizuna Arrigorriagako jaietan

|

arrigorriaga madalenak jaiak denetarik 2015

Uztailaren 17tik 25era bitartean ospatuko dira Arrigorriagako jaiak. Adin guztietarako ekitaldiak antolatu dituzte eta barraken prezioa bere horretan mantenduko da.

Egun gutxi barru Arrigorriaga jaigiroan murgilduko da. Madalenak jaiak uztailaren 17an hasiko dira eta hilaren 25era arte luzatuko dira. Egitarauari dagokionez, kirol eta gastronomia txapelketek leku garrantzitsua izango dute, baita musika kontzertuek ere.

Kirol arloan, esate baterako, ekintza hauek prestatu dituzte: Bizkaiko Foru Aldundiaren Bost eta erdiko Txapelketa –Urrutikoetxea eta Zubieta, Elezkano II.a eta Rezustaren kontra-, Saskibaloi triangularraren 50. edizioa, Futbol 7, Xakea, Taekwondo, Irristaketa ibilbidea eta herri kirolak. Gastronomiari dagokionez, Angel Minguez lehiaketaren XXXII. edizioaz gain, berdintasunaren paellada, txistorrada, omenaldi bazkaria, bertso-bazkaria –Arkaitz Estiballes eta Fredi Paia– eta hainbat dastatze saio izango dira. Oliba hezurren eta pizza jaurtiketa txapelketak ere nabarmenduko dira.

Musika kontzertuei dagokienez, Boogie Riders, Capsula, Los Chikos del Maiz eta Eskean Kristo taldeek girotuko dute Arrigorriaga. Era berean, Niña Coyote eta Chico Tornado, Highlights, Dinero, Etorkizun Beltza, Disaster Now, Woodstock Trio eta Osso taldeek osatuko dute Arrigorriagako jaietako kartel musikala, besteak beste.

2015eko Madalenak beste ikuskizun musikatu batekin bukatuko dira. Aurreko urteko jaiak Broadway ikuskizunarekin amaitu ziren eta Arrigorriagako ikusleek harrera ezin hobea egin ziotenez, Madalenak 2015 jaiak beste musikal batekin amaituko dira, kasu honetan, Radio City Music Hall ikuskizunarekin.

⇒ MADALENAK 2015 – PROGRAMA ⇐

BARRAKEN PREZIOA BERE HORRETAN MANTENDUKO DA

Arrigorriagak barraken prezioari eutsiko die eta uztailaren 17tik 26ra bitartean egongo dira Lonbon. Sarrera bakoitzak 1,70 euro balioko du eta uztailaren 23an Haurren Eguna denez, prezioa euro batera jaitsiko da.

Goizeko 10:00etatik aurrera jendearentzat irekita egongo dira barrakak eta ixteko ordua jai eremuaren inguruan egun horretan berbena edo beste ekitaldi bat ospatzearen araberakoa izango da; halakorik egonez gero, ekitaldi hori bukatzen denetik ordu erdira itxiko dira barrakak, eta ez badago, berriz, 24:00etan.

SEXU ERASOEN AURKAKO KANPAINA

Arrigorriagako Udalak errespetuaren aldeko eta sexu erasoen aurkako kanpaina bat abiarazi du “Jaia + Errespetua = Denontzat gozamena” lelopean. “Ez alkohola, ez jaia bera, ez dira aitzaki emakumezkoen eta gizonezkoen arteko harremanak berdintasunezkoak ez izateko, emakumeak sexu-objektu gisa tratatzeko, edo zenbait tokitan segurtasun eza edo beldurra sentitzeko“, diote udal arduradunek: “Erasorik gabeko Jaiak nahi ditugu, baita horiek sustatzen dituzten jarrerarik gabekoak ere. Hortaz, jarrera aktiboa eskatzen dugu emakumeak errespetatzen ez dituzten edozein adierazpen fisikoren edo hitzezkoren kontra“.

☉ Arrigorriaga

Arrigorriagako Gazte Egunak 300 lagun bildu ditu Gaztetxean, larunbatean

“Giro paregabea” izan zela aitortu dute Arrigorriagako Gaztetxetik, gaueko musika-eskaintza anitzarekin

|

Gazteak, bazkarian // Arrigorriagako Gaztetxea

Arrigorriagako Gazte Egunaren zortzigarren edizioa ospatu dute ekainaren 22an, Gaztetxean eta Argala plazan. Aurten, urteroko Hockey Txapelketa eta bertso bazkariaz gainera, Bafle poteoa antolatu dute herrian zehar.

Asteburuko eguraldi txarrak udaletxeko arkupeetara eraman du urteroko hockey txapelketa, iaz bezalaxe. Hala ere, Gazte Egunaren delaldiak “arrakasta handia” izan duela azaldu diote Gaztetxeko arduradunek GEURIAri: “140 lagun bildu ziren bertso bazkarian eta gerora 300 pertsona inguru izan ziren Gaztetxean”.

Izan ere bazkariko “giro paregabea” azpimarratu dute Gaztetxetik eta gaueko eskaintza musikala anitza izan zela azaldu dute: Rally48, Altxa Porru Erromeria eta Painapple taldeen kontzertuen lekuko izan ziren kontzertuetara gerturatu zirenak.

Osorik irakurri

☉ Arrigorriaga

Arrigorriagako san juan gaueko ekintzak kiroldegiko kantxa urdinean egingo dituzte

Arrigorriagako Udalak iragarri duenez, iratxoak eta sorginak 20:45etan antolatu dituzte

|

Haurrak, San Juan suan // Geuria

Hasiera batean Mendikoso eta Mintegi parkean antolatu zituzten san juan suen pizteak eta jarduerak lekualdatu ditizte asteburuko eguraldia dela eta. Arrigorriagako Udalak kiroldegiko kantxa urdinera lekualdatu ditu. Horiek horrela, 18:00etatik aurrerako ekintza guztiak bertan izango dira: iratxoak eta sorginak 20:45etan izango dira. Ondorioz, bertan ez dute surik piztuko.

21:35etan txokolate jana eta dantza egingo dute, 22:30ak arte.

Osorik irakurri

☉ Arrigorriaga

Arrigorriagako Harrotasun Asteak hitzaldiak, tailerrak eta Holi jaia ekarriko ditu herrira

Jarduera guztiak herrigunean antolatu dituzte, udaletxeko plazan eta baita Lamiaenan, ekainaren 24an, 28an eta 29an

|

Harrotasun Eguna, 2018an // Geuria

Ekainaren 24tik 29ra Harrotasunaren Astea antolatu dute Arrigorriagan eta hitzaldiak, tailerrak, bideo-proiekzioak eta Holi jaialdia antolatu du Arrigorriaga Harro taldeak Udalaren babesarekin.

Jarduera guztiak herrigunean antolatu dituzte, udaletxeko plazan eta baita Lamiaena emakumeen etxean ere

Egitaraua | Harrotasunaren astea 2024

Ekainak 24, astelehena
– 19:00 Dokumentala: Ekain Lersundi, Lamiaena

Ekainak 28, ostirala
– 17:00 eta 19:00 Escape Room LGTBIQ+, Lamiaena
– 19:00 Txapa tailerra, Lamiaena

Ekainak 29, larunbata
– 17:30 Arrigorriaga Harro taldearen bideoaren proiekzioa, Edurne Garitazelaiako Azokea aretoa
– 18:00 Umeentzako marrazketa tailerra, udaletxeko plaza
– 18:00 Arrigorriaga Harro hitzaldia + mokadutxoa, udaletxeko plaza
– 19:30 Holi jaia, udaletxeko plaza
– 20:00 Baflepoteo Transmaribibollo, herrian zehar

Osorik irakurri

☉ Arrigorriaga

Ume arrigorriagarrek puzgarriak, tailerrak eta ikuskizunak izango dituzte Madalenetan

Jai Batzordeak 17 jarduera baino gehiago prestatu ditu uztailaren 19tik 25era, egunez egun: antzerki saioak, tailerrak, buruhandiak, puzgarriak… herria umeentzako ekintzez beteko dute.

|

Haur bat, Arrigorriagako iazko txupinazoan // Geuria

Arrigorriagako Udala aurtengo jaietan izango diren jarduerak iragartzen ari da egun hauetan. Oraingo honetan umeentzat prestatutako ekintzen berri eman dute Udaletik.

Izan ere, Jai Batzordeak 17 jarduera baino gehiago prestatu ditu uztailaren 19tik 25era: antzerki saioak, tailerrak, buruhandiak, puzgarriak… herria umeentzako ekintzez beteko dute. Aurten ere Umeentzako parkea ipiniko dute Lehendakari parkean, hilaren 23an eta 24an, ordutegi ezberdinetan.

Egitaraua | Haurrentzako jarduerak 2024ko Madalenetan

Uztailak 19, ostirala
– 18:00 Jaioberriei aitortza-ekitaldia, Edurne garitazelaia kultur etxea
– 20:15 Buruhandiak, udaletxeko plaza

Uztailak 20, larunbata
– 12:00 Erraldoien kalejira, udaletxeko plazatik
– 19:30 Buruhandiak, Lehendakari Agirre parkea

Uztailak 21, igandea
– 11:00 Patinaje ibilbidea, herrian
– 11:00 Ekortzeko makina puzgarria, Joan XIII plaza
– 19:30 Buruhandiak, Lehendakari Agirre parkea

Uztailak 22, astelehena
– 19:00 Buruhandiak, Lehendakari Agirre parkea

Uztailak 23, asteartea
– 11:30 Umeentzako parkea, Lehendakari parkea (euria bada, eskolako patioa)
– 13:30 Buruhandiak, Lehendakari Agirre parkea
– 17:30 Umeentzako parkea, Lehendakari parkea (euria bada, eskolako patioa)
– 18:00 Izozki banaketa, Pergola

Uztailak 24, asteazkena
– 15:00 Umeentzako antzerkia: Izarren Hartza, Lehendakari Agirre parkea (euria bada, eskolako patioa)
– 18:30 Buruhandiak, Lehendakari Agirre parkea

Uztailak 25, osteguna
– 11:00 Entsalada tailerra, Ugertza parkea
– 17:45 XIII Tiragoma Txapelketa
– 18:30 Bitsa festa, Joan XIII plaza

Osorik irakurri

☉ Arrigorriaga

Arrigorriagako Arritxikerrakekoak ikasturteari euskaraz agur esateko elkartuko dira

17:30ean antolatutako Euskara Plazara izeneko gaurko jardueraren helburua familiak elkartu eta euskaraz berba egitea izango da

|

Familia bat, Arrigorriagako plazan // Geuria

Gaur bertan, ekainaren 20an, hitzordua ipini dute Arrigorriagako Arritxikerrak taldekoek ikasturteari agur esateko. 17:30ean antolatutako Euskara Plazara izeneko gaurko jardueraren helburua familiak elkartu eta euskaraz berba egitea izango da.

“Ez da jarduera gidaturik egongo; udaletxeko plaza euskararen arnasgune bihurtuko dugu”, azaldu dute Arritxikerraketik. Jarduera 0 eta 6 urte bitarteko haurrak dituzten familiei zuzenduta dago.

Osorik irakurri