Splash txapelketa antolatu du lehen aldiz santakurtzetan Galdakao Igeriketa Taldeak. Guztira 21 kuadrillak hartu dute parte eta txapeldun izan da Dekantzekoz, bigarren Firu eta hirugarren Piperrak.

Kirolaren Euskal Biltzarra hartuko du Basaurik urriaren 24an eta 25ean. Euskadin kirola eta jarduera fisikoa sustatzen duten erakundeak elkartuko dira topaketan, kudeaketan duten jakintza handitzeko asmoz.

Euskadiko Jarduera Fisikoaren eta Kirolaren VIII. Biltzarra Social Antzokian izango da, hain zuzen, 2024 urte olinpikoan Kirolaren Europako Hiri izendatu dutenean Basauri.

Adituen hitzaldi eta eztabaida-mahaien bidez, egitura dinamikoa eta iritziak trukatzeko aukerak eskainiko ditu Biltzarrak. Era berean, posterren eta workshopen bidez, ezagutza eta esperientzia berriak ikasi, aztertu eta partekatzeko foroa izango da.

Gaur, irailak 20, aurkeztu dute Kirolaren Euskal Biltzarraren zortzigarren edizioa Social Antzokian bertan. Asier Iragorri Basauriko alkatea, Gorka Iturriaga Eusko Jaurlaritzako Kirol zuzendaria, Leixuri Arrizabalaga Bizkaiko Foru Aldundiko Euskara, Kultur eta Kirol diputatua, eta Iñaki Ugarteburu KAIT Kirolaren Kudeatzaileen Euskal Elkartearen presidentea izan dira aurkezpenean.

Asier Iragorri Basauriko alkatea // KEB-CVD

Hiru bloke

‘Kirola gizarte berri baten aurrean’ izenburupean, Biltzarrak hiru bloke nagusi izango ditu: ‘Nori? Gizartea’, ‘Nola? Eredua’ eta ‘Non? Espazioak’. Etorkizuneko euskal gizartea azaltzeko hitzaldi markoa egingo da.

Programaren lehen blokea ostegun goizean egingo da, urriaren 24an, eta euskal gizartea aztertzea izango du ardatz: aldaketak, bilakaera eta etorkizun hurbilenean jarriko du arreta, herritar aktiboagoak lortzeko helburuarekin. Lehenengo hitzaldian, kirolak gizarte berrira egokitzeko izango dituen aldaketa nagusiak zehaztuko dira. Mahai-inguru batek Euskadik aurretik duen erronka demografikoa, migrazioaren eragina eta dibertsitate funtzionala eta belaunaldikoa landuko ditu. Lehen bloke honetan José Luis Larreak (Deusto Social Lab), Juan Aldazek (UPV-EHU), Blanca Ordoñezek (Haszten) eta Ekain Larrinagak (Bilboko Udala) parte hartuko dute, Pilar Kaltzada kazetariak moderatzaile lanak egingo ditu.

Arratsaldean, bigarren blokeak Udal Kirol Zerbitzuen (UKZ) eredua izango du ardatz: Nolakoak izan behar dute 2030. urtean? Nola garatu beharko da egungo udal zerbitzuaren eredua bere jatorrizko helburua bete dezaten, hau da, kirola unibertsala izatea eta gizartearen ongizatean laguntzea? Hitzaldiek hainbat gai jorratuko dituzte, hala nola, egungo eta etorkizuneko kirol-ohiturak, herritarren eskaerei nola erantzun, epe ertainerako UKZen egitura-formula eta -eredua, eta sektore publikoaren eta pribatuaren arteko harremana. Bigarren blokean Marian Ispizua (UPV-EHU), Juanan Compañón ‘Konpa’ (KAIT), Iratxe Ruesgas (Sport Studio), Fernando Paris (FAGDE), Manuel Abajo (Barakaldo Kirolak) eta Josune Gorospe (Bizkaiko Foru Aldundia) arituko dira mahai-inguruan.

Hirugarren eta azken blokea ostiral goizean izango da, urriaren 25ean, eta kirol-espazioak, etorkizuneko kiroldegiak eta hiri aktiboak izango ditu hizpide: kirol-instalazioek nolakoak izan behar duten etorkizunean, kaleak, herrietako eta hirietako plazak kirol-jarduerara txertatzeko bideak aztertu eta espazio publikoak modu libre zein partekatuan erabiltzeko gakoak identifikatzea. Hirugarren bloke honetan Jorge Yelamosek (GO fit), Sergio Sernak (TECH friendly), Unai Martinek (UPV-EHU) eta Karitte Alegriak (ideas4innovation) hartuko dute parte. Juanma Murua moderatzaile lanetan arituko da.

Azkenik, Basaurik, Kirolaren Euskal Biltzarra ospatzen duen udalerriak, 2024ko Kirolaren Europako Hiria izateko egin duen bidea partekatuko du. Era beran, azken hamarkadan Jarduera Fisikoaren eta Kirolaren arloan egin dituen garapenek eta datozen urteetan iristeke daudenek herritarrei ekarriko dieten ondarea ere azalduko du. Luis Solarren (OTSp) hitzaldi baten ondoren, mahai-inguruan hainbat erakundeetako kirol arduradunek hartu dute hitza: Carlos Sergio (Bizkaiko Foru Aldundia), Jon Zugazagoitia (Basauriko Udala), Itziar Carroceras (Santurtziko Udala) y Jon Iraola (Eibarko Udala). Amaierako hitzaldia Raúl Martínez de Santosek (UPV-EHU) emango du eta gako nagusiak ikuspegi kritiko eta eraikitzailearekin laburbilduko ditu.

Hiru workshop

Biltzarrean zehar, hitzaldi eta mahai-inguruekin batera, hiru workshop ere egingo dira: ‘Jarduera fisikoaren orientazio zerbitzua’ (Athlon), ‘Nola hobetu dezakegu adingabearen babesa kirol inguruneetan?’ (Kunina-Zain) eta ‘LED teknologiaren demokratizazioa’ (Mondo). Azkenik, proiektuak, ikerketak edo esperientziak posterren bidez aurkezteko guneak eskainiko ditu Biltzarrak. Proposamenak aurkezteko deialdia irailaren 15era arte dago zabalik.

Kirol Eskolak, Eusko Jaurlaritzaren kirol prestakuntzako online eskolak, 2024ko Kirolaren Euskal Biltzarraren inguruko informazioa, bideoak eta komunikazioak eskainiko ditu sare sozialen bidez.

KAIT, kirol arloko iritzi taldeak, antolatzen du Kirolaren VIII. Euskal Biltzarra, Eusko Jaurlaritza, Kirol Eskola, Bizkaiko Foru Aldundia eta Basauriko Udala erakunde babesleekin batera.

Errelebo lasterketa proba berriak hainbat kuadrilla batu ditu Galdakaoko jaietan. Errotu Konpartsak antolatu du eta Ander Uribarri kideak GEURIAri adierazi dionez, giro “oso ona” egon da.

“Galdakoztarrei gustatzen zaie proba fisikoetan parte hartzea herriko jaietan, eta horregatik sortu genuen erreleboen proba hau”, dio Anderrek, eta zehaztu du datorren urtean berriro antolatzeko asmoa dutela Errotutik.

Galdakaoko jaietan proba berriak antolatu dituzte. Horietako bat da Errelebo lasterketa, Errotuk antolatu duena. Txapeldun izan da Txantxa Gutxi kuadrilla, bigarren Antzeko, hirugarren Weekandugu eta laugarren Lonjelvi.

Usansoloko Metro geltokiaren aferaz asanblada irekia egin zuten atzo herrian. Bertan izan ziren Loly De Juan Eusko Jaurlaritzako Garraio Azpiegituren zuzendaria, Ernesto Martinez de Cabredo ETSko zuzendari orokorra eta Julian Ferraz ETSko zuzendari ondokoa.

Bi erakundeetako ordezkariek azaldu zutenez, baztertu egin dute Usansolo erdigunean geltokia eraikitzea: “Usansoloko erdigunean ez da geltokirik aurreikusten, ekonomikoki bideragarria ez delako”, zehaztu zuen De Juanek.

Adierazpen horiek asanblada irekira bertaratu ziren herritarren haserrea piztu zuen: “Usansolo bere ospitaletik eta bere garraiotik isolatu dituzue, proiektuak Bizkaiko gainerako bizilagunei begiratzen dien bitartean. Ospitaleari eman zaio lehentasuna, eta ez herriari”, adierazi zuen atzo herritar batek.

Hain zuzen ere, metroaren geltoki berria Ospitalaren ondoan eraikiko dute, Usansoloko Unkina plazatik 900 metrora (gaur egungo Euskotreneko geltokia, desagertu egingo dena, 450 metrora dago).

Eusko Jaurlaritzak eta ETSk bi aukera soilik dituzte mahai gainean metro geltokia Usansolo erdigunearekin lotzeko: alde batetik, lurazpiko tunel bat eraikitzea, 500 metro luzerakoa, Laminarrieta, Meatzeta eta Torreondo kaleen arteko bidegurutzera iritsiko litzatekeena; eta bestetik, tunel “labur” bat eta lanzadera zerbitzua uztartzea.

Tunel luzearen aukera (ezkerrean) eta tunel txikia eta lanzaderaren ibilbidearen aukera (eskuman) // Geuria

Eusko Jaurlaritzatik eta ETStik onetsi egiten dute bigarren aukera; lanzaderarena, alegia. “Autobus elektrikoa jarriko genuke, eta Gorosibaiko bizilagunek ere erabili ahal izango dute”, zehaztu zuen De Juanek. Lanzadera zerbitzua Eusko Jaurlaritzak kudeatuko luke, eta ez Usansoloko Udalak, atzo ere adierazi zutenez.

Geltokia Erdigunean plataformatik adierazi dute “euren helburua lortu arte” jarraituko dutela borrokan: “Eusko Jaurlaritzak eta ETSk entzun dute Usansolok zer nahi duen, eta, hortaz, jarraituko dugu geltokia erdigunean aldarrikatzen”, adierazi dio GEURIAri Josu Grandibal plataformako kideak.

“Ezin dugu onartu Bilborako gure denbora handitzea. Hirugarren aukera ez da oraingoa: 2021eko planetan Aldundiak geltoki bat zuen Usansolo erdigunean. Zergatik zen lehen bideragarria eta orain ez?”, galdetu zuen atzo asanbladan Jon Atxutegi plataformako kideak.