Sareak

☉ Basauri

160 berbalagun, urtetik urtera herritar gehiago euskaraz berba egiteko prest

|

basauri berbalagun mintzodromoa 2014

Irailean hasiko dira Hego Uribeko Berbalagunak berrosatzen. Urtero antolatzen dituzten ekintzez gain, Berbalagunek ideiak proposatzen dituzte ikasturte berriari begira.

Orain dela hamar bat urte iritsi zen Berbalagun egitasmoa Hego Uribe eskualdera. Galdakaok 2005. urtean jarri zuen martxan programa eta handik sei urtera Basaurira zabaldu zen. “Hego Uribeko Berbalagunen Galdakaoko eta Basauriko egitasmoak martxan daude”, dio Iratxe Dañobeitiak, Basauriko koordinatzaileak: “Bertan ibili gara azken urteotan Asier Martin Galdakaon eta ni neu Basaurin”. Azken urtean Arrate Arbaiza ibili da lanean Basauriko taldeak koordinatzen.

Dinamizatzaile bakoitzaren lana bere herrian jarduera ezberdinak antolatzea da eta 2015/2016 ikasturteari begira dagoeneko hasi dira gauzak prestatzen: “Urteroko ekintzak izango ditugu, guretzat ohitura bihurtu direnak, bai Basaurin bai Galdakaon”, dio Dañobeitiak. Errepikatuko diren jarduerak dira, besteak beste, aurkezpen jaia, Gabonetako jaia, Inauterietakoa eta ikasturte amaierakoa.

Hala ere, dinamizatzaileek laguntzaileak izan ohi dituzte askotan ikasturte berriari begirako jarduerak antolatzeko. Dañobeitiak dioenez, “ikasturte hasieran Berbalagunen gustuak eta gogoak kontuan hartzen ditugu eta zer gehiago egin daitekeen aztertzen dugu. Urte askotan zehar afariak eta sagardotegira irteera egin dira. Askotan berbalagunak izaten dira ideiak proposatu eta aurrera eramateko bidea ematen dutenak”.

EUSKALDUNON SAREA JOSTEN

2014/2015 ikasturtean 160 lagunek eman zuten izena Berbalagun programan Basaurin eta Galdakaon. Parte hartzaile kopuruari dagokionez, urteetan zehar gorabeherak izan direla aitortu du Dañobeitiak, baina azken urteetan gora egin duela antzematen du. “Dena dela, gure ustez Berbalagunek askoz gehiago egin behar du gora. Euskaldunon sarea josten ari gara eta sare horrek eskualdeko euskaldunak harremanetan jartzea izugarria izan daiteke. Sarea zenbat eta handiagoa izan, egunerokoan euskara hutsean bizitzea errazago izango da”, aldarrikatu du. “Berbalagunen oso harreman ezberdinak sortu izan dira, kide hutsak direnak badaude, ezezagun izatetik lagun min izatera pasa dena ere bada, eta bai, maitasuna topatu duen inor ere badagoela esan genezake”, dio Dañobeitiak.

Dagoeneko hasi dira Berbalagun taldeak berrosatzen, “eta iazko gehienak aurten ere mantenduko dira ziurrenik”. Horiek horrela, urriaren hasierarako taldeak aktibatzea aurreikusten dute antolatzaileek: “Hori bai, gogorarazi nahiko genuke edonoiz eman daitekeela izena Berbalagunen eta ezer ordaindu barik”.


 

GURASOLAGUN, FAMILIAN EUSKARA SUTATZEKO MODU APROPOSA

Gurasolagun programak gurasoak eta seme-alabak elkartzea du helburu, haien arten euskara erabiltzeko. Basaurin bi urtez egon da martxan eta Galdakaon hurbilketa egin zuten iaz. “Gurasolagunak oso talde politak eta bereziak dira. Ohitura komunikatiboen aldaketari begira oso talde egokiak dira, familia erdal hiztunetan euskaraz aritzeko ohitura sustatzeko modu oso aproposa baita”, dio Iratxe Dañobeitia Basauriko Berbalagun dinamizatzaileak: “Hala ere, argi utzi behar dugu Gurasolagun ez dela euskara ikastaro bat. Egitasmoak planteatzen duena euskal hiztunak eta erdal hiztunak elkartzea da, baina gutxieneko euskara maila bat dutenak”.

Behin teoria ezagututa euskara praktikara eramatean datza, “gure seme-alabekin euskaraz jolastea, euskaraz kantatzea eta lagun berriak euskaraz egitea, besteak beste”, dio Dañobeitiak. Horretarako, “ezinbestekoa da guraso euskaldunen inplikazioa eskualdean Gurasolagun zabaldu ahal izateko”, aldarrikatu du.

☉ Basauri

Basaurin ertzain bat atxilotu dute droga trafikoa leporatuta

|

Ertzaintzak eta Guardia Zibilak droga-trafikoaren aurkako polizia-operazioa martxan jarri dute gaur Bizkaian eta Kantabrian, eta hainbat atxiloketa eta miaketa egin dituzte.

Besteak beste, Basaurin pertsona bat atxilotu dute. Zenbait komunikabidek publikatu dutenez ertzain bat da Basaurin atxilotutakoa, 24. promoziokoa, eta substantzia estupefazienteen banaketan parte hartzea egotzi diote.

Miaketak, Basaurin, Bilbon, Barakaldon, Leioan eta Kantabriako herri batean egiten ari dira.

Osorik irakurri

☉ Basauri

San Juan suak Basaurin: Basozelain, Pozokoetxen, San Migelen, Kareagan eta Bidebietan

|

Ekainaren 23ko gauen piztuko dituzte San Juan suak Basauriko auzoetan // Geuria

Ekainaren 23ko gaua urteko laburrena da, baita San Juan bezpera ere. Hori ospatzeko San Juan suak piztuko dira Euskal Herrian eta Hego Uriben.

Basaurin, Basozelain, Pozokoetxen, San Migelen, Kareagan eta Bidebietan piztuko dituzte San Juan suak ekainaren 23ko gauean.

Egitaraua / San Juan suak Basaurin

Ekainak 23, igandea

Basozelai
19:00 Txokolatada Solidarioa. Bildutako dirua CTNNB1 elkartearentzat
19:30 VI. Basozelaiko Bingo Solidarioa. Bildutako dirua CTNNB1 elkartearentzat
20:00 Taloak eta ogitartekoak: Loiuko
21:30 Ohiko San Juan Sua Batukale Samba taldearekin
San Juan jaien egitaraua osorik hemen!

Pozokoetxe
20:00 Txokolate jana
21:00 Basauritar Dantza Taldea
21:30 San Juan sua
San Juan jaien egitaraua osorik hemen!

San Migel
18:00 Karropoteoa
20:00 Txorizoa sagardotan egosia eta musika Ixatxak parkean
22:00 San Juan sua Ixatxak parkean
22:15 Afari herrikoia: bakoitzajk bere afaria ekar dezala

Kareaga
21:30 Txokolatada
22:00 San Juan sua

Bidebieta
21:00 Txokolate-jana bizkotxoekin
22:00 San Juan sua piztea
23:00 Keimada

Osorik irakurri

☉ Basauri

Mendi martxa antolatu dute San Migelen autismoa duen Hugo auzotarraren alde

|

Mikelats Kultur Elkarteko kideak Sofia Taramona ikastetxeko ikasleekin eta ordezkariekin // Mikelats Kultur Elkartea

Mikelats Kultur Elkarteak Mendi Martxa Solidarioa antolatu du beste urte batez. Aurtengoa hamaikagarren eduzioa da eta bilduko duten dirua autismoa duen Hugo auzotarrarentzat eta Apnabi elkartearentzat izango da. Hugok 4 urte ditu eta Sofia Taramona ikastetxeko ikaslea da.

San Migeleko Mendi Martxa Solidarioa ekainaren 22an, larunbatez, izango da, 10:15ean hasita Ixatxak parketik. Antolatu duten ibilbidea 7 kilometrokoa da.

Ekimenean parte hartu nahi dutenek 5 euro ordainduko dituzte ekainaren 22an bertan, jarduera hasi aurretik.

Mendi Martxa Solidarioaz gain, San Migeleko jaietan (irailaren 27tik urriaren 6ra bitartean) Apnabi elkartearen jarduera bultzatzera bideratutako ekimen solidario gehiago antolatuko ditu Mikelatsek.

Osorik irakurri

☉ Basauri

Elixabete Etxanobe Ahaldun Nagusiak Sarratuko metroaren L5 lineako obrak bisitatu ditu Basaurin

|

Elixabete Etxanobe Sarratun, Asier Iragorri Basauriko alkatearekin eta Ager Izagirre foru diputatuarekin // Bizkaiko Foru Aldundia

Elixabete Etxanobe Bizkaiko Ahaldun Nagusia Hego Uribe eskualdean izan zen atzo. Basaurin, Sarratuko metroaren L5 lineako obrak gertutik jarraitu zituen, Asier Iragorri Basauriko alkatearekin eta Ager Izagirre Herri Administrazio eta Erakunde Harremanetarako foru diputatuarekin batera.

Era berean, Bizkotxaldeko Etxetic zentroko lanak ere bisitatu zituzten. “Etxetic zentroaren bidez, Bizkaiko Foru Aldundiak doako laguntza-zerbitzua eskainiko du, mendekotasun-egoeran dauden Basauriko pertsonak etxean egon daitezen”, dio Iragorrik.

Foru erakundeak eguneko zentroa eta elkarbizitzarako etxebizitzak eraikitzea ere finantzatu du Basaurin, Sarratu auzoan.

“Elixabete Etxanobek eta Ager Izagirrek gure herriarentzat estrategikoak diren beste proiektu batzuekiko interesa agertu dute, hala nola, San Fausto, Bidebieta eta Pozokoetxe auzoen berroneratze eta eraldaketa urbanistikoa edo La Basconiako lurren etorkizuneko garapena jarduera ekonomikoa ekarri ahal izateko”, adierazi du Iragorrik.

Basaurin bisita egiteaz gain, Arrigorriagan Maite Ibarra alkatearekin batu zen, foru-eskumeneko hainbat proiektu partekatzeko.

Osorik irakurri

☉ Basauri

Basozelaiko Skate txapelketak adin txikikoak eta nagusiak lehiatuko ditu Basaurin

|

Ekainaren 22an, larunbatez, izango da Skate Txapelketa Basozelaiko jaietan barruan // Geuria

Skate txapelketa antolatu dute beste urte batez Basozelaiko jaietan, Basaurin. Ekainaren 22an, larunbatez, izango da txapelketa eta sei kategoria lehiatuko dira: 12 urtez azpikoa (nahiatez erabili behar dira kaskoa eta babesak), 18 urtez azpikoa, neskak, masters, open eta Half Pipe.

Sariei dagokienez, parte-hartzaileen artean materiala banatuko dute, eta Open eta Half Pipe kategorietako irabazleek dirua jasoko dute.

Parte hartzeko izena ematea ekainaren 22an bertan egingo dute parte-hartzaileek.

Basozelaiko Skate Txapelketa Basauriko Udalak antolatzen du, Zirt Zart Gazte Zerbitzuaren eta Basauriko Skate Erakundearen laguntzarekin. Aurten, Basauri Kirolaren Europako Hiria den urte honetan, jarduera fisikoa eta kirola sustatzeko jarduera mantentzen eta zabaltzen jarraitu dute.

Open Basozelai 2024

Ekainak 22, larunbata
11:00 12 urtez azpikoak
12:00 18 urtez azpikoak
13:00 Neskak
16:00 Masters
17:00 Open
18:30 Half Pipe

Osorik irakurri