☉ Basauri
Asier Ogiza: “Modan dagoen talderen bat ekarri nahiko genuke, baina ez dugu dirurik”
Lehendabiziko urtea da Asier Ogiza (Basauri, 1973) Herriko Taldeak elkarteko lehendakari lanetan dabilena. Lan egiteko gogoz hartu zuen aurtengo otsailean erantzukizun berria eta ekitaldi guztietan “gustu handiz” parte hartuko duela aitortu du.
Nola hasi duzu Herriko Taldeakeko lehendakaritza?
Beti bezala, lanean. Ez dago besterik. Jai batzordea osatu eta berehala hasten gara kideok San Fausto egitaraua antolatzen. Aurreko bi urteetan Herriko Taldeakeko diruzaina izan naiz eta banekien nolakoa zen lan egiteko modua. Aurtengo honetan gertatzen dena da zeu zarela elkarteko aurpegia.
Erantzukizun handiegia, akaso?
Izan daiteke. Azken finean, Herriko Taldeak da sanfaustoak egiten dituena eta gauza asko izan behar dira kontutan programa ondo betetzeko. Aurretik ere beste elkarte batzuetan izan naiz, baina erantzukizuna handiagoa da hemen, batik bat ezagunagoa delako. Gainera, lehendakaria izateak erantzukizun hori areagotu egiten du.
Aurtengo sanfaustoak modu berezian biziko al dituzu?
Sanfaustoak beti izaten dira bereziak, baina aurten ekitaldi gehienetan izan beharko naiz. Aurreko urteetan gauza batzuetara ez nintzen joaten, baina aurten derrigorrez joan beharko dut. Noski, gustu handiz.
Zerbait nabarmenduko al zenuke aurtengo programan?
Ez dago sorpresa askorik. Aurreko urteetan arrakasta izan duten ekitaldiak egongo dira. Berrikuntza nabarmenena aipatzearren, jaiak auzo guztietara zabaldu ditugu: Urbi, Ariz, San Migel eta Kareaga. Beraz, aurtengo San Fausto jaiak Basauri osoan zehar biziko ditugu.
Kontzertuez galdetuko banizu…
Koadrila bakoitzak proposamenak botatzen ditu. Dena ezin denez ekarri, filtroak jartzen ditugu guk -eskatzen dituzten prezioak eta talde bakoitzaren prestutasuna, besteak beste- eta ondoren multzoak egiten ditugu, hala nola, kontzertu bereziak, talde euskaldunak eta klonikoak. Zerrendak prest ditugunean koadriletako kideek erabakitzen dituzte kontzertuak.
Zeren aldeko apustua egiten du Herriko Taldeakek?
Egun guztietan jarduera asko egotea eta normalean, adin-tarte guztientzako izatea. Adibidez, kalejirak, txitxarriloak, jokoak, txapelketak eta bakarrizketak. Kontzertuei dagokienez, modan dagoen talderen bat ekarri nahiko genuke, baina ez dago horretarako nahikoa diru. Bederatzi egunetako hogeita lau orduak bete behar ditugu eskura dugun aurrekontuarekin eta zaila da banaketa egitea.
Aurrekontua aipatu duzunez, azaldu zein den egungo egoera.
Aurten mantendu egin dugu aurrekontua: alde batetik, Udalak ematen diguna eta bestetik, babesleek ematen digutena. Normalean, apirila eta maiatza artean zehazten digute zenbatekoa izango den Udalaren diru-laguntza eta nortzuk izango diren babesleak. Horrekin guztiarekin aurrekontua osatzen dugu.
Urtetik urtera, gero eta jende gehiagok ematen al du izena koadriletan?
Bai. Azken bost urteetatik hona jende berria sartu da koadriletan, gehienbat gazteak. Herriko Taldeaken batzarretan, esate baterako, kide bat eta biok gara nagusienak; gainontzekoak gazteak dira: 20 eta 30 urte bitartekoak.
Zer egin beharko luke basauriar batek sanfaustoetan?
Hori galdera zaila! Nire ustez, Basauriko jaiak besteengandik bereizten dituena Herriko Taldeak osatzen duten koadrilak dira. Horietako batean sartuta ez bazaude, jaiak beste modu batean biziko dituzu. Ekitaldiak guztiontzako eginak daude -koadrila bateko kide izan zein ez-, baina bereziena koadrila bateko kide izatea da, Basauriko jaien arima direlako.
“EGUNERO ETXETIK KANPO BAZKALTZEN DUT JAIETAN”
Sanfaustoetako onena Kalean sortzen den jai-giroa eta elkartasuna
Sanfaustoetako okerrena Aldapan gora, aldapan behera ibili behar duzula
Ez dut inoiz galtzen… San Fausto eguna: Koadrila guztiak bazkaltzeko elkartzen gara eta hori da gehien gustatzen zaidana
San Faustoetako urteroko bazkaria Sanfaustoetan ez dut aste osoan zehar etxean bazkaltzen baina, zerbait esatearren, patatak errioxar erara eta solomoa. Kalean, bokatak
Koadrila bat Edurre, beti
Kareagako eta San Migeleko pediatria zerbitzuetan Osakidetzak murrizketak egin dituela salatu dute hainbatetan auzotarrek. Zehazki, San Migeleko pediatrak irailean erretiroa hartu ondoren ez dutela beste pediatrarik kontratatu eta Kareagako bi haur-medikuetatik batek lanaldia erdibitu beharko duela bi anbulatorioetan salatu dute.
Abenduaren 1etik aurrera formalizatuko da neurri hori. Kareaga, El Maño-Basozelai eta Bidebieta auzo elkarteak eta Kareagako eta Gazteluko ikastetxeetako guraso elkarteak euren “kezka” azaldu dute: “Neurri horrek zerbitzuaren kalitatea larriki okertzea dakar”.
Gauzka horrela, sinadura bilketa hasi dute Kareagako osasun zentroan, eta aurreratu dute ekintza gehiago egingo dituztela.
Azaroak 25 dituen honetan Emakumeen kontrako indarkeria ezabatzeko nazioarteko eguna ospatzen da. Basaurin goizean ekitaldia egin dute hemendik aurrera ‘Azaroak 25’ plaza deituko den lekuan, San Pedro elizaren ondoan.
Plazari ‘Azaroak 25’ jartzeko erabakia Udaleko osoko bilkurak aho batez hartu zuen urrian, eta gaur, eguna aprobetxatuta egin dute ekitaldia 12:00etan. Askoa Etxebarrieta Lasherasek, La Pulga Flamencok ikuskizuna eskaini ondoren, Paz Diaz Gonzalez Basauriko mugimendu feministako kide mitikoak plazaren plaka desestali du.
Merkatu solidarioa antolatu du Basaurin Acobi elkarteak Bielorrusiako umeentzat dirua biltzeko. Merkatua zabalik dago abenduaren 3ra bitartean Agirre Lehendakaria kaleko 57. zenbakiko lokalean, Herriko Taldeaken ondoan.
Liburuak, jostailuak, tresneria, apaingarriak edota imitaziozko bitxiak bildu eta salduko dituzte lokalean. “Espazioa dela eta, ezin dugu arroparik jaso edo saldu”, diote antolatzaileek.
Merkatu solidarioa zabalik dago astelehenetik larunbatera 18:00etatik 20:30era, eta igandetan 12:00etatik 14:00etara.
“Gerra kontuengatik etortzerik ez dutenez, dirua bidaliko diegi han behar dutena eros dezaten”, diote sustatzaileek.
Etxez etxeko laguntza zerbitzuaren (ELZ) araudia berrituko du Basauriko Udalak. Besteak beste hobekuntza hauek onartuko dituzte azaroko osoko bilkuran: mendekotasun-mailaren bat onartua duten erabiltzaileei arreta emateko ordu gehiago eskainiko dituzte, “nahi izanez gero eta egoerak ahalbidetuz gero, etxean denbora gehiago egon ahal izan daitezen”, dio Maria Larrinaga Gizarte Politikako zinegotziak.
Zehazki, bizikidetza-unitatean kide batek baino gehiagok baldin badute mendekotasun-balorazioa, maila handiena duenari dagozkion orduez gain, mendekotasun egoeran dagoen beste pertsonari dagokion ordu kopurua % 50 handituko dute.
Era berean, desgaitasuna onartuta duten 60 urtetik gorako pertsonek eta mendetasunik onartua ez duten 65 urtetik gorakoek ere gehienez 20 zerbitzu-ordu jaso ahal izango dituzte hilean, aldez aurretik balorazio teknikoa eginda.
“Azpimarratu behar da 85 urtetik gorako pertsonek, bakarrik bizi badira eta familian nahiz gizartean laguntza-sare nahikorik ez badute, erregelamendua onartu ostean, etxez etxeko laguntza eskatu ahal izango dutela hilean gehienez 30 orduz, bestelako baloraziorik egin behar izan barik”, dio Larrinagak.
Arau-testu berrian jasotako hobekuntzen artean, balorazio teknikoaren arabera babesgabetasun-egoeran edo arriskuan, bazterketa-egoeran edo abandonu-egoeran dauden edo tratu txarrak jasaten ari diren pertsonek hilean gehienez 30 zerbitzu-ordu jaso ahal izango dituzte, “betiere etxez etxeko laguntza-zerbitzuak eman ditzakeen prestazioak behar badituzte”, dio.
“Oro har, neurri horien bitartez, ELZren erabiltzaileen autonomia pertsonala sustatu gura dugu eta, horretarako, zerbitzuaren intentsitatea eta malgutasuna areagotzeaz gain, prestazioak konbinatzeko aukera ere handiagoa izango da”, dio Larrinagak.
Pozokoetxeko Sanjuantxines Kultur Elkarteak Basauriko lehen Putxera lehiaketa antolatu du. Azaroaren 25ean, larunbatez, izango da Solobarria plazan.
Hasiera batean Pozokoetxeko parkean izango zen lehiaketa, baina eguraldi iragarpena dela eta, Solobarriara lekualdatzea erabaki dute antolatzaileek.
Saritan 190 euro banatuko dituzte: lehenengo sailkatuak 100 euro jasoko ditu, bigarrenak 60 euro eta hirugarrenak 30 euro. Era berean, putxerak (lehenengo sailkatua eta herriko irabazlea), jamoia (bigarren sailkatua) eta ardo kutxa bat (hirugarren sailkatua) ere emango dizkiete irabazleei.
Lehiaketan izena ematea azaroaren 25ean bertan 10:00etatik 12:30era bitartean izango da. Parte hartzaileek 5 euro ordaindu behar dituzte putxera bakoitzeko.
Babarrunak 13:00etatik 14:00etara entregatu behar dira eta sari banaketa 15:00etan izango da.
Putxera lehiaketa antolatzeaz gain, zozketa bat egingo du Sanjuantxinek egunean bertan. Hain zuzen ere, putxera baten zozketa egingo dute. Zozketan parte hartzeko txartelak euro batean saltzen ari dira Pozokoetxeko saltokietan. Zozketa sari banetan egingo dute.
Lehiaketako oinarriak
- Erabili behar diren osagaiak: babarrun gorria, txorizoa, urdaia, odolostea eta saihets-hezurra
- Jendeari begira prestatuko da putxera, eta gasarekin, ikatzarekin edo egurrarekin egosi ahal izango da
- Putxerak Solobarriako karpan egin behar dira eta lurzorua estali beharko da
- Babarrunak 13:00etatik 14:00etara bitartean aurkeztu behar dira
- Putxera ez da txingarrekin aurkeztu behar
- Epaimahaiaren erabakia apelaezina da
Egunero Abenduaren 3an bizi nahi dutela aldarrikatuko dute Zaratamon
Euskal Baliabideen txokoa sortu dute Zaratamoko familientzat
Egun osoko egitaraua prestatu dute Zeberion Euskararen Nazioarteko Egunaren harira
Argazkiak / Hego Uribeko pentsionistek bat egin dute Gasteizen egin duten manifestazioarekin
Argazkiak / Esaera zaharrak, Irulegiko eskua eta bertsoak hizpide izan dituzte Galdakaoko Berbalagun jaian
Argazkiak / Berbalagun jaiak jolasean jarri ditu Basauriko euskara hiztunak
Bideoa / Leyre Rodriguez gogoratu dute Arrigorriagan, indarkeria matxistaren azken biktima herrian
Argazkiak / Dozenaka lagun batu dira Galdakaon Azaroaren 25eko elkarretaratzean